Lukas 19 - Muna Southern Dialect

Yesus bhe Zakeus 19:1-10

¹ Yesus nopesuamo we kotano Yeriko tamaka tanolaloi.

² Ne itu nandoo seemie neangkando mealaꞌino sewa, nohangkaea sepaliꞌa. Neano Zakeus.

³ Zakeus gaono mpuu namohae dua mie medando ae Yesus maitu, tamaka miina namoolia mbaꞌinomo dobhahi sepaliꞌa mie pakade nepanda fewutoino.

⁴ Dadiꞌanomo notendemo nopaꞌinduluki mie bhahi, nekamponea ne puꞌuno ara naꞌumondo Yesus so lumalono ne itu.

⁵ Nohato ne putaaꞌano, Yesus nototohanamo bhe nopugau ambano, “Zakeus, sampumo fekahimba, kapaꞌamo seꞌoleo itu tetewei abutu se lambumu.”

⁶ Zakeus nosampu nofekahimba-himba maka notahima Yesus se lambuno. Kawulano maka lalono.

⁷ Tamaka kosasawindo mie mohano kadhadhia aitu tadokomuntuꞌa ambado, “Ingka nobutu ne lambuno mie kodhosa.”

⁸ Palusi anaꞌa Zakeus noehemo maka nopugau ne Ompu ambano, “Ompu, naselabunta kanandooku ini adumawuandae mie mokae. Pakade ane nandoo mie nebhohe-bhoheꞌiku, kahugindo abhoosie nafato lentuꞌa.”

⁹ Ambano Yesus, “Seꞌoleo itu mieno polambu aini detahimamo kasalamati, hampano mie aini sampuꞌano dua Abraham.

¹⁰ Kapaꞌamo Anano Manusia - Idimo ini - nomai naꞌumondofi bhe namosalamati mie kolilinono totono lalo.”

Kapalendano dhoi bulawa 19:11-27

¹¹ Tangasano mie bhahi dofetingke pugauno ini, Yesus nofokansuhumo pugauno nepake toha sehonda kapalenda. Kapaꞌamo wakutuu aitu nomaꞌomo bhe kotano Yerusalem pakade kunaꞌendomo mie bhahi naꞌa Kafopahintaꞌano Lahataꞌala napikitiwohamo.

¹² Ambano Yesus, “Nandoo seemie kafeompuꞌa nakumala we liwu mokodoꞌoꞌano damoehee so kolaki mowano liwuno. Namalusi kaowu nasumulimo.

¹³ Miinaꞌo nakumalaa, kafeompuꞌa maitu nosaliꞌimo bhatuano doompulu, maka nowaꞌanda dhoi bulawa sewoka seemie bhe nopugauanda ambano, ‘Podagaꞌaoꞌomu dhoi aini ampa asumuli.’

¹⁴ Tamaka saliwuno dobansie sampe detudumo mie dosunsumie deowa suahando miendo liwu, ‘Mie aini miina tamoindaloe so kolakino liwu mani.’

¹⁵ Gahaꞌa palusi dofoehee nembali kolaki nosulimo. Sahatono we liwuno netudumo mie dalumoꞌoi bhatuaꞌino meꞌawano dhoi bulawa endefiꞌini. Patudhuno namandeꞌao labando dopodaga seemie-seemie.

¹⁶ Mie kabhao-bhaono nomaimo bhe nopugau ambano, ‘Waompu, dhoi bulawa sewokano endefiꞌini akolabaanemo dua ompulu woka.’

¹⁷ Nopugaumo kafeompuꞌa naꞌa ambano, ‘Nokesa sepaliꞌa itu, hintu bhatua metaa, notuhu lalomu ne taka mohobu, dadiꞌanomo amaꞌangko meowa naompulu onu liwu.’

¹⁸ Nomaimo dua seemieno bhe nopugau ambano, ‘Waompu, dhoi bulawa sewokano endefiꞌini akolabaanemo dua lima woka.’

¹⁹ Ambano kafeompuꞌa naꞌa, ‘Hintu amaꞌangko meowa nalima onu liwu.’

²⁰ Nohatomo dua seemieno bhe nopugau ambano, ‘Waompu, ainiꞌae dhoi bulawa kawaꞌaomu, taꞌafeka-fekataamo weo kapusuli.

²¹ Kapaꞌamo aoteꞌi waompu, hampano kaꞌosano lalomu. Hintu tamealamo tapa nehunsamu, kape ne kaampo tapa kamontisaꞌamu.’

²² Ambano kafeompuꞌa naꞌa, ‘Bhatua modai, abhotusiko naposahataa bhe pugaumu itu. Ingka pandeꞌa kanaumo mie moꞌosano lalo, aeala tapa nehunsaku, akape ne kaampo tapa kamontisaꞌaku.

²³ Ane peda naꞌa noafa dhoiku maitu miina maꞌandae mie mefowaweno dhoi? Neanomo sasuliku atumahimae bhe oeno.’

