Markus 13 - Muna Southern Dialect

Yesus nokowambaꞌao so kahansuruꞌano Lambuno Lahataꞌala 13:1-2

¹ Yesus nolimbamo nomaiꞌao weo Lambuno Lahataꞌala. Gahaꞌa seemie anaguhuno nopugaumo ambano, “Guru, soba ondo! Kabhalaꞌino bhe katangkaꞌino kontu aini! Kakesa maka Lambuno Lahataꞌala ini!”

² Tamaka Yesus notobhoosie ambano, “Ingka wohae padaa kabhalaꞌino bhe katangkaꞌino lambu aini? Bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue!”

Kasabha bhe kafodee-dee 13:3-13

³ Yesus nokalamo te kabhawono Zaitun. Ne itu nengkohamo nofewise we Lambuno Lahataꞌala, dopobhaiane Petrus, Yakobus, Yohanes bhe Andreas. Andoa ini dofeenaemo ambado,

⁴ “Fohato kainsami, naefie gahaꞌa kosasawiꞌae naꞌa nakumadhadhia? Maka o ae so katandainoa, ane nahumatomo tempono?”

⁵ Yesus nofohatodamo ambano, “Kodhagaomu bhahaa dofokolilino totono lalomiu!

⁶ Kapaꞌamo mada kaowu dabhahi so maino damake neaku bhe damugau ambado, ‘Idimo ini Mesias’, maka dabhahi sepaliꞌa so tibhohe-bhoheꞌino.

⁷ Ane metingkeomu popahisaꞌa bhahaꞌi meꞌawaomu bhihitano popahisaꞌa, koemo notikendaa handamiua. Ingka kosasawiꞌae maitu tetewei nakumadhadhia, tamaka suanoꞌo dua kafetompaino dhamani.

⁸ Liwu dapoewangi bhe liwu, kafopahintaꞌa dapoewangi bhe kafopahintaꞌa. Neꞌamai-neꞌamai nandumandoo luali bhe gaba. Kosasawiꞌae maitu kaneꞌomo kafetompunaꞌino dhamani buꞌou, nopototo bhe kaleano so koanano.

⁹ Tamaka hintimiu ini posiꞌondoomu! Mada kaowu dahumakofikoomu maka dabhitahakikoomu Sahano Agama. Damepekikoomu weo lambu kasambaheaꞌa. Pakade damowakoomu ne wisendo kafeompuꞌa bhe omputo, hampano membaliomu anaguhuꞌiku. Aini seꞌise dua katolala membaliomu sakusiiku ne wisendo.

¹⁰ Ampamo kaowu Bhihita Metaa tetewei damoleleandae kadeki sabhaha liwu we dhunia ini.

¹¹ Ane dahumakokoomu maka damowakoomu ne fobhitahakino, koe nekenda-kenda handamiua bhahaꞌi mugauꞌomu ae! Tapugaumoomu ampa kafohatoꞌaomiu wakutuu anaꞌa; hampano suano hintimiu so mugauno, tamaka Rohino Lahataꞌala.

¹² O mie damowa kakutaꞌando ne kokuasano damongkoeꞌao, pedamo dua o ama damowa anando damongkoeꞌao. O anaꞌi damewangi kamungkulando sampe damongkoda.

¹³ Hintimiu ini dabansikoomu sabhaha mie hampano neaku. Tamaka ane dakosabaha dapotaami ampa namalusi, dasumalamati.”

Fofekabinasano Timohakuno 13:14-23

¹⁴ “Weo kasabha maitu mohaomu Fofekabinasano Timohakuno naeehe-ehe ne pata mantasiꞌano. (Hintimiu mebasano tabeano motindaeꞌomu maꞌanano!) Maka miendo Yudea tabeano damilei te kokabhawoꞌano so dasumalamatiꞌao.

¹⁵ Mie we tambi koemo dopesua dakoniala weo lambu.

¹⁶ O mie te kaampo koemo dosuliki pakeando we liwu.

¹⁷ Kadaino maka kolaundo hobhine fowoowano tawa fofotitino wakutuu anaꞌa.

