Lukas 21 - Muna Southern Dialect

Sadhakaano bhihinanda mokaeno 21:1-4

¹ Weo Lambuno Lahataꞌala Yesus nofowanu fotuno, gahaꞌa nowohamo mie hangkaea dofopesua sadhakaando ne sohongano sadhakaa.

² Tanowohamo dua seemie bhihinanda mokaeno nofopesua sadhakaano haa kepe weo sohonga naꞌa.

³ Nopugaumo Yesus ambano, “Amohatokoomu inia, kotu-kotuꞌu nobhahi kafopesuaꞌano bhihinanda mokaeno ini bhe kosasawiꞌae kafopesuaꞌando mie sigaoꞌano.

⁴ Kapaꞌamo mie bhahi maitu dosadhakaaꞌao labhino kanandoodo, tamaka bhihinanda aini weo kakaeno nofowaꞌao kosasawiꞌae so kadadiꞌano.”

Yesus nokowambaꞌao so kahansuruꞌano Lambuno Lahataꞌala 21:5-6

⁵ Nandoo mie detula-tulaꞌao Lambuno Lahataꞌala, domenteꞌao kakesano dolegasiane sabhaha kontu mokesa bhe sabhaha bara kafoampendo mie. Tamaka Yesus nopugaumo ambano,

⁶ “Sabhaha newohamiu itu, nahumato tempono bhe nasepoi kontu pae bhe so tumapiꞌano te wawono kontu bhaino, kosasawiꞌae damadae damohansurue.”

Katandaꞌano kakadee-dee 21:7-19

⁷ Dofeenamo anaguhuꞌino ne Yesus ambado, “Guru, naefie bhahaa kosasawiꞌae naꞌa nakumadhadhia? Maka o ae so katandaino ane nahumato tempono?”

⁸ Ambano Yesus, “Kodhagaomu, bhahasaa dofokolilino totono lalomiu. Kapaꞌamo dobhahi mie so maino damake neaku bhe dapugau, ‘Idimo ini Mesias, tempono nomaꞌomo.’ Koise angkafidaomua.

⁹ Ane meꞌawaomu bhihitano popahisaꞌa tawa kahunggano liwu koise koheduomua, kapaꞌamo kosasawiꞌae maitu tetewei nakumadhadhia deki. Ampamo kaowu miina nakomaꞌana putae nahumatomo dua aitu kafetompaino dhamani.”

¹⁰ Nofohatodamo dua ambano, “Liwu dapoewangi bhe liwu, kakolakiꞌa dapoewangi bhe kakolakiꞌa.

¹¹ Neꞌamai-neꞌamai nandumandoo luali bhalano, hopu bhe gaba. Nakumadhadhia dua katikendaꞌa lalo bhe tanda-tanda timoteꞌi te lani.

¹² Ampamo kaowu paeꞌo nakumadhadhia kosasawiꞌae naꞌa, dahumakokoomu maka damodee-deekoomu, dabhitahakikoomu weo lambu kasambaheaꞌa bhe datumohongkukoomu. Datumondakoomu ne wisendo kabhalano liwu bhe kafeompuꞌa mbaꞌinomo kaparasaeamiu ne Idi.

¹³ Anoa naꞌa somo katolalamiu membaliomu sakusiiku.

¹⁴ Dadiꞌanomo fotohoomu lalomiu, koemo paꞌindulu nekenda-kenda handamiu nada amai potunduꞌao wutomiu.

¹⁵ Kapaꞌamo wutoku so maꞌangkoomu pugau kotimbangi, sampe kosasawindo kaewamiu paise damondoiꞌea dapoewangiane tawa dagumagai pugaumiu.

¹⁶ Kamungkulaꞌimiu damowakoomu ne limando kaewa, pedamo dua kakutaꞌamiu, bhahitieꞌimiu bhe sabhangkaꞌimiu, sampe seemie hodua ne olotamiu itu damongkoda.

¹⁷ Hintimiu dabansikoomu sabhaha mie hampano kaparasaeamiu ne Idi.

¹⁸ Tamaka bhe nasetangke wuluno fotumiu pae namiinaea.

¹⁹ Ane potaamiomu, sumalamatiomu bhe meꞌawaomu dadi sakotuꞌuno.”

So kahansuruꞌano Yerusalem 21:20-24

²⁰ “Ane mohaomu kaowu kotano Yerusalem dalumibu-libue tantara, pandeꞌaanemoomu ingka tempono so kahansuruꞌano nomaꞌomo.

