Lukas 6 - Muna Southern Dialect

Anaguhuꞌino Yesus detobhe gandum ne oleono Sabat 6:1-5

¹ Ne oleono Sabat tangasano Yesus nolalo weo kaampono gandum, anaguhuꞌino detobhemo wunano gandum, tadokokiꞌao limando maka dohumaaꞌe.

² Tamaka seemie hodua miendo Farisi dopugau ambado, “Noafa melempagiꞌaoꞌomu faliano oleono Sabat?”

³ Tamaka Yesus notobhoosida ambano, “Miinaꞌo basaeꞌomu gahaꞌa nehabuno Omputo Daud wakutuuno wutono bhe mie mangkafie doꞌahomo?

⁴ Ingka nopesua weo Lambuno Lahataꞌala, nealamo roti kapopanga so Lahataꞌala maka nohumaaꞌe bhe nowaꞌandae dua mie mangkafie. Weo tubhono agamantoomu roti anaꞌa o falia dohumaaꞌe mie sigaoꞌano, mpahinomo imamu.”

⁵ Ambano toha Yesus, “Anano Manusia Ompunomo dua oleono Sabat, nokokuasa namotantu atorano Sabat.”

Yesus nefekaꞌosa mie ne oleono Sabat 6:6-11

⁶ Seꞌoleono dua Sabat Yesus nopesuamo weo lambu kasambaheaꞌa maka nofofoinaꞌu. Ne itu nandoo seemie mokepeno limano sembali, o suanano.

⁷ Pande-pande Kitabi bhe miendo Farisi dokaꞌo-kaꞌondo Yesus bhahaꞌi kaowu namekaꞌosa mie amaitu ne oleono Sabat, somo tingkuno damoꞌalae.

⁸ Tamaka Yesus nopandeꞌaane fekihindo, maka nopugaumo ne mie mokepeno lima maitu ambano, “Mai, meehe-ehe te wise ini.” Mie anaꞌa noehemo.

⁹ Pada aitu Yesus nopugaumo ne andoa ambano, “Ameenakoomu, weo tubhono agamantoomu nembali dehabu ae ne oleono Sabat? Habu metaa kaa habu modai? Dafofodadi kaa dafopongko?”

¹⁰ Pada aitu Yesus nofolili matano ne andoa maitu, maka nopugau ne mie mokepe naꞌa ambano, “Fonsoho limamu!” Mie anaꞌa nofonsoho limano, gahaꞌa noꞌosamo.

¹¹ Miendo Farisi naꞌa nohehe bhakendo lasao dopugau-gau sapada-pada andoa bhahaꞌi damafaꞌiane Yesus maitu.

Yesus nesaliꞌi rasuluno ompulu hoduano 6:12-16

¹² Wakutuu anaꞌa Yesus nofonimo te kabhawo maka kosealoꞌae nosambahea ne Lahataꞌala.

¹³ Nomentae nosaliꞌimo anaguhuꞌino dahumatoe maka nepili ne olotando andoa maitu doompulu hodua. Andoa maitu nokonadamo rasulu.

¹⁴ Neaꞌindo: Simon nekonando dua Petrus, Andreas kakutaꞌano Simon, Yakobus bhe Yohanes, Filipus bhe Bartolomeus,

¹⁵ Matius bhe Tomas, Yakobus anano Alfeus, Simon miendo Zelot,

¹⁶ Yudas anano Yakobus bhe Yudas Iskariot. Yudas Iskariot ini hato pandano nembalimo mowano Yesus ne limano kaewa.

Yesus nofofoinaꞌu bhe dobhahi mie nefekaꞌosano 6:17-19

¹⁷ Pada aitu dosisampu-sampuꞌamo maiꞌao te kabhawo maka dofetumpu we potateꞌano. Ne itu dobhahi sepaliꞌa mie mangkafie dohompumo bhe dobhahi dua mie sigaoꞌano. Andoa maitu domaiꞌao ne kosekaꞌewaꞌae kadieno Yudea, domaiꞌao we Yerusalem, bhe domaiꞌao dua we kadieno Tirus bhe Sidon we wiwino teꞌi.

