Lukas 24 - Muna Southern Dialect

¹ Kaneꞌo nohaha kamentae ne oleono Ahadhi, hobhineꞌi naꞌa dokalamo we kobuhu dewowoꞌo bhe kagule kakawonduindo mie mate toka nefontaa-ntaando.

² Dohato we kobuhu, gahaꞌa kontu kasongkono fointono kobuhu ingka notidolemo.

³ Andoa dopesua weo lia kafokobuhuꞌa naꞌa, tamaka maeatino Yesus miina daohaea.

⁴ Tangasano detongo-tongoꞌao kadhadhia amaitu, tambaꞌomo nandoo mie dohodua deehe-ehe ne owando, pakeando nokosilo.

⁵ Hobhineꞌi maitu doteꞌi sepaliꞌa sampe dosudhu ampa we wite, tamaka mie hoduano maitu dopugau ambado, “Noafa gahaꞌa meꞌondofiꞌaoꞌomu mie dumadi ne olotando mie mate?

⁶ Miinamo bhe Anoa ne ini, nowanumo maiꞌao ne mate. Feꞌulaiꞌeomu pugauno ne hintimiu we Galilea endefiꞌini,

⁷ ambano: Anano Manusia tabeano daowae ne limando mie kodhosa maka dakumantaiꞌe te sau salipu, bhe ne katolu oleono namanumo maiꞌao ne mate.”

⁸ Andoa lasao dofeꞌulai pugauno Yesus naꞌa.

⁹ Hato dosuli domaiꞌao we kobuhu, detula-tulaꞌaomo kosasawiꞌae kadhadhia amaitu ne koompulu seemiendo rasuluꞌi bhe sabhangkaꞌindo sigaoꞌano.

¹⁰ Hobhineꞌi andoa naꞌa ndo Maria Magdalena, Yohana bhe Maria inano Yakobus. Nandoo dua hobhine poowaꞌando detula-tula dua ne rasuluꞌi.

¹¹ Tamaka weo fekihindo rasuluꞌi, pugaundo hobhineꞌi maitu sanea tula-tula hewu, sampe miina damarasaeada.

¹² Mahinggamo peda amaitu, Petrus noehe lasao notende se kobuhu. Nofeonga we lalo, gahaꞌa taꞌo kawalu newohano. Pada aitu nosulimo. Nofeenamo totono lalono, “O ae bhahaa kumadhadhiaꞌano ini?”

Yesus nofotiwoha Wutono we kaangkaꞌa humopeꞌano we Emaus 24:13-35

¹³ Oleo aitu dua dohodua anaguhuꞌino Yesus dokalamo we seꞌonu liwu koneaꞌano Emaus, kakodoꞌono bhe Yerusalem napeompulu sekilo.

¹⁴ Weo kala-kalando naꞌa detula-tulaꞌaomo sabhaha kadhadhia madaꞌano maitu.

¹⁵ Tangasano detula-tula dopolo-pololiꞌao fekihindo, nomaimo wutono Yesus nomaꞌotida maka nekala-kala nopoowa-owa bhe andoa.

¹⁶ Andoa dowohae, tamaka nandoo bhe umontomino matando sampe miina damandeꞌaane laꞌae mie maitu.

¹⁷ Yesus nofeenadamo ambano, “Metula-tulaꞌaoꞌomu ae bhahaa we laano sala ini?” Andoa lasao dofetumpu, wohaꞌano ulando noguguhu sepaliꞌa.

¹⁸ Seemie koneaꞌano Kleopas notobhoosimo ambano, “Bhahaa seemie-miemu hintu ini mie humato we Yerusalem tapa mandeꞌaono kadhadhia haꞌoleo ini ne watu?”

¹⁹ Ambano Yesus, “O ae bhahaa?” Dotobhoosimo ambado, “Kadhadhiano Yesus miendo Nasaret. Anoa seemie anabii, pugauno bhe habuno nokokuasa weo pomatano Lahataꞌala bhe weo pomatano kosasawindo mie.

²⁰ Tamaka neangkaꞌindo imamu bhe kamu-kamungkulaꞌi mani doowae ne kaewa dobhotusiane mate maka dokantaiꞌe te sau salipu!

²¹ Gahaꞌaitumo endefiꞌini taposahunaꞌao anoamo so mobebasino miendo Israel, maka ampa aini tolu oleomo nopalusi sabhaha kadhadhia anaꞌa.

²² Pakade inia dofekatikenda kainsami hobhineꞌi sabhangka mani. Kaneꞌo nohaha kamentae andoa dokala we kobuhu,

²³ tamaka miina damohae maeatino. Dosuli deowamo dua bhihita, ambado dokopowohaꞌao malaꞌekati dopugau ne andoa putae Yesus suli nodadi.

²⁴ Pada anaꞌa seemie hodua sabhangka mani dokala we kobuhu maka nepoꞌawaꞌaondo nopobutu bhe pugaundo hobhineꞌi maitu. Tamaka wutono Yesus miina daohaea.”

²⁵ Nopugaumo Yesus ambano, “Kabhohemiu gahaꞌa, kahenteno totono lalomiu, sampe miina marasaeaꞌomu sabhaha nekosuahaꞌaondo ana-anabii!

