Markus 12 - Muna Southern Dialect

Kapalendano kumahadhaano ne kaampono angguru 12:1-12

¹ Nopalusi peda naꞌa Yesus nopugaumo ne meangkaꞌindo imamu, pande-pande Kitabi bhe kamungkulaꞌi, nepakeanda kapalenda. Ambano, “Nandoo seemie nelengka kaampo maka nekantisaane angguru. Kofatowalaꞌae kaampono nopagalae. Neseli dua kantobha mbali kaefeoꞌano angguru bhe nefoehe kapala so kaedhaganiꞌa. Palusi aitu nefogadhimo mie so kumahadhaano kaampono maitu maka nokala we koliwuno.

² Nohato wulano defoꞌonu hasili, netudumo seemie bhatuano nakumala se kumahadhaano naꞌa, namalaꞌao dawuno.

³ Gahaꞌa sahatono katudu amaitu, dointahaemo maka dohambisie. Pada dohambisie, dotuduemo nasumuli haa mbali limano, miina nakoniwowoꞌo.

⁴ Pada aitu kokaampono netudumo toha mieno sigaoꞌano. Gahaꞌa katudu aitu dohambisie dua sampe nobhela bhe fotuno pakade dofekaambanoe.

⁵ Kokaampono netudumo toha mieno sigaoꞌano, tamaka katudu aitu dopongkoe. Nobhahi dua mieno sigaoꞌano netuduno, tamaka sigaꞌa dohambisida, sigaꞌa dopongkoda.

⁶ Pada aitu tamo seemie ndumandoono, anano kamoasiꞌaono sepaliꞌa. Panda-pandano notudumo anano maitu, weo fekihino, ‘Anaku ini tetewei daengatie.’

⁷ Tamaka dowoha anano maitu, mie kumahadhaano dopugau-gaumo ambado, ‘Ainiꞌaemo so kohakuꞌaono kaampono amano. Dopongkoeꞌanaomu! Hakuno somo intaodiomu.’

⁸ Dadiꞌanomo lasao dohakoe maka dopongkoe. Maeatino doꞌohoe we kundo ala.

⁹ Ia naeafamo dua kokaampono maitu? Ingka teteweimo nakumalaꞌida kumahadhaano naꞌa, namongkoda kosasawindo, maka kaampono maitu namaꞌandae dakumahadhaaꞌe mie sigaoꞌano.

¹⁰ Molimpuꞌaanemoomu gahaꞌa tibuhino weo Kitabino anabii peda aini, ‘Kontu neꞌohondo mefelambuno, gahaꞌa nembalimo sandi bhalano.

¹¹ Kapedaꞌano naꞌa hampano kuasano Ompu, wohaꞌano giu timenteꞌaono.’ ”

¹² Nopalusi aitu kamungkulaꞌindo Yahudi maitu deꞌondofimo akala dahumako Yesus, hampano dopandeꞌaane kapalenda saꞌituini nokantibha andoa. Tamaka mbaꞌinomo doteꞌi mie bhahi, miina damafa-afaane, tadokalamo.

Tanduaꞌano sewa so Omputo Kaisar 12:13-17

¹³ Pada aitu kamungkulaꞌindo Yahudi detudumo seemie hodua miendo Farisi bhe mieno kolaki Herodes dapoꞌawaꞌao Yesus. Patudhundo dametando alano wambano.

¹⁴ Sapoꞌawando bhe Yesus dofeenamo ambado, “Guru, tapandeꞌaane nelaa lalomu. Miina koniengatia, hampano miina poꞌala-alaanda manusia, mpahinomo weo kalaano lalomu fofoinaꞌuꞌao kaangkaꞌa metaano Lahataꞌala so manusia. Weo tubhono agamantoomu naembali bhahaa datumanduao sewa ne Omputo Kaisar kaa paise? Nofaraluu tasumewa kaa paise?”

¹⁵ Tamaka Yesus nopandeꞌaane dofehaaꞌula, maka nopugau ambano, “Noafa gahaꞌa soba kanauꞌomu? Waꞌa kanauꞌomu dhoi pera itu nasewoka ameꞌondoe.”