¹⁸ Sambaheaꞌaneomu kosasawiꞌae maitu koise nokadhadhia weo wulano use.

¹⁹ Wakutuu anaꞌa nandumandoo kasabha foliuno kabhibhiisa. Kasabha pedando naꞌa miinaꞌo nakumadhadhia, notanda Ompu Lahataꞌala nofokonandoo dhunia inia, ampa haꞌoleo ini, pakade paemo dua namendua nakumadhadhia.

²⁰ Ane ibahano Ompu pae nakumuhangi tempono, kotika dumadino pae bhe so sumalamatino. Tamaka mbaꞌinomo nandoo umati tipilino, Ompu Lahataꞌala nakumuhangi tempono.

²¹ Wakutuu anaꞌa, ane bhe so mugauangko ambado, ‘Ondoe, ainiꞌaemo Mesias, Omputo Fosalamatino’ tawa, ‘Ondoe, atatuꞌae Mesias’, koe parasaeaꞌomua.

²² Kapaꞌamo dabhahimo mabhino wutono Mesias, gahaꞌaitu suano. Dabhahi dua mpahaana-anabiino. Andoa naꞌa daehabu tanda-tanda tapa mentela bhe giu timenteꞌaono, patudhundo ane naembali damokolilino dua totono lalondo umati tipilino.

²³ Dadiꞌanomo hintimiu kodhagaomu! Kosasawiꞌae padamo afohatoangkoeꞌomu wawo inia.”

Kahatoꞌano Anano Manusia 13:24-27

²⁴ “Wakutuu anaꞌa, namalusi sabhaha kasabha naꞌa, o oleo nahohondomo, o wula paemo nakotilangaa.

²⁵ O kulipopo dapondawuti damaiꞌao te lani bhe kosasawiꞌae waweno alamu naohungga.

²⁶ Wakutuu anaꞌa Anano Manusia - Idimo ini - damohae namai te olu, natiwoha weo kakalabhiano bhe kuasa bhalano.

²⁷ Natumudu malaꞌekatino damoꞌonu umatino tipilino, damaiꞌao ne kofatowalaꞌae alamu, damaiꞌao te bheteꞌano oleo ampa we sooꞌano.”

Dopoguhu ne puꞌuno wohaꞌa 13:28-32

²⁸ “Soba poguhuomu ne puꞌuno wohaꞌa! Ane notawomo haꞌano, pandeꞌaanemoomu nomaꞌomo nakoꞌoleo.

²⁹ Pedamo dua aitu, mohaomu kaowu kadhadhia nepulaoꞌaoku saꞌituini, mandeꞌaanemoomu nomaꞌomo sepaliꞌa tempono, ingka te wisenomo fointo.

³⁰ Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa.

³¹ O lani bhe dhunia naosali, tamaka wambaku ini pae bhe kasalia.

³² Ampamo kaowu oleono bhe tempono bhe seemie miina bhe mandeꞌaanea. O malaꞌekati te surugaa miina, Anano Manusia miina dua, mpahinomo wutono Amaku mandeꞌaanea.”

Kafodhaga 13:33-37

³³ “Dadiꞌanomo posiꞌondoomu! Kodhagaomu, kapaꞌamo miina mandeꞌaaneomu naefie nahumato tempono.

³⁴ Naembali doposandahaane bhe seemie kumalano we koliwuno. Lambuno noposahunaꞌaane mieꞌino. Seemie-seemie bhe takano, dhagano fointo nofohatoe naekamboto, nakodhaga sepaliꞌa.

³⁵ Dadiꞌanomo kodhagaomu, hampano miina natipandeꞌaoa so kahatoꞌano kolambuno. Bheanea nahumato sanimohondo, bheanea kafewuntaꞌino alo, bheanea nabhala nekundono alo tawamo sanimentaeno.

³⁶ Ane nasehatoꞌa kolambuno, kodhagaomu bhahaa nohafotikoomu tangasano moodoomu.

³⁷ Wambaku ne hintimiu ini, amohatoandae dua kosasawindo manusia: mantaa-ntaaꞌomu bhe kodha-kodhagaomu!”