Lukas 12 - Muna Southern Dialect

Kafoinaꞌu kafepuuni so anaguhuꞌino Yesus 12:1-12

¹ Wakutuu anaꞌa nehewundo mie dopohato-hatomo tadopogua-guamo. Yesus netandakimo nofofoinaꞌu, kabhao-bhaono nopugaumo ne anaguhuꞌino ambano, “Posiꞌondoomu bhe kodhagaomu ne ragindo miendo Farisi, maꞌanano kafehaaꞌulando.

² Kapaꞌamo kosasawiꞌae tifebuniꞌano damotiumbae, sabhaha tisongkowiꞌano dalumengkae.

³ Dadiꞌanomo pugaumiu kohondoꞌa natifetingke ole-oleo, nepokamuntuiꞌaomiu weo boloku damolelee ne mie bhahi.

⁴ Hintimiu sabhangkaꞌiku, amohatokoomu, koise moteꞌiomu ne mepongkono mbadha, hampano namada anaꞌa paemo daeafa-afaa.

⁵ Amohatoangkoeꞌomu so nemoteꞌimiu. Moteꞌiomu Lahataꞌala, kapaꞌamo pada nofopongko, nokokuasa dua nofoꞌoho we narakaa. Kotu-kotuꞌu amohatokoomu moteꞌiomu ne Anoa.

⁶ Ingka dopandeꞌaanemo o rone doasoe lima ulu haa dhoi, tamaka mahinggamo peda naꞌa bhe naseꞌulu miina bhe nemolimpuꞌaono Lahataꞌala.

⁷ Hintimiu itu bhemo wuluno fotumiu dopadae doꞌeapie. Dadiꞌanomo koise moteꞌiomu, noliuꞌe kakofahalaamiu bhe kawaindo rone.

Koemo doteꞌi dopugau doangkafi Yesus 12:8-12

⁸ Amohatokoomu, laꞌa-laꞌae pugauno ne wisendo manusia putae noangkafi Idi, Anano Manusia, asumakusiiane dua te wisendo malaꞌekatino Lahataꞌala.

⁹ Tamaka laꞌa-laꞌae gumagano ne wiseno manusia putae anoa miina namangkafi Idi, agumagaiꞌe dua ne wiseno malaꞌekatino Lahataꞌala.

¹⁰ Ane o mie nopahampugau noewangi Anano Manusia, natiꞌamponi; tamaka ane dopahampugau dofekaꞌaebu Rohino Lahataꞌala paise natiꞌamponia.

¹¹ Ane daowakoomu weo lambu kasambaheaꞌa dabhitahakikoomu, ne wisendo pamarinta tawa ne wisendo kabhala, koemo nekenda-kenda handamiu bhahaꞌi nada amai potunduꞌao wutomiu tawa pugauꞌaoꞌomu ae.

¹² Kapaꞌamo wakutuu aitu dua namoinaꞌukoomu Rohino Lahataꞌala o ae so nepugauꞌaomiu.”

Kapalendano mie hangkaea kumabhohe-bhoheno 12:13-21

¹³ Nopugau seemie ne olotando mie bhahi naꞌa ne Yesus ambano, “Guru, fohato kanau isaku nadumawu kanau dua kahunsaꞌaono ama mani.”

¹⁴ Tamaka Yesus tanotobhoosi ambano, “Lamoꞌane, laꞌae bhahaa sumangke kanau so bhitahakikoomu tawa so dumawuno kahunsaꞌaomiu?”

¹⁵ Ambano toha Yesus ne mie bhahi, “Posiꞌondoomu bhe kodhagaomu ne sabhaha kakadau-dau, kapaꞌamo mahinggamo mie napontalabhi-labhi kahangkaeano, dadino miina naeate ne kahangkaeano naꞌa.”

¹⁶ Pada aitu nopugaumo nepakeanda kapalenda ambano, “Nandoo seemie hangkaea, pehapino witeno nopontalabhi-labhi.

¹⁷ Nokodukumo lalono, ‘Aeafamo bhahaa, ingka miinamo bhe lambu so katihompuꞌano pehapiku ini?’

¹⁸ Ambano toha mie anaꞌa, ‘Nada ini so nehabuku. Ahumunggada bhantea kaehompuꞌaku pehapi ini maka aefoehe guda sedhuluꞌano kabhalaꞌi, ne itumo so katihompuꞌano kosasawiꞌae paeku bhe sabhaha fehebuaꞌaku.

¹⁹ Mada aitu amugaumo ne wutoku, ‘Hintu itu nobhahimo kanandoomu, tanekanta-kantawumo pae bhe kawoloa ntini taꞌu-taꞌu. Fewuleꞌo toha, humaa fohoꞌu, fekataaꞌi namisimu!’ ’

²⁰ Tamaka Lahataꞌala nokobhoasaomo ne mie anaꞌa, ‘Hintu mobhohe, alo aini dua inawamu damalaemo, maka kanandoo nefontaa-ntaamu itu so laꞌae bhahaa?’

