Markus 3 - Muna Southern Dialect

Yesus nefekaꞌosa mie ne oleono Sabat 3:1-6

¹ Palusi anaꞌa Yesus nopesuamo toha weo lambu kasambaheaꞌa. Ne itu nandoo seemie nokepe limano sembali.

² Nandoo dua mie moti-motindano Yesus, bhahaꞌi kaowu mie amaitu namekaꞌosae dua ne oleono Sabat; patudhundo damoꞌalae.

³ Yesus nopugaumo ne mie mokepeno lima maitu ambano, “Mai, meehe-ehe te wise ini!”

⁴ Pada aitu Yesus nofeenadamo ambano, “Weo tubhono agamantoomu nembali dehabu ae gahaꞌa ne oleono Sabat? Habu metaa kaa habu modai? Dafofodadi kaa dafopongko?” Tamaka andoa maitu miina dakodiua.

⁵ Yesus noꞌamaha poowa nofolilianda matano, tamaka nobhelaanda dua lalono hampano katuꞌano fotundo. Pada aitu nopugaumo ne kepe saꞌituini ambano, “Fonsoho limamu!” Mie aitu nofonsoho limano, gahaꞌa lasao noꞌosa.

⁶ Pada anaꞌa miendo Farisi maitu dolimbamo, lasao dokala dopugau-gau bhe mieno kolaki Herodes so damongkoꞌao Yesus.

Dobhahi mie nefekaꞌosano Yesus 3:7-12

⁷ Yesus bhe anaguhuꞌino dofogaati wutondo we wiwino teꞌino Galilea. Dobhahi sepaliꞌa mieno Galilea mangkafino Yesus. Dobhahi dua maiꞌaono we kadieno Yudea,

⁸ maiꞌaono we Yerusalem, maiꞌaono we kadieno Idumea, maiꞌaono we sewetano umeleno Yordan, bhe maiꞌaono dua we kadieno Tirus bhe Sidon. Kahatoꞌando mie bhahi ini, mbaꞌinomo dofetingke sabhaha giu nehabuno Yesus.

⁹ Yesus notudumo anaguhuꞌino daefontaa-ntaaꞌane bhangka so kasawiꞌano, kapaꞌamo o mie dobhahi sepaliꞌa, bhahaa dodhumpuhaane.

¹⁰ Nobhahi sepaliꞌa nefekaꞌosa mie mosakino, sampe mie mosakino dopodhumpu-dhumpuhao domaꞌoti Yesus dakumadampaeꞌao.

¹¹ Taenomo mie nepesuakino seetani dowoha Anoa, dosudhu ne wiseno bhe dokei, “Hintumo Anano Lahataꞌala.”

¹² Tamaka Yesus noꞌeleꞌaanda sepaliꞌa seetani andoa naꞌa damohato mie sigaoꞌano, bhahaꞌi laꞌae Anoa maitu.

Yesus nepili doompulu hodua anaguhuꞌino 3:13-19

¹³ Pada anaꞌa Yesus nofonimo te kabhawo, maka nosaliꞌi mie so nepilino. Andoa naꞌa dokalamo se Anoa,

¹⁴ maka nefotantu doompulu hodua so pobhaiane. Andoa ini notududa daefolele Bhihita Metaa.

¹⁵ Yesus nowaꞌanda dua kuasa daefolimba seetani.

¹⁶ Neando anaguhu nepilino ompulu hoduano maitu: Simon, nokonae dua Petrus,

¹⁷ Yakobus, anano Zebedeus, bhe Yohanes kakutaꞌano Yakobus, andoa ini nokonada dua Boanerges, maꞌanano domansolumbu,

¹⁸ Andreas, Filipus, Bartolomeus, Matius, Tomas, Yakobus anano Alfeus, Tadeus, Simon miendo Zelot,

¹⁹ bhe Yudas Iskariot. Anoamo ini mowano Yesus ne limando kaewa.

Yesus dosangkatie nepake kuasano seetani 3:20-30

²⁰ Nopalusi anaꞌa Yesus nosulimo se lambu. Mie bhahi domaimo toha dopofoꞌo-foꞌonu, sampe Yesus bhe anaguhuꞌino miinamo datolala daomaa.

²¹ Dofetingke peda anaꞌa, domaimo bhahitieꞌino damalae, kapaꞌamo ambado, “Ingka nobheemo.”

²² Pande-pande Kitabi maiꞌaono we Yerusalem dopugaumo dua ambado, “Anoa ini nopesuakiemo Beelsebul, Kafeompuꞌando seetani. Dadiꞌanomo ane nefolimba seetani nepake kuasano Kafeompuꞌando seetani.”

²³ Yesus nosaliꞌimo mie bhahi maitu, maka nopugau nepakeanda kapalenda. Ambano, “Nameda amai gahaꞌa Kafeompuꞌando seetani naefolimba seetani?

²⁴ Ane mie neowano seemie omputo pae daseꞌise, liwu aitu pae natumahaa.

²⁵ Pedamo dua aitu, ane mie weo lambu seꞌonu pae daseꞌise, tamaka sadhia dapogiha-giha, polambu aitu pae natumahaa.

²⁶ Ane Kafeompuꞌando seetani namewangi wutono, o seetani dapoewa-ewangi, teteweimo kuasano seetani pae natumahaa, naosalimo.

²⁷ Pae naembali daepesuaki lambuno mie moꞌosa darumampasi arataano, ane pae datumapu kadeki kolambuno. Mada datumapue, makaneꞌo naembali darumampasi arataano.

²⁸ Amohatokoomu, kotu-kotuꞌu kosasawiꞌae dhosa bhe sabhaha kafekaꞌaebundo manusia, naembali natiꞌamponi.

²⁹ Tamaka ane dofekaꞌaebu Rohino Lahataꞌala, pae sepaliꞌa natiꞌamponia. Kapaꞌamo kafekaꞌaebu medando aitu, dhosa suhue dhamani.”

³⁰ Kapugauꞌano peda naꞌa mbaꞌinomo nandoo mugauno, “Anoa ini nopesuakie seetani.”

Inano bhe bhahitieꞌino Yesus 3:31-35

³¹ Pada anaꞌa dohatomo inano bhe bhahitieꞌino Yesus. Andoa deehe-ehe we simbalino lambu, maka detudu mie dalumoꞌoi Yesus.

³² Wakutuu anaꞌa dobhahi mie mengkoha-ngkohano dolibu-libue. Ambado mie maitu, “Guru, inamu bhe bhahitieꞌimu we simbalino lambu, doꞌondofiko.”

³³ Yesus tanotobhoosida ambano, “Laꞌae gahaꞌa inaku? Laꞌae bhahaa bhahitieꞌiku?”

³⁴ Nofolilimo matano ne mie lumibu-libue maitu maka nopugau, “Ainiꞌadamo inaku bhe bhahitieꞌiku.

³⁵ Laꞌae-laꞌae meangkano ne pahintano Lahataꞌala, anoamo itu bhahitieku moꞌane, bhahitieku hobhine, anoamo itu dua inaku.”