Lukas 23 - Muna Southern Dialect

Yesus ne wiseno Pilatus 23:1-7

¹ Kosasawindo Sahano Agama naꞌa doehemo maka doowa Yesus se Pilatus.

² Dohato dosangkatiemo ambado, “Tahatofie mie aini nefekakolilino raꞌeati mani, pakade noꞌeleꞌa kainsami tatumanduao sewa ne Omputo Kaisar. Anoa nokona dua wutono Kristus, maꞌanano Omputo Fosalamatino.”

³ Pilatus nofeenamo ne Yesus ambano, “Hintumo ini omputo miendo Yahudi?” Ambano Yesus, “Pedamo pugaumu naꞌa.”

⁴ Nopugaumo Pilatus ne meangkaꞌindo imamu bhe ne mie bhahi ambano, “Miina sepaliꞌa aepoꞌawaꞌao kaꞌalano mie aini.”

⁵ Tamaka andoa maitu dhulu kaꞌosa dowadhumpae ambado, “Anoa ini nehabu kahunggano liwu, raꞌeati ne Yudea kosekadieꞌae nowudhuanda kafoinaꞌuno, notanda we Galilea ampa we ini.”

⁶ Sanofetingke peda maitu Pilatus nofeenamo bhahaꞌi Yesus maitu mieno Galilea.

⁷ Nopandeꞌaane kaowu Yesus nomaiꞌao we kadie neowano Herodes, Pilatus nofotudumo daowae te wiseno Herodes. Wakutuu anaꞌa kolaki Herodes nandooꞌe dua we kotano Yerusalem.

Yesus ne wiseno Herodes 23:8-12

⁸ Sanowoha Yesus, kolaki Herodes noꞌia sepaliꞌa, kapaꞌamo nomponamo gaono namohae. Nentuhumo nofetingke bhihitano bhe gaono mpuu namoha Yesus naehabuane tanda timenteꞌaono.

⁹ Nobhahi nefeenaꞌaono ne Yesus, tamaka Yesus miina sepaliꞌa natumobhoosiea.

¹⁰ Tangasano nofee-feenae naꞌa, neangkaꞌindo imamu bhe pande-pande Kitabi dodhulumo te wise dokeiꞌao sabhaha kasangkatindo.

¹¹ Notanda ne itu Herodes bhe tantaraꞌino dofekaꞌaebumo Yesus bhe doele-elee, pada anaꞌa dofokanaanemo dhubano kolaki maka dofosulie se Pilatus.

¹² Notandamo oleo aitu Herodes bhe Pilatus doposabhangkamo; kumundoꞌano sadhia dopowengke.

Yesus nosuli ne wiseno Pilatus 23:13-25

¹³ Pada anaꞌa Pilatus nofohompumo neangkaꞌindo imamu, kamungkulaꞌi bhe raꞌeati,

¹⁴ maka nopugau ne andoa ambano, “Mie aini owaeꞌomu ne wiseku, ambamiu nefekakolilino raꞌeati. Ingka padamo apahakesaaꞌe ne wisemiu, tamaka miina sepaliꞌa apoꞌawaꞌao kaꞌalano mie aini peda nesangkatimiu itu.

¹⁵ Pedamo dua naꞌa kolaki Herodes, sampe mie aini nofosuliemo toha ne insaodi. Sakotuꞌuꞌano miina nakonihabua so mantasiꞌano damongkoe.

¹⁶ Dadiꞌanomo amepekie maka amolapae.”

¹⁷ [Ne oleono hohaeaꞌa pedando naꞌa Pilatus tabeano sadhia nefolapaanda seemie katohongku.]

¹⁸ Tamaka kosasawindo dosikei-keiꞌamo ambado, “Pongko mie aitu, folapa kainsami Barabas!”

¹⁹ Gahaꞌaitumo Barabas ini dotohongkue mbaꞌinomo neangkafi kahungga weo kota bhe nofopongko.

