Lukas 2 - Muna Southern Dialect

Kalenteꞌano Yesus 2:1-7

¹ Wakutuu anaꞌa Omputo Kaisar Agustus nofondawu pahintano nofotudu dabuhi neando kosasawindo mie weo kafopahintaꞌano Roma so dhiwaꞌa.

² Ainiꞌaemo dhiwaꞌa kabhao-bhaono tangasano Kirenius nembali gubernur we kadieno Siria.

³ Dadiꞌanomo kosasawindo mie dokalamo we kotando seemie-seemie defebuhi neando.

⁴ Pedamo dua anaꞌa, Yusuf nomaiꞌao we Nasaret we kadieno Galilea nokala we kadieno Yudea, we Betlehem, kota kalenteꞌano omputo Daud, kapaꞌamo anoa lee walaka bhe sampuꞌano Daud.

⁵ Patudhuno dadhumiwada bhe Maria pohaeno. Ne naꞌa Maria nandoo nofowoowa.

⁶ Gahaꞌa dohato we Betlehem, Maria nokapomo wulano nakokaana-ana.

⁷ Nokoanaꞌaomo seemie moꞌane, titiisano, nowaweꞌianemo kabhini maka nofondolee weo kampomaaꞌando kadadi, kapaꞌamo miinamo datooleaꞌa ne lambu kabutuꞌa.

Dhagaꞌino dhumba 2:8-20

⁸ Alo anaꞌa nandoo dhagaꞌino dhumba dodhagani kadadindo we pada ne owano liwu anaꞌa.

⁹ Tambaꞌomo seemie malaꞌekatino Ompu neehe-ehe ne owando maka tilangano kakalabhiano Ompu tanohehamo nokaputida sampe doteꞌi sepaliꞌa.

¹⁰ Nopugaumo malaꞌekati anaꞌa ambano, “Koise moteꞌiomua, kapaꞌamo amohatoangkoomu bhihita metaa, so kaowulaꞌano lalondo kosasawindo mie.

¹¹ Sealo itu we kotano Daud nolentemo so hintimiu Omputo Fosalamatino, Ompu Kristus.

¹² Nada ini katandaino, hintimiu meꞌawaomu seemie anaꞌi kaneꞌo lumenteno dowaweꞌiane kabhini nendole-ndole weo kampomaaꞌando kadadi.”

¹³ Tambaꞌomo notiwoha dua setagua bhalano malaꞌekati sigaoꞌano dolibu-libu malaꞌekati saꞌituini. Andoa dopudhi Lahataꞌala ambado,

¹⁴ “Nokalabhia mpuu Lahataꞌala te wawono wawo, katohopo mpuu we dhunia, so manusia posahasiꞌano lalo bhe Lahataꞌala.”

¹⁵ Dokundo kaowu malaꞌekati naꞌa dosuli te surugaa, dhagaꞌino dhumba amaitu dopugaumo sapada-pada andoa ambado, “Dokalaanaomu we Betlehem doꞌondoꞌaoꞌomu kumadhadhiaꞌano ne watu peda nefohatoꞌaono Ompu saꞌituini.”

¹⁶ Pada aitu tadopoagohimo dokala maka doꞌawamo Maria bhe Yusuf bhe anaꞌi kahobu anaꞌa nendole-ndole weo kampomaaꞌano kadadi.

¹⁷ Dowohae peda maitu, dhagaꞌino dhumba naꞌa detula-tulaꞌaomo nefohatoꞌaono malaꞌekati nopulaoꞌao anaꞌi aitu.

¹⁸ Kosasawindo mie tadomente dofetingke tula-tulando dhagaꞌino dhumba anaꞌa.

¹⁹ Tamaka Maria tanofekataa bhahi-bhahiꞌae weo totono lalono bhe nofeki-fekihie kansuhu.

²⁰ Dhagaꞌino dhumba anaꞌa dosulimo we pada dopudhi dofekakalabhia Lahataꞌala, hampano kosasawiꞌae nefetingkendo bhe newohando nopobutu sepaliꞌa bhe nefohatoꞌaono malaꞌekati.

Yesus doowae ne wiseno Ompu we Lambuno Lahataꞌala 2:21-40

²¹ Nokapo alu oleo, anaꞌi anaꞌa dosunaemo, neano dokonae Yesus. Neamo aini nefohatoꞌaono malaꞌekati wakutuuno miinaꞌo nawoowae inano.

²² Pada aitu nohatomo tempono Yusuf bhe Maria dofekangkilo wutondo, seꞌise tutuha weo tubhono agama Yahudi tibuhino ne Kitabino Musa. Dadiꞌanomo dowowoꞌo Yesus we Yerusalem damowae ne wiseno Ompu.

²³ Aini doangkafi tibuhino weo pahintano Ompu, “Kotika anaꞌi moꞌane titiisa tabeano damowae ne Lahataꞌala mbali fehebuaꞌano mongkilono.”

²⁴ Andoa deowa dua so kapopanga peda nefotantu weo pahintano Ompu, sepasa burukou bhahaꞌi haa ulu anano dhaadhaha.

²⁵ We Yerusalem nandoo seemie koneaꞌano Simeon. Anoa ini mie banara lumebeno, nontaa-ntaa kasalamatiꞌando miendo Israel. Rohino Lahataꞌala nopobhaiane,

²⁶ bhe padamo dua nofohatoe, paeꞌo namatea ane paeꞌo namoha Omputo Fosalamatino nedhandiꞌaono Ompu.

