Lukas 9 - Muna Southern Dialect

Yesus notudu anaguhuꞌino ompulu hoduano 9:1-6

¹ Palusi anaꞌa Yesus nosaliꞌimo anaguhuꞌino ompulu hoduano, nowaꞌanda kuasa bhe kapooli so daefolimbaꞌao seetani bhe so daefekaꞌosaꞌao sabhaha mie mosaki.

² Pada aitu notudadamo daefolele bhihita Kafopahintaꞌano Lahataꞌala bhe daefekaꞌosa mie mosaki.

³ Ambano Yesus, “Koise koniwowoꞌoomua weo kala-kalamiu, koise mewowoꞌoomu katuko, tawa kakaduno bhaku bhahaꞌi oti tawa dhoi tawa bhadhu nahaa tuwu.

⁴ Ane datumahimakoomu ne seꞌonu lambu, meateomu ne itu ampa humunsaomu liwu aitu.

⁵ Ane pae datumahimakoomu, hunsaomu kota aitu, mahingga bungahasi ne aꞌemiu tantaeꞌomu somo tandano kafodhagando.”

⁶ Pada anaꞌa anaguhuꞌino dokalamo doliligi sabhaha liwu defolele Bhihita Metaa bhe defekaꞌosa mie mosaki ne amai maka kahatoꞌando.

Herodes bhe Yesus 9:7-9

⁷ Kolaki Herodes mowano kadieno Galilea aitu, nofetingke sabhaha kadhadhia anaꞌa. Tamaka nopoibhaha dua lalono, kapaꞌamo nandoo mekapunano Yohanes suli nodadi.

⁸ Nandoo dua mugauno anabii Elia nofenduamo dua notiumba, maka nandoo dua mugauno putae seemie anabii ne dhamani wawono suli nodadi.

⁹ Tamaka ambano Herodes, “Yohanes ingka pada atotoꞌe wuꞌuno. Laꞌae bhahaa mie nefetingkeku humabuno sabhaha kadhadhia anaꞌa?” Dadiꞌanomo Herodes noꞌuleiꞌe lalono napoꞌawa bhe Yesus.

Yesus nepakande mie dolima hewu 9:10-17

¹⁰ Dosuli kaowu ne Yesus, rasulu detula-tulaanemo kosasawiꞌae nehabundo. Yesus nowowoꞌodamo dagumampi ne seꞌonu liwu, patudhuno tadamoisa. Neano liwu anaꞌa Betsaida.

¹¹ Tamaka mie bhahi dopandeꞌaane lasao doangkafie. Yesus notahimada maka nofoinaꞌuanda Kafopahintaꞌano Lahataꞌala bhe nofekaꞌosa mie mefaraluuno katotomata.

¹² Nepanda kaowu oleo domaimo anaguhuꞌino ompulu hoduano ambado, “Tududamo mie bhahi ini dasumuli, dokalaꞌao ne liwu-liwu bhe komieꞌano ne owa ini, daeꞌondofi kabutuꞌa bhe nehumaando. Kapaꞌamo intaodiomu ini we molinoꞌano.”

¹³ Tamaka Yesus tanopugau ambano, “Hintimiu so makandeda.” Anaguhuꞌino dotobhoosimo ambado, “Ingka roti lima onu kaowu ndumandooꞌano bhe kentano haa ulu. Bhahaa tabeano takumala taeꞌoli oti so mie bhahi inia?”

¹⁴ Humatono ne itu moꞌane kaowu dapelima hewu kabhahindo. Nopugaumo toha Yesus ne anaguhuꞌino ambano, “Tududaomu daengkoha datumombu-tombu wutondo dapelima fulu setombu.”

¹⁵ Anaguhuꞌino doangkafi katuduno, maka kosasawindo mie bhahi naꞌa dofongkohada.

¹⁶ Pada noala roti lima onuno bhe kenta haa uluno naꞌa, Yesus nototohanamo te lani, nefoampe katumpuno lalo ne Lahataꞌala. Pada anaꞌa roti aitu nobhebhehaemo maka nowaꞌandae anaguhuꞌino dadumawu-dawuandae mie bhahi.

¹⁷ Kosasawindo dohumaa ampa doweꞌi. Pada dohumaa dofoꞌonumo kabhilaꞌando, nopono ompulu haa kalangka.

Kamangakuno Petrus 9:18-21

¹⁸ Sewakutuu tangasano Yesus nosambahea nomoisa domaiꞌiemo anaguhuꞌino. Yesus nofeenadamo ambano, “O mie dokona kanau laꞌae bhahaa Idi ini?”

¹⁹ Dotobhoosimo ambado, “Nandoo kumonako Yohanes Fokadiuno, nandoo kumonako dua anabii Elia, tamaka nandoo dua mugauno seemie anabii dhamani wawono suli nodadi.”

²⁰ Yesus nofeenadamo dua ambano, “Ane hintimiu, kona kanauꞌomu laꞌae Idi ini?” Notobhoosimo Petrus, “Hintumo Mesias, Omputo Fosalamatino maiꞌaono ne Lahataꞌala.”