²⁴ Nopugaumo kafeompuꞌa naꞌa ne mie meehe-eheno ne itu ambano, ‘Alaeꞌomu dhoi bulawa neintahano mie aini maka waꞌaneomu bhatua kolabaꞌano ompulu wokano saꞌituini.’

²⁵ Ambado mie netuduno naꞌa, ‘Waompu, ingka bhemo dhoino ompulu woka.’

²⁶ Ambano toha kafeompuꞌa naꞌa, ‘Amohatokoomu, sasuka mie kokanandoono datumabhahiane, tamaka tapa kokanandoono, o ae maka dua kanandoono damadae damalaꞌie.

²⁷ Tamaka kosasawindo kaewaku tapa moindalo kanau aembali kolakindo, owadaomu se ini maka pongkodaomu ne wiseku ini.’ ”

Yesus doꞌia-iaꞌe we kotano Yerusalem 19:28-44

²⁸ Nopalusi nopugau peda naꞌa Yesus nopaꞌindulukidamo, nofopansuhu kala-kalano we Yerusalem.

²⁹ Nohato we owano Betfage bhe Betania we laano kabhawo nekonando kabhawono Zaitun, Yesus netudumo dohodua anaguhuno damaꞌindulu.

³⁰ Andoa ini nofohatoda, “Kalaomu we liwu te wise watu. Samesuaꞌomu weo liwu mohaomu seꞌulu anano keledai dotapue, miinaꞌo sepaliꞌa natisawikia. Lenseꞌomu katapuno maka tondaeꞌomu we ini.

³¹ Ane bhe so meenakoomu, ‘Noafa lenseaneomu?’, fohatodaomu putae, ‘Nofaraluuꞌe Ompu.’ ”

³² Pada aitu anaguhuno netuduno dokalamo, nepoꞌawaꞌaondo nopobutu bhe pugauno Yesus.

³³ Tangasano dolense katapuno keledai aitu, dofeenadamo kokeledaino naꞌa ambado, “Noafa lenseaneomu?”

³⁴ Ambado toha, “Nofaraluuꞌe Ompu.”

³⁵ Keledai anaꞌa dotondaemo ne Yesus, towuno dolempesiane pakeando mbali kaengkohaꞌano maka dofosawi Yesus te wawono.

³⁶ Wakutuuno Yesus nolalo nosawi ne keledai naꞌa, mie bhahi dobhakesaane pakeando ne kaangkaꞌa.

³⁷ Nohato we owano Yerusalem, ne kainsibuluno kabhawono Zaitun, mie bhahi mangkafie naꞌa dopokakei-keiꞌaomo kaꞌia dopudhi Lahataꞌala, hampano sabhaha tanda tapa mentela newohando.

³⁸ Ambado, “Nobarakati omputo maino weo neano Ompu, katohopo te surugaa, kakalabhiano Lahataꞌala te wawono wawo.”

³⁹ Seemie hodua miendo Farisi mangkafino mie bhahi naꞌa dopugaumo ne Yesus ambado, “Guru, tududa anaguhuꞌimu ini koe dokodiua!”

⁴⁰ Notobhoosimo Yesus, “Amohatokoomu, ane andoa ini pae dakadiu-diu, tetewei o kontu ini so pokakei-keino.”

⁴¹ Nohato we owano kota, nowoha Yerusalem, Yesus noꞌaefiemo.

⁴² Ambano, “Kaꞌasimu hintu kotano Yerusalem, naetaa mpuu ane seꞌoleo itu lumosangie o ae maraluuꞌano so kataa bhe katohopono ngkoha-ngkohamu! Ampamo kaowu anaꞌa notifebuni, miina mohaea.

⁴³ Kapaꞌamo mada kaowu dahumato kaewamu dakumalibuangko bente maka dakumombuko bhe dasumekehiko damai fato wala.

⁴⁴ Andoa naꞌa damohansuruko bhe kosasawindo mie meatefiko. Ne kahondomino bentemu pae daehunsaangko kontu so potapiꞌano nahaa poi, mbaꞌinomo miina motindae wakutuuno Lahataꞌala nofotiwohaangkomo kaasino.”

Yesus nofekangkilo Lambuno Lahataꞌala 19:45-48

⁴⁵ Pada anaꞌa Yesus nopesuamo weo kadeteno Lambuno Lahataꞌala maka nogihasi sabhaha podaoano ne itu.

⁴⁶ Ambano Yesus, “Nandoo notibuhi weo Kitabi peda ini, ‘Lambuku lambu kasambaheaꞌa, tamaka hintimiu habueꞌomu mbali lia kaꞌonuꞌando mie modai.’ ”

⁴⁷ Seꞌo-seꞌoleo Yesus nofofoinaꞌu weo Lambuno Lahataꞌala. Neangkaꞌindo imamu, pande-pande Kitabi bhe neangkaꞌindo miendo Yahudi deꞌondofi akala damongkoe.

⁴⁸ Ampamo kaowu miina damandeꞌaanea nada amai dhalano, kapaꞌamo kosasawindo raꞌeati notihela lalondo dametingke kafoinaꞌuno.