Markus 16 - Muna Southern Dialect

Kawanuꞌano Yesus nomaiꞌao ne mate 16:1-8

¹ Nopalusi oleono Sabat, Maria Magdalena, Salome bhe Maria inano Yakobus, dokalamo deꞌoli mina-mina. Patudhundo dakumala daminaki maeatino Yesus.

² Ne oleono Ahadhi samentaeno, oleo kabhao-bhaono weo ahadhi aitu, nofoni oleo dokalamo we kobuhu.

³ We laano sala tadopofee-feenamo ambado, “Laꞌae bhahaa so fotulumino dadumole kontu kasongkono kobuhu?” Kapaꞌamo kontu anaꞌa nobhala sepaliꞌa.

⁴ Dohato we kobuhu, gahaꞌa dowohamo kontu bhalano naꞌa notidolemo.

⁵ Nelaa dopesua weo liano kobuhu naꞌa, dowohamo seemie anaꞌi moꞌane nepake dhuba kapute, nengkoha-ngkoha humanda we suana. Andoa dokohedu sepaliꞌa.

⁶ Tamaka ambano mie naꞌa, “Koe moteꞌiomua! Apandeꞌaanemo ingka ondofiomu Yesus miendo Nasaret, tikantaino te sau salipu. Miinamo bhe Anoa ne ini, nowanumo! Ondoeꞌomu katifondoleꞌano ini!

⁷ Aitu sulimoomu, maka fohatodaomu anaguhuꞌino, fohatoeꞌomu dua bhe Petrus, putae Yesus nopaꞌindulukikoomu we Galilea. Ne watu mohaemoomu peda pugauno endefiꞌini ne hintimiu.”

⁸ Pada anaꞌa lasao dolimba maiꞌao weo liano kobuhu maka dofilei, mbaꞌinomo doteꞌi sepaliꞌa bhe noguguda. Kaꞌosano kateꞌindo, miina sepaliꞌa daetula-tula ne mie sigaoꞌano.

Yesus nobhahi pakuno nofotiwoha wutono ne anaguhuꞌino 16:9-18

⁹ [Nowanu kaowu, ne oleono Ahadhi kahangkowineno, kabhao-bhaonoꞌo Yesus nofotiwoha Wutono ne Maria Magdalena. Nomaiꞌao ne Maria ini, Yesus padamo nefolimba fitu bansa seetani.

¹⁰ Hobhine aitu lasao nokala nofohato sabhangkaꞌino Yesus. Andoa ini tangasano noguguhu lalondo bhe doꞌae.

¹¹ Wakutuuno dofetingke Yesus nodadi toha, pakade padamo nowohae Maria Magdalena, andoa miina damarasaea.

¹² Pada anaꞌa Yesus nofotiwoha dua Wutono ne anaguhuno dohodua, tangasano dokala we simbalino kota; ulano segaatiꞌa dua.

¹³ Kohoduando ini lasao dosuli dofohato sabhangkaꞌindo, tamaka miina dua damarasaeada.

¹⁴ Panda-pandano Yesus nofotiwoha Wutono ne anaguhuꞌino koompulu seemiendo, tangasano dohumaa. Nofeꞌalada mbaꞌinomo miina damarasaea, pakade notuꞌa fotundo sampe dongahe damarasaea ne mie mohae nopalusi kawanuꞌano.

¹⁵ Pada aitu Yesus nofohatodamo ambano, “Kalaomu ne amai liwu ne dhunia ini maka foleleomu Bhihita Metaa ne kosasawindo manusia!

¹⁶ Ane damarasaea bhe dakumadiuda, dasumalamati; tamaka ane pae damarasaea daeꞌawa kahukumu.

¹⁷ Mie marasaeano ne Idi naembali daehabu tanda tapa mentela: daefolimba seetani damake neaku; damande dua dapugauꞌao sabhaha wamba buꞌou.

¹⁸ Ane daeintaha ule bhahaꞌi daohoꞌu hasu, pae daeꞌawa balaa. Ane datumei limando te wawono mie mosaki, mosakino aitu naoꞌosa.”

Yesus notisangke te surugaa 16:19-20

¹⁹ Pada nopugau peda anaꞌa, Ompu Yesus notisangkemo te surugaa maka nengkoha ne suanano Lahataꞌala.

²⁰ Pada anaꞌa anaguhuꞌino dokalamo defolele Bhihita Metaa ne amai liwu ne dhunia ini. Ompu noposabhangkaanda kansuhu, bhihita nefolelendo nofekatangkaane tanda-tanda tapa mentela.]