Lukas 18 - Muna Southern Dialect

Kapalendano bhihinanda bhe pande bhitaha 18:1-8

¹ Yesus nopugaumo toha nepakeanda kapalenda. Patudhuno nofoinaꞌu anaguhuꞌino putae sadhia dasumambahea pae daongoongaraa.

² Ambano, “Ne seꞌonu kota nandoo seemie pande bhitaha tapa moteꞌino ne Lahataꞌala bhe miina nakonidhampangia mie bhainoa.

³ Ne kota aitu nandoo dua seemie bhihinanda sadhia nokala ne pande bhitaha naꞌa ambano, ‘Potunduꞌa kanau ne kaewaku.’

⁴ Ampa seꞌoleo haa oleo pande bhitaha naꞌa nokiido natumulumie. Tamaka pada anaꞌa nokodukumo we lalono, ‘Daanumo miina aoteꞌia ne Lahataꞌala, miina dua akonidhampangia mie bhaiku,

⁵ ampamo kaowu bhihinanda aini ingka nofekasabha kanau kansuhu, naetaa apotunduꞌaanemo, keana sadhia nomaiꞌi kanau bhe namekawule kanau.’ ”

⁶ Ambano Ompu Yesus, “Tandaiꞌeomu pugauno pande bhitaha pata melaano lalo naꞌa!

⁷ Bhahaa Lahataꞌala pae napotunduꞌao umati tipilino metondalano ne Anoa mentae mohondo? Bhahaa Lahataꞌala naefodhulu-dhulu tempo maka natumulumida?

⁸ Amohatokoomu, Lahataꞌala lasao napotunduꞌaanda. Ampamo kaowu humato nasumuli Anano Manusia, nandoo napoꞌawaꞌao bhahaa mie so marasaeano ne Anoa te dhunia ini?”

Kapalendano miendo Farisi bhe mealano sewa 18:9-14

⁹ Yesus nepakemo dua kapalenda aini ne mie mabhino wutondo mie banara bhe misakino mie bhaindo.

¹⁰ Ambano, “Nandoo dohodua dokala we Lambuno Lahataꞌala dosambahea. Seemie miendo Farisi, seemieno mealano sewa.

¹¹ Miendo Farisi maitu neehe-ehe bhe nosambahea weo totono lalono peda ini, ‘O Lahataꞌala, notumpu mpuu laloku ne Hintu, hampano miina apototoa bhe mie sigaoꞌano, peda mie forampasino, mie modai tawa mie monsuleno. Idi miina dua apototoa bhe mealano sewa ini.

¹² Idi apoasa haa paku seꞌahadhi, pakade pehapiku afeompulu dawue, sedawu nembali kafoampe so Hintu.’

¹³ Tamaka mealano sewa naꞌa neehe-ehe se mokodoꞌoꞌano, bhe miina naokadoa natumotohana. Anoa tanotofa-tofa mbadhano kaꞌosano sosono bhe nopugau, ‘O Lahataꞌala, mobhela kanau lalo, idi mie kodhosano ini.’

¹⁴ Amohatokoomu, mie mealano sewa ini nosuli se lambuno nembalimo mie banara ne wiseno Lahataꞌala, tamaka seemieno miina. Kapaꞌamo sasuka mekalangkeno wutono namekapandae Ompu, sasuka mekapandano wutono namekalangkee.”

Yesus nebarakati anaꞌi 18:15-17

¹⁵ Pada aitu dohatomo mie meowano anaꞌi kahobu ne Yesus, patudhundo daefekadampada. Dowoha peda maitu, anaguhuꞌino Yesus doꞌamahakidamo.

¹⁶ Tamaka Yesus noloꞌoimo anaꞌi andoa maitu bhe nopugau ne anaguhuꞌino ambano, “Hunsaꞌanomo anaꞌi andoa itu damai se Idi, koise eleꞌaandaomu, kapaꞌamo mie medandomo andoa ini so mieno Kafopahintaꞌano Lahataꞌala.

¹⁷ Amohatokoomu, kotu-kotuꞌu ane pae datumahima Lahataꞌala so mahintangino dadindo nameda anaꞌi kahobu, pae naembalia damesua weo Kafopahintaꞌano Lahataꞌala.”

Mie hangkaea noꞌali damesua weo Kafopahintaꞌano Lahataꞌala 18:18-27

¹⁸ Nandoo seemie neangkando miendo Yahudi nofeenamo ne Yesus ambano, “Guru, hintu metaano lalo, aeafa bhahaa so aeꞌawaꞌao dadi suhue dhamani?”

¹⁹ Notobhoosimo Yesus, “Noafa gahaꞌa kona kanau metaano lalo? Ingka miina bhe metaano lalo, mpahinomo wutono Lahataꞌala.

