Lukas 7 - Muna Southern Dialect

Yesus nofekaꞌosa bhatuano neangkando tantara we Kapernaum 7:1-10

¹ Nopalusi nofohatoanda bhahi-bhahiꞌae naꞌa ne mie bhahi, Yesus nopesuamo we kotano Kapernaum.

² Ne itu nandoo seemie neangkando tantarano Roma, bhatuano nosaki moꞌosa tamateꞌano. Bhatuano naꞌa noasiane sepaliꞌa.

³ Nofetingke bhihitano Yesus, neangkando tantara maitu netudumo seemie hodua kamungkulaꞌindo miendo Yahudi dakumala daesalo ne Yesus namai namekaꞌosa bhatuano.

⁴ Dohato se Yesus, mie netuduno maitu desalo mpuu katulumino ambado, “Neangkando tantara maitu nopantasi mpuu tumulumie,

⁵ kapaꞌamo noasiꞌao sepaliꞌa intaodiomu miendo Yahudi ini, padamo dua nefoehe kainsami lambu kasambaheaꞌa.”

⁶ Dadiꞌanomo Yesus nosekala-kalaꞌamo bhe andoa. Domaꞌo bhe lambuno, neangkando tantara naꞌa notudumo sabhangkaꞌino dakumala damugau ne Yesus ambado, “Waompu, koemo mosabha kapaꞌamo miina amantasia mesuaki lambuku.

⁷ Kanandooꞌanomo aabhi wutoku miina amantasia amai ne wisemua, ampamo kaowu tapugaumo nasewobha wamba maka bhatuaku maitu tetewei naoꞌosa.

⁸ Kapaꞌamo idi ini bhe neangkaku dua, maka nandoo dua tantara neowaku. Ane apugau ne seemie tantara, ‘Kala!’ lasao nokala. Ane apugau ne seemieno dua, ‘Mai!’ lasao nomai. Pedamo dua aitu ane apugau ne bhatuaku, ‘Kahadhaa aini!’ lasao nokahadhaaꞌe.”

⁹ Nofetingke pugau anaꞌa, Yesus tanomente. Poowa nodoli ne mie bhahi mangkafie, nopugaumo ambano, “Amohatokoomu, kabhalano kaparasaea pedando ini miinaꞌo sepaliꞌa apoꞌawaane ne olotando miendo Israel.”

¹⁰ Gahaꞌa hato dosuli mie netudu naꞌa se lambuno neangkando tantara maitu, bhatuano noꞌosamo.

Yesus nefodadi seemie anaꞌi moꞌane mateno we kota Nain 7:11-17

¹¹ Miina naomponaa pada anaꞌa Yesus nokalamo we seꞌonu kota nekonando Nain. Anaguhuꞌino dopobhaiane bhe doangkafida dua mie bhahi.

¹² Nomaꞌo bhe kaguali bhalano mesuaꞌano weo kota nandoo katongkuno mie mate dolimbaane maiꞌao weo kota. Mateꞌano naꞌa anaꞌi moꞌane kaenseemie, anano bhihinanda. Dobhahi sepaliꞌa miendo kota poangkaꞌaono hobhine naꞌa.

¹³ Nowoha bhihinanda aitu, Ompu Yesus nobhelaanemo lalono maka nopugau ambano, “Koise moꞌaea.”

¹⁴ Pada aitu nodhulupimo katongkuno maeati maka nodampasie sampe mie metongkuno dofetumpu. Nopugaumo Yesus ambano, “Anaꞌi moꞌane, ambaku wanuꞌo toha!”

¹⁵ Anaꞌi moꞌane mateno naꞌa lasao nowanu nengkoha bhe nopugau, maka Yesus nowaꞌanemo inano.

¹⁶ Kosasawindo mie bhahi doteꞌimo bhe dopudhi Lahataꞌala ambado, “Seemie anabii bhalano notiumbamo ne wunta-wuntantoomu. Lahataꞌala nodongawimo umatino natumulumida.”

¹⁷ Bhihitano Yesus ini nolelemo ne kosekaꞌewaꞌae witeno Yudea bhe liwu pomaꞌo-maꞌotiꞌano.

