Lukas 20 - Muna Southern Dialect

Dofeenaꞌao kuasano Yesus 20:1-8

¹ Seꞌoleo Yesus nefoinaꞌu mie bhahi weo Lambuno Lahataꞌala bhe nofohatoanda Bhihita Metaa. Gahaꞌa dohatomo dua neangkaꞌindo imamu, pande-pande Kitabi bhe kamu-kamungkulaꞌindo Yahudi.

² Andoa ini dopugaumo ne Yesus ambado, “Fohato kainsami: o ae gahaꞌa kaengkohaꞌano kuasa mehabu sabhaha giu itu. Nofopooliko laꞌae bhahaa?”

³ Yesus tanotobhoosi ambano, “O Idi ameena dua. Soba fohato kanauꞌomu.

⁴ Nomaiꞌao ne amai bhahaa kuasano Yohanes nofokadiu? Nomaiꞌao ne Lahataꞌala kaa nomaiꞌao ne manusia?”

⁵ Pada aitu dopuga-pugaumo sapada-pada andoa ambado, “Ane dapugauꞌomu nomaiꞌao ne Lahataꞌala, tetewei namugau, ‘Noafa gahaꞌa miina marasaeaꞌaneomua?’

⁶ Tamaka ane dapugau nomaiꞌao ne manusia, kosasawindo raꞌeati dafobhatumbuliꞌao kontu, kapaꞌamo doparasaeaꞌe mpuu Yohanes maitu seemie anabii.”

⁷ Pada aitu dotobhoosimo, “Miina tamandeꞌaanea.”

⁸ Ambano toha Yesus, “Ane peda itu, paise dua amohatokoomua kaengkohaꞌano kuasaku aehabu sabhaha giu amaitu.”

Kapalendano kumahadhaano te kaampono angguru 20:9-19

⁹ Pada peda naꞌa Yesus netula-tulaꞌaomo kapalenda aini ne mie bhahi. “Nandoo seemie nelengka kaampo maka nekantisaane angguru. Pada aitu neponambomo mie so kumahadhaaꞌe maka nokala we koliwuno miina nakotempoa.

¹⁰ Nohato wulano defoꞌonu pehapi, netudumo seemie bhatuano nakumala ne kumahadhaano te kaampono angguruno naꞌa, so namalaꞌao dawuno. Tamaka mie kumahadhaano tadohambisi bhatua anaꞌa maka dotudue nasumuli haambali limano.

¹¹ Pada aitu kafeompuꞌa naꞌa netudumo dua bhatua sigaoꞌano, tamaka katuduno maitu dohambisiemo dua bhe dofekonsana-nsanaiꞌe maka dotudue nasumuli haambali limano.

¹² Pada aitu ne katolu pakumo netudu toha seemie bhatua, tamaka tadobhelai maka doꞌohoe we kundo ala.

¹³ Nokodukumo lalono kafeompuꞌa kokaampono naꞌa, ‘Kaowu aeafamo bhahaa? Ingka atumudumo anaku kamoasiꞌaoku ini, tetewei daengatie.’

¹⁴ Tamaka sadowoha anano kafeompuꞌando, kumahadhaano dopugau-gaumo ambado, ‘Anoamo ini so kohakuꞌaono kahunsaꞌaono, dopongkoeꞌanaomu, neanomo kahunsaꞌaono somo intaodiomu.’

¹⁵ Pada anaꞌa dobulue we kundo ala maka dopongkoe.” ⸤ Pada aitu Yesus nofeenadamo ambano⸥ , “Nasumuli kokaampono, namafaꞌiandamo bhahaa kumahadhaano naꞌa?

¹⁶ Ingka tetewei namai namongkolida, maka kaampono naꞌa namaꞌandae mie sigaoꞌano so kumahadhaaꞌe.” Dofetingke peda maitu mie bhahi dopugaumo ambado, “Tetewei paise!”

¹⁷ Tamaka Yesus noꞌondoda bhe nopugau ambano, “Ane peda naꞌa, o ae bhahaa maꞌanano aeatino Kitabi aini? ‘Kontu neꞌohondo mefelambuno, gahaꞌa nembalimo sandi bhalano!’

¹⁸ Sasuka mondawuno te wawono kontu anaꞌa naowita, nendawutino kontu aitu naopuho.”

¹⁹ Pande-pande Kitabi bhe neangkaꞌindo imamu deꞌondofi akala dahumakoe, kapaꞌamo dopandeꞌaane kapalenda amaitu nokantibha andoa, tamaka doteꞌi mie bhahi.

Tanduaꞌano sewa ne Omputo Kaisar 20:20-26

²⁰ Pande-pande Kitabi bhe neangkaꞌindo imamu dokaꞌo-kaꞌondo Yesus. Detuduanemo mata-mata woha-wohaꞌano mie melaano lalo, so dametandoꞌao alano wambano. Patudhundo neanomo naembali dahumakoe maka daowae ne limano gubernur, mintahano kuasa bhe kabhotusi weo liwu.

²¹ Mie andoa maitu dofeenaemo ambado, “Guru, tapandeꞌaane sabhaha pugau bhe kafoinaꞌumu nokotuꞌu, miina poꞌala-alaanda manusia, tamaka weo kalaano lalomu fofoinaꞌuꞌao sala metaano Lahataꞌala so manusia.

