Markus 1 - Muna Southern Dialect

Yohanes Fokadiuno 1:1-8

¹ Ainimo Bhihita Metaa metula-tulaꞌaono Yesus Kristus, Anano Lahataꞌala.

² Kafetompunaꞌino Bhihita Metaa ini peda tibuhino weo Kitabino anabii Yesaya peda aini, “⸤ Ambano Lahataꞌala⸥ ‘Anoamo ini katuduku, atudue namaꞌinduluangko, naebhongkaangko kaangkaꞌa.’

³ Nandoo suaha mekei-keino we pandaso bhalano ambano, ‘Mebhongkaomu kaangkaꞌa so Ompu; fekalaaꞌeomu so kaangkaꞌano.’ ”

⁴ Pedamo tibuhino naꞌa Yohanes Fokadiuno notiumba we pandaso bhalano bhe nopugau ambano, “Fetompaꞌao dhosamiu, doliomu ne Lahataꞌala bhe mefekadiuꞌomu maka Lahataꞌala naꞌumamponikoomu.”

⁵ Pada aitu kosekadieꞌae Yudea bhe miendo kotano Yerusalem dosipumpumo dokala we Yohanes. Detula-tulamo doꞌakui dhosando maka nokadiuda Yohanes we umeleno Yordan.

⁶ Pakeano Yohanes ini wuluno unta, kagegeno o kuli. Nehumaano o kapunda bhe golano kainiua.

⁷ Nefolele bhihita peda aini, “Namada idi nahumato seemie moliu kanau kuasa; alumongko alumense katapuno kaampini ne aꞌeno paise amantasia.

⁸ O idi akadiuangkoomu oe, tamaka ane nahumato Anoa nakumadiuangkoomu Rohino Lahataꞌala.”

Yohanes nokadiu Yesus 1:9-11

⁹ Wakutuu aitu nohatomo Yesus nomaiꞌao we liwuno Nasaret, we kadieno Galilea, maka nokadiuꞌe Yohanes we umeleno Yordan.

¹⁰ Safonino nomaiꞌao weo umele, Yesus nowohamo lani nomoengka, maka Rohino Lahataꞌala nosampu te potalaꞌano nokatu futeꞌo.

¹¹ Notifetingkemo dua suaha nomaiꞌao te lani ambano, “Hintumo Anaku timoasiꞌaono, Hintumo mekaꞌiano laloku.”

Yesus nosobae Kafeompuꞌando seetani we pandaso bhalano 1:12-13

¹² Pada aitu Yesus lasao nofokalae Rohino Lahataꞌala we pandaso bhalano.

¹³ Fato fuluꞌa kaomponano neate we pandaso bhalano naꞌa bhe nosobae Kafeompuꞌando seetani. Anoa neate ne naꞌa nopobhai bhe sabhaha kadadi fohumaano, tamaka dodambaꞌaane malaꞌekati.

Yesus noumba we Galilea 1:14-15

¹⁴ Notitohongku kaowu Yohanes, Yesus nokalamo we Galilea. Nefolele Bhihita Metaa maiꞌaono ne Lahataꞌala.

¹⁵ Ambano, “Nohatomo tempono, nomaꞌomo Kafopahintaꞌano Lahataꞌala. Fetompaꞌao dhosamiu, doliomu ne Lahataꞌala bhe parasaeaꞌomu ne Bhihita Metaa!”

Pakatandano Yesus nesaliꞌi anaguhuno 1:16-20

¹⁶ Tangasano Yesus nekala-kala nosohaki wiwino teꞌino Galilea, gahaꞌa nowohamo Simon bhe Andreas kakutaꞌano. Andoa maitu tangasano debuani mbaꞌinomo andoa ini pande kenta.

¹⁷ Yesus nosaliꞌidamo ambano, “Maimoomu angkafi kanauꞌomu, amoguhukoomu so mebuanino manusia.”

¹⁸ Andoa maitu lasao dohunsa buanindo maka doangkafi Yesus.

¹⁹ Miinaꞌo nakodoꞌo nokala, Yesus nowohamo dua Yakobus bhe Yohanes anaꞌino Zebedeus tangasano dofekataaꞌi pukando weo bhangka.

²⁰ Yesus lasao nosaliꞌida dua. Kohoduando tadohunsamo amando Zebedeus bhe mie gumadhino weo bhangka maka doangkafie.

Yesus nofolimba seetani weo lambu kasambaheaꞌa we Kapernaum 1:21-28

²¹ Yesus bhe mie mangkafie dohatomo we liwuno Kapernaum. Sahatono oleono Sabat, Yesus lasao nopesua weo lambu kasambaheaꞌa maka nofofoinaꞌu.

²² Mie metingkeno kafoinaꞌuno domente sepaliꞌa, mbaꞌinomo nofoinaꞌuda peda seemie kokuasano, nopoꞌala bhe pande-pande Kitabi.

