Markus 10 - Muna Southern Dialect

Pohunsaꞌa 10:1-12

¹ Nomaiꞌao ne itu Yesus nokalamo we kadieno Yudea bhe kadie we sewetano umeleno Yordan. Mie bhahi domaimo toha dolibue. Peda kaneano, Yesus nofoinaꞌudamo toha.

² Domaimo dua miendo Farisi, patudhundo damoꞌalae. Dofeenamo ambado, “Weo tubhono agamantoomu, bhahaa naembali o moꞌane nopohunsa bhe mieno lambuno?”

³ Yesus notobhoosidamo ambano, “Nowaꞌangkoomu pahinta ae gahaꞌa anabii Musa?”

⁴ Dotobhoosi ambado, “Musa miina nafoꞌeleꞌaoa dopohunsa, sumanomo debuhiane bhe suhano.”

⁵ Ambano toha Yesus, “Musa nobuhiangkoomu pahinta anaꞌa hampano katuꞌano fotumiu.

⁶ Kapaꞌamo pakatandano dhunia, Ompu Lahataꞌala nefokonandoo manusia, o moꞌane bhe hobhine.

⁷ Dadiꞌanomo o moꞌane tetewei nahumunsa inano bhe amano maka naseꞌise bhe hobhineno,

⁸ sampe kohoduando daembalimo seemie. Dadiꞌanomo andoa maitu paemo dahoduaꞌa tamaka seemie.

⁹ Nefoseꞌiseno Lahataꞌala, koise dopogaatiane manusia.”

¹⁰ Sahatondo se lambu, anaguhuꞌino dofeenaꞌaomo toha kafoinaꞌuno saꞌituini.

¹¹ Nofohatodamo ambano, “Ane o moꞌane nohunsa mieno lambuno maka nogaa toha bhe hobhine sigaoꞌano, nomonsuleꞌao mieno lambuno.

¹² Pedamo dua aitu ane o hobhine nohunsa moꞌaneno maka nogaa toha bhe moꞌane sigaoꞌano, nomonsule dua.”

Yesus nebarakati anaꞌi 10:13-16

¹³ Nandoo dua mie meowano anaꞌi kahobu ne Yesus, defekadampada, tamaka anaguhuꞌino doꞌeleꞌaanda.

¹⁴ Sanowohada peda maitu, Yesus noꞌamahakimo anaguhuꞌino bhe nopugau ambano, “Hunsaꞌanomo anaꞌi andoa itu damai se Idi! Koise eleꞌaandaomua, hampano mie medandomo andoa ini so mieno Kafopahintaꞌano Lahataꞌala.

¹⁵ Amohatokoomu, kotu-kotuꞌu ane pae datumahima Lahataꞌala so mahintangino dadindo nameda anaꞌi kahobu, pae naembalia damesua weo Kafopahintaꞌano Lahataꞌala.”

¹⁶ Pada nopugau peda anaꞌa, nokakopudamo anaꞌi maitu maka notei limano te wawondo bhe nobarakatida.

Mie hangkaea noꞌali damesua surugaa 10:17-27

¹⁷ Wakutuuno Yesus noehe nakumala toha, gahaꞌa nomaimo seemie bhe notende. O mie aitu nofongkoha tuuno ne wiseno Yesus bhe nofeena ambano, “Guru, hintu metaano lalo, aeafa bhahaa so adumadiꞌao suhue dhamani?”

¹⁸ Notobhoosimo Yesus, ambano, “Noafa gahaꞌa kona kanauꞌao metaano lalo? Ingka miina bhe metaano lalo, mpahinomo wutono Ompu Lahataꞌala.

¹⁹ Ingka pandeꞌaanemo padaa pahintano Ompu Lahataꞌala, ‘Koe fopongko, koe monsule, koe mbolaku, koe membali sakusii kopaha, koe fobhohe-bhoheꞌi, fosibhala inamu bhe amamu!’ ”

²⁰ Ambano toha mie maitu, “Guru, kosasawiꞌae pahinta anaꞌa adhalangiemo mpini kaanaꞌiku.”