²¹ Nadamo aitu so netompaloino mie mefoꞌonuno kahangkaea so wutono, tamaka miina nahumangkaea ne pomatano Lahataꞌala.”

Kamihino lalo 12:22-34

²² Yesus nopugaumo ne anaguhuꞌino ambano, “Dadiꞌanomo amohatokoomu, koise nomihi lalomiu ne kadadiꞌamiu bhahaꞌi momaaꞌomu ae, koise dua nomihi lalomiu ne mbadhamiu bhahaꞌi mepakeomu ae.

²³ Ingka noliuꞌe dadi ini bhe oti, noliuꞌe dua mbadha bhe pakea.

²⁴ Soba feꞌo-feꞌondoomu kaa maitu, miina dahumooa miina dakumapea, miina dua dakobhantea tawa o aꞌu so kaefoꞌonuꞌano pehapi, tamaka nopakandeda Lahataꞌala. Ingka foliuda hintimiu bhe kaꞌuhi lumolano maitu.

²⁵ Laꞌae bhahaa ne olotamiu itu hampano kamihino lalo namooli namodhulu dadino naseendai kaowu?

²⁶ Dadiꞌanomo ane giu mohobuno pedando naꞌa pae mondoiꞌeomu mehabuomu, noafa nomihiꞌao lalomiu ne giu sigaoꞌano?

²⁷ Soba feꞌo-feꞌondo kambeano kuni, miina dakumahadhaa, miina dua damoohu. Tamaka omputo Salomo foliuno kahangkaea maitu, pakeano miina naehatoa ne kakesano kamba-kamba aitu!

²⁸ Kahoku tumumbuꞌano we pada oleo itu, namentae datumawuemo. Sanginomo kahoku maitu nolegasiemo Lahataꞌala, bhemo toha hintimiu. Kakuhano dua kaparasaeamiu!

²⁹ Dadiꞌanomo koise fekihiomu kansuhu o ae so nehumaamiu, o ae so nefohoꞌumiu pakade koise nekenda-kenda handamiu.

³⁰ Kosasawiꞌae naꞌa nefosibhalandomo sabhaha bansano liwu ne dhunia ini tapa mandeꞌaono Lahataꞌala. Tamaka Amamiu nopandeꞌaane kosasawiꞌae naꞌa ingka faraluuꞌeomu.

³¹ Ampamo kaowu ondofiomu kadeki Kafopahintaꞌano Lahataꞌala maka kosasawiꞌae kafaraluumiu naꞌa namaꞌangkoeꞌomu dua.

³² Hintimiu pata bhabhahino, koise moteꞌiomu! Kapaꞌamo Amamiu nopoindalomo nosangkekoomu so mieno Kafopahintaꞌano.

³³ Asopieꞌomu fehebuaꞌamiu maka dhoino waꞌandae mie mokae! Mehabuomu kadu-kaduno dhoi so tapa molusaꞌano, maꞌanano kahangkaea te surugaa tapa mowoowolono. Kahangkaea anaꞌa paise nahumatoe kasibu, paise dua naomaaꞌe faa.

³⁴ Kapaꞌamo ne amai kanandooꞌano kahangkaeamiu, ne ituꞌaemo dua totono lalomiu.”

Bhatua sadhia mantaa-ntaano 12:35-40

³⁵ Ambano toha Yesus, “⸤ Naetaa meate mantaa-ntaaꞌomu so kahatoꞌaku⸥ . Sadhia mekawaweomu bhe kantaleamiu sahende,

³⁶ peda mie ntumaa-ntaano kafeompuꞌando nomaiꞌao we hame-hameno kagaa. Ane nasumuli kafeompuꞌando naꞌa maka naekatengki fointo lasao dalumengkaane.

³⁷ Dokodawua mpuu bhatua nehatofino kafeompuꞌando nandoo demboto bhe dodhaga. Amohatokoomu, kotu-kotuꞌu kafeompuꞌa aitu nalumoli pakeano maka napugauanda bhatuano naꞌa daengkoha bhe naetaganaanda daomaa.

³⁸ Ane nahumato kafewuntaꞌino alo tawa namaꞌo kamentae maka nahumatofida dodhaga, dakodawua mpuu bhatua andoa maitu.

³⁹ Tamaka naetaa mandeꞌaaneomu, ane kolambuno namandeꞌaane hambi seꞌae so hatoꞌano kasoꞌo, teteweimo pae tanakumatahomoa lambuno dalumeloe.

⁴⁰ Dadiꞌanomo hintimiu mantaa-ntaaꞌomu dua, kapaꞌamo Anano Manusia nahumato ne wakutuu pata nepotu-potuluꞌao.”