²¹ Tamaka Yesus noꞌeleꞌaandamo sepaliꞌa daekapuna ne laꞌae maka dua.

Kafohato kabhao-bhaono kakadee-deeno Yesus 9:22-27

²² Nopugaumo Yesus ambano, “Anano Manusia tetewei nabhahi naenamisi kakadee-dee bhe dabansie kamu-kamungkulaꞌi, neangkaꞌindo imamu bhe pande-pande Kitabi, damongkoe maka ne katolu oleono namanu namaiꞌao ne mate.”

²³ Kosasawindo nofohatodamo ambano, “Laꞌae maka so mangkafi kanau tabeano nahumunsa kafaraluuno wutono, natumongku sau salipuno seꞌo-seꞌoleo ⸤ maꞌanano doꞌunda mahingga damate⸥ maka namangkafi kanau.

²⁴ Laꞌae so potaamiꞌaono inawano, namiinae inawano. Tamaka laꞌae miinaeno inawa mbaꞌinomo noangkafi Idi, tetewei namehapi dadi mpuuno.

²⁵ O ae fahalaano seemie manusia naeꞌawa kosasawiꞌae kahangkaeano dhunia ini tamaka naohugiꞌao inawano bhe nabinasa?

²⁶ Kapaꞌamo ane doambano doangkafi kanau bhe kafoinaꞌuku, Anano Manusia naoambanoane dua mie aitu humato namai weo kakalabhiano wutono bhe kakalabhiano Amano, dalumibu-libue malaꞌekati mongkilono.

²⁷ Amohatokoomu, kotu-kotuꞌu ne olotando mie meehe-eheno aitu nandoo so tapaꞌo mateno ane paeꞌo daoha Kafopahintaꞌano Lahataꞌala.”

Anaguhiꞌino dowoha kakakalabhiano Yesus te kabhawo 9:28-36

²⁸ Napealu oleo pada nofofoinaꞌu peda naꞌa Yesus nowowoꞌomo Petrus, Yohanes bhe Yakobus dofoni te kabhawo dosambahea.

²⁹ Gahaꞌa tangasano dosambahea ulano Yesus tanotibhaliimo, pakeano nopute kosilo.

³⁰ Dotiwohamo dua mie dohodua dopotula-tula bhe Anoa, andoa ini anabii Musa bhe anabii Elia.

³¹ Kohoduando dotiwoha weo kakalabhiando dopuga-pugauꞌao takano so nedhalangino, so kamateꞌano we Yerusalem.

³² Wakutuu aitu Petrus bhe sabhangkaꞌino dempaumo sampe doodo. Hato dowanu, gahaꞌa dowohamo Yesus weo kakalabhiano bhe mie hoduano naꞌa deehe-ehe ne sohihino.

³³ Wakutuuno mie hoduano damealaimo Yesus, nopugaumo Petrus ambano, “Guru, netaa domaiꞌomu ne ini! Naetaa taefoehe natolu bhantea, seꞌonu so Hintu, seꞌonu so anabii Musa bhe seꞌonuno so anabii Elia. Tamaka Petrus miina namandeꞌaane maꞌanano pugauno naꞌa.

³⁴ Tangasano nopugau peda naꞌa tanokaolumidamo olu. Sapesuando weo olu naꞌa doteꞌimo sepaliꞌa.

³⁵ Tanotifetingkemo dua suaha nomaiꞌao weo olu naꞌa ambano, “Ainimo Anaku nepiliku, fetingkeeꞌomu.”

³⁶ Pada dofetingke suaha naꞌa, anaguhuꞌino dowohamo Yesus tanomoisa. Kadhadhia aini doforahasiaꞌe, miina sepaliꞌa daetula-tulaane newohando naꞌa ne laꞌae maka dua.

Yesus nefekaꞌosa anaꞌi nepesuakino seetani 9:37-43 a

³⁷ Nomentae kaowu ⸤ Yesus bhe anaguhuꞌino totoluno⸥ dosampumo maiꞌao te kabhawo. Gahaꞌa dohatomo mie bhahi dobhatompa dopoꞌawaꞌao Yesus.

³⁸ Seemie ne olotando mie bhahi naꞌa nopugaumo nofekabhala-bhala suahano ambano, “Guru, aesalo umondo anaku, anaku ini kaenseemie kaꞌasi.

³⁹ Tambaꞌomo giagi nokuasaiꞌe seetani sampe tanopokakei-keimo. Seetani anaꞌa nogegohaꞌiane nokokida-kida bhe uluno, nokobuha-buha bhe wobhano. Sadhia nofodee-deeꞌe, gaono paemo sepaliꞌa nahumunsaea.

⁴⁰ Padamo dua aesalo ne anaguhuꞌimu damolimba seetani aini tamaka miina damondoiꞌea.”

