Lukas 8 - Muna Southern Dialect

Hobhine umondofaono Yesus 8:1-3

¹ Miina naomponaa pada anaꞌa Yesus noliligimo kota bhe liwu nefolele Bhihita Metaa Kafopahintaꞌano Lahataꞌala. Weo kala-kalano naꞌa dopobhaiane anaguhuꞌino ompulu hoduano,

² bhe hobhineꞌi nefekaꞌosano nomaiꞌao ne kuasano seetani bhe ne sabhaha saki. Andoa naꞌa Maria nekonando dua Magdalena, pada nofolimbaane fitu bansa seetani mesuakie;

³ Yohana hobhineno Kusa, Susana bhe hobhineꞌi sigaoꞌano. Kusa naꞌa mandeꞌaonomo kamalino kolaki Herodes. Hobhine andoa ini doꞌondofao kafaraluuno Yesus bhe sabhangkaꞌino dopake kanandoodo wutondo.

Kapalendano meꞌewino wine 8:4-15

⁴ Mie bhahi dosipumpu kansuhu ne Yesus domaiꞌao ne sabhaha kota. Dobhahi kaowu humompuno, nopugaumo nepakeanda kapalenda.

⁵ Ambano, “Nandoo seemie mekaampono nokala neꞌewi wine. Tangasano noꞌewi wine maitu nandoo mondawuꞌano ne kaangkaꞌa, gahaꞌa doangka mie dofinda-findaꞌie bhe dopadae dohumaaꞌe kaꞌuhi lumola.

⁶ Sigaꞌa nondawu ne kamoꞌali, hato notumbu lasao noleleu mbaꞌinomo miina naeꞌawa oe.

⁷ Sigaꞌa nondawu ne wunta-wuntano kahoku kokihi notumbu nopoowa-owa, tamaka noꞌontiꞌie kahoku kokihi naꞌa ampa nomate.

⁸ Sigaoꞌano dua nondawu ne wite menowu, hato nokobhake sampe moꞌono lentuꞌa kabhahino.” Pada nopugau peda naꞌa, Yesus nopugaumo nofekabhala suahano, “Ane dokotingala, tabeano dametingke!”

⁹ Pada aitu anaguhuꞌino dofeenaꞌaomo maꞌanano kapalenda saꞌituini ne Yesus.

¹⁰ Anoa notobhoosidamo ambano, “Hintimiu dowaꞌangkoomu kadawu so mandeꞌaoꞌomu rahasiano Kafopahintaꞌano Lahataꞌala, tamaka mie sigaoꞌano dofohatoda weo kapalenda, neanomo mahingga daꞌumondo-ondoe pae damohaea, mahingga dametingke pae dalumosangiea.

¹¹ Maꞌanano kapalenda saꞌituini peda aini. O wine naꞌa bhoasaono Lahataꞌala.

¹² Mondawuꞌano ne wiwino kaangkaꞌa maꞌanano mie metingkeno tamaka nomai Kafeompuꞌando seetani noala bhoasao anaꞌa maiꞌao weo totono lalondo keana doparasaea, keana dua dosalamati.

¹³ Mondawuꞌano ne kamoꞌali, maꞌanano mie metingkeno bhoasaono Lahataꞌala naꞌa, lasao dotahimae bhe doꞌiaꞌane, tamaka miina nakopahakaa weo totono lalondo. Doparasaea sebantaha kaowu, sadeꞌawa kasabha dohunsa kaparasaeando kosowo-sowondo.

¹⁴ Mondawuꞌano weo kahoku kokihi maꞌanano mie metingkeno bhoasaono Lahataꞌala tamaka nobhahi dofekihi so kadadiꞌando, so kahangkaeando bhe so kambakano namisindo. Kosasawiꞌae naꞌa nopesua weo totono lalondo maka noꞌontiꞌi bhoasaono Lahataꞌala sampe miina nakohasilia.

¹⁵ Mondawuꞌano ne wite menowu maꞌanano mie metingkeno bhoasaono Lahataꞌala, dofekataaꞌe mpuu weo totono lalondo metaaꞌano. Andoa dopotaami kansuhu ampa dokohasili.”

Kapalendano kantalea 8:16-18

¹⁶ Nopugaumo toha Yesus ambano, “Miina bhe mesulano kantalea maka dosongkowiane bhengki tawa doteiꞌe we pandano kaodoꞌa. Tamaka ane desula kantalea dohunsae ne kangkailaoꞌano neanomo kosasawindo mie mesuano weo lambu damoha tilangano.

¹⁷ Kapaꞌamo kosasawiꞌae tifebuniꞌano damotiumbae, sabhaha rahasia damekantaleaꞌie bhe damolelee ne mie bhahi.

