Lukas 13 - Muna Southern Dialect

Dhosa bhe kakadee-dee 13:1-5

¹ Wakutuu anaꞌa dohatomo seemie hodua ne Yesus. Andoa ini deowaane bhihita miendo Galilea nepongkono Pilatus tangasano deowa kapopanga ne Lahataꞌala, heando noposalomo bhe heano kadadi nesumbelendo mbali kapopanga.

² Notobhoosimo Yesus ambano, “Kunaꞌemiu miendo Galilea naꞌa nofoliu kabhieno dhosando bhe kosasawindo miendo Galilea sigaoꞌano hampano kadaino kolaundo naꞌa?

³ Amohatokoomu, miina sepaliꞌa. Ampamo kaowu, ane pae metompaꞌao dhosamiu, kosasawimiu itu binasaomu dua nada andoa naꞌa.

⁴ Pedamo dua mie ompulu aluno mateno notabuhikida menara kontu we owano Siloam. Kunaꞌemiu nofoliu kabhalano kaꞌalando bhe kosasawindo meateno we Yerusalem?

⁵ Amohatokoomu, miina sepaliꞌa. Ampamo kaowu, ane paise metompaꞌao dhosamiu, kosasawimiu itu binasaomu dua nada andoa naꞌa.”

Kapalendano puꞌuno ara tapa kobhake 13:6-9

⁶ Pada anaꞌa Yesus nepakeanda kapalenda ambano, “Nandoo seemie bhe puꞌuno arano notumbu weo kaampono angguruno. Seꞌoleo nomai noꞌondo bhakeno gahaꞌa miina naewohaa maumo naseꞌonu.

⁷ Nopugaumo ne dhagano kaampono angguruno, ‘Tolu taꞌumo amai aꞌondo bhakeno puꞌuno ara aini, tamaka miina akoniꞌawaa. Naetaa tuꞌoemo, ingka nefekatembe kaowu wite.’

⁸ Ambano dhagano kaampono naꞌa, ‘Waompu, hunsaꞌanomo kadeki taꞌu aini. Madaꞌo asumaꞌerae witeno maka ahumewutie,

⁹ bhahaꞌi kaowu taꞌu te wise ini nakobhakemo. Ane paise ingka datumuꞌoemo.’ ”

Yesus nefekaꞌosa mie mosaki ne oleono Sabat 13:10-17

¹⁰ Sewakutuu ne oleono Sabat Yesus tangasano nofofoinaꞌu ne seꞌonu lambu kasambaheaꞌa.

¹¹ Ne itu nandoo seemie hobhine ompulu alu taꞌumo nopesuakie seetani sampe nosaki. Nobungkumo towuno, miinamo sepaliꞌa namoolia noehe nofekalaa.

¹² Nowoha hobhine amaitu Yesus noloꞌoiꞌemo bhe nopugau ambano, “Waꞌina moꞌosaanemo sakimu itu.”

¹³ Pada aitu noteimo limano ne hobhine anaꞌa. Hobhine aitu lasao noehe nofekalaa maka nofekakalabhia Lahataꞌala.

¹⁴ Tamaka mie mandeꞌaono lambu kasambaheaꞌa naꞌa nohehewu lalono mbaꞌinomo Yesus nefekaꞌosa mie mosaki ne oleono Sabat. Anoa nopugaumo ne mie bhahi ambano, “Nandoo nomo oleo so dakogunaꞌao, dadiꞌanomo maiꞌomu damekaꞌosakoomu ne nomo oleono naꞌa, sumanomo koise ne oleono Sabat.”

¹⁵ Tamaka Ompu Yesus notobhoosiemo ambano, “Hintimiu mie mehaaꞌulano! Ingka kosasawimiu ini sadhia lenseomu sapi tawa keledaimiu maka tondaeꞌomu we simbali fefohoꞌutieꞌomu, mahingga ne oleono Sabat.

¹⁶ Ingka hobhine aini sampuꞌano dua Abraham. Gahaꞌa ompulu alu taꞌumo nogogantue Kafeompuꞌando seetani. Dadiꞌanomo dalumensee tabeano, mahingga ne oleono Sabat.”

¹⁷ Pugauno Yesus naꞌa doambanoane kosasawindo mewangie, tamaka mie bhahi doꞌia sepaliꞌa mbaꞌinomo sabhaha kakalabhia nehabuno.

