Markus 8 - Muna Southern Dialect

Yesus nepakande mie dapefato hewu 8:1-10

¹ Miina naomponaa pada anaꞌa nandoo toha mie bhahi dopofoꞌo-foꞌonu. Mbaꞌinomo miina dakoꞌotia, Yesus nosaliꞌimo anaguhuꞌino maka nopugau ambano,

² “Nobhelaanda sepaliꞌa laloku mie bhahi ini. Tolu oleomo doangkafi kanau, miinamo dakoꞌotia.

³ Ane atumududa dasumuliꞌao kulino handado, dakumamposola we sala. Kapaꞌamo nandoo maiꞌaono we kodoꞌono.”

⁴ Dotobhoosimo anaguhuꞌino ambado, “Ne kalinoꞌa aini ne amai daeꞌawa gahaꞌa roti so daomaa mie kabhahi peda ini?”

⁵ Yesus nofeenadamo, “Tafee onu gahaꞌa roti ndumandooꞌano?” Ambado, “Tafitu onu.”

⁶ Pada aitu Yesus notudumo mie bhahi maitu daengkoha ne wite. Noalamo roti fitu onuno naꞌa, nefoampe katumpuno lalo ne Lahataꞌala, maka nobhebhehae. Roti anaꞌa nowaꞌandae anaguhuꞌino dadumawu-dawuandae mie bhahi, lasao dodawu-dawue.

⁷ Nandoo dua kenta mohobuꞌi seendai. Yesus nefoampe toha katumpuno lalo maka kenta amaitu dodawu-dawuandae dua mie bhahi.

⁸ Mie bhahi dohumaa ampa doweꞌi. Pada dohumaa, roti kabhilaꞌando dotawunaane, nopono fitu kalangka.

⁹ Kabhahindo momaano dapefato hewu. Pada peda naꞌa Yesus notududamo dasumuli.

¹⁰ Anoa bhe anaguhuꞌino lasao dosawi ne bhangka maka dokala we kadieno Dalmanuta.

Miendo Farisi desalo tanda timenteꞌaono ne Yesus 8:11-13

¹¹ Domaimo miendo Farisi dopuga-pugau bhe Yesus, deꞌondofi tingku damoꞌalae. Desalomo naehabuanda giu timenteꞌaono so katandaino putae Anoa ini nomaiꞌao te surugaa.

¹² Pada nokaꞌuu we lalono, Yesus notobhoosidamo ambano, “Noafa gahaꞌa mie dhamani aini desaloꞌao tanda timenteꞌaono? Amohatokoomu, paise! Pae sepaliꞌa aehabuanda tanda kamesalondo.”

¹³ Nopalusi anaꞌa nohunsadamo, nosawi toha ne bhangka maka nopolimba we sewetano.

Podiundo miendo Farisi bhe kolaki Herodes doposandahaane bhe ragi kaefoꞌendeꞌa roti 8:14-21

¹⁴ Anaguhuꞌino Yesus dolimpu daewowoꞌo roti, mpahinomo seꞌonu we bhangka.

¹⁵ Yesus nofodhagadamo ambano, “Posiꞌondoomu ne ragi kaefoꞌendeꞌa rotindo miendo Farisi bhe ragino kolaki Herodes.”

¹⁶ Anaguhuꞌino detula-tulamo sapada-pada andoa ambado, “Kapugauꞌano peda naꞌa mbaꞌinomo miina bhe rotintoomua.”

¹⁷ Gahaꞌa Yesus nopandeꞌaane dua nepuga-pugauꞌaondo maitu, dadiꞌanomo nofeenadamo ambano, “Noafa gahaꞌa pugauꞌaoꞌomu miina bhe rotia? Miinaꞌo mandeꞌaaneomua gahaꞌa? Miinaꞌo dua lumosangieꞌomua? Ingka notosungku sepaliꞌa fekihimiu!

¹⁸ Ingka bhe matamiu, noafa gahaꞌa miina fowohaꞌaoꞌomu? Ingka bhe tingalamiu, noafa gahaꞌa miina fofetingkeꞌaoꞌomu? Molimpuꞌaanemoomu gahaꞌa,

¹⁹ aebhebheha lima onu roti mbali dohumaa mie dolima hewu. Fee kalangka gahaꞌa kabhilaꞌandoa netawunaomiu?” Dotobhoosimo ambado, “Ompulu haa kalangka.”

