Markus 14 - Muna Southern Dialect

Dopokanagau so damongkoꞌao Yesus 14:1-2

¹ Hohaeaꞌano Paska bhe hohaeaꞌano Roti Pata Koragiꞌano tana haa oleo. Neangkaꞌindo imamu bhe pande-pande Kitabi dopokanagau deꞌondofi akala dahumako Yesus. Tamaka patudhundo pae damandeꞌaane mie bhahia, maka damongkoe.

² Dadiꞌanomo ambado, “Koise dohakoeꞌomu ne oleono hohaeaꞌa, bhahaa dohialele raꞌeati.”

Yesus nominakie seemie hobhine 14:3-9

³ Wakutuu anaꞌa Yesus tangasano nohumaa we lambuno Simon kokuli modaino ⸤ endefiꞌini⸥ , we liwuno Betania. Gahaꞌa tanosihatoꞌamo seemie hobhine. Hobhine anaꞌa newowoꞌo seewua butolo kani noponoꞌao mina-mina mowonduꞌano sepaliꞌa pakade noꞌali, dokonae minano warasituu. Wuꞌuno butolo naꞌa nokebhae, maka mina-minano nosungkae te fotuno Yesus.

⁴ Mie mohae nandoo umamahano, maka dopugau sapada-pada andoa ambado, “So ae gahaꞌa dopokadai-daianea mina-mina amaitu?

⁵ Ane damasoe, ingka nakolabhi tolu moꞌono woka pera, maka olino naꞌa naembali dadumawu-dawuandae mie mokae.” Dadiꞌanomo doꞌamahakimo hobhine anaꞌa.

⁶ Tamaka Yesus nopugaumo ambano, “Hunsaꞌanomo! Noafa gahaꞌa fekasabhaaneomu? Anoa ini nehabu kanau giu metaaꞌano.

⁷ Ingka o mie mokae sadhia deate bhe hintimiu, ane moindaloomu sadhia naembali tumulumidaomua. Tamaka Idi ini pae aeate kansuhua bhe hintimiu.

⁸ Hobhine aini nehabumo ampa nepoo-poolino. Mbadhaku ini nominakiemo wawo, somo katokano humato dakumobuhu kanau.

⁹ Amohatokoomu! Kotu-kotuꞌu ne amai maka dua so katifoleleꞌano Bhihita Metaa te dhunia ini, nehabuno hobhine aini sadhia daetula-tulaane dua, somo kafeꞌulaino.”

Isikadhi modaino Yudas 14:10-11

¹⁰ Pada aitu Yudas Iskariot nokalamo nopoꞌawaꞌao neangkaꞌindo imamu, patudhuno namowaanda Yesus. Yudas ini seemie maiꞌao ne anaguhuno ompulu hoduano.

¹¹ Kaꞌiando maka neangkaꞌindo imamu dofetingke peda naꞌa, lasao dopodhandi damaꞌane dhoi. Notanda ne naꞌa, Yudas neꞌondofi katolala metaa namowaanda Yesus.

Haroano Paska 14:12-21

¹² Nohatomo oleo katandaꞌano hohaeaꞌa Roti Pata Koragiꞌano. Ne oleo anaꞌa kaneando miendo Yahudi desumbele dhumba Paska. Dadiꞌanomo anaguhuꞌino Yesus dofeenamo ambado, “Guru, ne amai bhahaa gaomua taefotoka so dapoharoaꞌao Paska?”

¹³ Maka Yesus netudu dohodua anaguhuno, ambano “Kalaomu we kota, ne watu poꞌawaꞌaoꞌomu seemie bhe kasodano kaiꞌino. Angkafieꞌomu!

¹⁴ Namesua kaowu ne lambu, pugauꞌomu ne kolambuno putae, ‘O guru nofeenaꞌao bhahaꞌi boloku amai so napoharoaꞌao Paska bhe anaguhuꞌino?’

¹⁵ Anoa namosusuangkoomu boloku bhalano te wawo. Boloku anaꞌa nosangkamo katokanoa. Fotokaemoomu ne itu haroano Paskantoomu!”