¹⁸ Dadiꞌanomo taꞌo tingalamu fekataa-taaꞌe! Laꞌae kokanandoono datumubhahiane; tamaka tapa kokanandoono, o ae maka dua nekonano kanandoono damalae.”

Inano bhe bhahitieꞌino Yesus 8:19-21

¹⁹ Pada aitu dohatomo inano bhe bhahitieꞌino Yesus tamaka miina damoolia dapoꞌawaane hampano kabhahindo mie.

²⁰ Dofohatoemo mie ambado, “Inamu bhe bhahitieꞌimu deehe-ehe we simbali, gaondo dapoꞌawaangko!”

²¹ Tamaka Yesus tanotobhoosi ambano, “Mie metingkeno bhe dhumalangino bhoasaono Lahataꞌala, andoamo ini inaku bhe bhahitieꞌiku.”

Yesus nefoonto kawea moꞌosa 8:22-25

²² Seꞌoleo Yesus bhe anaguhuꞌino dosawimo ne bhangka maka nopugauanda ambano, “Dopolimbaanaomu we sewetano!” Dadiꞌanomo dobhosemo.

²³ Tangasano dohela Yesus noodomo. Gahaꞌa tanosihatoꞌamo gahuha weo teꞌi naꞌa sampe bhangkando noiꞌi dewisekimo balaa.

²⁴ Anaguhuꞌino lasao dofowanue, ambado, “Guru, guru, dabinasamoomu.” Yesus nowanu lasao nobhoohai kawea bhe oe mamuhuno maitu, sampe dofeontomo. Oeno teꞌi suli nolinto.

²⁵ Ambano Yesus, “Ne amai gahaꞌa kaparasaeamiu?” Anaguhuꞌino doteꞌi bhe domente maka dopuga-pugau sapada-pada andoa ambado, “O mie ae bhahaa Anoa ini? Mahingga nepahintangi kawea bhe oe doangkafie!”

Yesus nefolimba seetani nomaiꞌao ne miendo Gerasa 8:26-39

²⁶ Yesus bhe anaguhuꞌino dosedemo we liwundo miendo Gerasa we sewetano teꞌino Galilea.

²⁷ Safonino te wite nosumpuiꞌemo seemie moꞌane nomaiꞌao ne kota aitu. Mie anaꞌa nopesuakie seetani; nomponamo nelembi, miina naeate weo lambu tamaka neate ne tombuno lia kafokobuhuꞌa.

²⁸ Sanowoha Yesus nekei-keimo maka nosudhumo notaohao sombano bhe nopugau ampa kabhalano suahano, “O ae patudhumu ne idi ini, Yesus Anano Lahataꞌala foliuno kuasa? Aesalo mpuu koise fodee-dee kanaua.”

²⁹ Kapugauꞌano peda naꞌa mbaꞌinomo Yesus nopahintangi seetani naꞌa nalumimba namaiꞌao ne mie aitu. Seetani anaꞌa nentelamo nokuasai mie amaitu. Mbali nomudaꞌao dhaganiꞌano dohantee bhe dolangkee, tamaka katapuno naꞌa nopadae nobhotulie maka nowowoꞌoe seetani we pada molinoꞌano.

³⁰ Yesus nofeenamo ambano, “Laꞌae gahaꞌa neamu?” Ambano, “Neaku Legion”, kapaꞌamo dobhahi seetani mesuakie.

³¹ Pada peda naꞌa seetani maitu desalomo ne Yesus koise natumududa damesua weo ola tapa kotompa.

³² Ne itu nandoo kawaindo wewi ⸤ nekanea⸥ tangasano doliwu te laano kabhawo. Seetani andoa naꞌa desalomo ne Yesus naꞌumundaꞌaanda damesuaki kawaindo wewi aitu. Yesus noꞌundapi kamesalondo.

³³ Dadiꞌanomo seetani lasao dolimba maiꞌao ne mie aitu maka dopesuaki kawaindo wewi naꞌa. Kosekawaindo wewi maitu dofilei we wiwino pimpi maka doꞌohofi wutondo weo teꞌi sampe dolomo.

³⁴ Sadowoha kadhadhia aitu, dhagaꞌino wewi ⸤ kakanea⸥ naꞌa lasao dofilei defolele bhihita we kota bhe liwu-liwu momaꞌoꞌano.

³⁵ Dadiꞌanomo miendo liwu dofisilimba-limbaꞌamo daꞌumondo kadhadhia anaꞌa. Dohato ne Yesus, dowohamo mie nekadunsano seetani naꞌa nengkoha-ngkoha ne wiseno Yesus, nokopakeamo bhe nototomo. Andoa doteꞌi sepaliꞌa.

³⁶ Mie mohaꞌaono wuntano matano kadhadhia amaitu dofohatomo mie bhahi peda amai mie nepesuakino seetani maitu dofosalamatie.

