Lukas 17 - Muna Southern Dialect

Kafoinaꞌuno dhosa bhe kaparasaea 17:1-6

¹ Nopugaumo Yesus ne anaguhuꞌino ambano, “Tingkuno dhosa tetewei nandumandoo, tamaka nobalaamo mie mehabuno tingkuno dhosa naꞌa.

² Mie medando naꞌa naetaa dakumantaiane kagili kontu ne wuꞌuno maka damotondue we teꞌi. Naetaa nada anaꞌa bhe nehabu tingkuno dhosa so mie ndidiki ini.

³ Dhagaꞌao wutomiu! Ane bhahitiemu nehabu kaꞌala mefeꞌulaiane, ane nasumosoane maꞌafuane.

⁴ Mahinggamo seꞌoleo nafitu paku nakokaꞌala ne hintu bhe nafitu paku dua nasumuli ne wisemu maka napugau, ‘Asumosoaneꞌo toha’, tetewei maꞌafuane.”

⁵ Dopugaumo rasuluꞌi ne Ompu Yesus ambado, “Tubhahie kaparasaea mani.”

⁶ Ambano Ompu, “Ane kabhalano kaparasaeamiu nada onuno wonoita seꞌonu, naembali pugauꞌomu ne puꞌuno ara ini, ‘Buna wutomu maka tisa wutomu we teꞌi’, puꞌuno sau maitu tetewei namangkafi pugaumiu.”

Kafeompuꞌa bhe bhatuano 17:7-10

⁷ “Ibahano ne olotamiu itu nandoo kobhatuano mbali melukuno te kaampo tawa dhumaganino kadadino. Ane bhatua naꞌa nohato nomaiꞌao te kaampo, bhahaa nasumaliꞌie, ‘Mai, lasaomo humaa’? Ingka paise.

⁸ Tetewei napugau ne bhatua naꞌa, ‘Mefotoka kanau otiku. Loli kadeki pakeamu maka ondofa kanau ampa namada aomaa bhe aohoꞌu. Mada anaꞌa kaneꞌomo naembali momaa bhe mohoꞌu.’

⁹ Bhahaa naefoampe katumpuno lalo ne bhatua naꞌa, hampano padamo nodhalangi takano? Ingka paise.

¹⁰ Pedamo dua hintimiu itu, ane madamo dhumalangi kosasawiꞌae takamiu, naetaa pugauꞌomu, ‘Insaodi ini senaꞌa-naꞌa bhatua, tadhalangi kaowu taka netuduꞌao mani.’ ”

Yesus nefekaꞌosa doompulu mie kokuli modaino 17:11-19

¹¹ Weo kala-kalano nohope we Yerusalem, Yesus nosohaki potidaꞌano kadieno Samaria bhe Galilea.

¹² Wakutuu nopesua ne seꞌonu liwu, dosumpuiꞌemo kokuli modaino doompulu. Andoa ini deehe-ehe se mokodoꞌoꞌano

¹³ bhe dokei ambado, “Guru Yesus! Mobhela kainsami lalo!”

¹⁴ Yesus noꞌondoda maka nopugau ambano, “Kala fotiwoha wutomiu ne imamuꞌi ⸤ damahakesaa kulimiu⸥ .” Gahaꞌa we laano sala tadosimonggelaꞌamo.

¹⁵ Seemie ne olotando doompulu maitu, sanowoha wutono nonggelamo, lasao nosuli nopokakei-kei nopudhi Lahataꞌala.

¹⁶ Nohato nolongkomo ne aꞌeno Yesus maka nefoampe katumpuno lalono. Gahaꞌa mie anaꞌa miendo Samaria.

¹⁷ Nopugaumo Yesus ambano, “Kunaꞌekumo koompulundo donggelamo. Ne amaida bhahaa sisiuano?

¹⁸ Miina bhe sigaoꞌano bhahaa so sumulino mudhino Lahataꞌala mpahinomo koliwuno ini?”

¹⁹ Pada aitu nopugaumo ne mie anaꞌa, “Eheꞌo toha maka kala, hampano parasaea ne Idi, osalamatimo.”

Kahatoꞌano Kafopahintaꞌano Lahataꞌala 17:20-37

²⁰ Yesus dofeenae miendo Farisi bhahaꞌi naefie nahumato Kafopahintaꞌano Lahataꞌala. Yesus notobhoosidamo ambano, “Tanda-tandano kahatoꞌano kafopahintaꞌano Lahataꞌala miina natiwohaa.

²¹ Pakade pae dua bhe so pugauno, ‘Ondoe itu, ainiꞌae tawa atatuꞌae’, kapaꞌamo sakotuꞌuno Kafopahintaꞌano Lahataꞌala nandoomo ne olotamiu itu.”

²² Pada anaꞌa nopugaumo ne anaguhuꞌino, “Mada kaowu gaomiu mohaomu tempono kahatoꞌano Anano Manusia, mahingga naseꞌoleo kaowu, tamaka pae sepaliꞌa mohaomua.

²³ Nandumandoo mie so pugauno ne hintimiu, ‘Ondoeꞌomu atatuꞌae tawa ainiꞌae Anano Manusia.’ Tamaka koise kalaomua, koise dua angkafieꞌomua.

²⁴ Kapaꞌamo oleono kahatoꞌano Anano Manusia nada adhono bhibhito, nakosilaka te lani maiꞌao te setompano ampa we setompano.

²⁵ Ampamo kaowu Anano Manusia tabeano nabhahi naenamisi kadeki kakadee-dee bhe dabansie mie dhamani aini.

²⁶ Peda koeatendo manusia ne dhamanino Nuh, nadamo dua anaꞌa ne oleono kahatoꞌano Anano Manusia.

²⁷ O mie dohumaa dofohoꞌu, dogaa bhe dofogaada, ampa oleono Nuh nopesua weo bhangka bhalano. Wakutuu anaꞌa nohato luano oe bhalano nofobinasada kosasawindo.

²⁸ Pedamo dua ne dhamanino Lot, o mie dohumaa dofohoꞌu, dopoꞌoli poaso, domontisa bhe defelambu.

²⁹ Tamaka ne oleono Lot nohunsa kotano Sodom, nosampumo efi bhe waleha kabeanga o use nomaiꞌao te lani nofobinasada kosasawindo.

³⁰ Nadamo dua anaꞌa so kumadhadhiano ne oleono Anano Manusia namotiwoha Wutono.

³¹ Ne oleo anaꞌa, mie we tambi koemo dopesua dakoniala weo lambu, pedamo dua mie te kaampo koemo dosulia we liwu.

³² Feꞌulaiꞌomu kumadhadhiaꞌano ne hobhineno Lot.

³³ Laꞌae so potaamiꞌaono inawa patudhuno so nasumalamatiꞌao, namiinae inawano. Tamaka laꞌae so miinaeno inawa, ingka nasumalamati.

³⁴ Amohatokoomu, ane alo anaꞌa dahodua sekaodoꞌa, seemie dawowoꞌoe, seemieno dahumunsae.

³⁵ Ane dahodua hobhine tangasano megilino kahitela, seemie dawowoꞌoe, seemieno dahumunsae.

³⁶ [Ane dahodua kumahadhaano te kaampo, seemie dawowoꞌoe, seemieno dahumunsae.]”

³⁷ Dofeenamo dua ne Yesus, “Ne amai Ompu?” Notobhoosimo Yesus ambano, “Ne amai kobhangkeꞌano, ne itumo kaefoꞌonuꞌando kaa.”