Lukas 4 - Muna Southern Dialect

Yesus nosobae Kafeompuꞌando seetani we pandaso bhalano 4:1-13

¹ Yesus nokabhintiemo Rohino Lahataꞌala. Nosuli maiꞌao we umeleno Yordan noatoemo Rohino Lahataꞌala we pandaso bhalano.

² Ne itu neate fato fuluꞌa kaomponano bhe nosoba-sobae Kafeompuꞌando seetani. Kaomponano neate ne itu miina sepaliꞌa naomaaꞌa. Panda-pandano noꞌahomo.

³ Nopugaumo Kafeompuꞌando seetani ambano, “Ane hintu ini Anano Lahataꞌala, soba tududa kontu ini daembali roti.”

⁴ Yesus tanotobhoosi ambano, “Nandoo notibuhi weo Kitabi, ‘Suano kaowu taꞌo roti kaoꞌuhiꞌando manusia.’ ”

⁵ Pada aitu Kafeompuꞌando seetani nowowoꞌomo Yesus te melangkeꞌano maka setolindaꞌa nofotiwohaane kosasawiꞌae kakolakiꞌano dhunia.

⁶ Nopugaumo ne Yesus ambano, “Kosasawiꞌae kuasa bhe kahangkaeano ini amaꞌangkoe hintu, kapaꞌamo kosasawiꞌae ini padamo dowaꞌa kanaꞌe idi maka akokuasa dua amaꞌane ne mepoindaloku.

⁷ Dadiꞌanomo ane sumudhu tumaohao sombamu ne idi, kosasawiꞌae ini amaꞌangkoe hintu so fehebuaꞌamu.”

⁸ Tamaka Yesus tanotobhoosi ambano, “Nandoo notibuhi weo Kitabi, ‘Taohao sombamu ne Ompu Lahataꞌalamu, ampamo kaowu Anoa so nefeompuniꞌimua!’ ”

⁹ Pada aitu nowowoꞌomo toha Yesus we Yerusalem, noampee te kabubuno Lambuno Lahataꞌala maka nopugau ambano, “Ane hintu Anano Lahataꞌala oho wutomu we panda watu,

¹⁰ kapaꞌamo nandoo notibuhi weo Kitabi, ‘Lahataꞌala natumudu malaꞌekatino dadhumaganiko;

¹¹ andoa dakumantafeko keana notompalo aꞌemu ne kontu.’ ”

¹² Yesus notobhoosimo ambano, “Nandoo bhoasaono Kitabi, ‘Koe sobaea Ompu Lahataꞌalamu.’ ”

¹³ Nopalusi sabhaha kasobano naꞌa Kafeompuꞌando seetani nokalamo maka neanta-antagi kasalawa metaa.

Yesus nosuli we Galilea 4:14-15

¹⁴ Weo kuasano Rohino Lahataꞌala, Yesus nosulimo we Galilea. Bhihitano nolelemo ne kosekaꞌewaꞌae kadie aitu.

¹⁵ Yesus nofofoinaꞌu ne lambu-lambu kasambaheaꞌa ne itu, maka kosasawindo metingkeno dopudhi-pudhie.

Yesus dobansie we Nasaret 4:16-30

¹⁶ Yesus nohato dua we Nasaret, liwunomo ampa nobhala. Peda kaneano ne oleono Sabat nopesuamo weo lambu kasambaheaꞌa maka noehe naebasa Kitabi.

¹⁷ Dowaꞌanemo Kitabino anabii Yesaya. Hato nolengka kaluluno Kitabi aitu, noꞌawamo aeati peda ini,

¹⁸ “Rohino Ompu nokabhinti kanau, mbaꞌinomo padamo nosangke kanau so amosampeꞌao Bhihita Metaa ne mie ngkumaasi-asino. Anoa notudu kanaumo aefolele bhihita putae mie netohongku damobebasida, o kabunto sumuli dafowoha. Notudu kanau dua amobebasi mie nefompina-mpina,

¹⁹ aefolele bhihitano putae tempono kabarakatino Ompu nohatomo.”

²⁰ Pada nebasa nosongkoemo, nofosulie ne dhagano lambu kasambaheaꞌa naꞌa maka nengkoha nafofoinaꞌu. Kosasawindo mie weo lambu kasambaheaꞌa dosemata-mata ne Anoa.

²¹ Netandakimo nofoinaꞌuda ambano, “Seꞌoleo itu aeatino Kitabi ini nokoꞌulamo wakutuuno fetingkeeꞌomu.”

²² Kosasawindo mie naꞌa doꞌuumbetie, domenteꞌao pugau mokesa nekobhoasaꞌaono. Ambado, “Ingka anoa ini anano Yusuf.”

²³ Yesus nopugaumo dua ne andoa ambano, “Teteweimo patudhumiu malenda kanauꞌomu peda ini, ‘Hintu foagono, fekaꞌosa wutomu! Ingka padamo tafetingke mehabu sabhaha tanda timenteꞌaono we Kapernaum; dadiꞌanomo habue dua ne liwu kamaiꞌaoꞌamu ini.’ ”

²⁴ Ambano dua Yesus, “Amohatokoomu, kotu-kotuꞌu miina bhe anabiia nefosibhala ne liwu kamaiꞌaoꞌano.