³⁷ Pada naꞌa kosasawindo mie ne kadieno Gerasa maitu desalo ne Yesus nakumalamo napikihunsaꞌao liwundo, kapaꞌamo doteꞌi sepaliꞌa. Dadiꞌanomo Yesus nosawimo ne bhangka maka dahumela dasumuli kundodo.

³⁸ Gahaꞌa mie nehunsano seetani naꞌa nesalomo ne Yesus naꞌumundaꞌaane namangkafie. Tamaka Yesus notudue nakumala ambano,

³⁹ “Sulimo se lambumu maka metula-tulaꞌaomo sabhaha nehabuno Lahataꞌala ne wutomu.” Dadiꞌanomo mie aitu noliligimo kosekaꞌewaꞌae kota nopoleleꞌao sabhaha nehabuno Yesus ne wutono.

Yesus nofodadi anano Yairus bhe nefekaꞌosa seemie hobhine 8:40-56

⁴⁰ Hato nosuli, mie bhahi doꞌia sepaliꞌa dosumpuiꞌemo hampano kosasawindo daanumo doanta-antagiemo.

⁴¹ Gahaꞌa nomaimo seemie mandeꞌaono lambu kasambaheaꞌa, neano Yairus. Anoa nosudhu notaohao sombano nesalo ne Yesus nakumala se lambuno,

⁴² kapaꞌamo anano hobhine kaenseemie tamateꞌano; umuhuno napeompulu haa taꞌumo. Weo kala-kalano dahumope se lambuno Yairus, mie bhahi dopoꞌua-ua ne sohihino Yesus.

⁴³ Gahaꞌa ne itu nandoo seemie hobhine, ompulu haa taꞌumo nomaiꞌie kansuhu wulano miina bhe katiehea. Tanopadamo kanandoono nopoagoane, tamaka bhe seemie miina bhe moolie.

⁴⁴ Hobhine aitu nomaꞌoti Yesus maiꞌao we kundo maka nodingku dhambeno dhubano. Gahaꞌa tanosimoꞌosaꞌamo, o hea nofetumpumo.

⁴⁵ Ambano Yesus, “Laꞌae gahaꞌa dumingku kanau?” Tamaka miina bhe mekapunano. Dadiꞌanomo nopugaumo Petrus ambano, “Guru, ingka wohada kabhahindo mie lumibuko bhe umua-uako!”

⁴⁶ Tamaka ambano Yesus, “Nandoo seemie dumingku kanau, kapaꞌamo anamisi bhe kuasa lumimbaꞌano maiꞌao ne wutoku.”

⁴⁷ Nopandeꞌaomo lalono gahaꞌa habuno maitu notipandeꞌaomo, hobhine maitu nodhulu te wise nogugue kateꞌino. Lasao nosudhu notaohao sombano ne Yesus maka netula-tula ne mie bhahi noafa katidingkuꞌano Yesus bhe peda amai tanosimoꞌosaꞌamo.

⁴⁸ Ambano Yesus ne hobhine anaꞌa, “Anaku, hampano kaparasaeamu ne Idi, osalamatimo. Kalamo weo katohopo.”

⁴⁹ Tangasano Yesus nopugau, nohatomo seemie katudu maiꞌao we lambuno Yairus bhe nopugau ambano, “Anamu nomatemo, koemo dua fekasabha Gurua.”

⁵⁰ Tamaka Yesus nofetingkee, tanopugau ne Yairus ambano, “Koe tikendaa, taparasaeamo ne Idi, anamu tetewei nasumalamati.”

⁵¹ Sahatondo se lambuno Yairus, Yesus miina naꞌumundaꞌaanda damangkafie weo lambu, ampamo Petrus, Yohanes bhe Yakobus, poowa inano bhe amano anaꞌi anaꞌa.

⁵² Kosasawindo mie dekangkoꞌae doꞌaefimo anaꞌi aitu. Tamaka Yesus tanopugau ambano, “Koise moꞌaeꞌomua, anaꞌi aini miina namatea tamaka noodo.”

⁵³ Gahaꞌa mie bhahi tadofuta-futaaꞌi Yesus kapaꞌamo anaꞌi aitu dopandeꞌaane nomatemo.

⁵⁴ Pada anaꞌa Yesus nointahamo limano anaꞌi aitu bhe nopugau ambano, “Anaku wanuꞌo toha!”

⁵⁵ Inawano anaꞌi aitu nosuli maka tanosiwanuꞌamo. Yesus notududamo damakandee.

⁵⁶ Kamungkulano anaꞌi anaꞌa domente sepaliꞌa, tamaka Yesus noꞌeleꞌaanda daetula-tulaꞌao kadhadhia aitu ne laꞌae maka dua.