Lukas 15 - Muna Southern Dialect

Kapalendano dhumba miinaeꞌano 15:1-7

¹ Dobhahi mealaꞌino sewa bhe mie kodhosa sadhia domai ne Yesus dofetingke kafoinaꞌuno.

² Miendo Farisi bhe pande-pande Kitabi dokamuntu-muntu ambado, “Pahasili, mie aini netahima mie kodhosa bhe nohumaa nopombali-mbalianda.”

³ Dadiꞌanomo Yesus nofohatoandamo kapalenda aini.

⁴ “Ane ibahano ne olotamiu itu nandoo seemie kodhumbano moꞌono ulu, gahaꞌa namiinae seꞌulu, naeafamo bhahaa? Ingka teteweimo nahumunsada siua fulu siua uluno naꞌa we pada maka naꞌumondofi seꞌuluno miinaeꞌano naꞌa ampa naꞌumawae.

⁵ Satiꞌawano natumongkuemo, kaꞌosano kaꞌiano.

⁶ Sahatono we lambu nasumaliꞌimo sabhangkaꞌino bhe santieneno maka napugauanda, ‘Moꞌia kaitaomu, dhumbaku miinaeꞌano aꞌawaemo.’

⁷ Amohatokoomu, nadamo dua anaꞌa te surugaa daoꞌia hampano seemie kodhosa metompaꞌaono dhosano, nalumiuꞌe kaꞌiando mbaꞌinomo mie banara siua fulu sisiuano tapa maraluuno dametompaꞌao dhosando.”

Kapalendano dhoi pera miinaeꞌano 15:8-10

⁸ ⸤ Ambano toha⸥ “Ane ibahano seemie hobhine bhe dhoino ompulu woka pera, gahaꞌa namiinae sewoka, naeafamo bhahaa? Ingka teteweimo naesula kantalea maka naeꞌaho weo lambuno naꞌa naꞌumondofie namotinda-tindae ampa naꞌumawae.

⁹ Satiꞌawano nabhasimo sabhangkaꞌino bhe santieneno maka namugau, ‘Moꞌia kaitaomu, hampano dhoiku miinaeꞌano aꞌawaemo.’

¹⁰ Amohatokoomu, nadamo dua anaꞌa malaꞌekatino Lahataꞌala daoꞌia hampano seemie kodhosa metompaꞌaono dhosano.”

Kapalendano anaꞌi moꞌane miinaeꞌano 15:11-32

¹¹ ⸤ Ambano toha Yesus⸥ , “Nandoo seemie bhe ana moꞌaneno dohodua.

¹² Nopugaumo kaꞌepu ne amano ambano, ‘Ama, waꞌa kanaumo dawuku maiꞌao ne kahunsaꞌao mani itu!’ Amando lasao nopodawuanda kahangkaeano.

¹³ Miina naompona pada aitu kaꞌepu noasomo kosasawiꞌae dawuno maka nokala we koliwuno, nokodoꞌo sepaliꞌa. Nohato we koliwuno nopokamasaꞌao dhoino, nodadi noangkafi namisino.

¹⁴ Hato nopuli kosasawiꞌae dhoino, liwu aitu nofindaꞌiemo gaba, anoa nenamisimo kakae.

¹⁵ Dadiꞌanomo nokalamo nokahadhaa ne seemie meateno ne liwu aitu. Mie anaꞌa notudue nakumala we kaampo nadhumagani wewi ⸤ kakaneano⸥ .

¹⁶ Kaꞌosano kaꞌahono sampe mahingga oti kabhilaꞌa so nehumaano wewi gaonoa tanaomaamo, tamaka miina dua bhe maꞌanea.

¹⁷ Panda-pandano nopandeꞌaomo lalono. Nokoduku we lalono ambano, ‘Kabhahindo mie mealano ponambo ne amaku dohumaa nopontabhila-bhila, gahaꞌa idi ne ini amateꞌao oti.

¹⁸ Naetaamo asumuli ne amaku maka amohatoe, ‘Ama, akodhosamo ne Lahataꞌala bhe ne hintu.

¹⁹ Miinamo amantasia kumona kanau anamu, hunsaꞌanomo aembali nada mealano ponambo.”

²⁰ Pada anaꞌa noehemo maka nosuli we amano. Gahaꞌa nandoo nokodoꞌo nowohaemo amano. Kabhelano maka lalono amano, lasao notende nopoꞌawaane, nokakopue bhe nowonoe.

²¹ Ambano ana moꞌane anaꞌa ne amano, ‘Ama, akodhosamo ne Lahataꞌala bhe ne hintu, paemo amantasia kumona kanau anamu.’

²² Tamaka amano tanopugau ne bhatuaꞌino, ‘Fekahimba owa kanauꞌomu dhuba foliuno kakesa maka fepakeanieꞌomu, fosukoaneomu singkahu ne wunano limano bhe fokanaaneomu kaampini ne aꞌeno.

²³ Meala kaitaomu anano sapi kampuhobuku maka sumbeleeꞌomu. Maimoomu, daomaaꞌomu bhe dahumame-hameomu.

²⁴ Kapaꞌamo anaku ini kanggetu nomatemo, gahaꞌa sulimo nodadi. Nomiinae, sulimo apoꞌawaane.’ Pada aitu dohame-hamemo.

²⁵ Tamaka anano titiisa nandooꞌe te kaampo. Hato nosuli nomaꞌo bhe lambu nofetingkemo ndiino mbololo bhe ganda bhe lagu-lagu manari.

²⁶ Anoa nebhasimo seemie bhatua maka nofeenaꞌao maꞌanano bhahi-bhahiꞌae maitu.

²⁷ Ambano bhatua naꞌa, ‘Ingka o aimu nosulimo. Amamu padamo nesumbele sapi kampuhobuku, kapaꞌamo aimu suli nopoꞌawaꞌane weo katotomata.’

²⁸ Nofetingke peda aitu, anaꞌi titiisa naꞌa noꞌamahamo bhe nokiidomo namesua. Dadiꞌanomo amano nolimbamo nopoꞌawaane nomalu-malusie namesua.

²⁹ Tamaka tanotobhoosi ne amano ambano, ‘Ingka ntini taꞌu-taꞌumo afeompuniꞌiko, bhe nasepaku miina alumempagi pahintamu. Tamaka bhe naseꞌulu anano membe miina maꞌa kanau so ahumame-hameꞌao bhe sabhangkaꞌiku.

³⁰ Aitu kaneꞌo nohato anamu pokamasaꞌaono fehebuaꞌamu bhe hobhineꞌi karambole, gahaꞌa lasao mesumbeleane sapi kampuhobuku.’

³¹ Notobhoosimo amano, ‘Anaku, ingka hintu sadhia pobhai bhe idi; sabhaha fehebuaꞌaku fehebuaꞌamumo dua.

³² Nopantasi mpuu daoꞌiaꞌomu bhe dahumame-hameomu kapaꞌamo aimu kanggetu nomatemo, gahaꞌa sulimo nodadi, nomiinae sulimo apoꞌawaane.’ ”