Markus 11 - Muna Southern Dialect

Yesus nopesua we Yerusalem, dobhidha-bhidhae peda seemie omputo 11:1-11

¹ Yesus bhe anaguhuꞌino domaꞌotimo Yerusalem. We owano Betfage bhe Betania, liwu ne laano kabhawono Zaitun, Yesus netudumo dohodua anaguhuno damaꞌindulu.

² Nofohatoda ambano, “Kalaomu we liwu te wise watu! Samesuaꞌomu, mohaomu seꞌulu anano keledai dotapue, miinaꞌo sepaliꞌa natisawikia. Lenseeꞌomu maka tondaeꞌomu se ini.

³ Ane bhe so meenano, ‘Noafa lenseaneomu?’ fohatodaomu putae, ‘Nofaraluuꞌe Ompu, ingka pae naomponaa damosuliemo toha.’ ”

⁴ Pada aitu dokalamo maka dowoha seꞌulu anano keledai, dotapue te wiseno lambu, ne wiwino kaangkaꞌa. Lasao dolensee.

⁵ Mie meehe-eheno ne itu dofeenamo, “Noafa gahaꞌa lenseaneomu keledai itua?”

⁶ Dotobhoosi peda pugauno Yesus saꞌituini, maka doꞌundaꞌaandamo dokala.

⁷ Keledai aitu dotondae se Yesus, towuno dolempesiane pakeando mbali kaengkohaꞌano, maka nosawikie.

⁸ Dobhahi tumalesaono pakeando ne kaangkaꞌa. Nandoo dua metalesaono haꞌano sau bhe hoo-hoono nealando we kaampo.

⁹ Mie maꞌinduluno bhe mangkano kundono kosasawindo debhidha-bhidha ambado, “Hosana, pudhi Ompu! Notibarakati maino weo neano Ompu!

¹⁰ Notibarakati Kafopahintaꞌano awuantoomu Daud humatono ini! Hosana, pudhi kaitaomu Lahataꞌala te wawono wawo!”

¹¹ Sahatono we Yerusalem, Yesus nopesuamo weo lambuno Lahataꞌala. Ne itu nofolili matano, tamaka mbaꞌinomo nohondomo oleo, Anoa bhe anaguhuꞌino ompulu hoduano dosuli we Betania.

Yesus nebhatataꞌiao puꞌuno ara 11:12-14

¹² Hato nomentae, tangasano dokala domaiꞌao we Betania, Yesus noꞌahomo.

¹³ Nandoo se kodoꞌono nowohamo sepuꞌu ara nokohoomo. Nokalamo nofeꞌondoe bhahaꞌi kaowu bhe bhakeno. Gahaꞌa miina nakoniwohaa, taꞌo hoo, mbaꞌinomo suano wulano kakobhakeꞌano.

¹⁴ Yesus nobhatataꞌiao sau aitu ambano, “Notanda aitu ampa suhue dhamani, bhe naseemie paemo bhe so momaano bhakemu!” Pugauno naꞌa dofetingkee dua anaguhuꞌino.

Yesus negihasi podaoano weo Lambuno Lahataꞌala 11:15-19

¹⁵ Pada aitu Yesus bhe anaguhuꞌino dohatomo toha we Yerusalem. Nopesua kaowu weo kadeteno Lambuno Lahataꞌala, Yesus negihasimo podaoano ne itu. Medhando mebhase-bhaseno dhoi bhe bhangko-bhangko kapahaasoꞌando dhaadhaha nobhansualeda.

¹⁶ Miina naꞌumundaꞌaandaa daeowa pahaaso weo kadeteno Lambuno Lahataꞌala maitu.

¹⁷ Pada aitu nofoinaꞌudamo ambano, “Notibuhi weo Kitabino anabii, ‘Lambuku dakumonae lambu kasambaheaꞌando sabhaha liwu. Tamaka hintimiu habueꞌomu mbali lia kaꞌonuꞌando mie modai!’ ”

¹⁸ Neangkaꞌindo imamu bhe pande-pande Kitabi dofetingke dua kadhadhia amaitu, maka deꞌondofi akala damongkoe. Andoa doteꞌie, mbaꞌinomo mie bhahi domenteane kafoinaꞌuno.

¹⁹ Nohondo kaowu oleo Yesus bhe anaguhuꞌino dohunsamo toha kota.

Yesus nofofoinaꞌuꞌao kaparasaea bhe sambahea 11:20-26

²⁰ Samentaeno Yesus bhe anaguhuꞌino dolalo toha ne owano puꞌuno ara endewi. Gahaꞌa dowohae nomatemo, nokekele bhe paha-pahakano.

²¹ Petrus nofeꞌulaimo kadhadhia endewi, sampe nopugau ne Yesus, “Guru, soba ondo, puꞌuno ara nebhatataꞌiaomu maitu nomatemo!”

²² Notobhoosimo Yesus ambano, “Parasaeaꞌomu ne Lahataꞌala.

²³ Amohatokoomu, kotu-kotuꞌu ane dopugau ne kabhawo aini, ‘Sangke wutomu maka oho wutomu we teꞌi’, tetewei nakumadhadhia, sumanomo koe nopoibhaha lalondo, tamaka doparasaea pugaundo maitu nakoꞌula.

²⁴ Dadiꞌanomo, amohatokoomu, o ae maka dua kamesalo weo sambaheamu, taparasaeamo umawae, maka tetewei umawae.

²⁵ Tamaka taenomo sumambahea, ane nokohobu-hobu totono lalomu ne mie bhaimu, maꞌafuane kadeki, neanomo Amamu te surugaa naꞌumamponiko dua.

²⁶ [Ane pae fomaꞌafuꞌao, Amamu te surugaa pae dua naꞌumamponiea dhosa-dhosamu.]”

Dofeenaꞌao kuasano Yesus 11:27-33

²⁷ Yesus bhe anaguhuꞌino dohatomo toha we Yerusalem. Tangasano Yesus nekala-kala ne kadeteno Lambuno Lahataꞌala, gahaꞌa domaiꞌiemo neangkaꞌindo imamu, pande-pande Kitabi bhe kamungkulaꞌi.

²⁸ Andoa ini dofeenaemo ambado, “O ae gahaꞌa kaengkohaꞌano kuasamu kaehabuꞌamu sabhaha giu maitu? Nowaꞌangko laꞌae gahaꞌa kapooli sampe mehabu bhahi-bhahiꞌae maitu?”

²⁹ Notobhoosidamo ambano, “O Idi ameena dua. Tobhoosi kanauꞌomu, maka amohatoangkoeꞌomu kuasa medando ae nepakeku aehabu giu andoa maitu.

³⁰ Kuasano Yohanes nofokadiu, nomaiꞌao ne Lahataꞌala kaa nomaiꞌao ne manusia? Tobhoosi kanauꞌomu!”

³¹ Pada aitu dopuga-pugaumo sapada-pada andoa ambado, “Ane damugauꞌomu, ‘Nomaiꞌao ne Lahataꞌala’, tetewei namugau, ‘Noafa miina marasaeaꞌaneomu?’

³² Tamaka koasi dua damugauꞌomu, ‘Nomaiꞌao ne manusia.’ ” Andoa doteꞌi mie bhahi hampano kosasawindo mie dokona Yohanes seemie anabii.

³³ Dadiꞌanomo tadotobhoosimo, “Miina tamandeꞌaanea.” Ambano dua Yesus, “Ane peda naꞌa, pae amohatokoomu dua, kuasa medando ae nepakeku aehabu giu andoa maitu.”