Lukas 5 - Muna Southern Dialect

Yesus nosaliꞌi anaguhuꞌino kabhao-bhaono 5:1-11

¹ Sewakutuu Yesus neehe-ehe ne wiwino teꞌino Genesaret, dolibu-libue mie bhahi dametingke bhoasaono Lahataꞌala sampe tadoposeke-sekehemimo.

² Gahaꞌa nowohamo haa onu bhangka we kaꞌotiꞌa, mieno dosampumo tangasano dofekanggelaꞌi pukando.

³ Yesus nosawimo ne seꞌonu bhangka andoa maitu. Bhangka anaꞌa bhangkano Simon. Nohato te wawo nopugauanemo nadhumudhu bhangka naꞌa namekambakodo-kodoꞌoe. Yesus nengkoha te wawono bhangka naꞌa maka nofoinaꞌu mie bhahi.

⁴ Palusi nofofoinaꞌu nopugaumo ne Simon ambano, “Bhose kaita we ndalo maka tabuhao pukamu dehakoomu kenta.”

⁵ Simon notobhoosimo ambano, “Guru, kosekawantaꞌae alo tagiuꞌe miina takonipoolia, tamaka hampano tudu kanau tadua atumabuhaomo puka inia.”

⁶ Pada dotabuhao pukando nobhahi sepaliꞌa kenta nekalibundo, nomaꞌomo nobhensi bhe pukando.

⁷ Dadiꞌanomo doalemo sabhangkando we bhangka seꞌonuno damai datumulumida. Andoa domai dopouleaꞌao kenta naꞌa sampe kohaaꞌonu bhangkaꞌae nomaꞌo nakumalobu.

⁸ Nowoha kadhadhia aitu, Simon Petrus nolongko nosudhu ne wiseno Yesus bhe nopugau ambano, “Ompu, hunsa kanau kapaꞌamo idi ini mie kodhosa.”

⁹ Simon nopugau peda naꞌa kapaꞌamo anoa bhe kosasawindo sabhangkaꞌino nopuli mentendo dowoha kabhahino kenta nepoolindo.

¹⁰ Pedamo dua aitu Yakobus bhe Yohanes anaꞌino Zebedeus posabhangkaꞌaono Simon. Yesus nopugaumo ne Simon, “Koise moteꞌia, notanda aitu mepukamo manusia.”

¹¹ Pada dofoampe bhangkando te wite dohunsamo bhahi-bhahiꞌae maka doangkafi Yesus.

Yesus nefekaꞌosa seemie kokuli modaino 5:12-16

¹² Sewakutuu Yesus nandooꞌe toha ne seꞌonu liwu. Ne itu nandoo seemie kokuli modaino nokabhintiemo koseꞌulu-uluno. Sanowoha Yesus nolongkomo ne wite bhe nopugau ambano, “Waompu, ane umunda, tetewei naembali mekaꞌosa kanau.”

¹³ Yesus nofonsoho limano bhe nodampasi mie maitu bhe nopugau, “Aꞌunda, moꞌosaꞌo toha.” Mie aitu lasao noꞌosa, kulino nonggelamo.

¹⁴ Yesus noꞌeleꞌaane naekapuna ne laꞌae maka dua, bhe nopugau ambano, “Kalamo fotiwoha wutomu ne imamu. Namada aitu meowa kapopanga ne Lahataꞌala peda neowilino anabii Musa so netandaindo mie bhahi putae hintu moꞌosamo.”

¹⁵ Tamaka bhihitano Yesus dhulu kaꞌewa nolelea, sampe mie bhahi dosipumpu domai ne Anoa, dametingkeꞌao pugauno bhe daoꞌosaꞌao maiꞌao ne sakindo.

¹⁶ Tamaka Yesus nofogaatimo wutono, nokalamo nosambahea ne molinoꞌano.

Yesus nefekaꞌosa seemie kalu 5:17-26

¹⁷ Seꞌoleo tangasano Yesus nofofoinaꞌu nandoo seemie hodua miendo Farisi bhe pande-pande Kitabi dengkoha-ngkoha dofetingke pugauno. Andoa domaiꞌao ne sabhaha liwu ne kadieno Galilea, Yudea bhe Yerusalem. Kuasano Ompu nokabhinti Yesus sampe nembali nefekaꞌosa mie mosaki.

¹⁸ Gahaꞌa dohatomo mie deꞌowea seemie kalu ne kaodoꞌano. Andoa doꞌulei lalondo damopesuaꞌe, patudhundo damondolee ne wiseno Yesus.

¹⁹ Mbaꞌinomo miina damooli dopesua hampano kabhahindo mie dofonimo te ato ⸤ potateꞌano⸥ , dehungga ato maka dofosampu mie aitu bhe kaodoꞌano ne wunta-wuntando mie bhahi nopobutu ne wiseno Yesus.