²⁷ Kamungkula aini noatoe Rohino Lahataꞌala se Lambuno Lahataꞌala. Wakutuu anaꞌa nopobutu dua anaꞌi koneaꞌano Yesus dowowoꞌoe kamungkulano dopesua weo Lambuno Lahataꞌala. Patudhundo damolapasiane tutuha peda tibuhino weo Kitabino Musa.

²⁸ Simeon lasao noala anaꞌi aitu maka noꞌawie bhe nopudhi Lahataꞌala ambano,

²⁹ “Ompu, aitu hunsaꞌanomo bhatuamu ini nahumunsa dhunia ini peda dhandimu; notohopomo laloku.

³⁰ Kapaꞌamo padamo awohaꞌao wuntano mataku Fosalamatino katudumu.

³¹ Anoamo ini nefontaa-ntaamu so sabhaha bansano liwu,

³² Anoamo ini tapedamo tilanga umulawino sabhaha bansano liwu, somo dua meowano kakalabhia ne umatimu Israel.”

³³ Inano bhe amano tadomente dofetingke sabhaha pugauno mulaoꞌano anando naꞌa.

³⁴ Pada anaꞌa Simeon nobarakatidamo bhe nopugau ne Maria inano anaꞌi anaꞌa ambano, “Kotu-kotuꞌu anaꞌi aini nofotantuemo Lahataꞌala so miendo Israel bhahino, sigaꞌa namobinasada, sigaꞌa namosalamatida. Anoa somo katandai maiꞌao ne Lahataꞌala, somo dapotaga-tagaliꞌao mie bhahi.

³⁵ Nadamo anaꞌa natipandeꞌaomo totono lalondo sabhaha mie. Gahaꞌa totono lalomu naopea kao-kaomo dakumansuꞌuane kampue.”

³⁶ Ne itu nandoo dua seemie anabii hobhine neano Hana. Neano amano Fanuel nomaiꞌao ne sampuꞌano Asyer. Anoa nokamungkulamo sepaliꞌa; pada nogaa tamaka fitu taꞌu kaowu dopomeatefi bhe moꞌaneno.

³⁷ Ampa aini nobhihinandamo, umuhuno alu fulu fato taꞌumo. Anoa ini miina nagumaati Lambuno Lahataꞌala, mentae mohondo nosombai Lahataꞌala, sadhia nopoasa bhe nosambahea.

³⁸ Pobutu doowa Yesus ne naꞌa, anoa nomaimo dua lasao nefoampe katumpuno lalo ne Lahataꞌala. Pada aitu nopugaumo nopulaoꞌao anaꞌi amaitu ne kosasawindo mie ntumaa-ntaano katitolosiꞌano Yerusalem.

³⁹ Nopalusi doalaꞌi kosasawiꞌae tutuha maraluuꞌano peda pahintano Ompu, dosulimo we liwu kaeateꞌando, liwuno Nasaret we kadieno Galilea.

⁴⁰ Anaꞌi aitu dhulu kabhala dhulu kaꞌosa, dhulu dua kapande, sadhia nopobhaiane kabarakatino Lahataꞌala.

Yesus weo Lambuno Lahataꞌala 2:41-52

⁴¹ Setaꞌu-setaꞌu ne hohaeaꞌano Paska kamungkulano Yesus dokala we Yerusalem.

⁴² Wakutuuno Yesus nokoꞌumuhu ompulu haa taꞌu, peda kaneando dokalamo toha we Yerusalem dapohohaea.

⁴³ Nopalusi hohaeaꞌa naꞌa dosulimo, tamaka Yesus neate we Yerusalem; gahaꞌa miina damandeꞌaanea kamungkulano.

⁴⁴ Kunaꞌendomo anaꞌi maitu nosulimo dua dopoangka-angkafi bhe sabhangkaꞌindo. Seꞌoleomo dokala kaneꞌomo doꞌondofie ne olotando bhahitieꞌindo bhe popandeꞌaoꞌando.

⁴⁵ Miina kaowu daohae, dosulimo we Yerusalem poowa doꞌondofie kansuhu.

⁴⁶ Nopooli tolu oleo dopoꞌawaanemo weo Lambuno Lahataꞌala, tangasano nengkoha-ngkoha ne wunta-wuntando guru agama. Anoa nofeti-fetingkeda bhe nofee-feena.

⁴⁷ Kosasawindo metingkeno domenteane sepaliꞌa kapandeno bhe katobhoosino.

⁴⁸ Sadowohae kamungkulano tadotonto, maka nopugau inano ambano, “Noafa kaꞌasi habu kainsami peda itu, anaku? Amamu bhe idi sakenda handa mani taꞌondofiko.”

⁴⁹ Tamaka Yesus tanotobhoosida ambano, “Noafa gahaꞌa ondofi kanauꞌomu? Miina mandeꞌaaneomua gahaꞌa Idi ini tabeano aeate weo lambuno Amaku?”

⁵⁰ Tamaka andoa miina dalumosangi maꞌanano pugauno naꞌa.

⁵¹ Pada aitu Yesus nosulimo we Nasaret nopoowa-owa bhe kamungkulano. Ne itu Yesus sadhia neangka ne kamungkulano. Inano tanofekataa sabhaha kadhadhia amaitu weo totono lalono.

⁵² Yesus dhulu kabhala dhulu kapande, dhulu noasiane Lahataꞌala bhe doasiane dua manusia.