Bhatua motuhuno lalo bhe tapa motuhuno lalo 12:41-48

⁴¹ Nopugaumo Petrus ambano, “Ompu, patudhuno kapalenda naꞌa so insaodi kaa so kosasawindo manusia?”

⁴² Ambano Ompu Yesus, “Kaowu laꞌae bhahaa mie mandeꞌaono lambuno kafeompuꞌano motuhuno lalo bhe kotimbangino maitu? Anoamo maitu so nesangkeno kafeompuꞌa so neangkando kosasawindo bhatua so metaganaanda daomaa napobutu bhe tempono.

⁴³ Nokodawua mpuu bhatua naꞌa ane nohatofie kafeompuꞌano tangasano noalaꞌi gunano.

⁴⁴ Amohatokoomu, kotu-kotuꞌu kafeompuꞌa naꞌa nasumangke bhatua aitu somo mandeꞌaono sabhaha fehebuaꞌano.

⁴⁵ Ampamo kaowu ane bhatua naꞌa nokoduku we lalono, ‘Ingka kafeompuꞌaku nandoo naompona maka nasumuli’, maka namepekimo bhatua sigaoꞌano namoꞌane nahobhine, naomaa bhe naohoꞌu sampe nalolanu.

⁴⁶ Gahaꞌa kafeompuꞌano tambaꞌomo nahumato ne oleo tapa nepotu-potuluꞌao, ne tempo tapa nenamu-namu. Bhatua anaꞌa namehaakebhae, kahukumu napototoane bhe mie pata meangkano ne Lahataꞌala.

⁴⁷ Seemie bhatua mandeꞌaono kapoindalono kafeompuꞌano tamaka miina namantaa-ntaa tawa miina nadhumalangiea, naobhahi naeꞌawa kabhebhe.

⁴⁸ Tamaka seemie bhatua tapa mandeꞌaono kapoindalono kafeompuꞌano maka nehabu kaꞌala sampe nopantasimo dabhebhee, seendai naeꞌawa kabhebhe. Kapaꞌamo mie metahimano nobhahi, naobhahi dua datumuntue; mie neposahunaꞌaono nobhahi, naobhahi dua so nesonso ne anoa.”

Yesus neowa kapowengkeꞌa 12:49-53

⁴⁹ “Hatoku ini aeꞌoho efi we dhunia ini; gaoku mpuu efi aini nohendemo!

⁵⁰ Idi ini tetewei aenamisi kakadee-dee, nosabha sepaliꞌa handaku ane paeꞌo namalusi kakadee-dee anaꞌa.

⁵¹ Kunaꞌemiu hatoku ini aeowa pometaa te dhunia ini? Miina sepaliꞌa! Amohatokoomu, suano pometaaꞌa, tamaka powengke-wengkeꞌa.

⁵² Kapaꞌamo notanda aitu, ane dolidima weo polambu dapowengke-wengke, totoluno damewangi hoduano, hoduano damewangi totoluno.

⁵³ Amano namewangi anano moꞌane, ana moꞌane namewangi amano. Inano namewangi anano hobhine, anaꞌi hobhine namewangi inano. Kamungkula hobhine namewangi poniano hobhine, ponia hobhine namewangi kamungkulano hobhine.”

Damandeꞌao tandano dhamani 12:54-59

⁵⁴ Yesus nopugaumo dua ne mie bhahi maitu ambano, “Ane wohaomu olu nofoni we bhaha lasao pugauꞌomu, ‘Ingka nakoꞌuse’, maka kotu-kotuꞌu nokoꞌuse.

⁵⁵ Ane wohaomu kawea nofinda salata, ambamiu, ‘Naombena oleo seꞌoleo itu’, maka kotu-kotuꞌu nombena.

⁵⁶ Hintimiu mie mehaaꞌulano! Tanda-tanda te lani bhe we dhunia pandeꞌaane maꞌanakieꞌomu. Koasimo dua miina mandeꞌaane maꞌanakiomu tanda kumadhadhiano ne dhamani aini!

⁵⁷ Koasiꞌamo dua miina mondoiꞌeomu mebhotusiꞌaoꞌomu wutomiu medando ae kumotuꞌuꞌano?

⁵⁸ Kapaꞌamo ane bhe so mobhieangko te wiseno kabhala, ulei lalomu pometaaꞌane tinangke we laano sala. Ane paise kaewamu itu nabuluko ne wisendo pande bhitaha, maka pande bhitaha naꞌa namowako ne limano dhagano katohongku maka anoa naꞌumohoko weo katohongku.

⁵⁹ Amohatokoomu, kotu-kotuꞌu paise sepaliꞌa damolimbako ane paeꞌo momeaꞌe kosasawiꞌae dosamu.”