Lukas 14 - Muna Southern Dialect

Yesus nefekaꞌosa toha mie mosaki ne oleono Sabat 14:1-6

¹ Sewakutuu ne oleono Sabat, Yesus nokalamo se lambuno seemie neangkando Farisi naomaa ne itu. Kosasawindo mie humatono dofeꞌo-feꞌondoe.

² Tambaꞌomo nohato seemie kobehe-beheno, tanokoweo-weomo koseꞌulu-uluno. Sahatono neehe-ehe ne wiseno Yesus.

³ Nopugaumo Yesus ne pande-pande Kitabi bhe miendo Farisi ambano, “Weo tubhono agamantoomu naembali bhahaa daefekaꞌosa mie mosaki ne oleono Sabat kaa paise?”

⁴ Tamaka andoa miina dakodiua. Pada aitu Yesus nointahamo limano mie mosaki naꞌa, nofekaꞌosae maka notudue nakumala.

⁵ Pada peda maitu nopugaumo ne andoa ambano, “Ane ibahano ne olotamiu itu nandoo seemie nondawu anano tawa o sapino weo sumu ne oleono Sabat, pae nahumelae bhahaa?”

⁶ Tamaka andoa miinamo dakowobhaa datumobhoosiea.

Kaengkohaꞌa te wise bhe kaengkohaꞌa we kundo 14:7-11

⁷ Yesus nowoha mie humatono sadhia deꞌondofi kaengkohaꞌa te wise. Dadiꞌanomo nopugaumo nepakeanda kapalenda.

⁸ Ambano, “Ane ibahano dobhasiko ne hame-hameno kakawi, koise mengkoha te wise, kapaꞌamo bheanea kolambuno nebhasi dua mie lumiuko katifosibhala.

⁹ Ane nada naꞌa bheanea kolambuno bhasikoomu kohoduamiu naꞌa namai namohatoko, ‘Aesalo maafu, kaengkohaꞌamu ini so mie amaitu.’ Nada kaowu anaꞌa hintu moambanomo, pakade kumalamo mengkoha ne kaengkohaꞌa we kundo-kundo.

¹⁰ Tamaka ane ibahano dobhasiko, kalamo mengkoha ne kaengkohaꞌa we kundo. Bheanea kolambuno bhasiko namai namugauangko, ‘Maimo sabhangka, mengkoha te wise ini.’ Ane nada naꞌa hintu meꞌawa kafosibhala ne kosasawindo mie humatono.

¹¹ Kapaꞌamo sasuka mekalangkeno wutono namekapandae Ompu, sasuka mekapandano wutono namekalangkee.”

Mie so nebhasi 14:12-14

¹² Nopugaumo Yesus ne kolambuno bhasie naꞌa ambano, “Ane mefokonandoo kahame ole-oleo tawa kohondoꞌa, koise bhasi sabhangkaꞌimu, kakutaꞌamu tawa bhahitieꞌimu tawa santieneꞌimu mohangkaeano. Kapaꞌamo mada kaowu andoa maitu dabhasiko dua maka hintu tumahimamo kabhoosino habu metaamu.

¹³ Tamaka ane mehabu kahame mebhasi mie mokae, tapa maiwuluno, kakempa bhe kabunto.

¹⁴ Ane nada naꞌa hintu kodawua mpuu, kapaꞌamo andoa maitu miina bhe ae-aenondoa so kabhoosino habu metaamu. Habu metaamu naꞌa nabholosiangkoe Lahataꞌala nahumato kawanuꞌando mie banara maiꞌao ne mate.”

Kapalendano mie metingku-tingkuno 14:15-24

¹⁵ Nofetingke peda naꞌa seemie ne olotando mie humatono nopugaumo ne Yesus ambano, “Dokodawua mpuu mie so poharoano weo Kafopahintaꞌano Lahataꞌala.”

¹⁶ Tamaka Yesus tanotobhoosi ambano, “Nandoo seemie mehabuno kahame bhalano, mie nebhasino dobhahi sepaliꞌa.

¹⁷ Nohato wakutuuno dapoharoa, notudumo bhatuano nasumunsumi mie nebhasino, ambano ‘Maimoomu, bhahi-bhahiꞌae notokamo.’