²⁰ Nofendua toha Pilatus nopugau nofekahaa-haaꞌie ne mie bhahi, hampano gaono namolapa Yesus.

²¹ Tamaka andoa tadokei ambado, “Kantaiꞌe te sau salipu! Kantaiꞌe te sau salipu!”

²² Tolu pakuꞌaomo aini Pilatus nopugau ambano, “Tamaka habu modai medando ae gahaꞌa nehabuno mie aini? Ingka miina sepaliꞌa apoꞌawaꞌao kaꞌala so mantasiꞌano damongkoe. Dadiꞌanomo amepekie maka amolapae.”

²³ Tamaka dowadhumpae kansuhu bhe dokei desalo Yesus dakumantaiꞌe te sau salipu. Panda-pandano dofotaloꞌaomo keindo.

²⁴ Dadiꞌanomo Pilatus nobhotusiemo damangkafi kamesalondo.

²⁵ Katohongku saꞌituini, mie mehabuno kahungga bhe fopongkono naꞌa, nofolapaandaemo peda kamesalondo, tamaka Yesus noowaandae dahumabue ampa kapoindalondo.

Yesus dowowoꞌoe we sembalino kota 23:26-32

²⁶ Wakutuuno dowowoꞌo Yesus we sembalino kota, detaangimo seemie koneaꞌano Simon miendo Kirene maka dofotongkuane sau salipuno Yesus bhe dotudue namangkafie. Anoa ini kaneꞌo nosuli maiꞌao we simbalino kota.

²⁷ Dobhahi sepaliꞌa mie mangkafino Yesus, ne olotando mie bhahi maitu dobhahi dua hobhineꞌi doꞌaefie bhe dekangkoꞌae.

²⁸ Gahaꞌa Yesus tanodolikida bhe nopugau ambano, “Alee hobhineꞌino Yerusalem, koise moꞌaefiomu Idi, tamaka moꞌaefi wutomiu bhe anaꞌimiu.

²⁹ Kapaꞌamo mada kaowu nahumato tempono o mie dapugau, ‘Nokodawua mpuu hobhine moꞌafano, tapa mefolenteno anaꞌi bhe tapa fofotitino.’

³⁰ Ne naꞌa mie dapugau ne gunu, ‘Mosansa tabuhiki kainsami,’ bhe ne kabhawo, ‘Hohawu kainsami.’

³¹ Kapaꞌamo ane sau moꞌuhi dohabue peda ini, damafaꞌiane bhahaa sau kamateno?”

³² Nandoo dua dohodua mie modai newowoꞌondo so damongko dapoowa-owa bhe Yesus.

Yesus dokantaiꞌe te sau salipu 23:33-43

³³ Dohato te kabhawo koneaꞌano Kaꞌuada, Yesus dokantaiꞌemo te sau salipu. Pedamo dua anaꞌa mie modai hoduano, seemie we suanano, seemieno we kemano.

³⁴ Nopugaumo Yesus ambano, “Ama, amponida kapaꞌamo miina damandeꞌaanea nehabundo.” O tantara dodawu-dawumo pakeano, dopodaduane mbali notipandeꞌaoane dawuno seemie-seemie.

³⁵ Mie bhahi deehe-ehe ne itu doꞌondo-ondo sabhaha kumadhadhiaꞌano. Kamu-kamungkulaꞌi doele-elee ambado, “Mie sigaoꞌano nofosalamatida, ane kotu-kotuꞌu anoa ini Mesias, Omputo Fosalamatino nepilino Lahataꞌala, ingka naetaamo namosalamati wutono.”

³⁶ O tantara doele-elee dua bhe domai dowaꞌane angguru mokolo.

³⁷ Ambado, “Ane hintu ini omputo miendo Yahudi fosalamati wutomu.”

³⁸ Te wawo, ne potalaꞌano fotuno, notibuhi “ Anoamo ini Omputo miendo Yahudi.”

