Markus 15 - Muna Southern Dialect

Yesus ne wiseno Pilatus 15:1-15

¹ Nohaha kamentae neangkaꞌindo imamu, kamu-kamungkulaꞌi, pande-pande Kitabi bhe kosasawindo Sahano Agama noseꞌisemo fekihindo. Yesus dotapuemo maka doowae ne wiseno Pilatus.

² Pilatus nofeenae ambano, “Nokotuꞌu hintu inia omputo miendo Yahudi?” “Pedamo pugaumu naꞌa,” ambano Yesus.

³ Nobhahi sepaliꞌa kasangkati nesungkuꞌaondo neangkaꞌindo imamu naꞌa.

⁴ Pilatus nofeenaemo toha ambano, “Pae tumobhoosia gahaꞌa? Ingka fetingkee naꞌa kabhahino kasangkatindo ne hintu!”

⁵ Tamaka Yesus miina sepaliꞌa natumobhoosia, sampe Pilatus tanomente.

⁶ Kaneano ne hohaeaꞌa peda naꞌa Pilatus sadhia nefolimba seemie katohongku, ampa kamesalondo mie bhahi.

⁷ Ne naꞌa nandoo seemie koneaꞌano Barabas, notitohongku bhe sabhangkaꞌino mbaꞌinomo dehabu kahungga weo liwu doewangi pamarinta. Weo kahungga anaꞌa andoa dofopongko.

⁸ Dohato mie bhahi desalomo ne Pilatus so namangkafiꞌao kaneano maitu.

⁹ Pilatus notobhoosida ambano “Poindaloomu bhahaa amolimbaangkoomu omputomiu ini?”

¹⁰ Kapaꞌamo Pilatus nopandeꞌaane neangkaꞌindo imamu doowa Yesus se anoa hampano dokonduaꞌane lalo.

¹¹ Tamaka neangkaꞌindo imamu lasao dowudhu mie bhahi daesalo ne Pilatus namolimbaanda Barabas.

¹² Pilatus nofeenadamo toha ambano, “Ane peda naꞌa amafaꞌiane mie nekonamiu omputo miendo Yahudi ini?”

¹³ Mie bhahi dokei ambado, “Dakumantaiꞌe te sau salipu!”

¹⁴ “Podiu modai ae gahaꞌa nehabunoa?” ambano toha Pilatus. Tanodhulu kaꞌosa dokei ambado, “Dakumantaiꞌe te sau salipu!”

¹⁵ Panda-pandano Pilatus nofolimbamo Barabas doꞌiaꞌao kaowu mie bhahi maitu. Pada aitu Yesus dohambisianemo habuta maka nowaꞌandae dakumantaiꞌe te sau salipu

Yesus doele-elee 15:16-20

¹⁶ Pada peda naꞌa, tantara doowamo Yesus we kamali kaebhotusiꞌa parakara. Maka kosasawindo tantara dosaliꞌida dapofoꞌo-foꞌonu.

¹⁷ Yesus dofopakeane dhuba wungo, pada aitu dekinianemo songkono omputo maiꞌao ne haꞌano sau kokihi maka dofokanae ne fotuno.

¹⁸ Pada anaꞌa dopahasomba-sombaiꞌemo ambado, “Somba waompu, Omputo miendo Yahudi!”

¹⁹ Fotuno dohambisiane wulu, dokapehasie bhe dosudhu ne wiseno dotaohao sombado.

²⁰ Pada doele-elee peda naꞌa, dhuba wungo saꞌituini dolembiemo maka dofopakeane toha pakeano wutono. Nopalusi anaꞌa dofolimbaemo, dakumalamo dakumantaiꞌe te sau salipu.

Yesus dokantaiꞌe te sau salipu 15:21-32

²¹ We laano sala nandoo seemie lumalono koneaꞌano Simon. Simon ini miendo Kirene, amando Aleksander bhe Rufus. Anoa ini kaneꞌo nosuli nomaiꞌao we simbalino kota, lasao dofosuhue natumongku sau salipuno Yesus.

²² Yesus doowae te kabhawo nekonando Golgota; maꞌanano kaꞌuada.

²³ Dohato ne itu dowaꞌanemo angguru dosaloane kaago nekonando mur, tamaka Yesus nongahe naohoꞌu.

²⁴ Pada anaꞌa dokantaiꞌemo te sau salipu. Pakeano dopodawu-dawue; mbali notipandeꞌaoane dawuno see-seemie, dopodaduane.

²⁵ Tempo katisalipuꞌano naꞌa hambi siua mata hangkowine.

²⁶ Tingkuno katisalipuꞌano dobuhie maka dofopikae te salipuno. Kabuhino peda ini, “ Omputo miendo Yahudi”.