¹⁶ Anaguhuno hoduano maitu dokalamo. Dohato we kota dopoꞌawaꞌaomo peda pugauno Yesus saꞌituini. Lasao defotoka haroano Paska.

¹⁷ Nohondo oleo, Yesus nohatomo bhe anaguhuꞌino ompulu hoduano.

¹⁸ Tangasano dengkoha-ngkoha dohumaa, Yesus nopugaumo ambano, “Amohatokoomu! Naseemie ne olotamiu momaano bhe Idi ini, namowa kanau ne limando kaewa.”

¹⁹ Dofetingke pugauno naꞌa, dosabhamo maka see-seemie dofeenaemo, “O idi bhahaa?”

²⁰ Tanotobhoosida ambano, “O mie anaꞌa seemie ne olotamiu ompulu hoduano ini. Metandano roti weo pihi poowa bhe Idi, anoamo itu.

²¹ Daanumo Anano Manusia - Idimo ini - tetewei namate peda tibuhino weo Kitabino anabii, tamaka so mowa kanau ne kaewa maitu natolau kadaino kolauno. Naetaa koemo nolentea te dhunia ini.”

Haroano Ompu 14:22-25

²² Tangasano dohumaa maitu, Yesus nealamo roti maka nefoampe katumpuno lalo ne Lahataꞌala. Pada aitu roti naꞌa nokekebhaemo maka nowaꞌandae anaguhuꞌino poowa nopugau, “Alaeꞌomu maka humaaꞌeomu, mbadhakumo inia.”

²³ Pada anaꞌa nealamo kampohoꞌuꞌa, nefoampe toha katumpuno lalo maka nowaꞌandae anaguhuꞌino. Kosasawindo dofohoꞌu angguru ne kampohoꞌuꞌa aitu.

²⁴ Yesus nopugaumo toha ambano, “Heakumo inia. Hea aini damotuhue so mie bhahi, somo mekatangkano podhandino Lahataꞌala bhe manusia.

²⁵ Amohatokoomu! Kotu-kotuꞌu paemo aohoꞌu angguru ampa oleono aohoꞌu angguru buꞌou, weo Kafopahintaꞌano Lahataꞌala.”

Petrus nagumaga miina namandeꞌao Yesus 14:26-31

²⁶ Pada delagu-lagu dopudhi Lahataꞌala, dokalamo te kabhawono Zaitun.

²⁷ Yesus nofohatodamo ambano, “Kosasawimiu itu naohungga kaparasaeamiua sampe humunsa kanauꞌomu, kapaꞌamo nandoo tibuhino weo Kitabino anabii peda aini, ‘Dhagano dhumba amongkoe, maka gulumano dhumbano datigasa.’

²⁸ Tamaka amanu kaowu maiꞌao ne mate, amaꞌindulukikoomu we Galilea.”

²⁹ Ambano Petrus, “Mahingga kosasawindo ini naohungga kaparasaeandoa sampe dahumunsako, tamaka o idi paise.”

³⁰ Tamaka Yesus nofohatoe ambano, “Amohatoko! Kotu-kotuꞌu alo aini dua, paeꞌo nahaa paku nakumakuhua manu, natolu pakumo gumaga miina mandeꞌa kanaua.”

³¹ Sedhuluꞌa dua kakampuu-mpuuno lalono Petrus nopugau, “Mahingga amate bhe hintu, pae sepaliꞌa agumagaa.” Anaguhuꞌino sigaoꞌano sanea dua dopugau peda naꞌa.

Yesus nosambahea te kaendeano Getsemani 14:32-42

³² Yesus bhe anaguhuꞌino dohatomo te kaendea koneaꞌaono Getsemani. Nofohatomo anaguhuꞌino ambano, “Mengkoha-ngkohaomu ne ini, nandoo akumala asumambahea.”

³³ Petrus, Yakobus bhe Yohanes nosaliꞌida damangkafie. Notandamo ne itu nosabha sepaliꞌa bhe nokakenda-kenda handano.

³⁴ Ambano, “Nokompeaha sepaliꞌa laloku, kao-kaomo amatemo. Mengkoha-ngkohaomu ne ini, mekambotoomu bhe kodhagaomu!”