²¹ Wakutuu anaꞌa mie we kadieno Yudea tabeano damilei te kokabhawoꞌano ⸤ so dasumalamatiꞌao⸥ , mie weo kota tabeano dagumampi we simbalino kota, bhe mie we sembalino kota koemo dopesua weo kota.

²² Kapaꞌamo anaꞌa temponomo kahukumu maiꞌao ne Lahataꞌala, somo nakoꞌulaꞌao kosasawiꞌae tibuhino weo Kitabi.

²³ Kadaino maka kolaundo hobhineꞌi fowoowano tawa fofotitino ne wakutuu anaꞌa, kapaꞌamo ne naꞌa ne kosekadieꞌae nandumandoo kasabha foliuno kabhibhiisa. Weo amahano Lahataꞌala nahumukumu miendo Israel.

²⁴ Sigaꞌa damongkoanda kampue, sigaꞌa dawowoꞌoda so katohongku ne sabhaha onuno liwu ne dhunia ini. Kotano Yerusalem dapokafindaꞌiane sabhaha bansano liwu tapa mandeꞌaono Lahataꞌala ampa nakumapo tempo nefotantuno Lahataꞌala so andoa.”

Kahatoꞌano Anano Manusia 21:25-28

²⁵ “Mada kaowu natiwoha tanda-tanda ne wula, ne oleo bhe kulipopo. Ne dhunia ini sabhaha bansano liwu daoteꞌi sepaliꞌa bhe miinamo dakototonolaloa dawiseki guhuntumano bhe ewono teꞌi.

²⁶ Mie damateꞌaomo kateꞌi mbaꞌinomo kamihino lalondo dawiseki sabhaha kumadhadhiaꞌano ne dhunia, kapaꞌamo sabhaha waweno alamu naohungga.

²⁷ Wakutuu anaꞌa Anano Manusia - Idimo ini - damohae namai te olu, natiwoha weo kakalabhiano bhe kuasa bhalano.

²⁸ Ane mohaomu kaowu kafetompunaꞌino kadhadhia amaitu, eheomu, fowanu fotumiu kapaꞌamo nomaꞌomo tempono damosalamatikoomu.”

Kapalendano puꞌuno wohaꞌa 21:29-33

²⁹ Pada anaꞌa Yesus nofohatoandamo kapalenda ambano, “Soba feꞌondoomu puꞌuno wohaꞌa bhe puꞌuno sau sigaoꞌano.

³⁰ Ane mohaomu kaowu puꞌuno sau naꞌa natumawo, ingka pandeꞌaaneomu nomaꞌomo nakoꞌoleo.

³¹ Pedamo dua naꞌa ane mohaemoomu sabhaha kadhadhia nepulaoꞌaoku saꞌituini, pandeꞌaanemoomu Kafopahintaꞌano Lahataꞌala nomaꞌomo.

³² Amohatokoomu! Kotu-kotuꞌu mie dhamani aini paeꞌo daopulia damate, nakumadhadhiamo kosasawiꞌae naꞌa.

³³ O lani bhe dhunia naosali, tamaka wambaku ini pae bhe kasalia.”

Katangahi dakodhaga 21:34-38

³⁴ “Dhagani wutomiu, bhahasaa totono lalomiu notahusuꞌao fekihiꞌano kahame bhe foho-fohoꞌu bhe kafaraluuno dhunia. Kapaꞌamo ane nada anaꞌa Oleono Ompu nakumahatokoomu kabeanga kabhahinta.

³⁵ Kapaꞌamo oleo anaꞌa nakumangkanai kosasawindo mie meateno te dhunia ini.

³⁶ Kodha-kodhagaomu bhe sadhia sambaheaꞌomu, neanomo meꞌawaomu kaꞌosa lumapaꞌaoꞌomu ne sabhaha so kumadhadhiaꞌano naꞌa bhe naembali meehe-eheomu te wiseno Anano Manusia.”

³⁷ Ole-oleo Yesus nofofoinaꞌu weo Lambuno Lahataꞌala, hato kohondoꞌa nokalamo noodo te kabhawo koneaꞌano kabhawono Zaitun.

³⁸ Hangko-hangkowine kosasawindo mie bhahi dohatomo ne Yesus weo Lambuno Lahataꞌala dametingkeꞌao pugauno.