Lukas 22 - Muna Southern Dialect

Patudhu damongko Yesus 22:1-2

¹ Hohaeaꞌano Roti Pata Koragiꞌano nekonando Paska nomaꞌomo.

² Neangkaꞌindo imamu bhe pande-pande Kitabi deꞌondofi dhala damongko Yesus tamaka pae daefemata-mataa, hampano doteꞌi mie bhahi.

Isikadhi modaino Yudas 22:3-6

³ Wakutuu anaꞌa totono lalono Yudas Iskariot nopesuakiemo Kafeompuꞌando seetani. Anoa ini seemie maiꞌao ne anaguhuꞌino Yesus ompulu hoduano.

⁴ Dadiꞌanomo Yudas nokalamo ne meangkaꞌindo imamu bhe neangkaꞌindo dhagano Lambuno Lahataꞌala napokanagauꞌao dhalano namowaanda Yesus.

⁵ Andoa maitu doꞌia sepaliꞌa sampe domafakaane damaꞌane dhoi.

⁶ Yudas noꞌundapida maka notanda ne naꞌa neꞌondofimo katolala metaa namowaandae, tamaka pae naefemata-mataa ne mie bhahi.

Fotokaꞌano haroano Paska 22:7-13

⁷ Hohaeaꞌano Roti Pata Koragiꞌano nohatomo. Ne oleo anaꞌa miendo Yahudi tabeano desumbele dhumbano Paska.

⁸ Yesus notudumo Petrus bhe Yohanes ambano, “Kala mefotoka kaitaomu haroano Paska so daomaaꞌomu.”

⁹ Dopugaumo ambado, “Taefotoka ne amai bhahaa gaomu?”

¹⁰ Ambano Yesus, “Mesuaꞌomu kaowu weo kota poꞌawaꞌaoꞌomu seemie bhe kasodano kaiꞌino oe. Angkafieꞌomu ampa se lambu kapesuaꞌano.

¹¹ Fohatoomu kolambuno naꞌa putae, ‘Guru nofeenaꞌao bhahaꞌi boloku amai so napoharoaꞌao Paska bhe anaguhuꞌino.’

¹² Mie anaꞌa namosusuangkoomu boloku bhalano te wawo nosangkamo katokano. Mefotoka kaitaomu ne itu.”

¹³ Anaguhuꞌino hoduano naꞌa dokalamo maka dopoꞌawaꞌao nopobutu bhe pugauno Yesus. Pada aitu defotokamo haroano Paska.

Haroano Ompu 22:14-23

¹⁴ Nohato kaowu tempono, Yesus nengkohamo naomaa napombali-mbali bhe rasuluꞌino.

¹⁵ Nopugaumo ne anaguhuꞌino ambano, “Nokamba mpuu laloku aomaa haroano Paska ini bhe hintimiu tinangke miinaꞌo akumadee-dee.

¹⁶ Amohatokoomu: haroa medando aini paemo aomaaꞌea sampe nakoꞌula maꞌanano haroa aini weo dhunia buꞌou Kafopahintaꞌano Lahataꞌala.”

¹⁷ Pada aitu nealamo kampohoꞌuꞌa, nefoampe katumpuno lalo ne Lahataꞌala maka ambano, “Alaeꞌomu maka podawu-dawueꞌomu.

¹⁸ Kapaꞌamo amohatokoomu notanda aitu paemo aohoꞌu angguru sampe nahumato Kafopahintaꞌano Lahataꞌala.”

¹⁹ Pada anaꞌa nealamo dua roti, nefoampe katumpuno lalo, nobhebhehae maka nodawu-dawuandae anaguhuꞌino. Ambano, “Mbadhakumo inia, newaꞌaoku so hintimiu, habuomu nada ini somo kafeꞌulaimiu ne Idi.”

²⁰ Peda dua anaꞌa palusi dohumaa nealamo toha kampohoꞌuꞌa bhe nopugau, “Kampohoꞌuꞌa aini podhandi buꞌouno Lahataꞌala bhe manusia, dofekatangkaane tuhuno heaku. Heakumo ini nefotuhu so hintimiu.

²¹ Tamaka, soba ondoomu, limano mie so mowa kanau ne kaewa, nopobhai kanau ne medha aini.

²² Kapaꞌamo Anano Manusia tetewei namate peda toka nefotantuno Lahataꞌala, tamaka nabalaamo mie mowae ne kaewa!”

²³ Anaguhuꞌino tadopofee-feenamo sapada-pada andoa bhahaꞌi laꞌae ne olotando so mehabuno nada naꞌa.

Potaga-tagaliꞌa tangasano dopoharoa 22:24-30

²⁴ Gahaꞌa nonandoomo dua potaga-tagaliꞌa ne olotando anaguhuꞌino, bhahaꞌi laꞌae ne olotando maitu so mantasiꞌano doabhie foliuno kabhala.

