Markus 7 - Muna Southern Dialect

Pahintano Lahataꞌala bhe adhatindo Yahudi 7:1-13

¹ Sepaku miendo Farisi bhe pande-pande Kitabi maiꞌaono we Yerusalem domai dopoꞌawaꞌao Yesus.

² Gahaꞌa dowohamo seemie hodua anaguhuꞌino tadohumaamo mahingga limando miina naongkilo. Maꞌanano miina daewanua ⸤ peda atorano agamando⸥ .

³ Kapaꞌamo miendo Farisi, pedamo dua miendo Yahudi sigaoꞌano, miina daomaaꞌa ane miinaꞌo daewanu kadeki ⸤ peda atorano agamando⸥ . Andoa dofintahaki sepaliꞌa adhatindo kamungkulaꞌindo.

⁴ Ane dosuli domaiꞌao we daoa, miinaꞌo kadeki naembali dohumaa, simbali padamo dofekanggela wutondo peda atorano agamando. Nobhahi dua adhati sigaoꞌano nefintahakindo, peda ibahano deꞌomesi kampohoꞌuꞌa, kampomaaꞌa bhe sabhaha katoka maiꞌaono ne tambaga.

⁵ Dadiꞌanomo dofeenamo ne Yesus, ambado, “Noafa gahaꞌa anaguhuꞌimu miina damangkafiꞌao adhatindo kamungkulaꞌintoomu? Ingka tadohumaamo, limando miina naongkilo.”

⁶ Yesus notobhoosidamo ambano, “Nokotuꞌumo pugauno anabii Yesaya nopulaoꞌao hintimiu ini, mie mehaaꞌulano! Kapaꞌamo nandoo tibuhino weo Kitabino peda aini, ‘Mie andoa ini dosombai kanau kaowu ne wiwindo, tamaka totono lalondo nokodoꞌo bhe Idi.

⁷ Miina nakoꞌuluꞌaa dosombai kanau, mbaꞌinomo dofofoinaꞌuao pahintano manusia.’

⁸ Pahintano Lahataꞌala miinamo moheruaneomu, maka tafosibhalaomu adhatindo manusia.”

⁹ Ambano toha Yesus, “Ingka kapandemiu, hunsaeꞌomu pahintano Lahataꞌala, so namatangkaꞌao adhatimiu.

¹⁰ Kapaꞌamo nandoo pahintano anabii Musa, ‘Fosibhalae inamu bhe amamu. Mie meꞌawutino inano bhe amano tabeano damekamatee.’

¹¹ Tamaka hintimiu fofoinaꞌuomu peda aini, ‘Ane o mie nopugau ne inano bhe amano, ‘Kanandooku so atumanggoꞌao hintimiu nembalimo kapopanga so Lahataꞌala’,

¹² maka mie aitu paemo naoafaa ane pae natumulumi inano bhe amano.’

¹³ Ane peda anaꞌa ingka songkoemoomu bhoasaono Lahataꞌala, songkoaneomu adhati nefintahakimiu itu. Nobhahi giu pedando itu nehabumiu.”

O giu fofekaharamuno 7:14-23

¹⁴ Pada anaꞌa Yesus nosaliꞌimo toha mie bhahi maka nopugau ambano, “Kosasawimiu, fetingkeeꞌomu pugauku ini bhe hunsaeꞌomu weo totono lalomiu!

¹⁵ O ae maka mesuaꞌano we lalondo manusia miina nafofekaharamua, tamaka o ae lumimbaꞌano maiꞌaono we lalondo manusia, aituꞌaemo fofekaharamunoa.

¹⁶ [Ane dokotingala, tabeano dametingke.]”

¹⁷ Nopesua kaowu weo lambu bhe nopogaati bhe mie bhahi, anaguhuꞌino dofeenaꞌaomo maꞌanano kapalenda saꞌituini.