Kapalendano onuno wonoita bhe ragi 13:18-21

¹⁸ Yesus nopugaumo toha ambano, “Dapototoane bhe ae bhahaa Kafopahintaꞌano Lahataꞌala maitu? Amalendaane ae bhahaa so metaaꞌanoa?

¹⁹ Kafopahintaꞌano Lahataꞌala tapedamo onuno sau wonoita seꞌonu noalae mie maka nohooꞌe te kaampono. Hato notumbu nembalimo puꞌuno sau bhalano sampe kaꞌuhi lumola domai dofekaufe ne haꞌaꞌino.”

²⁰ Ambano dua, “Apototoane bhe ae dua Kafopahintaꞌano Lahataꞌala?

²¹ Kafopahintaꞌano Lahataꞌala tapedamo ragi nealano seemie hobhine mbali kaefoꞌendeꞌano roti. Ragi aini nokunsaloe bhe tariguno fato fulu baa ampa noꞌende kosasawiꞌae.”

Mie so sumalamatino 13:22-30

²² Weo kala-kalano nohope we Yerusalem, Yesus nopontaala-alaꞌao kota bhe liwu poowa nofofoinaꞌu.

²³ Nandoo seemie meenano ambano, “Ompu, naseendai kaowu bhahaa so sumalamatino?”

²⁴ Notobhoosimo Yesus ne mie bhahi ambano, “Uleiꞌomu lalomiu pesuaꞌomu ne fointo mosekeꞌano. Kapaꞌamo amohatokoomu dobhahi mie mesobano damesua, tamaka paise damoolia.

²⁵ Nahumato kaowu kolambuno namehemo maka naꞌumonto fointono, hintimiu tameehe-ehemoomu we simbali, mekate-katengkiomu fointo bhe pugauꞌomu, ‘Waompu, lengka kainsami fointo!’ Tamaka anoa tanamugau ambano, ‘Miina amandeꞌaangkoomua maiꞌaoꞌomu ne amai.’

²⁶ Maka ambamiu dua, ‘Insaodi pada tahumaa tafohoꞌu tapombali bhe hintu, ingka hintu dua padamo fofoinaꞌu we kaangkaꞌano liwu mani.’

²⁷ Tamaka anoa tanamugau ambano, ‘Miina amandeꞌaangkoomu maiꞌaoꞌomu ne amai, gampiomu ne wiseku ini hintimiu humabu modaino!’

²⁸ Wakutuu anaꞌa maka mohaomu Abraham, Ishak bhe Yakub bhe kosasawindo anabii weo Kafopahintaꞌano Lahataꞌala, gahaꞌa hintimiu daꞌumohokoomu we simbali, ne naꞌa taꞌo kangkoꞌae bhe kuꞌino wangka.

²⁹ O mie damaiꞌao te mata oleo bhe we kansoopa, te napa bhe we salata maka daengkoha daomaa weo Kafopahintaꞌano Lahataꞌala.

³⁰ Kotu-kotuꞌu dabhahi mie mbuhumaino sumuli damaꞌindulu, maꞌinduluno sumuli dambuhumai.”

Fedeeno Yesus ne kotano Yerusalem 13:31-35

³¹ Ne wakutuu anaꞌa dohatomo seemie hodua miendo Farisi dopugau ne Yesus ambado, “Kalaꞌo toha, hunsamo liwu aini, hampano kolaki Herodes nokopatudhu namongkoko.”

³² Notobhoosimo Yesus ambano, “Kalaomu, fohatoomu kilau naꞌa, ‘Idi aefolimba seetani bhe aefekaꞌosa mie mosaki seꞌoleo itu bhe naewine, naefua atumokaemo kahadhaaku.’

³³ Ampamo kaowu oleo itu, naewine bhe naefua tetewei amopansuhu kala-kalaku, kapaꞌamo miina namantasia seemie anabii damongkoe we simbalino kotano Yerusalem.

³⁴ Yerusalem, Yerusalem! Hintumo mongkono ana-anabii bhe bhatumbulino mie netudu ne hintu. Nentuhumo nokamba laloku ne hintu, amohompu raꞌeatimu, kanggetu inano manu nofohompu anano we towawano panino, tamaka hintimiu mokiidoomu.

³⁵ Kotu-kotuꞌu lambumu ini natihunsamo bhe naolino, maka amohatokoomu paemo moha kanauꞌomua ampa mugauꞌomu, ‘Notibarakati maino weo neano Ompu!’ ”