¹⁸ Kamaiꞌando dametingkeꞌao pugauno bhe so daoꞌosaꞌao ne sakindo. Mie nepesuakino seetani nofekaꞌosada dua.

¹⁹ Kosasawindo mie humatono naꞌa doꞌulei lalondo damedampa Yesus, kapaꞌamo nandoo kuasa lumimbano ne Anoa sampe kosasawindo nofekaꞌosada.

Wambano dawua bhe balaa 6:20-26

²⁰ Pada anaꞌa Yesus noꞌondomo anaguhuꞌino bhe nopugau ambano, “Kodawua mpuu, hintimiu ngkumaasi-asino, hampano hintimiumo so mehapino Kafopahintaꞌano Lahataꞌala.

²¹ Kodawua mpuu hintimiu moꞌahono ampa aitu, hampano mada kaowu damekaweꞌikoomu. Kodawua mpuu hintimiu moꞌaeno ampa aitu, hampano namada kaowu mutaaꞌomu.

²² Kodawua mpuu ane dabansikoomu mie bhaimiu, ane dagumihasikoomu tawa dabihidhingikoomu bhe dasumambili neamiu ne modaiꞌano hampano mangkafiomu Anano Manusia.

²³ Ne wakutuu anaꞌa fowulaomu lalomiu bhe manariꞌaoꞌomu kaꞌia, kapaꞌamo sakotuꞌuno nobhala ponambomiu kumantaa-ntaano te surugaa. Ingka pedamo dua aitu habundo awuaꞌindo ne ana-anabii dhamani wawono.

²⁴ Tamaka balaamoomu, hintimiu mohangkaeano, hampano weo kahangkaeamiu itu poꞌawaanemoomu kalawesino lalomiu.

²⁵ Balaamoomu, hintimiu moweꞌino ampa aitu, hampano mada kaowu moꞌahoomu. Balaamoomu, hintimiu mutaano ampa aitu, hampano mada kaowu mopeaꞌomu bhe moꞌaeꞌomu.

²⁶ Balaamoomu, ane kosasawindo mie damudhikoomu, hampano pedamo dua naꞌa habundo awuaꞌindo ne mie mpahaana-anabiino.”

Moasiꞌao kaewamu 6:27-36

²⁷ “Ampamo kaowu hintimiu metingke kanau itu, amohatokoomu, moasianda kaewamu, habu metaa ne mie bansiko,

²⁸ mesaloomu kabarakati so mie bhatataꞌiangko, sambaheaꞌandaomu mie meꞌawutiko.

²⁹ Ane dotofa bhagamu, fodoliane dua bhagamu sewetano. Ane doala bhetamu waꞌanda dua bhe bhadhumu.

³⁰ Ane bhe mie nokonisalo ne hintu, waꞌanda. Ane fehebuaꞌamu doalaemo mie bhaimu, koise suli mesaloe.

³¹ Bhahi-bhahiꞌae kapoindalomu so nehabundo mie bhaimu ne hintu, habue dua ne mie bhaimu.

³² Ane moasiꞌao kaowu mie moasiangko, o ae gahaꞌa so tipudhiꞌano? Ingka mahingga mie kodhosa doasiꞌao dua mie moasianda.

³³ Ane humabu metaa kaowu ne mie humabu metaano ne hintu, o ae gahaꞌa so tipudhiꞌano? Ingka mie kodhosa dohabu dua peda naꞌa.

³⁴ Ane konifoada kaowu ne mie bhaimu mbaꞌinomo posahunaꞌao damosuliangkoe, o ae gahaꞌa so tipudhiꞌano? Ingka mie kodhosa dofoada dua mie kodhosa sigaoꞌano, patudhundo sumuli daꞌumawae napototo kabhahino.