³⁵ Yesus nopansuhu te wise seendai maka nolongko ne wite bhe nosambahea. Nesalo ane naembali tempono kakadee-dee amaitu tanalumaloiꞌe.

³⁶ Ambano, “O Aba, Amaku, sanea membaliꞌano so Hintu. Fogampi kanau kampohoꞌuꞌa so kafohoꞌuꞌaku ini. Ampamo kaowu koise angkafi kapoindalokua, tamaka taꞌampamo kapoindalomu.”

³⁷ Pada anaꞌa nosulimo se anaguhuꞌino, gahaꞌa nohatofida doodomo. Nopugaumo ne Petrus ambano, “Simon, moodo gahaꞌa? Pae tumahamiea bhahaa mekamboto nasedhamua?

³⁸ Mekambotoomu bhe sambaheaꞌomu, keana nokantibhakoomu kasoba. Daanumo totono lalo neangka, tamaka o mbadha nonale.”

³⁹ Nofendua nokala maka nosambahea toha, nopototo bhe sambaheano saꞌituini.

⁴⁰ Hato nosuli gahaꞌa nohafotida doodomo toha, hampano dempaumo sepaliꞌa. Miinamo damandeꞌaanea damugauꞌao ae ne Yesus.

⁴¹ Tolu paku kaowu nosulikida, nopugaumo ambano, “Moodomoomu bhe fewulemoomu. Netaamo! Nohatomo tempono. Anano Manusia - Idimo ini - damowaemo ne limando mie kodhosa.

⁴² Ehemoomu, dokalaanaomu. O mie mowa kanau ne limando kaewa nomaꞌomo nahumato.”

Yesus dohakoe 14:43-52

⁴³ Tangasano Yesus nopugau, nohatomo Yudas, seemie maiꞌaono ne anaguhuno ompulu hoduano. Yudas maitu nohato nopoowa bhe mie bhahi metaguno kampue bhe kawangku. Mie bhahi naꞌa dotududa neangkaꞌindo imamu, pande-pande Kitabi bhe kamungkulaꞌi.

⁴⁴ Yudas padamo nofohatoanda tanda peda aini, “O mie so newonoku, anoamo itu. Hakomoomu, wowoꞌoeꞌomu tamaka fekataa dhaganieꞌomua.”

⁴⁵ Sahatono, Yudas nomaꞌotimo Yesus bhe nopugau ambano, “Guru!”, poowa nowonoe.

⁴⁶ Mie bhahi lasao dointaha Yesus maka dotapue.

⁴⁷ Nandoo seemie ⸤ anaguhuno⸥ nobuna kampueno maka notowe bhatuano Imamu Bhalano, nondawu bhe tingalano.

⁴⁸ Yesus nofeenadamo ambano, “Kona kanauꞌomu mie modai gahaꞌa? Noafa gahaꞌa tabeano metaguomu kampue bhe kawangku maka humako kanauꞌomu?

⁴⁹ Ingka seꞌo-seꞌoleo afofoinaꞌu weo Lambuno Lahataꞌala ne wisemiu, tamaka miina humako kanauꞌomu. Kapedaꞌano naꞌa somo nakoꞌulaꞌao tibuhino weo Kitabino anabii.”

⁵⁰ Pada aitu anaguhuꞌino dopuli dofilei, dohunsae tanomoisa.

⁵¹ Nandoo dua seemie anaꞌi moꞌane noangkafi Yesus. Pakeano tanewaweꞌimo setuwu kamoohu. Patudhundo anoa ini dahumakoe dua.

⁵² Gahaꞌa tanofosipuli pakeano naꞌa maka nofilei kalembi-lembi.

Yesus ne wiseno Sahano Agama 14:53-56

⁵³ Pada anaꞌa Yesus doowaemo we lambuno Imamu Bhalano. Kosasawindo neangkaꞌindo imamu, kamungkulaꞌi bhe pande-pande Kitabi dohompu ne itu.