³⁹ Seemie ne olotando mie modai tikantaino maitu nofekaꞌaebumo dua Yesus ambano, “Kunaꞌekumo hintu ini Mesias. Soba fosalamati wutomu bhe insaodi dua.”

⁴⁰ Tamaka notangahiemo dua seemieno ambano, “Miina moteꞌi gahaꞌa ne Lahataꞌala? Kahukumu neꞌawamu ingka nopototo bhe anoa.

⁴¹ Ampamo kaowu intaodi ini nopantasimo detahima kahukumu hampano kabhoosinomo habunto, tamaka mie aini miina sepaliꞌa nakokaꞌalaa.”

⁴² Pada anaꞌa nopugaumo ne Yesus ambano, “Yesus, feꞌulai kanau humato membali Omputo.”

⁴³ Nopugaumo Yesus ambano, “Amohatoko, seꞌoleo itu dua hintu pobhai kanau te surugaa.”

Kamateꞌano Yesus 23:44-49

⁴⁴ Hambi-hambi ompulu haa mata pana oleo, kosekadieꞌae nodapoe kahohondo ampa hambi tolu mata kamaꞌoleono,

⁴⁵ kapaꞌamo oleo miina nakotilangaa. Kai bhalano mbali kahondomi weo Lambuno Lahataꞌala nopobhensi nopofelabunta.

⁴⁶ Pada anaꞌa Yesus nokei nofekandii-ndii, “Ama, inawaku aposahunaꞌaanemo ne handano limamu.” Pada nopugau peda naꞌa nobhotumo.

⁴⁷ Nowoha kadhadhia anaꞌa neangkando tantara nopudhi nofekakalabhia Lahataꞌala ambano, “Kotu-kotuꞌu anoa ini mie banara!”

⁴⁸ Dobhahi mie sihompuno ne itu doꞌondo-ondo kumadhadhiaꞌano. Dowohae kaowu peda anaꞌa, kosasawindo dosulimo bhe dotofa mbadhando kaꞌosano sosondo.

⁴⁹ Kosasawindo mie popandeꞌaono bhe Yesus tadeehe-ehemo we kodoꞌoꞌano, pedamo dua naꞌa hobhineꞌi mangkafie notanda we Galilea. Bhahi-bhahiꞌae kadhadhia anaꞌa dowohae.

Yesus dokobuhue 23:50-56 a

⁵⁰ Nandoo seemie koneaꞌano Yusuf, nopesua dua ne Sahano Agama. Anoa ini mie metaa bhe mie banara,

⁵¹ sampe miina namangkafie kabhotusi bhe habundo Sahano Agama maitu. Yusuf ini nomaiꞌao we Arimatea, liwundo dua miendo Yahudi. Anoa neanta-antagi dua kahatoꞌano Kafopahintaꞌano Lahataꞌala.

⁵² Anoa nokalamo nopoꞌawaꞌao Pilatus nesalo maeatino Yesus.

⁵³ Pada nofosampue, maeatino Yesus nowaluanemo bhalatu moꞌalusu maka nofondolee weo lia kafokobuhuꞌa neselindo ne kabhawono kontu. Kobuhu aitu miinaꞌo sepaliꞌa natipakea.

⁵⁴ Oleo anaꞌa oleono Dhumaa, oleono Sabat nomaꞌomo nahumato.

⁵⁵ Hobhineꞌi poowa-owaꞌano Yesus domaiꞌao we Galilea doangkafimo Yusuf. Kobuhu anaꞌa dowohae, bhe dowohae dua peda amai maeatino Yesus dofondolee we lalo.

^56a Hato dosuli defontaa-ntaamo sabhaha kagule bhe mina-mina kawondu so daminakiꞌao maeatino Yesus.

Kawanuꞌano Yesus 23:56b-24:12

^56b Ne oleono Sabat dofewulemo doangkafi tubhono agamando.