¹⁶ Dowaꞌanemo dhoi pera sewoka. Yesus nofeenadamo ambano, “Gambara bhe kabuhi laꞌae gahaꞌa inia?” Dotobhoosi ambado, “Gambara bhe kabuhino Omputo Kaisar.”

¹⁷ Ambano toha Yesus, “Bahangka peda naꞌa, fehebuaꞌano Omputo Kaisar waꞌaneomu Omputo Kaisar; fehebuaꞌano Lahataꞌala waꞌaneomu Lahataꞌala!” Dofetingke peda naꞌa tadomente.

Miendo Saduki dofeenaꞌao kawanuꞌando mie mate 12:18-27

¹⁸ Nandoo dua miendo Saduki domai ne Yesus. Andoa ini miina damarasaea mie mate dasumuli damanu.

¹⁹ Dofeenamo ambado, “Guru, anabii Musa nebuhi pahinta so intaodiomu peda ini, ‘Ane o moꞌane nomate tamaka hobhineno miina nakoana, maka kakutaꞌano moꞌane tetewei nagumaa bhe bhihinandano naꞌa neanomo anano dakumonae sampuꞌano mateno maitu.’

²⁰ Gahaꞌa nandoo dopipitu dosibhahi-bhahitie sanea moꞌane. Titiisando nogaa, tamaka nomate miinaꞌo nakoanaa.

²¹ Dadiꞌanomo katuluno nogaamo bhe bhihinandano, tamaka miinaꞌo nakoana nomatemo dua. Pedamo dua aitu aino tuluꞌano.

²² Pedamo aitu kansuhu, sampe kopipitundo domate, miina dakoanaa bhe hobhine anaꞌa. Panda-pandano nomatemo dua hobhine naꞌa.

²³ Nahumato oleo kawanuꞌando mie mate, so mieno lambu laꞌae hobhine amaitua? Ingka kopipitundo sanea gumaaꞌane?”

²⁴ Yesus notobhoosida ambano, “Noꞌalamo sepaliꞌa fekihimiu itu. Kapaꞌamo miina mandeꞌaaneomu tibuhino weo Kitabino anabii, miina dua mandeꞌaaneomu kuasano Lahataꞌala.

²⁵ Nahumato damanu mie mate, dadumadi nada malaꞌekati te surugaa: paemo dagumaa, paemo dua damogaada.

²⁶ Ane kawanuꞌando mie mate, ingka notibuhi weo Kitabino anabii Musa; miinaꞌo basaeꞌomua gahaꞌa? Ne itu notibuhi Lahataꞌala nopugau ne Musa nomaiꞌao ne sau kokihi humendeꞌano. Ambano, ‘Idimo ini Lahataꞌalano Abraham, Lahataꞌalano Ishak bhe Lahataꞌalano Yakub.’

²⁷ Maꞌanano Ompu Lahataꞌala suano Lahataꞌalando mie mate, tamaka Lahataꞌalando mie dumadi. Dadiꞌanomo kotu-kotuꞌu noꞌalatimo sepaliꞌa fekihimiu itua!”

Pahinta fofoliuno kabhala 12:28-34

²⁸ Nohatomo dua seemie pande Kitabi, nofetingke Yesus nopuga-pugau bhe miendo Saduki. Anoa nopandeꞌaane katobhoosino Yesus maitu nokantibha maka nofeenamo dua, “Kosasawiꞌae pahinta ndumandooꞌano, pahinta medando ae gahaꞌa foliuno kabhalaa?”

²⁹ Ambano Yesus, “Pahinta foliuno kabhala peda aini, ‘Miendo Israel! Fetingkeomu! Ompu Lahataꞌalantoomu, Ompu Kaseemie-mieꞌano.

³⁰ Moasiane Ompu Lahataꞌalamu sampuu-mpuuno lalomu, sampuu-mpuuno alusumu, sampuu-mpuuno fekihimu bhe sampuu-mpuuno kaꞌosamu.’