²⁷ Nandoo dua dohodua mie modai nekantaindo te sau salipu, seemie ne kemano, seemie ne suanano.

²⁸ [Maka nokoꞌulamo tibuhino weo Kitabino anabii putae “Anoa natilentu mie modai.”]

²⁹ Mie lumalono ne itu doꞌumbue bhe dofoule-ule fotundo ambado, “Alee, hintumo ini gahaꞌa so humunggano Lambuno Lahataꞌala maka ne katolu oleono moeheemo toha!

³⁰ Soba fosalamati wutomu, sampuꞌo toha maiꞌao te salipu itu!”

³¹ Pedamo dua aitu neangkaꞌindo imamu bhe pande-pande Kitabi doele-elee bhe dopugau sapada-pada andoa ambado, “Mie sigaoꞌano nofosalamatida, gahaꞌa itu wutono miina namooliea!

³² Naetaa Mesias, Omputo Israel Fosalamatino maitu, nasumampumo namaiꞌao te sau salipu, dowohaꞌao bhe doparasaeaꞌao.” Mahingga mie hoduano tisalipuno ne sohihino dowambakie dua.

Kamateꞌano Yesus 15:33-41

³³ Noꞌindotu oleo kosekadieꞌae naꞌa nohohondomo ampa hambi tolu mata.

³⁴ Hambi tolu mata, Yesus noloꞌoimo nofekandii-ndii ambano, “ Eloi, Eloi, lama sabaktani?” Maꞌanano, “Lahataꞌalaku, Lahataꞌalaku, noafa hunsa kanauꞌao?”

³⁵ Dofetingke peda naꞌa, seemie hodua mie meehe-eheno ne itu dopugaumo ambado, “Fetingke kaitaomu, noloꞌoi anabii Elia!”

³⁶ Seemie lasao nelondo kapa weo angguru mokolo. Kapa maitu noteiꞌe ne wulu maka nofefohoꞌutiane Yesus, poowa nopugau ambano, “Hunsaꞌaonomo! Soba daꞌumondo-ondoe bhahaꞌi kaowua namai Elia namosampue.”

³⁷ Pada aitu Yesus nokeiꞌaomo pandano nafasi maka nobhotu.

³⁸ Wakutuu anaꞌamo dua kai bhalano mbali kahondomi weo Lambuno Lahataꞌala nopobhensi nomaiꞌao te wawo ampa we panda.

³⁹ Neangkando tantara meehe-eheno te wiseno nowoha kaowu mateno Yesus peda maitu, nopugaumo ambano, “Kotu-kotuꞌu mie aini Anano Lahataꞌala!”

⁴⁰ Nandoo dua hobhineꞌi umondono we kodoꞌono. Ne olotando hobhineꞌi maitu, nandoo Maria Magdalena, Salome bhe Maria inando Yakobus mohangkuꞌano dadi bhe Yoses.

⁴¹ Andoa ini notanda we Galilea doangkafimo Yesus mbali umondofaono kafaraluuno. Ne itu dobhahi dua hobhine sigaoꞌano humatono we Yerusalem dopoowa-owa bhe Yesus.

Yesus dokobuhue 15:42-47

⁴² Oleo nohondomo. Oleo aitu kaefotokaꞌa oleono Sabat, mbaꞌinomo namentae matanomo.

⁴³ Seemie koneaꞌano Yusuf tanofekatangkamo lalono nokala nesalo maeatino Yesus ne Pilatus. Yusuf ini mieno Arimatea, seemie kamungkula tiangka, nopesua dua Sahano Agama. Anoa neantagi dua kahatoꞌano Kafopahintaꞌano Lahataꞌala.

⁴⁴ Pilatus nomente nofetingke Yesus nomatemo, lasao neloꞌoi neangkando tantara maka nofeenae bhahaꞌi nokotuꞌu Yesus nomatemo.

⁴⁵ Nofetingke kaowu bhihita kahatoꞌaono neangkando tantara maitu, Pilatus noꞌundaꞌaanemo maeatino Yesus namalae Yusuf.

⁴⁶ Pada aitu Yusuf neꞌolimo bhalatu moꞌalusu maka nofosampu maeatino Yesus maiꞌao te sau salipu. Pada anaꞌa nowaluanemo bhalatu saꞌituini maka nofopesuaꞌe weo kobuhu. Kobuhu anaꞌa dopatotae ne kabhawono kontu, ⸤ dohabue peda katuno lia⸥ . Mbali kasongkono wobhano lia naꞌa, nodoleane kontu bhalano.

⁴⁷ Katifondoleꞌano Yesus maitu, dowohae dua Maria Magdalena bhe Maria inano Yoses.