⁵⁴ Petrus noangka-angka ngkodoꞌo Yesus, ampa nopesua weo kadeteno lambuno Imamu Bhalano. Ne itu nengkoha-ngkoha bhe dhumagano poowa nehana.

⁵⁵ Neangkaꞌindo imamu bhe kosasawindo Sahano Agama deꞌondofi sakusii so sumangkatie, nomudaꞌao dabhotusie damongkoe, tamaka miina daeꞌawaa.

⁵⁶ Dobhahi mie depaha-paha dosangkatie, tamaka pugaundo miina napokanti-kantibhaa.

⁵⁷ Pada anaꞌa doehemo dua seemie hodua maka depaha-paha dosangkatie ambado,

⁵⁸ “Insaodi padamo tafetingkee nopugau, ‘Ahumunggae lambuno Lahataꞌala kahabuꞌando manusia ini, maka natolu oleo aefoehemo sigaoꞌano, suano kahabuꞌando manusia.’ ”

⁵⁹ Mahinggamo peda naꞌa pugaundo daa-daaꞌe miina napokanti-kantibhaa.

⁶⁰ Nopalusi anaꞌa noehemo Imamu Bhalano ne wunta-wuntando, maka nofeena Yesus ambano, “Pae tumobhoosiea gahaꞌa kasangkatindo ne hintu ini?”

⁶¹ Tamaka Yesus miina nakodiua, miina sepaliꞌa natumobhoosia. Imamu Bhalano maitu nofendua nofeenae ambano, “Nokotuꞌu hintumo ini Mesias, anano Lahataꞌala tipudhino?”

⁶² “Anoamo,” ambano Yesus, “maka mada kaowu, mohaomu Anano Manusia - Idimo ini - naengkoha ne suanano Lahataꞌala kokuasano, mohaeꞌomu dua namai te wunta-wuntano olu te lani.”

⁶³ Imamu Bhalano lasao nopobhensiꞌao pakeano bhe nopugau, “So dua ae deꞌondofiꞌao sakusii gahaꞌa?

⁶⁴ Ingka dofetingkeemoomu nopototoꞌao wutono bhe Lahataꞌala. Peda amai fekihimiu?” Maka kosasawindo dosesuahamo, dobhotusiemo tetewei damongkoe.

⁶⁵ Pada aitu sigaꞌa dokapehasiemo, dodampu matano maka dotumbusie poowa dofeenae ambado, “O anabii, soba bhoto notumbuko laꞌae!” Sampe mie dhumagano detofalimo dua.

Petrus nogagaiꞌe miina namandeꞌao Yesus 14:66-72

⁶⁶ Tangasano Petrus nengkoha-ngkoha ne kadete, nomaimo seemie hobhine bhatuano Imamu Bhalano.

⁶⁷ Sanowoha Petrus nehana, nofoti-fotindamo ulano maka nofeenae ambano, “Ingka hintu ini sadhia pobhai bhe Yesus, miendo Nasaret maitu?”

⁶⁸ Tamaka Petrus nogaga ambano, “Miina amandeꞌaanea, miina alumosangiea pugaumu naꞌaa.” Pada aitu nogampimo se fointono kadete. [Nopobutu nokakuhua manu.]

⁶⁹ Nowohae toha ne itu, o bhatua hobhine saꞌitu nopugaumo ne mie meehe-eheno ne itu, “Mie aini seemie dua sabhangkando.”

⁷⁰ Tamaka Petrus nogaga toha. Miina naomponaa mie ne itu dopugaumo, ambado, “Nokotuꞌu hintu ini sabhangkaꞌindomo, kapaꞌamo hintu ini mieno Galilea.”

⁷¹ Petrus nofemata bhe nobhatataꞌiao wutono ambano “Kotu-kotuꞌu miina sepaliꞌa amandeꞌaanea mie nesambi-sambilimiu itua!”

⁷² Gahaꞌa nopobutu nokakuhua toha manu. Petrus lasao nofeꞌulai pugauno Yesus ne anoa, “Paeꞌo nahaa paku nakumakuhua manu, natolu pakumo gumaga miina mandeꞌa kanaua.” Maka noꞌae, tanokansodu-nsodumo.