Yesus bhe Yohanes Fokadiuno 7:18-35

¹⁸ Yohanes Fokadiuno nofetingke bhihitano sabhaha kadhadhia anaꞌa ne anaguhuꞌino.

¹⁹ Nesaliꞌimo dohodua maka notududa dakumala dameena Ompu Yesus nada aini, “Hintumo bhahaa so humatono peda nedhandiꞌaono Lahataꞌala maitu, kaa taeantagi dua mie sigaoꞌano?”

²⁰ Dohato ne Yesus mie katuduno maitu dopugaumo ambado, “Yohanes Fokadiuno notudu kainsami tameenako, hintumo bhahaa so humatono peda nedhandiꞌaono Lahataꞌala, kaa taeantagi dua mie sigaoꞌano?”

²¹ Wakutuu anaꞌa dobhahi mie nefekaꞌosano Yesus nomaiꞌao ne sabhaha saki bhe kakadee-dee. Nobhahi dua seetani nefolimbano bhe kabunto nefowulano matando sampe dofowoha.

²² Dadiꞌanomo Yesus tanotobhoosidamo ambano, “Sulimoomu fohatoomu Yohanes, fohatoaneomu o ae newoha bhe nefetingkemiu: kabunto suli dofowoha, mie kalu dekala-kala, kokuli modaino donggela, kapongke dofofetingke, mie mate suli dodadi, bhe mie ngkumaasi-asi defebhihitaianda Bhihita Metaa.

²³ Dokodawua mpuu mie tapa mongaheꞌi kanau hampano kandidikino lalo.”

²⁴ Dokundo kaowu katuduno Yohanes maitu Yesus nopugaumo ne mie bhahi nopulaoꞌao Yohanes ambano, “Kala meꞌondoomu ae gahaꞌa we pandaso bhalano endefiꞌini? Meꞌondo-ondoomu wulu neangko-angkono kawea bhahaa?

²⁵ Ane miina kala meꞌondoomu ae bhahaa? Meꞌondo-ondo mie kopakea alusuno? Mie kopakea alusuno bhe dumadi pontalabhi-labhino ingka deate weo kamali.

²⁶ Kaowu kala meꞌondoomu ae? Mefeꞌondoomu seemie anabii? Ingka anoamo, bhahamoa noliuꞌe anoa bhe seemie anabii.

²⁷ Kapaꞌamo Yohanes inimo nepulaoꞌaono wambano Kitabi aini, ⸤ Ambano Lahataꞌala⸥ ‘Anoamo itu katuduku, atudue namaꞌinduluangko, naebhongkaangko kaangkaꞌa te wisemu.’

²⁸ Amohatokoomu, ne olotando mie lumenteno ne dhunia ini miina bhe moliuno Yohanes Fokadiuno, tamaka foliuno kahobu weo Kafopahintaꞌano Lahataꞌala nofoliuꞌe kabhala.”

²⁹ Kosasawindo mie metingkeno pugauno naꞌa, notilentumo dua mealaꞌino sewa, doꞌuumbetimo patudhuno Lahataꞌala, hampano padamo doowa wutondo nokadiuda Yohanes.

³⁰ Tamaka miendo Farisi bhe pande-pande Kitabi doewangi patudhuno Lahataꞌala, mbaꞌinomo dongahe nakumadiuda Yohanes.

³¹ Ambano Yesus, “Apoꞌibahatiane bhe ae bhahaa mie ne dhamani aini? Apototoanda bhe ae bhahaa?

³² Andoa ini tapedamo kaana-anaꞌi mengkoha-ngkohano ne daoa maka dopoloꞌo-loꞌoi ambado, ‘Ingka taetempaangkoomu ganda gahaꞌa miina lumindaomu, taelagu-laguangkoomu kapea, ingka miina mekangkoꞌaeꞌomua.’

³³ Kapaꞌamo Yohanes nohato, miina naomaa miina naohoꞌua, ambamiu, ‘Anoa maitu nopesuakie seetani.’

³⁴ Pada anaꞌa Anano Manusia - Idimo ini - nohato nohumaa nofohoꞌu, ambamiu, ‘Soba ondoomu, mie kumadau-dau bhe pande fohoꞌu, sabhangkando mealaꞌino sewa bhe mie kodhosa.’