²⁵ Nopugaumo Yesus ne andoa ambano, “Ingka pandeꞌaaneomu kafeompuꞌando sabhaha bansano liwu pata mandeꞌaono Lahataꞌala dopahintangi raꞌeatindo, mie mintahano kuasa dokonadamo kafeoluꞌando raꞌeati.

²⁶ Tamaka hintimiu pae naembali nada naꞌa. Mie nefokoisa foliuno kabhala tabeano nahumabu nada mie nefokoai, mie neangka tabeano naꞌumondofao kafaraluundo mie bhaindo.

²⁷ Laꞌae bhahaa foliuno kabhala? Mengkohano momaano kaa foꞌondofaono? Ingka momaano. Tamaka Idi ini ne olotamiu kanggetu foꞌondofaono.

²⁸ Hintimiu sadaa-daa pobhai kanauꞌomu weo sabhaha kasabha netompaloiku.

²⁹ Tapedamo Amaku nowaꞌa kanau kuasa afopahintangi, nadamo dua o Idi amaꞌangkoomu kuasa fopahintangiomu.

³⁰ Ne naꞌa hintimiu naembali momaaꞌomu mohoꞌuomu pombaliomu bhe Idi weo Kafopahintaꞌaku, bhe mengkohaomu ne kaengkohaꞌano kolaki so mandeꞌaono miendo Israel ompulu haa sampuꞌano.”

Petrus nagumaga miina namandeꞌao Yesus 22:31-38

³¹ “Simon, Simon, fetingke kanauꞌo. Kafeompuꞌando seetani pada nofealai nasumolo-solokoomu, tapedamo mie detepisao pae.

³² Tamaka Idi padamo asambaheaꞌangko keana nosali kaparasaeamu. Nasumuli kaowu lalomu, fekatangkada lalondo bhahitieꞌimu.”

³³ Ambano Petrus, “Ompu, aꞌundamo atitohongku bhe amate apoowa bhe Hintu!”

³⁴ Tamaka ambano Yesus, “Petrus, amohatoko. Alo aini dua paeꞌo nakumakuhua manu, natolu pakumo gumaga putae miina mandeꞌa kanau.”

³⁵ Pada anaꞌa nofeenadamo ambano, “Wakutuuno atudukoomu paise mewowoꞌomu kadu-kaduno dhoi, bhaku tawa kaampini, bhahaa mokaeꞌaoꞌomu ae?”

³⁶ Ambado, “Miina sepaliꞌa.” Ambano toha Yesus, “Tamaka aitu laꞌae kokadu-kaduno dhoino tetewei nawowoꞌe, pedamo dua anaꞌa kobhakuno. Maka laꞌae tapa kokampueno naetaa naeaso pakeano maka naeꞌoli kampue.

³⁷ Kapaꞌamo amohatokoomu, aeatino Kitabi tetewei nakoꞌulamo ne Idi peda ini, ‘Anoa notilentu mie modai.’ Hampano sabhaha tibuhino mulaoꞌaono Idi napikikoꞌulamo.”

³⁸ Dopugaumo anaguhuꞌino, “Ingka nandoo kampue ne ini haa mata.” Ambano Yesus, “Netaamo.”

Te kaendeano Getsemani 22:39-46

³⁹ Pada anaꞌa Yesus nokalamo we simbalino kota, peda kaneano nohope te kabhawono Zaitun. Anaguhuꞌino doangkafie dua.

⁴⁰ Sahatono ne itu nopugaumo ambano, “Sambaheaꞌomu keana nokangkanaikoomu kasoba.”

⁴¹ Palusi aitu nofogaati wutono nape sekakulambiꞌa kakodoꞌono, nofongkohamo tuuno maka nosambahea.

⁴² Ambano, “Amaku, ane umunda fogampi kanaꞌe sabhaha kakadee-dee so netompaloiku, ampamo kaowu suano kapoindaloku tamaka kapoindalomu so kumadhadhiaꞌano.”

⁴³ Gahaꞌa nomaiꞌiemo seemie malaꞌekati nomaiꞌao te lani nofekatangka lalono.

⁴⁴ Yesus nomahasai sepaliꞌa lalono maka sadhulu-dhulu kakampuu-mpuu nosambahea. Antino tapedamo hea nobubuka nopotuhu ne wite.

⁴⁵ Palusi nosambahea, noehemo nosuli se anaguhuꞌino tamaka nohatofida nandoo doodo hampano kakompeahano lalondo.

⁴⁶ Nopugaumo Yesus ambano, “Noafa gahaꞌa moodoꞌaoꞌomu? Wanumoomu sambaheaꞌomu keana nokangkanaikoomu kasoba.”