¹⁸ Yesus notobhoosidamo ambano, “Gahaꞌa, hintimiu ini miina dua lumosangieꞌomua? Miina mandeꞌaaneomua gahaꞌa oti mesuaꞌano we lalondo manusia miina nafofekaharamua,

¹⁹ mbaꞌinomo miina namesuaꞌa weo totono lalo, tamaka nekansuhu weo handado maka doꞌohoe toha we dhamba.” Pugauno Yesus naꞌa nokomaꞌanaꞌao sabhaha oti nehumaa nembali dohumaaꞌea.

²⁰ Ambano toha, “O ae lumimbaꞌano nomaiꞌao we lalondo manusia, aituꞌaemo fofekaharamunoa.

²¹ Kapaꞌamo nomaiꞌao weo totono lalondo manusia nolimba sabhaha fekihi modai peda dopokawite-wite, dosibu, dofopongko,

²² domonsule, kakadau-dau, isikadhi modai, kabhohe-bhoheꞌi, nafusuu modai, kakoulano lalo, kaꞌumbu ne Lahataꞌala, kalangkeno diu bhe katuꞌano fotu.

²³ Kosasawiꞌae podiu modai ini nomaiꞌao we totono lalo, mekaharamunomo manusia.”

Kaparasaeano seemie hobhine maiꞌaono we koliwuno 7:24-30

²⁴ Maka nomaiꞌao ne itu Yesus nohope we kadieno Tirus bhe Sidon. Sahatono nopesuamo ne seꞌonu lambu mbaꞌinomo nongahe hatono maitu damandeꞌaane miendo liwu, gahaꞌa miina sepaliꞌa natifebunia.

²⁵ Ne itu nandoo seemie hobhine, anano nopesuakie seetani. Anano ini o hobhine dua. Sanofetingke Yesus nohato, hobhine aitu lasao nokala nosudhu ne wiseno.

²⁶ Hobhine anaꞌa mieno Yunani maiꞌaono we kadieno Siro-Fenesia, ⸤ suano mieno Yahudi⸥ . Anoa nesalo mpuu ne Yesus so namolimbaꞌao seetani mesuakino anano maitu.

²⁷ Yesus tanopugau ambano, “Hunsaꞌanomo kadeki anaꞌi so momaano ampa daoweꞌi, kapaꞌamo pae namantasia o roti so anaꞌi damalae maka daꞌumohoane daꞌu.”

²⁸ Hobhine anaꞌa notobhoosimo ambano, “Anoamo naꞌa Waompu, ampamo kaowu o daꞌu we pandano medha ⸤ peda insaodi ini⸥ dohumaa dua kapondawundo anaꞌi.”

²⁹ Ambano toha Yesus ne hobhine aitu, “Bahangka pedamo anaꞌa pugaumua, sulimo! O seetani nolimbamo maiꞌao ne anamu.”

³⁰ Hobhine amaitu lasao nosuli se lambuno, nohatofi anano nandoo nendole-ndole ne kaodoꞌano. O seetani nolimbamo daanumo.

Yesus nefekaꞌosa seemie kapongke 7:31-37

³¹ Nopalusi anaꞌa Yesus nohunsamo kadieno Tirus noangka we Sidon nohope we teꞌino Galilea. Noangkai dua kadieno Dekapolis.

³² Ne itu deowaanemo seemie kapongke pakade nomahasai nopugau, maka desalo natumei limano te wawono.

³³ Yesus noowa kapongke naꞌa nopogaatiane bhe mie bhahi, maka nofopesua wunano limano ne kohaambaliꞌae tingalano mie aitu. Pada anaꞌa nekapehamo maka nofedampa lelano mie aitu.

³⁴ Yesus nototohanamo te lani, nofeeneimbusu maka nopugau ambano, “Efata ,” maꞌanano, “Tilengkaꞌo toha!”

³⁵ Tingalano mie aitu notilengkamo, katapuno lelano notilensemo bhe nelaamo pugauno.

³⁶ Yesus noꞌeleꞌaanda sepaliꞌa pae daekapunaa ne mie sigaoꞌano, tamaka dhulu noꞌeleꞌaanda, dhulu detula-tulaane.

³⁷ Mie metingkeno tadomente bhe dotonto. Ambado, “Pahasili, ingka sabhaha giu nofekataaꞌie. O kapongke nofofetingkeda, o bhohe nofekapandeda dopugau.”