²³ Gahaꞌa weo lambu kasambaheaꞌa naꞌa tanonandoomo dua seemie nepesuakino seetani. O mie aitu nokeimo ambano,

²⁴ “O Yesus miendo Nasaret, o ae patudhumu ne insaodi ini? Mai mobinasa kainsami gahaꞌa? Apandeꞌaangko, Hintu itu mie mongkilono katuduno Lahataꞌala.”

²⁵ Tamaka Yesus nohandapi seetani maitu ambano, “Koise mohobhoa, limbaꞌo toha maiꞌao ne mie aini!”

²⁶ Seetani nogegohao mie aitu maka nolimba bhe nopokakei-kei.

²⁷ Kosasawindo mie nopuli mentendo, sampe dopofee-feena ambado, “O ae gahaꞌa inia? Seꞌise kafoinaꞌu buꞌou. Pugauno noponoꞌao kuasa. Mahingga o seetani deangka ne pahintano.”

²⁸ Pada aitu bhihitano ini nehimba sepaliꞌa nolele ne kosekaꞌewaꞌae kadieno Galilea.

Yesus nofekaꞌosa ponia hobhineno Simon bhe mie sigaoꞌano dua 1:29-34

²⁹ Salimbando domaiꞌao ne lambu kasambaheaꞌa, Yesus, Yakobus bhe Yohanes dokala se lambudo Simon bhe Andreas.

³⁰ Ponia hobhineno Simon nandoo nendole-ndole mbaꞌinomo nosodoe. Sapesuano weo lambu, Yesus lasao dofohatoane sakino kamungkula amaitu.

³¹ Yesus nokalamo se kaodoꞌano, nointahamo limano maka nofowanue. Gahaꞌa sodono tanosipadaꞌamo. Hobhine aitu lasao netaganaanda daomaa.

³² Kamaꞌoleomo dua anaꞌa, nosoo kaowu oleo, dehatoanemo mie mosakino bhe mie nepesuakino seetani weo liwu.

³³ Dadiꞌanomo mieno liwu dowolo dofoꞌonu wutondo ne wiseno fointo.

³⁴ Alo amaitu dobhahi sepaliꞌa mie meepesino sabhaha saki nefekaꞌosano, dobhahi dua seetani nefolimbano. Seetani andoa naꞌa miina namotolalada dopugau, mbaꞌinomo andoa dopandeꞌaane laꞌae Yesus maitu.

Yesus nofofoinaꞌu we liwu sigaoꞌano 1:35-39

³⁵ Sanimentae sepaliꞌa, nandoo nohohondo, Yesus nowanumo maka nolimba we simbalino liwu. Nokalamo nosambahea te molinoꞌano.

³⁶ Gahaꞌa Simon bhe sabhangkaꞌino dokalamo doꞌondofie.

³⁷ Hato dopoꞌawaane dopugaumo ambado, “Guru! Kosasawindo mie doꞌondofiko.”

³⁸ Yesus tanotobhoosida ambano, “Dopansuhuanaomu we liwu sigaoꞌano ne owano ini, neanomo aefolele dua Bhihita Metaa ne watu, kapaꞌamo aituꞌaemo patudhuno kahatoꞌaku.”

³⁹ Pada aitu Yesus nolilimo we kadieno Galilea, nefolele Bhihita Metaa weo lambu-lambu kasambaheaꞌando bhe nefolimba seetani.

Yesus nefekaꞌosa kokuli modaino 1:40-45

⁴⁰ Nandoo seemie kokuli modaino nomai notaohao sombano ne wiseno Yesus. Mie aitu nefetulumi ambano, “Ane umunda, tetewei naembali mekaꞌosa kanau.”

⁴¹ Hampano nobhela lalono, Yesus nofonsoho limano maka nofedampae bhe nopugau, “O Idi aꞌunda, moꞌosaꞌo toha.”

⁴² Ne olotano namu-namu tanosimoꞌuhiꞌamo kuli modaino, uluno nonggelamo.

⁴³ Mie aitu lasao notudue nakumala bhe nofodhagae ambano,

⁴⁴ “Tandaiꞌe fekataa-taa, koise mekapu-kapunaa ne laꞌae-laꞌaemoa, ampamo kaowu, kalamo fotiwoha wutomu ne imamu. Namada anaꞌa, kapaꞌamo moꞌosamo, kalamo meowa dua kapopanga so Lahataꞌala peda neowiliꞌaono anabii Musa, so netandaindo mie bhahi putae hintu moꞌosamo.”

⁴⁵ Tamaka mie aitu nolili netula-tulaꞌao kadhadhia amaitu, sampe Yesus miinamo naembali namesua weo liwu ane dowohae mie bhahi. Yesus taneatemo we molinoꞌano. Tamaka mie bhahi maiꞌaono ne sabhaha liwu sadhia domaiꞌie dua.