³⁵ Tamaka timbangino Lahataꞌala notipandeꞌao kakotuꞌuno ne kosasawindo mie tumahimae.”

Yesus nominakie seemie hobhine we lambuno Simon 7:36-50

³⁶ Seemie Farisi ⸤ koneaꞌano Simon⸥ nobhasi Yesus daomaa we lambuno. Yesus nokalamo se lambuno maka nengkoha nohumaa.

³⁷ Ne kota anaꞌa nandoo seemie hobhine tiende-endeno mie kodhosa. Nofetingke Yesus tangasano nohumaa we lambuno mieno Farisi naꞌa, hobhine aitu nomaimo newowoꞌo kabuto-butolo kani noponoꞌao mina-mina kawondu.

³⁸ Nohato neehe-ehemo we kundono Yesus ne owano aꞌeno bhe noꞌae. Luuno nopotuhu ne aꞌeno Yesus maka noꞌapuleiane wuluno fotuno bhe nowonoe. Aꞌeno Yesus naꞌa nominakianemo dua mina-mina kawondu saꞌituini.

³⁹ Nowoha aitu, mieno Farisi bhasino Yesus naꞌa nokomuntumo we lalono, “Ane anoa ini kotu-kotuꞌu seemie anabii, tetewei namandeꞌaane laꞌae hobhine dumampasie ini, peda ae podiuno, ingka o mie kodhosa.”

⁴⁰ Pada aitu Yesus nopugaumo ne kolambuno naꞌa ambano, “Simon, nandoo so nefohatoꞌaoku ne hintu.” Ambano Simon, “Tapugaumo paꞌaa Guru.”

⁴¹ Ambano toha Yesus, “Nandoo dohodua kodosano ne seemie fofodosaꞌaono dhoi. Seemie nokodosa lima moꞌono woka pera, seemieno lima fulu.

⁴² Hampano miina damondoiꞌe dofosulie, fofoadano naꞌa nofosaliemo dosando kohoduando. Laꞌae bhahaa ne olotando hoduano ini so foliuno kamoasiꞌao ne kodhoino naꞌa?”

⁴³ Notobhoosimo Simon ambano, “Fenaiku mobhahiꞌano dosa nefosalino saꞌituini.” Ambano Yesus, “Nokotuꞌu fekihimu naꞌa.”

⁴⁴ Poowa nodoli ne hobhine naꞌa, Yesus nopugaumo ne Simon ambano, “Wohae bhahaa hobhine aini? Idi apesua weo lambumu, tamaka miina maꞌa kanau oe so amewaniuꞌao aꞌeku. Gahaꞌa hobhine aini nobhehei aꞌeku nopake luuno maka noꞌapuleiane wuluno fotuno.

⁴⁵ Hintu miina wono kanau ⸤ tandano dopoꞌawa⸥ , tamaka hobhine aini notanda apesua weo lambumu ini miina nameo-meontoa nowono aꞌeku.

⁴⁶ Fotuku miina kumatandaane mina-mina ⸤ katandaino kafosibhalamu ne Idi⸥ , tamaka hobhine aini nominaki aꞌeku nepake mina-mina kawondu moꞌaliꞌano.

⁴⁷ Dadiꞌanomo amohatoko, kabhalano kamoasiꞌaono ini nofotiwohaemo putae dhosano mobhahiꞌano maitu notiꞌamponimo. Tamaka o mie seendaiꞌano dhosa tiꞌamponiꞌano, seendai kaowu dua kamoasiꞌaono.”

⁴⁸ Pada aitu Yesus nopugaumo ne hobhine anaꞌa ambano, “Dhosamu notiꞌamponimo.”

⁴⁹ O mie sigaoꞌano mengkoha-ngkohano momaano bhe Yesus nokodukumo we lalondo, “Laꞌae bhahaa mie aini sampe neꞌamponi dhosa?”

⁵⁰ Tamaka Yesus nopugaumo dua ne hobhine anaꞌa, “Hampano parasaea ne Idi, osalamatimo. Kalamo weo katohopono lalo!”