²⁰ “Ne oleono aebhebheha fitu onu roti mbali dohumaa mie dofato hewu, fee kalangka gahaꞌa kabhilaꞌando netawunaomiu?” Ambado, “Fitu kalangka.”

²¹ Pada anaꞌa Yesus nopugaumo toha ambano, “Peda ae? Miinaꞌo dua lumosangieꞌomu gahaꞌa?”

Yesus nefekaꞌosa kabunto we Betsaida 8:22-26

²² Yesus bhe anaguhuꞌino dohatomo we Betsaida. Ne itu deowaane seemie kabunto maka desalo namedampae.

²³ Yesus nointaha limano kabunto maitu maka notonda-tondae, noowae we simbalino liwu. Pada aitu nopuntohimo matano maka notei limano te wawono bhe nofeenae ambano, “Koniwohamo?”

²⁴ Mie anaꞌa noꞌondomo te wise maka nopugau ambano, “Uumbe, awohamo mie dekala-kala, tamaka kabeangaꞌida puꞌuno sau.”

²⁵ Yesus nofedampa toha matano mie aitu, maka matano notilengka, netaamo kofowohanoa. Sabhaha newohano nentaleamo bhe notindamo.

²⁶ Pada anaꞌa Yesus notuduemo nasumuli se lambuno tamaka nofohatoe ambano, “Koemo sulia se liwu saꞌituini!”

Petrus noꞌakui putae Yesus o Mesias 8:27-30

²⁷ Yesus bhe anaguhuꞌino dokala we liwu-liwu we kadieno Kaisarea Filipi. We laano sala, Yesus nofeenadamo ambano, “O mie dokona kanau laꞌae gahaꞌa Idi inia?”

²⁸ Dotobhoosimo ambado, “Nandoo kumonako Yohanes Fokadiuno, nandoo dua kumonako Elia, sigaꞌa dokonako dua seemie anabii.”

²⁹ Yesus nofeenadamo dua ambano, “Ane hintimiu, kona kanauꞌomu laꞌae?” Notobhoosimo Petrus, ambano, “Hintu ini Mesias, Omputo Fosalamatino!”

³⁰ Tamaka Yesus noꞌeleꞌaanda sepaliꞌa daekapuna ne mie sigaoꞌano laꞌae Anoa maitu.

Yesus nofofohatoꞌao kakadee-dee so nenamisino bhe so kamateꞌano 8:31-38

³¹ Nopalusi anaꞌa Yesus notandamo nofohato anaguhuꞌino ambano, “Anano Manusia - Idimo ini - tetewei nabhahi naenamisi kakadee-dee. Anoa dabansie kamu-kamungkulaꞌi, neangkaꞌindo imamu bhe pande-pande Kitabi. Damongkoe, tamaka ne katolu oleono nadumadimo toha.”

³² Yesus nofohatoda mentalea-mentalea, tamaka Petrus nohelae ne sohihino maka nofeꞌalae.

³³ Yesus nodoliki anaguhuꞌino maka nofeꞌala Petrus ambano, “Gampi seetani! Nefekihimu itu suano nefekihino Lahataꞌala, tamaka nefekihino manusia.”

³⁴ Pada aitu Yesus nosaliꞌimo mie bhahi bhe anaguhuꞌino maka nopugau ambano, “Ane dopoindalo damangkafi kanau, tetewei dahumunsa kapoindalondo wutondo. Mada anaꞌa datumongku sau salipundo ⸤ maꞌanano doꞌunda mahingga damate⸥ maka damangkafi kanau.

³⁵ Kapaꞌamo laꞌae mongaheno namate, tetewei namate; tamaka laꞌae mateno mbaꞌinomo noangkafi Idi bhe Bhihita Metaa, anoamo itu so dumadino.

³⁶ O ae fahalaano seemie manusia naeꞌawa kosasawiꞌae kahangkaeano dhunia ini, gahaꞌa inawano nabinasa?

³⁷ Naembali bhahaa o inawa maitu dalumoliane kahangkaea?

³⁸ Ane doambano doangkafi kanau bhahaꞌi doambano doangkafi kafoinaꞌuku ne olotando mie modai bhe mie kodhosa dhamani aini, Anano Manusia - Idimo ini - naoambanoane dua mie aitu ane namai weo kakalabhiano Amano, dalumibu-libue malaꞌekati mongkilono.”