¹⁸ Tamaka kosasawindo desalo maꞌafu deꞌondofi tingku. Nopugaumo seemie ambano, ‘Kaneꞌo aeꞌoli kaampo, dadiꞌanomo akumala aꞌumondoe beano. Aesalo maꞌafu.’

¹⁹ Seemieno nopugau dua ambano, ‘Kaneꞌo aeꞌoli sapi lima pasa, akumala asumobae kadeki. Aesalo maꞌafu.’

²⁰ Seemieno dua nopugau ambano, ‘Idi kaneꞌo agaa, dadiꞌanomo pae naembalia amai.’

²¹ Pada aitu bhatua anaꞌa nosulimo nofohato kafeompuꞌano. Nofetingke peda naꞌa kafeompuꞌano noꞌamaha sepaliꞌa bhe nopugau ne bhatuano, ‘Fekahimba kalaomu ne sabhaha kaangkaꞌa bhe kampuna weo kota maka bhasidaomu kosasawindo mie mokae, tapa maiwuluno, kabunto bhe kakempa maka owadaomu se ini.’

²² Palusi anaꞌa nohatomo bhatua nopolele ambano, ‘Pahinta waompu padamo adhalangie, tamaka nandoo dua kaengkohaꞌa.’

²³ Nopugaumo dua kafeompuꞌa naꞌa, ‘Kalaomu ne amai kabhongka bhe salano kaampo, fosuhudaomu mie nepoꞌawaꞌaomiu ne itu damesua, neanomo lambuku naopono!

²⁴ Amohatokoomu, mie kabhao-bhaono nebhasi bhe naseemie paise bhe so menamisino otino hameku.’ ”

Kosasawiꞌae damosipulie so damangkafiꞌao Yesus 14:25-35

²⁵ Weo kala-kalano dobhahi sepaliꞌa mie dobhatompa doangkafi Yesus. Yesus nodolikidamo bhe nopugau ambano,

²⁶ “Ane seemie namai ne Idi, tabeano nakumukundo amano bhe inano, hobhineno bhe anaꞌino, kakutaꞌano moꞌane bhe hobhine bhahamoa nabansi inawano wutono. Ane paise, pae naembalia so anaguhuku.

²⁷ Laꞌae so tapa tumongkuno sau salipuno maka namangkafi kanau, pae naembali so anaguhuku.

²⁸ Ane ibahano ne olotamiu itu nandoo seemie gaono naefoehe lambu melangke. Ingka tetewei naengkoha-ngkoha deki nalumentu-lentu ongkosono bhahaꞌi nakumapoiꞌe dhoino sampe natumokae bhahaꞌi paise.

²⁹ Kapaꞌamo mada kaowu namongkoha sandino tamaka paise namoolie namotokae, ingka kosasawindo mie mohae damuta-mutaaꞌie

³⁰ bhe dapugau ambado, ‘Mie aitu netandaki nefoehe lambu, gahaꞌaitu miina namondoiꞌea namotokae.’

³¹ Pedamo dua anaꞌa, ane seemie kolaki bhe tantarano ompulu hewu nakumala napopahisa bhe kolaki sigaoꞌano bhe tantarano haa fulu hewu, ingka tetewei naengkoha-ngkoha deki nalumentu-lentu lalono, bhahaꞌi namondoiꞌe namewangi kaewa so maiꞌie maitu bhahaꞌi paise.

³² Ane paise namondoiꞌe, tetewei naepakatu deki katudu tinangke kaewano nandoo nokodoꞌo naesalomo dhalano dapometaa.

³³ Pedamo dua anaꞌa hintimiu, laꞌae tapa mosipulino wutono maiꞌao ne sabhaha fehebuaꞌano, paise naembalia so anaguhuku.

³⁴ O gaha maitu daanumo netaa, tamaka ane nosimotembeꞌa, kiha-kiha damekakahaane dua ae?

³⁵ Ingka paemo nakofahalaaꞌa, pae natipakea te kaampo, paemo dua naembali so kahewutino kantisa, tadaꞌumoho. Ane dokotingala, tabeano dametingke!”