²⁰ Nowoha kabhalano kaparasaeando maitu Yesus nopugaumo ambano, “Sabhangka, dhosamu notiꞌamponimo.”

²¹ Tamaka pande-pande Kitabi bhe miendo Farisi nokaduku we lalondo, “Laꞌae bhahaa mie aini pototoꞌaono wutono bhe Lahataꞌala? Laꞌae gahaꞌa so meꞌamponino dhosa ane paise wutono Lahataꞌala?”

²² Tamaka Yesus nopandeꞌaane dukuno lalondo maka nopugau ne andoa, “Noafa gahaꞌa kofekihiꞌaoꞌomu peda aitu?

²³ O ae so katandaino akokuasa? Apugauꞌao ‘Dhosamu notiꞌamponimo’, bhahaꞌi apugau, ‘Wanumo maka kala’?

²⁴ Amotiwohaangkoomu Anano Manusia - Idimo ini - nokokuasa neꞌamponi dhosa te dhunia ini.” Pada aitu Yesus nopugaumo ne mie kalu maitu ambano, “Wanuꞌo toha, sangke kaodoꞌamu itu maka suli se lambumu.”

²⁵ Kalu anaꞌa lasao nowanu ne wisendo, nosangke kaodoꞌano maka nosuli se lambuno bhe nopudhi Lahataꞌala.

²⁶ Kosasawindo mie tadomente bhe dopudhi Lahataꞌala. Weo kateꞌindo dopugaumo ambado, “Oleo itu dowohaomu kadhadhia timenteꞌaono sepaliꞌa.”

Lewi mealano sewa noangkafi Yesus 5:27-32

²⁷ Pada aitu Yesus nokalamo nohunsa kota amaitu. Gahaꞌa nowohamo seemie mealano sewa nengkoha-ngkoha ne kantorino sewa. Neano Lewi. Yesus nopugauanemo ambano, “Mai angkafi kanau!”

²⁸ Lewi lasao noehe nohunsa kosasawiꞌae naꞌa maka noangkafi Yesus.

²⁹ Palusi anaꞌa Lewi nehabumo hame bhalano se lambuno mbali Yesus. Dobhahi mealaꞌino sewa bhe mie sigaoꞌano dohumaa dopombali-mbali bhe Yesus.

³⁰ Miendo Farisi bhe pande-pande Kitabi dokamuntu-muntu ne anaguhuꞌino Yesus ambado, “Noafa gahaꞌa pombali-mbaliꞌaoꞌomu bhe mealaꞌino sewa bhe mie kodhosa maitu?”

³¹ Tamaka Yesus tanotobhoosida ambano, “Suano mie metaano namisi mefaraluuno foagono, mpahinomo mie mosaki.

³² Hatoku ini miina aeꞌondofi mie mongkilo, tamaka mie kodhosa neanomo dametompaꞌaomo podiu modaindo.”

Poasaꞌa 5:33-39

³³ Dopugaumo dua mie ne Yesus ambado, “Anaguhuꞌino Yohanes Fokadiuno nentuhu dopoasa bhe dosambahea, pedamo dua anaguhuꞌindo miendo Farisi, tamaka anaguhuꞌimu ingka dohumaa bhe dofohoꞌu.”

³⁴ Ambano Yesus, “Naembali bhahaa sabhangkaꞌino loꞌia buꞌou datumududa damoasa tangasano loꞌia buꞌou nopobhaianda? Ingka paise!

³⁵ Tamaka nahumato kaowu tempono loꞌia buꞌou dawowoꞌoe, ne naꞌamo kaneꞌomo damoasa.”

³⁶ Yesus nofohatoanda dua kapalenda ambano, “Miina nandumandooa mie mebhensino sebhini kai maiꞌao ne bhadhu buꞌou maka natumabhae ne bhadhu nggasi. Kapaꞌamo ane nada anaꞌa bhadhu buꞌou naꞌa natibhensimo dua pakade kabhini buꞌou naꞌa pae nakumanaa ne bhadhu nggasi naꞌa.

³⁷ Pedamo dua naꞌa, miina nandumandooa mie mefosingiꞌino angguru buꞌou ne kaenteiꞌa katembuno, kapaꞌamo ane nada naꞌa so kaowu naowengkaꞌao kaenteiꞌano. Angguruno nabinasa, kaenteiꞌano nahumansuru.

³⁸ Dadiꞌanomo angguru buꞌou tabeano doteiꞌe ne kaenteiꞌa buꞌou.

³⁹ Pedamo dua anaꞌa miina bhe so mohoꞌuno angguru buꞌou ane padamo dofohoꞌu angguru ngkodau. Kapaꞌamo ambado, ‘Nombaka angguru ngkodau.’ ”