²¹ Noꞌondo mie amaitu, Yesus noasiane maka nopugau ambano, “Tasehonda nekaemimua! Sulimo, asoe sabhaha fehebuaꞌamu, olino dawu-dawuandae mie mokae, maka meꞌawa arataa te surugaa. Mada anaꞌa maimo angkafi kanau.”

²² Nofetingke pugauno Yesus naꞌa, nobatalamo lalono, lasao nokala. Nosabha handano mbaꞌinomo nohangkaea sepaliꞌa.

²³ Sapalusino aitu, Yesus nofolilimo matano maka nopugau ne anaguhuꞌino ambano, “Kaꞌali maka mie kokanandoo damesua weo Kafopahintaꞌano Lahataꞌala.”

²⁴ Anaguhuꞌino domente dofetingke pugauno naꞌa. Tamaka Yesus nopugaumo toha ambano, “Anaꞌiku, noꞌali daanumo damesua Kafopahintaꞌano Lahataꞌala.

²⁵ Nomuda seꞌulu kahumbau namangka ne kabhentano deu bhe seemie hangkaea namesua weo Kafopahintaꞌano Lahataꞌala.”

²⁶ Dofetingke pugauno Yesus maitu sedhuluꞌa dua kamentendo bhe dokohedu, sampe dopugaumo sapada-pada andoa ambado, “Ane peda naꞌa, laꞌae dua so sumalamatino?”

²⁷ Yesus noꞌondodamo bhe nopugau, “Uumbe daanumo, so manusia pae bhe kapoolia nakumadhadhiaꞌa peda amaitu, tamaka so Lahataꞌala miina bhe pata nemondoino.”

Ponambo doangkafi Yesus 10:28-31

²⁸ Maka ambano Petrus ne Yesus, “Ingka insaodi ini tapadaemo tahunsae bhahi-bhahiꞌae maka taangkafiko!”

²⁹ Notobhoosimo Yesus, ambano, “Amohatokoomu! Kotu-kotuꞌu ane dohunsa lambudo, bhahitieꞌindo, inando, anaꞌindo bhahaꞌi kaampondo hampano doangkafi Idi bhe Bhihita Metaa, nandoo so neꞌawando.

³⁰ Ne dhamani aini daeꞌawa moꞌono paku kabhahino: o lambu, o bhahitie, o ina, o anaꞌi bhe kaampo, tamaka daenamisi dua kafodee-dee. We dhamani mbuhumai daeꞌawa dadi suhue dhamani.

³¹ Kapaꞌamo dabhahi mie maꞌinduluno sumuli dambuhumai, mie mbuhumaino sumuli damaꞌindulu.”

Katolu pakuno Yesus nofohatoanda so kamateꞌano 10:32-34

³² Yesus bhe anaguhuꞌino tangasano we laano sala dahumope we Yerusalem. Yesus nopaꞌindulu. Anaguhuꞌino domihiane lalondo, mie mangkafie doteꞌiane. Nosaliꞌimo toha anaguhuꞌino ompulu hoduano bhe nofohatoanda so netompaloino.

³³ Ambano, “Fetingkeomu! Aitu dahumopeomu we Yerusalem. Ne watu Anano Manusia - Idimo ini - damowae ne limando neangkaꞌindo imamu bhe pande-pande Kitabi. Andoa dabhotusie damongkoe. Mada anaꞌa damowae toha ne limando mie pata mandeꞌaono Ompu Lahataꞌala.

³⁴ Andoa naꞌa damele-elee, dakumapehasie, dahumambisiane habuta maka damongkoe. Tamaka ne katolu oleono nadumadimo toha.”