²⁵ Amohatokoomu dua bhe pugauku ini nokotuꞌu, ne dhamanino anabii Elia o lani notisongko ⸤ miina nakoꞌusea⸥ tolu taꞌu nomo wula, maka kosekaꞌewaꞌae witeno Israel nofindaꞌie gaba bhalano. Wakutuu anaꞌa nobhahi hobhine ne Israel bhihinandano.

²⁶ Mahinggamo pedamo aitu anabii Elia miina natumudue Lahataꞌala ne andoa maitu, tamaka ne seemie bhihinanda we Sarfat ne kadieno Sidon.

²⁷ Pedamo dua aitu, ne dhamanino anabii Elisa dobhahi mie kokuli modaino ne witeno Israel, tamaka bhe seemie miina bhe tifekaꞌosaꞌano, mpahinomo Naaman miendo Siria.”

²⁸ Dofetingke peda naꞌa kosasawindo mie weo lambu kasambaheaꞌa anaꞌa nopaꞌi sepaliꞌa lalondo.

²⁹ Andoa dosiehe-eheꞌamo dogihasi Yesus we sembalino kota maka dowowoꞌoe se wiwino pimpi, kaengkohaꞌano kotando, patudhundo daꞌumohoe we panda.

³⁰ Tamaka Yesus tanoangka ne olotando maka nokala.

Yesus weo lambu kasambaheaꞌa we Kapernaum 4:31-37

³¹ Pada aitu Yesus nosampumo we Kapernaum, seꞌonu kota we kadieno Galilea maka ne oleono Sabat nofofoinaꞌu ne itu.

³² Mie metingkeno kafoinaꞌuno tadomente mbaꞌinomo pugauno noponoꞌao kuasa.

³³ Gahaꞌa weo lambu kasambaheaꞌa naꞌa nandoo seemie nepesuakino seetani. Mie naꞌa nokei nofekabhala-bhala ambano,

³⁴ “Haa hintu Yesus miendo Nasaret! O ae patudhumu ne insaodi ini, mai mobinasa kainsami gahaꞌa? Apandeꞌaangko hintu itu mie mongkilo maiꞌao ne Lahataꞌala.”

³⁵ Tamaka Yesus nohandapie ambano, “Koise mohobhoa, limbaꞌo toha maiꞌao ne mie aini!” Gahaꞌa seetani anaꞌa nohambitaꞌiao mie aitu ne wunta-wuntando mie bhahi maka nolimba bhe miina namekolea-leaꞌiea.

³⁶ Kosasawindo mie tadomente maka dopugau sapada-pada andoa ambado, “Pahasili pugauno maitua! Ingka nokokuasa mpuu sampe nepahintangi seetani dalumimba, lasao dua dolimba.”

³⁷ Maka bhihitano nolelemo ne neꞌamai-neꞌamai liwu ne kadie aitu.

Yesus nofekaꞌosa ponia hobhineno Simon Petrus bhe mie sigaoꞌano 4:38-41

³⁸ Pada aitu nohunsamo lambu kasambaheaꞌa naꞌa maka nokala se lambuno Simon. Gahaꞌa ponia hobhineno Simon nosaki, nodaha sepaliꞌa sodono maka desalo ne Yesus natumulumie.

³⁹ Yesus noehemo ne sohihino kamungkula aitu, maka nobhoohai sodono naꞌa, lasao nopada. Hobhine aitu lasao nowanu maka netaganaanda daomaa.

⁴⁰ Nosoo kaowu oleo, kosasawindo miendo liwu deowaꞌianemo mie mosakino; saki nenamisindo tanofegiu. Yesus noteimo limano te wawondo seemie-seemie maka nofekaꞌosada.

⁴¹ Dobhahi dua seetani dolimba domaiꞌao ne mie bhe dokei ambado, “Hintumo Anano Lahataꞌala.” Yesus noꞌeleꞌaanda sepaliꞌa damugau, mbaꞌinomo dopandeꞌaanemo putae Yesus Omputo Fosalamatino.

Yesus nofofoinaꞌu we liwu-liwu sigaoꞌano 4:42-44

⁴² Hato nomentae Yesus nokalamo we simbalino kota, we molinoꞌano. Gahaꞌa mie bhahi doꞌondofie. Hato dopoꞌawaane, doꞌuleimo lalondo desalo keana nohunsada.

⁴³ Tamaka Yesus tanopugau ambano, “Bhihita Metaa Kafopahintaꞌano Lahataꞌala tabeano amolelee dua we liwu-liwu sigaoꞌano, kapaꞌamo aituꞌaemo patudhuno Lahataꞌala notudu kanau we dhunia ini.”

⁴⁴ Dadiꞌanomo Yesus nefolelemo Bhihita Metaa weo lambu-lambu kasambaheaꞌa ne kadieno Yudea.