²⁰ Ingka pandeꞌaanemo padaa sabhaha pahintano Lahataꞌala: Koe monsule, koe fopongko, koe mbolaku, koe membali sakusii kopaha, fosibhalada inamu bhe amamu.”

²¹ Ambano mie anaꞌa, “Kosasawiꞌae pahinta naꞌa adhalangiemo mpini kaanaꞌiku.”

²² Nofetingke peda naꞌa Yesus nopugaumo ambano, “Tadua sehonda so nedhalangimua, asoe sabhaha fehebuaꞌamu, olino dawu-dawuandae mie mokae maka meꞌawa arataa te surugaa. Mada anaꞌa maimo angkafi kanau!”

²³ Nofetingke pugau anaꞌa mie aitu nokompeaha sepaliꞌa lalono hampano nohangkaea sepaliꞌa.

²⁴ Yesus noꞌondoe bhe nopugau ambano, “Kaꞌali maka mie kodhoi damesua weo Kafopahintaꞌano Lahataꞌala.

²⁵ Nomuda seꞌulu kahumbau namangka ne kabhentano deu, bhe seemie hangkaea namesua weo Kafopahintaꞌano Lahataꞌala.”

²⁶ Mie metingkeno dopugaumo ambado, “Ane peda naꞌa, laꞌae bhahaa so sumalamatino?”

²⁷ Ambano Yesus, “Tapa nemondoino manusia, nomondoiꞌe Lahataꞌala.”

Ponambono mie mangkafino Yesus 18:28-30

²⁸ Nopugaumo Petrus ambano, “Ingka insaodi ini tahunsaemo sabhaha fehebuaꞌa mani maka taangkafiko.”

²⁹ Ambano Yesus, “Amohatokoomu, sasuka humunsano lambuno, hobhineno, tawa bhahitieno, kamungkulano tawa anaꞌino hampano nofosibhala Kafopahintaꞌano Lahataꞌala, nandoo so neꞌawano.

³⁰ Ne dhamani aini naeꞌawa sedhuluꞌa dua kabhahino bhe nehunsano, maka nahumato dhamani mbuhumai naeꞌawa dadi suhue dhamani.”

Kafohato katolu pakuno so kakadee-deeno Yesus 18:31-34

³¹ Pada anaꞌa Yesus nosaliꞌimo anaguhuꞌino ompulu hoduano maka nofohatoda ambano, “Aitu dokalaomu we Yerusalem. Ne naꞌa kosasawiꞌae nebuhindo ana-anabii mulaoꞌaono Anano Manusia - Idimo ini - nakoꞌulamo.

³² Kapaꞌamo Anano Manusia daowae ne limando mie tapa mandeꞌaono Lahataꞌala maka damele-elee, damekaꞌaebue bhe dakumapehasie.

³³ Anoa maitu damepekie bhe damongkoe tamaka ne katolu oleono namanu namaiꞌao ne mate.”

³⁴ Tamaka kosasawiꞌae naꞌa miina dalumosangiea anaguhuꞌino. Maꞌanano pugauno maitu notifebuni ne andoa, sampe miina damandeꞌaanea o ae patudhuno.

Yesus nefekaꞌosa seemie kabunto we owano kota Yeriko 18:35-43

³⁵ Wakutuuno Yesus nomaꞌomo nahumato we Yeriko, nandoo seemie kabunto nengkoha-ngkoha ne wiwino sala nesalo-salo.

³⁶ Wakutuuno kabunto maitu nofetingke mie bhahi dolalo ne itu, nofeenamo ambano, “O ae naꞌa?”

³⁷ Ambado mie, “Yesus miendo Nasaret noangka ne ini.”

³⁸ Nokeimo kabunto anaꞌa ambano, “Yesus sampuꞌano Daud, mobhela kanau lalo!”

³⁹ Mie maꞌinduluno doꞌamahakiemo bhe dopugauane pae nakodiua. Tamaka tanodhulu kahaaꞌi nokeia, “Sampuꞌano Daud, mobhela kanau lalo!”

⁴⁰ Gahaꞌa Yesus nofetumpumo maka netudu mie datumondaane kabunto naꞌa. Nohato se owano Yesus nofeenaemo ambano,

⁴¹ “Mekapoindalo ae bhahaa? Amafaꞌiangko gaomu?” Ambano mie aitu, “Ompu, gaoku afowoha!”

⁴² Ambano Yesus, “Fowohaꞌo toha, hampano parasaea ne Idi, osalamatimo!”

⁴³ Mie anaꞌa lasao nofowoha maka noangkafi Yesus poowa nofekakalabhia Lahataꞌala. Kosasawindo mie mohano kadhadhia amaitu, dopudhimo dua Lahataꞌala.