Yesus dohakoe 22:47-53

⁴⁷ Tangasano Yesus nopugau, dohatomo mie setagua, nopaꞌinduluanda Yudas, seemie maiꞌaono ne anaguhuno ompulu hoduano. Nohato Yudas nomaꞌotimo Yesus bhe nowonoe.

⁴⁸ Ambano Yesus, “Yudas, o kawono gahaꞌa tanda nepakemu mowa Anano Manusia ne limando kaewa?”

⁴⁹ Dowoha so kumadhadhiaꞌano maitu mie poangkafiꞌaono Yesus dofeenamo, “Ompu, tatumoweliandamo kampue bhahaa?”

⁵⁰ Seemie anaguhuꞌino notowe bhatuano imamu bhalano sampe nondawu tingalano we suana.

⁵¹ Tamaka Yesus tanopugau ambano, “Daꞌomo itu.” Lasao nofedampa tingalano mie anaꞌa maka nofekaꞌuhie.

⁵² Palusi anaꞌa nopugaumo Yesus ne meangkaꞌindo imamu, neangkaꞌindo dhagano Lambuno Lahataꞌala bhe kamu-kamungkulaꞌi maino so humakoe, ambano, “Kona kanauꞌomu mie modai gahaꞌa sampe metaguomu kampue bhe kawangku?

⁵³ Ingka seꞌo-seꞌoleo apoowa-owa bhe hintimiu weo Lambuno Lahataꞌala tamaka miina humako kanauꞌomu. Ampamo kaowu aitu nohatomo wakutuumiu, ainiꞌaemo tempono kuasano kahohondo.”

Petrus nogaga miina namandeꞌao Yesus 22:54-62

⁵⁴ Pada anaꞌa Yesus dohakoemo maka dowowoꞌoe we lambuno Imamu Bhalano. Petrus noangka-angka mbonoda.

⁵⁵ We wunta-wuntano kadeteno lambu naꞌa bhe mie detampo efi maka dengkoha dolibu-libue. Petrus nengkohamo dua bhe andoa.

⁵⁶ Gahaꞌa seemie bhatua hobhine nowoha Petrus nengkoha-ngkoha ne owano efi, nofoti-fotindaemo maka nopugau ambano, “Mie aini ingka pobhaiꞌano mie amaitu.”

⁵⁷ Tamaka Petrus nogaga ambano, “Alee hobhine, ingka miina amandeꞌaanea mie amaitu.”

⁵⁸ Miina naompona nowohaemo dua mie sigaoꞌano bhe nopugau, “Hintu ini seemie dua sabhangkando!” Tamaka ambano Petrus, “Alee moꞌane, suano idia!”

⁵⁹ Napesedhamu pada anaꞌa nopugaumo dua seemie ambano, “Kotu-kotuꞌu anoa ini pobhaiꞌanomo, kapaꞌamo anoa ini mieno Galilea dua.”

⁶⁰ Tamaka ambano Petrus, “Alee moꞌane, ingka suano! Miina amandeꞌaanea maꞌanano pugaumu naꞌa.” Gahaꞌa tangasano nopugau tanosikakuhuaꞌamo manu.

⁶¹ Ompu nodoli noꞌondomo Petrus, maka Petrus nofeꞌulaimo pugauno Ompu, “Paeꞌo nakumakuhuaꞌa manu alo aini, natolu pakumo gumaga miina mandeꞌa kanau.”

⁶² Petrus lasao nolimba bhe noꞌae, nokompeaha sepaliꞌa lalono.

Yesus ne wiseno Sahano Agama 22:63-71

⁶³ Mie dhumaganino Yesus doele-elee bhe dohambisie.

⁶⁴ Matano dodampue maka dofeenae ambado, “Alee anabii, soba bhotoe laꞌae humambisiko itua?”

⁶⁵ Nobhahi dua kafekaꞌaebu sigaoꞌano nepugauꞌaondo ne Anoa.

⁶⁶ Hato nomentae dosihompumo kamu-kamungkulaꞌindo Yahudi, neangkaꞌindo imamu bhe pande-pande Kitabi maka doowa Yesus te wiseno Sahano Agama.

⁶⁷ Ambado, “Ane hintu ini kotuꞌu Mesias Omputo Fosalamatino, fohato kainsami.” Ambano Yesus, “Mahingga amohatokoomu, tetewei pae marasaeaꞌomua.

⁶⁸ Mahingga ameenakoomu, ingka pae tumobhoosi kanauꞌomua.

⁶⁹ Notandamo aitu Anano Manusia nengkohamo ne suanano Lahataꞌala kokuasano.”

⁷⁰ Kosasawindo dopugau ambado, “Ane peda naꞌa, gahaꞌa hintu ini Anano Lahataꞌala?” Ambano Yesus, “Ingka peda pugaumiu itu.”

⁷¹ Ambado dua, “So dua ae daeꞌondofiomu sakusii? Ingka dofetingkeeꞌomu nopugauꞌao wutono.”