³⁵ Tamaka hintimiu, moasianda kaewamu, habu metaa ne andoa. Fofoada tamaka koe posahunaꞌao sumuli umawae, maka meꞌawa ponambo bhahi. Hintimiu membaliomu anaꞌino Lahataꞌala foliuno kuasa, kapaꞌamo Lahataꞌala netaa dua lalono ne mie tapa mepandeꞌaono katumpuno lalo bhe mie modai.

³⁶ Mobhelaanda lalo mie bhaimu pedamo dua Amamu nofomobhelaꞌao lalo.”

Pobhita-bhitahaki 6:37-42

³⁷ “Koise bhitahaki mie bhaimu, keana dua nobhitahakiko Lahataꞌala. Koise hukumu mie bhaimu, keana dua nohukumuko Lahataꞌala. Amponida mie bhaimu maka naꞌumamponiko dua Lahataꞌala.

³⁸ Waꞌanda mie bhaimu maka Lahataꞌala namaꞌangko dua, meꞌawa kaganta bhalano nefohuka bhe neꞌendu ampa napondawuti dasumungkaangkoe ne awimu. Kapaꞌamo kaganta nepakemu mbali mie bhaimu namaꞌangkoe dua Lahataꞌala so wutomu.”

³⁹ Yesus nofohatoanda dua sehonda kapalenda ambano, “Bhahaa naembali seemie kabunto naetonda kabunto? Ingka so kaowu daondawuꞌao weo ola kohoduando.

⁴⁰ Seemie anaguhu miina namoliuꞌea gurunoa, tamaka nopooli kaowu nepoguhuꞌaono nopototomo bhe guruno.

⁴¹ Noafa bhahaa wohaꞌao kanenano habha weo matano bhahitiemu, gahaꞌa itu kakebhano sau weo matamu miina mandeꞌaanea?

⁴² Peda ae dua pugauꞌao ne bhahitiemu, ‘Bhahitie, mai amaliangko kanenano habha weo matamu itu’, gahaꞌaitu kakebhano sau weo matamu miina mohaea. Hintu mie mehaaꞌulano! Alimo kadeki kakebhano sau weo matamu itu, so nentaleaꞌao umondo maka mali kanenano habha weo matano bhahitiemu.”

O sau bhe bhakeno 6:43-45

⁴³ “Sau metaa pae bhe kapoolia nakobhakeꞌao modaiꞌano, pedamo dua anaꞌa sau tapa metaaꞌano pae bhe kapoolia nakobhakeꞌao metaaꞌano.

⁴⁴ Sepuꞌu-sepuꞌu sau dopandeꞌaane ne bhakeno. Ingka bhakeno wohaꞌa miina daꞌumutae ne kahoku kokihi, tawa bhakeno angguru daꞌumutae ne daha-daha.

⁴⁵ Mie metaa nefolimba metaaꞌano nomaiꞌao ne kampebuniꞌano lalono metaaꞌano; mie modai nefolimba modaiꞌano. Kapaꞌamo tibhokaꞌano ne wiwi nolua nomaiꞌao weo totono lalo.”

Haa honda sandi 6:46-49

⁴⁶ “Noafa kona kanauꞌomu, ‘Ompu, Ompu’, gahaꞌaitu miina mangkafieꞌomu pugauku?

⁴⁷ Mie maino ne Idi maka nofetingke pugauku bhe noangkafie, amohatoangkoeꞌomu bhe laꞌae pototoꞌano.

⁴⁸ Anoa ini nopototo bhe seemie mefoeheno lambu. Mefoeheno lambu naꞌa neseli nofekandalo-ndaloe maka nofongkoha sandino ne kontu dempa. Gahaꞌa nonandoomo luano oe bhe mawa noangkai lambu aitu tamaka miina namoolie nogegohaane hampano katangkano katifoeheꞌano.

⁴⁹ Ampamo kaowu metingkeno pugauku tamaka miina namangkafiea, mie aitu nopototo bhe mie mefoeheno lambu te wawono wite melaa, miina nakosandia. Sanoangkaiꞌe mawa lambu anaꞌa lasao nosansa, kadaha maka kadaino.”