²⁶ Ingka Mesias Omputo Fosalamatino tetewei naenamisi kadeki kosasawiꞌae maitu so namehapiꞌao kakalabhiano.”

²⁷ Pada peda maitu notalesaandamo tibuhino weo sabhaha Kitabi mulaoꞌaono Wutono, notanda ne Kitabino Musa ampa ne Kitabindo ana-anabii sigaoꞌano.

²⁸ Dohato we owano liwu kahopeꞌando, wohaꞌano Yesus nakumala kansuhu.

²⁹ Tamaka andoa dofosuhue ambado, “Angkamo kadeki bhe insaodi sealo itu, ingka naohondomo; oleo nomaꞌomo nasumoo.” Dadiꞌanomo nopesuamo weo lambudo nabutu ne itu.

³⁰ Hato naomaa bhe andoa, Yesus nealamo roti, nobarakatie maka nobhebhehae bhe nodawuandae.

³¹ Wakutuu aitu dua matando nosimentaleaꞌamo lasao dopandeꞌaane Anoa maitu Yesus, gahaꞌa lasao noila nomaiꞌao ne olotando.

³² Dopugaumo sapada andoa ambado, “Ingka uumbemo, totono lalonto notisangke sepaliꞌa wakutuu nopugau bhe intaodi we laano sala nofotalesaꞌao wambano Kitabi.”

³³ Wakutuu anaꞌa dua lasao doehe maka dosuli we Yerusalem. Dohato dopoꞌawaꞌaomo rasuluꞌi ompulu seemieno tangasano dopohompu-hompu bhe sabhangkaꞌi sigaoꞌano.

³⁴ Ambado rasuluꞌi, “Nokotuꞌu mpuu Ompu nowanumo maiꞌao ne mate! Padamo nofotiwoha Wutono ne Simon!”

³⁵ Anaguhu hoduano saꞌituini lasao detula-tulaꞌaomo dua kadhadhia we laano sala bhe katipandeꞌaoꞌano wakutuuno nebhebheha roti.

Yesus nofotiwoha Wutono ne kosasawindo anaguhuꞌino 24:36-49

³⁶ Tangasano detula-tulaꞌao kadhadhia anaꞌa, Yesus tambaꞌomo neehe-ehe ne wunta-wuntando bhe nopugau ambano, “Katohopono dadi so hintimiu!”

³⁷ Andoa dokohedu bhe doteꞌi, kunaꞌendomo dowoha kahanda.

³⁸ Tamaka Yesus nopugau ambano, “Noafa koheduꞌaoꞌomu? Noafa nopoibhahaꞌao totono lalomiu?

³⁹ Feꞌondoomu limaku bhe aꞌeku ini. Ingka Idimo inia, kadampa kanauꞌomu bhe ondo kanauꞌomu, kapaꞌamo kahanda miina nakombadhaa miina nakobukua peda newohamiu ne Idi ini.”

⁴⁰ Poowa nopugau peda anaꞌa, Yesus nofotiwohaandamo limano bhe aꞌeno.

⁴¹ Gahaꞌa andoa miinaꞌo dua damarasaea hampano kaꞌiando bhe mentendo. Yesus nopugaumo dua ambano, “Nandoo bhahaa oti nehumaa ne ini?”

⁴² Dadiꞌanomo dowaꞌanemo sedodo kaholeno kenta.

⁴³ Yesus noalae maka nohumaaꞌe ne wisendo.

⁴⁴ Ambano dua, “Pedamo ini patudhuno pugauku wakutuuno apobhaiangkoomu endefiꞌini. Ingka afohatokoomu kosasawiꞌae tibuhino weo Kitabino Musa, Kitabindo ana-anabii bhe Kitabino Laguno Daud tetewei nakoꞌula.”

⁴⁵ Pada anaꞌa Yesus nolengkamo fekihindo sampe dolosangiemo wambano Kitabi.

⁴⁶ Ambano toha, “Notibuhi peda ini: Mesias Omputo Fosalamatino tetewei naenamisi kakadee-dee bhe namanu maiꞌao ne mate ne katolu oleono.

⁴⁷ Nandoo dua notibuhi: weo neano Omputo Fosalamatino daefolele bhihita ne sabhaha bansano liwu putae dametompaꞌao dhosando maka Lahataꞌala naꞌumamponida. Bhihita anaꞌa damolelee natumanda we Yerusalem.

⁴⁸ Hintimiumo sakusii so mefoleleno bhihitano kadhadhia aini.

⁴⁹ Mada kaowu o Idi amakatuangkoomu toka nedhandiꞌaono Amaku. Ampamo kaowu hintimiu tetewei meateomu weo kota ini sampe nakumabhintikoomu kuasa namaiꞌao te surugaa.”

Yesus notisangke te surugaa 24:50-53

⁵⁰ Pada peda maitu Yesus nowowoꞌodamo we simbalino kota ampa te owano Betania. Hato ne itu nosangke limano maka nobarakatida.

⁵¹ Tangasano nobarakatida, Yesus nogaatidamo notisangke te surugaa.

⁵² Andoa dosudhu dotaohao sombado. Pada anaꞌa dosulimo we Yerusalem, kawulando maka lalondo.

⁵³ Andoa sadhia weo Lambuno Lahataꞌala, dopudhi dofekakalabhia Lahataꞌala.