Kamesalondo Yakobus bhe Yohanes 10:35-45

³⁵ Pada aitu Yakobus bhe Yohanes, anaꞌino Zebedeus, domaꞌotimo Yesus maka dopugau ambado, “Guru, nandoo bhe kamesalo mani. Sio-siomo tumahimae!”

³⁶ Notobhoosimo Yesus ambano, “Amafaꞌiangkoomu gahaꞌa gaomiu?”

³⁷ Ambado toha, “Gao mani mpuu nahumato fopahintangi weo kakalabhiamu, insaodi ini taengkoha ne sohihimu; seemie ne suanamu, seemie ne kemamu.”

³⁸ Tamaka notobhoosida Yesus ambano “Ingka miina mandeꞌaaneomua maꞌanano kamesalomiu naꞌa. Mondoiꞌeomu mohoꞌuomu ne kampohoꞌuꞌa so kafohoꞌuꞌaku, tawa dakumadiuangkoomu oe kakadiuku?”

³⁹ “Tamondoiꞌe,” ambado. Yesus nopugaumo toha ne andoa, ambano, “Uumbe daanumo, mohoꞌuomu ne kampohoꞌuꞌaku bhe dakumadiangkoomu oe kakadiuku.

⁴⁰ Ampamo kaowu daengkoha ne suanaku bhahaꞌi ne kemaku, suano Idi so motantue. Kaengkohaꞌa anaꞌa pada dofontaa-ntaaꞌandae so mie nepilino Ompu Lahataꞌala.”

⁴¹ Dofetingke peda naꞌa, anaguhuꞌi sigaoꞌano doꞌamahamo ne Yakobus bhe Yohanes.

⁴² Tamaka Yesus nosaliꞌidamo maka nofohatoda ambano, “Ingka pandeꞌaaneomu, mahintangino sabhaha liwu pata mandeꞌaono Ompu Lahataꞌala dofodee-dee raꞌeatindo, neangkando nokii sepaliꞌa dofodhala pahintando.

⁴³ Nopoꞌala bhe hintimiu. So moindalono membalino kabhala, tabeano naꞌumondofao kadeki kafaraluundo mie bhaino.

⁴⁴ So moindalono membalino mie neangka, tabeano naembali palima-limando sigaoꞌano.

⁴⁵ Kapaꞌamo wutono Anano Manusia - Idimo ini - nomai pae naefeꞌondofaoa, tamaka nafoꞌondofao bhe nafowaꞌao inawano so katolosindo mie bhahi.”

Yesus nofekaꞌosa Bartimeus 10:46-52

⁴⁶ Yesus bhe anaguhuꞌino dohatomo we Yeriko. Dalumimbaki kaowu Yeriko, dobhahi mie mangkafie, gahaꞌa nandoo seemie kabunto nengkoha-ngkoha ne wiwino sala nesalo-salo. Neano Bartimeus, anano Timeus.

⁴⁷ Sanofetingke lumalono maitu Yesus miendo Nasaret, nokeimo kabunto naꞌa ambano “Yesus, sampuꞌano Daud, mobhela kanau lalo!”

⁴⁸ Dobhahi umamahakie so pae nakodiuꞌao, tamaka tanodhulu kahaaꞌi nokei, “Sampuꞌano Daud, mobhela kanau lalo!”

⁴⁹ Yesus nofetumpumo maka nopugau ambano, “Loꞌoiꞌeomu!” Lasao dosaliꞌi kabunto maitu bhe dofohatoe, “Fekatangka lalomu! Ehemo, nosaliꞌiko!”

⁵⁰ Tanolembi dhubano, nosieheꞌa, lasao nokala nopoꞌawaꞌao Yesus.

⁵¹ Yesus nofeenaemo, “Amafaangko gahaꞌa gaomu?” Notobhoosimo, “Guru, gaoku afowoha.”

⁵² “Kalamo,” ambano Yesus, “Hampano kaparasaeamu ne Inodi, moꞌosamo!” Wakutuu anaꞌa lasao nofowoha, maka noangkafi Yesus.