³¹ Pahinta katuluno peda aini, ‘Moasianda mie bhaimu peda kaasimu ne wutomu.’ Miinamo bhe pahinta moliuno pahinta aini.”

³² Ambano toha pande Kitabi maitu, “Anoamo naꞌa, Guru. Nokotuꞌu Ompu Lahataꞌala maitu Kaseemie-mieꞌano, miina bhe sigaoꞌano.

³³ Nokotuꞌu dua, daoasiane sampuu-mpuuno lalo, sampuu-mpuuno fekihi bhe sampuu-mpuuno kaꞌosa, pakade daoasianda mie bhainto peda kaasi ne wutonto. Naetaa damangkafi pahinta aini bhe daeowa sabhaha kapopanga nekantunu bhahaꞌi nesumbele so Lahataꞌala.”

³⁴ Nofetingke katobhoosino mie amaitu noponoꞌao timbangi, Yesus nopugaumo ambano, “Hintu ini miinamo mokodoꞌoa bhe Kafopahintaꞌano Lahataꞌala!” Pada aitu miinamo bhe mokadono so meenaea.

Pokaiꞌano Yesus bhe Daud 12:35-37

³⁵ Sepaku tangasano nofofoinaꞌu weo Lambuno Lahataꞌala, Yesus nofeenamo ambano, “Noafa gahaꞌa pande-pande Kitabi dokonaꞌao Mesias sampuꞌano Daud?

³⁶ Gahaꞌa itu wutono Daud weo kuasano Rohino Lahataꞌala padamo nopugau peda aini, ‘Ompu Lahataꞌala nokowambamo ne Ompuku, Mengkohamo ne suanaku ini ampa kosasawindo kaewamu ahumabuda so kafindaꞌamu.’

³⁷ Dadiꞌanomo, ane wutono Daud nokona Mesias maitu Ompuno, maka maꞌanano suano kaowu taꞌo sampuꞌano, tamaka Ompuno dua.” Mie bhahi doasiane sepaliꞌa dofetingke kafoinaꞌuno Yesus.

Yesus nofodhagaanda kafoinaꞌundo pande-pande Kitabi 12:38-40

³⁸ Weo kafoinaꞌuno, Yesus nofohatodamo dua ambano, “Kodha-kodhagaomu ne pande-pande Kitabi. Andoa maitu doasiane dekala-kala depake dhuba kawanta, doasiane dua dosombaida weo daoa.

³⁹ Weo lambu kasambaheaꞌa bhahaꞌi weo kahame andoa sadhia dua dengkoha te wise.

⁴⁰ Andoa debhohe-bhoheꞌi bhihinanda maka dorampasi lambudo. Pakade keana notipandeꞌao kadaino isikadhindo, tadofekawanta-wantamo sambaheando. Dadiꞌanomo nasedhuluꞌa dua kabhieno kahukumu so neꞌawamiu.”

Sadhakaano seemie bhihinanda mokaeno 12:41-44

⁴¹ Sepaku Yesus nengkoha-ngkoha weo Lambuno Lahataꞌala, nopowise bhe sohongano sadhakaa. Anoa nofoti-fotindamo mie bhahi mefopesuano dhoi sadhakaa weo sohonga maitu. Dobhahi hangkaea nobhahiꞌi defopesua dhoi.

⁴² Gahaꞌa nomaimo dua seemie bhihinanda mokaeno, nefopesua haa kepe, o bhaseno sedhoi.

⁴³ Yesus noloꞌoimo anaguhuꞌino maka nofohatoda ambano, “Amohatokoomu inia! Kotu-kotuꞌu nobhahi kafopesuaꞌano bhihinanda mokaeno ini bhe kosasawiꞌae kafopesuando mie sigaoꞌano.

⁴⁴ Kapaꞌamo mie bhahi maitu dosadhakaaꞌao labhino kanandoodo, tamaka bhihinanda aini weo kakaeno nofowaꞌao kosasawiꞌae so kadadiꞌano.”