⁴¹ Ambano Yesus, “Pahasili hintimiu, mie tapa marasaeano bhe kolilinono totono lalo! Tana seꞌae gahaꞌa beano so kaomponanoa aeate bhe hintimiu? Tana seꞌae bhahaa so sabahaku? Owa kanaꞌe se ini anamu itu!”

⁴² Tangasano nekala-kala nohope ne Yesus, seetani nohambitaꞌiao anaꞌi aitu ne wite maka nogegohaane. Tamaka Yesus tanobhoohai seetani anaꞌa, nofekaꞌosa anaꞌi aitu maka nofosulie ne amano.

^43a Kosasawindo mie ne itu tadomente dowoha kuasano Lahataꞌala kumalabhiano.

Kafohato kahaa pakuno so kakadee-deeno Yesus 9:43b-45

^43b Tangasano mie bhahi maitu dopokamente-menteꞌao sabhaha nehabuno, Yesus nopugaumo ne anaguhuꞌino,

⁴⁴ ambano, “Taꞌoomu tingalamiu, tandaiꞌeomu pugauku ini. Anano Manusia daowae ne kuasano manusia.”

⁴⁵ Anaguhuꞌino miina damandeꞌaanea maꞌanano pugauno naꞌa hampano nandoo notifebuni so andoa, tapamo katilosangiꞌano. Andoa miina dua daokadoa dameenaꞌao maꞌanano pugauno naꞌa.

Foliuno kabhala ne olotando anaguhuꞌino Yesus 9:46-48

⁴⁶ Pada peda maitu anaguhuꞌino Yesus tadopotaga-tagaliꞌaomo dua laꞌae foliuno kabhala ne olotando andoa maitu.

⁴⁷ Tamaka Yesus nopandeꞌaane fekihindo. Dadiꞌanomo netondamo seemie anaꞌi kahobu maka nofoehe-ehee ne sohihino.

⁴⁸ Yesus nopugaumo ambano, “Laꞌae tumahimano anaꞌi aini weo neaku notahimamo Idi. Laꞌae tumahimano Idi notahima dua Tumudu kanau. Kapaꞌamo foliuno kahobu ne olotamiu itu, anoamo itu foliuno kabhala.”

Seemie suano anaguhuno Yesus nefolimba seetani 9:49-50

⁴⁹ Nopugaumo Yohanes ambano, “Guru, tawoha seemie nefolimba seetani nopake neamu, lasao taꞌeleꞌaane hampano suano mie mangkafino intaodiomu ini.”

⁵⁰ Yesus tanotobhoosi ambano, “Koise eleꞌaaneomua, kapaꞌamo mie tapa mewangikoomu, ingka o sabhangkamiu.”

Miendo Samaria dongahe datumahima Yesus 9:51-56

⁵¹ Nomaꞌo kaowu tempono katisangkeꞌano te surugaa, Yesus neꞌonumo lalono nakumala we Yerusalem.

⁵² Anoa nopakatumo katuduno dopaꞌindulukie. Katuduno maitu dokalamo dopesua ne seꞌonu liwundo miendo Samaria, daefotokaane sabhaha kafaraluuno.

⁵³ Gahaꞌa miendo liwu naꞌa dongahe datumahimae, mbaꞌinomo kala-kalano nahumope we Yerusalem.

⁵⁴ Dowohae kaowu peda naꞌa dohodua anaguhuꞌino, Yakobus bhe Yohanes dopugaumo ambado, “Ompu, poindalo bhahaa taesalo efi maiꞌao te lani nahumampuniꞌao andoa ini?”

⁵⁵ Tamaka Yesus nodolikida bhe nofeꞌalada.

⁵⁶ Pada aitu dokalamo we liwu sigaoꞌano.

Mie so mangkafino Yesus 9:57-62

⁵⁷ Tangasano Yesus bhe anaguhuꞌino dofopansuhu kala-kalando, nopugaumo seemie ambano, “Guru, amangkafiko ne amai maka so kakalaꞌamu.”

⁵⁸ Yesus notobhoosimo ambano, “Daꞌu ngkahoku bhe liano, kaꞌuhi lumola bhe kaufeno, tamaka Anano Manusia miina sepaliꞌa bhe katifekalaaꞌiꞌano towuno.”

⁵⁹ Pada aitu nopugaumo ne seemie ambano, “Angkafi kanau!” Tamaka mie aitu tanopugau ambano, “Folalesa kanau asumuli kadeki akumobuhu amaku.”

⁶⁰ Tamaka Yesus nopugaumo ambano, “Hunsaꞌanomo mie mate dakumobuhu mie mate bhaindo, tamaka hintu kala folele bhihita Kafopahintaꞌano Lahataꞌala.”

⁶¹ Nandoo dua seemie nopugaumo ambano, “Amangkafiko Ompu, tamaka folalesa kanau kadeki amealai ne meateno se lambuku.”

⁶² Tamaka Yesus tanopugau ambano, “Laꞌae tangasano melukuno maka sadoli we kundo, pae nakofahalaa weo Kafopahintaꞌano Lahataꞌala.”