Markus 5 - Muna Southern Dialect

Yesus nefolimba seetani nomaiꞌao ne mieno Gerasa 5:1-20

¹ Pada aitu Yesus bhe anaguhuꞌino dohatomo we sewetano, we kadieno Gerasa.

² Ne itu Yesus nosampumo nomaiꞌao ne bhangka. Sasampuno, nopoꞌawaanemo seemie nepesuakino seetani nomaiꞌao se tombuno liano kafokobuhuꞌa.

³ Mie amaitu neate weo lia kafokobuhuꞌa naꞌa. Miinamo damondoiꞌea datumapue, mahingga datumapuane hante.

⁴ Kapaꞌamo nentelamo dohantee bhe dolangkee, tamaka hanteno nobhotulie, langkeno nopuhokotie. Dadiꞌanomo miinamo bhe mondoiꞌe damotuhue.

⁵ Mentae mohondo nolili weo lia bhe te kabhawo poangka nopokakei-kei, uluno nopepekiane kontu.

⁶ Nowoha Yesus nandoo nokodoꞌo, notendehekiemo maka nosudhu bhe notaohao sombano.

⁷ Mie aitu nokei nofekabhala-bhala, “Yesus Anano Lahataꞌala kokuasano! O ae patudhumu ne idi ini? Weo neano Lahataꞌala, koise fodee-dee kanau!”

⁸ Kapugauꞌano peda anaꞌa mbaꞌinomo Yesus padamo nopugauane “Hei, hintu seetani! Limbaꞌo toha maiꞌao ne mie aini!”

⁹ Yesus nofeenaemo ambano, “Laꞌae gahaꞌa neamu?” Notobhoosimo ambano, “Neaku Legion, mbaꞌinomo insaodi ini tabhahi.”

¹⁰ Anoa nesalo mpuu ne Yesus ambano, “Koe tududa seetani ini dalumimba we simbalino liwu ini.”

¹¹ Miina nakodoꞌo bhe andoa maitu dobhahi sepaliꞌa wewi ⸤ kakanea⸥ tangasano doliwu te laano kabhawo.

¹² Maka seetani maitu desalomo ne Yesus ambado, “Tudu kainsami talumimba maiꞌao ne mie aini, taesahangkaꞌao te wewi tatu!”

¹³ Yesus noꞌundapida. Seetani naꞌa lasao dolimba domaiꞌao ne mie aitu maka dokala desahangka te gulumando wewi saꞌituini. Kabhahindo wewi aitu dapehaa hewu. Lasao dotende se wiwino pimpi, maka dololetimo wutondo weo teꞌi sampe dolomo.

¹⁴ Dhagaꞌino wewi ⸤ kakanea⸥ maitu dofileimo bhe defolele bhihita we kota bhe liwu-liwu momaꞌoꞌano. Mie metingkeno lasao dolimba daꞌumondo kumadhadhiano.

¹⁵ Dohato ne Yesus dowohamo mie nepesuakino seetani saꞌituini nengkoha-ngkoha ne itu. Mie aitu bhemo pakeano bhe nopandeꞌaomo lalono. Anoamo ini nepesuakino kantawundo seetani saꞌituini. Dadiꞌanomo mie humatono maitu doteꞌi.

¹⁶ Mie mohaꞌaono wuntano matano detula-tulaandamo kadhadhiando mie nepesuakino seetani bhe wewi saꞌituini.

¹⁷ Pada aitu gahaꞌa mieno liwu desalomo ne Yesus so napikihunsaꞌao liwundo.

¹⁸ Dadiꞌanomo Yesus nosawimo toha ne bhangka. Gahaꞌa mie nepesuakino seetani saꞌituini nesalo namangkafie.

¹⁹ Tamaka Yesus miina naꞌumundaꞌaanea, tanopugaumo ambano, “Sulimo we lambumu! Fohatoda saliwumu peda ae kabhalano kaasino Ompu ne hintu, nehabuangko giu pata mentela.”

²⁰ Mie amaitu nosulimo bhe nefolele bhihita we kadieno Dekapolis. Netula-tulaꞌaomo nehabuno Yesus ne wutono. Kosasawindo mie metingkeno dowolo domente.