²² Weo tubhono agamantoomu, naembali bhahaa datumanduao sewa ne Omputo Kaisar kaa paise?”

²³ Tamaka Yesus nopandeꞌaane patudhundo daꞌumakalaiꞌe, dadi nopugaumo ambano,

²⁴ “Fotiwoha kanauꞌomu nasewoka dhoi pera itu. Gambarano ula bhe nea laꞌae gahaꞌa ini?” Ambado, “Ulano bhe neano Omputo Kaisar.”

²⁵ Nopugaumo toha Yesus ambano, “Bahangka peda naꞌa, fehebuaꞌano Omputo Kaisar waꞌaneomu Omputo Kaisar; fehebuaꞌano Lahataꞌala waꞌaneomu Lahataꞌala!”

²⁶ Andoa miina damooliea dofetando alano wambano ne wisendo mie bhahi; tadomente dofetingke katobhoosino, sampe miina dakowobhaa.

Miendo Saduki dofeenaꞌao kawanuꞌando mie mate 20:27-40

²⁷ Nandoo seemie hodua miendo Saduki domai ne Yesus. Andoa ini miina damarasaea kawanuꞌando mie mate.

²⁸ Dofeenamo ne Yesus ambado, “Guru, anabii Musa nebuhi pahinta so intaodiomu peda ini: Ane seemie moꞌane nomate tamaka hobhineno miinaꞌo nakoanaa, maka kakutaꞌano moꞌane tetewei nagumaa bhe bhihinandano naꞌa, neanomo kakutaꞌano mateno maitu nakosampuꞌa dua.

²⁹ Gahaꞌa nandoo dopipitu dosekakutaꞌa sanea moꞌane. Titiisa nogaa tamaka nomate miinaꞌo nakoanaa.

³⁰ Dadiꞌanomo katuluno nogaamo bhe bhihinandano naꞌa tamaka miinaꞌo nakoanaa nomatemo dua.

³¹ Pada aitu hobhine anaꞌa nogaaꞌanemo dua katuluno, tapedamo aitu kopipitundo dopotulu-tulu dogaaꞌane tamaka sanea domate miina dakoanaa.

³² Panda-pandano hobhine naꞌa nomatemo dua.

³³ Kaowu nada amai ne oleo kawanuꞌando mie mate? Somo mieno lambu laꞌae bhahaa hobhine amaitu? Ingka kopipitundo sanea gumaaꞌane?”

³⁴ Notobhoosimo Yesus ambano, “Mie te dhunia ini dogaa bhe dofogaada,

³⁵ tamaka nahumato oleo kawanuꞌando mie mate, mie mantasino so mesuano we dhunia buꞌou naꞌa pae dagumaa, pae dua damogaada.

³⁶ Andoa naꞌa paemo bhe kapoolia damatea, dapototomo bhe malaꞌekati. Kapaꞌamo andoa maitu anaꞌinomo Lahataꞌala, mie toka nefowanuno maiꞌao ne mate.

³⁷ Ingka wutono anabii Musa padamo nofohato kaita mentalea-mentalea so kawanuꞌando mie mate. Aini notibuhi weo Kitabino metula-tulaꞌaono sau kokihi humendeno. Ne itu Ompu nokonae Lahataꞌalano Abraham, Lahataꞌalano Ishak bhe Lahataꞌalano Yakub.

³⁸ Ompu suano Lahataꞌalando mie mate, tamaka Lahataꞌalando mie dumadi. Kapaꞌamo ne wiseno Lahataꞌala kosasawindo mie dodadi.”

³⁹ Dofetingke peda naꞌa pande-pande Kitabi seemie hodua dopugaumo ambado, “Guru, ingka netaa mpuu katobhoosimu naꞌa.”

⁴⁰ Dadiꞌanomo miinamo daokadoa dakonifeenaꞌao ne Yesus.

Pokaiꞌano Yesus bhe Daud 20:41-44

⁴¹ Nopugaumo toha Yesus ambano, “Noafa bhahaa Mesias Omputo Fosalamatino maitu dokonaane sampuꞌano Daud?

⁴² Kapaꞌamo wutono Daud weo Kitabino Laguno nopugau peda ini, ‘Ompu Lahataꞌala nokowambamo ne Ompuku, Mengkohamo ne suanaku ini,

⁴³ ampa kosasawindo kaewamu ahumabuda so kafindaꞌamu.’

⁴⁴ Dadiꞌanomo ane Daud nokonae Ompuno, noafaꞌao dua nembali sampuꞌano?”

Yesus nofofodhaga daposiꞌondo ne pande-pande Kitabi 20:45-47

⁴⁵ Tangasano mie bhahi dofetingke kafoinaꞌuno, nopugaumo Yesus ne anaguhuꞌino ambano,

⁴⁶ “Posiꞌondoomu ne pande-pande Kitabi! Andoa maitu doasiane dolili depake dhuba kawanta bhe dopoindalo sepaliꞌa dofosibhalada we wuntano daoa. Weo lambu kasambaheaꞌa doasiane dengkoha te wise-wise, weo kahame dengkoha ne kaengkohaꞌando kabhala.

⁴⁷ Andoa debhohe-bhoheꞌi bhihinanda maka dorampasi lambudo. Pakade keana notipandeꞌao kadaino isikadhindo, tadofekawanta-wantamo sambaheando. Dadiꞌanomo nasedhuluꞌa dua kabhie kahukumu so neꞌawando.”