Markus 4 - Muna Southern Dialect

Kapalendano meꞌewino wine 4:1-9

¹ Yesus nofofoinaꞌu toha we wiwino teꞌino Galilea. Dobhahi sepaliꞌa humatono dolibu-libue. Dadiꞌanomo, nosawimo ne seꞌonu bhangka ⸤ melanto-lantono ne itu⸥ maka nengkoha, tamaka mie bhahi deehe-ehe te wite.

² Nobhahi kafoinaꞌuno nepakeanda kapalenda. Ambano peda aini.

³ “Soba fetingkeomu! Nandoo seemie mekaampono nokala neꞌewi wine.

⁴ Tangasano neꞌewi, nandoo wine mondawuꞌano ne kaangkaꞌa. Gahaꞌa dohatomo kaꞌuhi lumola, dopadae dohumaaꞌe.

⁵ Nandoo dua mondawuꞌano ne kamoꞌali, witeno miina naokapaa. Wine aitu nopikitumbu, mbaꞌinomo nonifi witeno.

⁶ Tamaka hato nopana oleo, tumbuno noleleumo, lasao nomate, kapaꞌamo pahakano miina nakumamaa.

⁷ Nandoo dua wine mondawuꞌano weo kahoku kokihi. Kahoku kokihi aitu nodhulu kabhala maka noꞌontiꞌi kantisa anaꞌa sampe miina nakobhakea, tanomate.

⁸ Tamaka nandoo dua mondawuꞌano ne wite menowu. Nokesa endeno, maka hasilino nobhahi sepaliꞌa. Nandoo tolu fulu onuno sewili, nandoo nomo fulu, nandoo dua moꞌono onu.”

⁹ Ambano toha, “Ane dokotingala, beano dametingke.”

Tingkuno Yesus nepake kapalenda 4:10-12

¹⁰ Tangasano Yesus tanomoisa, domaimo mie mangkafie bhe anaguhuꞌino ompulu hoduano, dofeenaꞌao maꞌanano kapalenda saꞌituini.

¹¹ Yesus notobhoosida ambano, “Hintimiu nowaꞌangkoomu dawua Lahataꞌala pandeꞌaanemoomu rahasiano Kafopahintaꞌano. Tamaka mie sigaoꞌano aepakeanda kapalenda,

¹² neanomo ‘mahingga daꞌumondo-ondoe, paise damohae; mahingga dametingke paise dalumosangiea. Kanandooꞌano peda anaꞌa keana dodoli ne Lahataꞌala, keana dua noꞌamponida.’ ”

Maꞌanano kapalenda meꞌewino wine 4:13-20

¹³ Yesus nopugaumo toha, “Miinaꞌo mandeꞌaaneomua gahaꞌa maꞌanano kapalenda saꞌituinia? Ane peda anaꞌa, nada amai gahaꞌa melosangiomu kapalenda sigaoꞌano?

¹⁴ Meꞌewino wine naꞌa, maꞌanano o mie mefoleleno bhoasaono Lahataꞌala.

¹⁵ O wine mondawuꞌano ne kaangkaꞌa, maꞌanano mie metingkeno bhoasaono Lahataꞌala maitu. Tamaka kaneꞌo pada dofetingkee, nomaimo Kafeompuꞌando seetani, lasao noala bhoasao kaneꞌo neꞌewi weo totono lalondo maitu.

¹⁶ Wine mondawuꞌano ne kamoꞌali, maꞌanano mie metingkeno bhoasaono Lahataꞌala, lasao dotahimae bhe doꞌiaꞌane.

¹⁷ Ampamo kaowu bhoasao aitu miina nakopahakaa weo totono lalondo, sampe miina natumahaa. Sadeꞌawa kasabha bhahaꞌi kakadee-dee mbaꞌinomo doangkafi bhoasao aitu, lasao dohunsae kaparasaeando.

¹⁸ Wine mondawuꞌano weo kahoku kokihi, maꞌanano mie metingkeno bhoasaono Lahataꞌala.

¹⁹ Tamaka nobhahi dofekihi so kadadiꞌando, nobhohe-bhoheꞌida dua kahangkaeano dhunia, pakade nobhahi kapoindalondo sigaoꞌano. Kosasawiꞌae maitu nopesua weo totono lalondo, noꞌontiꞌi bhoasaono Lahataꞌala, sampe miina nakohasilia.

²⁰ Maka o wine mondawuꞌano ne wite menowu, maꞌanano mie metingkeno bhoasaono Lahataꞌala bhe dotahimae weo totono lalondo, sampe nokohasili. Nandoo tolu fulu, nandoo nomo fulu, sampe nandoo dua moꞌono lentuꞌa hasilino.”