Yesus nofodadi anano Yairus bhe nefekaꞌosa seemie hobhine 5:21-43

²¹ Sahatono we sewetano, o mie bhahi dosipumpumo toha dolibu-libu Yesus. Nandooꞌe we wiwino teꞌi,

²² gahaꞌa nohatomo seemie mandeꞌaono lambu kasambaheaꞌa weo liwu aitu, neano Yairus. Sanowoha Yesus, nolongkomo ne aꞌeno

²³ bhe nesalo mpuu ambano, “Anaku hobhine nosaohi sepaliꞌa sakino, ane naembali mai teiane limamu te wawono, noꞌosaꞌao, keana nomate.”

²⁴ Pada aitu Yesus dosikalaꞌamo bhe anoa. Mie bhahi dosipumpumo toha doangkafie bhe dopoꞌua-ua ne sohihino.

²⁵ Ne olotando mie bhahi maitu nandoo seemie hobhine mosakino, ompulu haa taꞌumo nomaiꞌie wulano miina bhe katiehea.

²⁶ Tanopadamo kanandoono nopoago ne sabhaha foagono, tamaka miina bhe kaoꞌosaꞌanoa, sakino tanodhulu kasaohi.

²⁷ Hobhine amaitu nobhahimo nofetingke bhihitano Yesus, dadiꞌanomo ne olotando mie bhahi maitu noꞌowatie nomaiꞌao we kundo.

²⁸ Weo fekihino, “Mahingga taꞌadumingku kaowu dhubano, aoꞌosamo.”

²⁹ Sanodingku dhubano maitu, notiehemo hea nolimba, nonamisi we lalono noꞌosamo.

³⁰ Yesus lasao nonamisi nandoo bhe kuasa lumimbaꞌano nomaiꞌao ne Anoa, maka nodoli ne mie bhahi bhe nopugau ambano, “Laꞌae gahaꞌa dumingkuno dhubaku ini?”

³¹ Dotobhoosimo anaguhuꞌino ambado, “Ingka wohae mie dopoꞌua-ua ne sohihimu, noafa dua feenaꞌao ‘Laꞌae dumingku kanau?’ ”

³² Tamaka Yesus nofolili matano noꞌondofi laꞌae dumingkue.

³³ Nopandeꞌaane kaowu noꞌosamo, hobhine aitu nofotiumba wutono, tamaka nohengkue kateꞌino. Notaohaomo sombano ne wiseno Yesus maka netula-tulaꞌao kosasawiꞌae kumadhadhiaꞌano ne uluno.

³⁴ Ambano Yesus ne hobhine aitu, “Waꞌina, hampano kaparasaeamu ne Idi, moꞌosamo. Sulimo, netaamo namisimu, moꞌosamo kansuhu itua.”

³⁵ Tangasano nopugau, dohatomo katudu domaiꞌao we lambuno Yairus ambado, “Nomatemo anamu, noafa nandoo dua damekasabhaꞌao Guru?”

³⁶ Yesus miina naoheruane pugaundo mie maitu, maka ambano ne Yairus, “Koe tikendaa, taparasaeamo ne Idi!”

³⁷ Yesus nopansuhumo, tamaka mie bhahi noꞌeleꞌaanda damangkafie, mpahinomo Petrus, Yakobus bhe Yohanes, kakutaꞌano Yakobus.

³⁸ Dohato se lambuno Yairus, Yesus nowohamo mie bhahi bhe nofetingke dohobho, doꞌae bhe dekaꞌulei ampa kabhalano suahando.

³⁹ Dopesua kaowu weo lambu, nopugaumo ne mie maitu, “Noafa gahaꞌa mohobho bhe mekaꞌuleiꞌaoꞌomu? Ingka anaꞌi aini miina namatea, noodo kaowu.”

⁴⁰ Dofetingke peda maitu andoa tadofuta-futaaꞌi. Tamaka Yesus notududa dalumimba we simbali maka noowa kamungkulano anaꞌi maitu bhe kototolundo anaguhuno dopesua weo boloku.

⁴¹ Dohato weo bolokuno anaꞌi naꞌa, Yesus nointahamo limano bhe nopugau ambano, “Talita kum,” maꞌanano, “Anaku, wanuꞌo toha!”

⁴² Anaꞌi aitu lasao nowanu maka nekala-kala. Umuhuno ompulu haa taꞌumo. Mie mohano kadhadhia aitu nopuli mentendo.

⁴³ Tamaka Yesus noꞌeleꞌaanda sepaliꞌa daetula-tulaꞌao kadhadhia aitu mahingga ne laꞌae. Pada anaꞌa Yesus notududamo damakande anaꞌi aitu.