Kapalendano kantalea 4:21-25

²¹ Pada anaꞌa Yesus nofeenamo ambano, “Pada wohaomu bhahaa mesulano kantalea maka dosongkowiane kaiꞌi bhahaꞌi dohunsae we pandano kaodoꞌa? Ingka o kantalea tetewei dohunsae te melangkeꞌano.

²² Kapaꞌamo kosasawiꞌae tifebuniꞌano sanea damotiumbae; sabhaha rahasia damekantaleaꞌie.

²³ Dadiꞌanomo, ane dokotingala, beano dametingke.”

²⁴ Yesus notudumi toha pugauno ambano, “Tandaiꞌeomu nefetingkemiu ini! Ampa kawaꞌaoꞌamu ne mie bhaimu, aitu dua so neꞌawamu maiꞌao ne Lahataꞌala, tadua natumubhahiangkomo.

²⁵ Kapaꞌamo mie kokanandoono datumubhahiane, tamaka pata kokanandoono, o ae maka dua kanandoono damalae.”

Kapalendano tumbuno wine 4:26-29

²⁶ Ambano toha Yesus, “Kafopahintaꞌano Lahataꞌala naembali dapototoane bhe mie meꞌewino wine te kaampono.

²⁷ Nohondo oleo giagi tanoodomo, nomentaea tanowanumo. O wine neꞌewino maitu tanodhampakamo, maka tanodhulu-dhulumo kabhala. Peda ae noꞌende miina namandeꞌaane.

²⁸ O kantisa tanotumbuꞌaomo wutono maiꞌao ne wite; kabhao-bhaono laano, pada naꞌa kunsalono maka onuno.

²⁹ Pada aitu nokuni kaowu, dotobheemo mbaꞌinomo nohatomo metobheꞌa.”

Kapalendano onuno sau wonoita 4:30-34

³⁰ Yesus nopugaumo toha ambano, “Kafopahintaꞌano Lahataꞌala maitu dapototoane bhe ae bhahaa? Damalendaane ae bhahaa so metaaꞌanoa?

³¹ Kafopahintaꞌano Lahataꞌala tapedamo onuno sau wonoita seꞌonu nehoo ne wite. Onuno wonoita ini wine foliunomo kahobu ne dhunia ini.

³² Tamaka ane dohooꞌe, noꞌende nembali kantisa foliuno kabhala. Kabhalaꞌino haꞌano, sampe kaoluno nembali dofekaufeane kaꞌuhi lumola.”

³³ Nobhahi kapalenda medando saꞌituini nepakeno Yesus weo kafoinaꞌuno, ampa hatoꞌano fekihindo mie bhahi.

³⁴ Dadiꞌanomo ane nefoinaꞌu mie bhahi, sadhia nepalendaanda. Tamaka ane tanomoisa bhe anaguhuꞌino, kosasawiꞌae nofohatoandae bhe maꞌanano.

Yesus nefoonto kawea moꞌosa 4:35-41

³⁵ Ne oleo anaꞌa, nepanda kaowu oleo, Yesus nopugaumo ne anaguhuꞌino, “Maimo dopolimbaanaomu we sewetano.”

³⁶ Dadiꞌanomo anaguhuꞌino dohunsamo mie bhahi te wite, dosawimo ne bhangka kaengkoha-ngkohaꞌano Yesus saꞌituini, maka dobhose. Nandoo dua bhangka sigaoꞌano mangkafida.

³⁷ Miina naomponaa dobhose, gahaꞌa nomaimo kawea moꞌosa. Bhangkando nohambi-hambitaanemo ewo, sampe noiꞌi, nomaꞌo naopono.

³⁸ Yesus nandoo noodo we wana, nepake kanduula. Anaguhuꞌino dofowanue ambado, “Guru, nada amai inia? Pae moheruane gahaꞌa dabinasaa?”

³⁹ Yesus nowanumo, maka nowambaki kawea maitu bhe nopugau ne oeno teꞌi, “Koe mohobhoa! Feontoꞌo toha!” Kawea lasao nofeonto, oeno teꞌi suli nolinto.

⁴⁰ Pada aitu nopugaumo ne anaguhuꞌino, “Noafa moteꞌiꞌaoꞌomu? Miinaꞌo marasaea kanauꞌomu gahaꞌa?”

⁴¹ Maka andoa doteꞌi sepaliꞌa bhe dopugau sapada-pada andoa ambado “Laꞌae bhahaa anoa ini? Mahingga o kawea bhe teꞌi doangkafi pahintano!”