Lukas 11 - Muna Southern Dialect

Yesus nofoinaꞌu anaguhuꞌino dosambahea 11:1-13

¹ Sewakutuu Yesus nosambahea. Pada nosambahea nopugaumo seemie anaguhuno ambano, “Ompu, foinaꞌu kainsami tasumambahea peda Yohanes ⸤ Fokadiuno⸥ nofoinaꞌu anaguhuꞌino.”

² Notobhoosidamo Yesus ambano, “Ane sumambaheaꞌomu, pugauꞌomu nada ini: Ama, notifosibhalaꞌo toha neamu, nohatoꞌo toha Kafopahintaꞌamu.

³ Waꞌa kainsami nehumaa kafaraluu mani seꞌo-seꞌoleo.

⁴ Amponie sabhaha dhosa mani, kapaꞌamo insaodi tamaꞌafuꞌao dua kokaꞌalano ne insaodi. Koise folapasa kainsami ne sabhaha kasoba.”

⁵ Pada anaꞌa Yesus nopugaumo dua ambano, “Ane ibahano nandoo ne olotamiu itu seemie ne kafewuntaꞌino alo nakumala we lambuno sabhangkano maka namugau, ‘O bhahitie, foada kanau rotimu natolu onu.

⁶ Kapaꞌamo bhe sabhangkaku weo kala-kalano noangka se lambu maka miina takoꞌae-aea so naomaa.’

⁷ Koasimo dua mieno lambu naꞌa tanapugau, ‘Koise hungga-hunggai kanau, fointo notiꞌontomo, anaꞌiku bhe wutoku taodomo, pae naembalia amanu amaꞌangko roti.’

⁸ Amohatokoomu, mahinggamo kolambuno naꞌa nongahe namanu maka namaꞌane roti mbaꞌinomo doposabhangka, tamaka hampano nokiido naoambano, tetewei kolambuno naꞌa namanu maka namaꞌane kafaraluuno.

⁹ Dadiꞌanomo amohatokoomu, tamesalomo, tetewei damaꞌangko; taꞌondofimo, tetewei poꞌawaane; tamekatengkimo fointo, tetewei dalumengkaangkoe.

¹⁰ Kapaꞌamo sasuka mesalono naetahima, sasuka meꞌondofino naepoꞌawaꞌao, bhe sasuka mekatengkino fointo dalumengkaane.

¹¹ Nandoo bhahaa ne olotamiu itu seemie ama ane anano nesalo kenta tanowaꞌao ule so kalolino?

¹² Tawa ane nesalo unteli tanowaꞌao waꞌati-atikoho?

¹³ Dadiꞌanomo sanginomo hintimiu mie modai pandemoomu waꞌaoꞌomu metaaꞌano ne anamiu, bhemo toha Amamiu te surugaa! Anoa namaꞌao Rohino ne laꞌae maka dua mesaloiꞌe.”

Yesus bhe Beelsebul 11:14-23

¹⁴ Sewakutuu Yesus nefolimba seetani mefekabhongano mie. Salimbano seetani anaꞌa, mie bhonga aitu nopandemo netula-tula sampe mie bhahi tadomente.

¹⁵ Tamaka nandoo mugauno, “Anoa ini nefolimba seetani nopake kuasano Beelsebul, Kafeompuꞌandomo seetani.”

¹⁶ Nandoo dua mesalono ne Yesus namotiwohaanda tanda tapa mentela so katandaino kuasano nomaiꞌao ne Lahataꞌala, tamaka patudhundo damansoꞌalaiꞌe.

¹⁷ Tamaka Yesus nopandeꞌaane fekihindoa lasao nopugau ambano, “Ane seꞌonu kakolakiꞌa pae daseꞌise tamaka sadhia dopoewa-ewangi tetewei nabinasa, pedamo dua ane seꞌonu polambu pae daseꞌise tamaka sadhia dopogiha-giha tetewei nahumansuru.

¹⁸ Dadiꞌanomo ane weo kafopahintaꞌano Kafeompuꞌando seetani pae daseꞌise, dapoewa-ewangi sanea-nea andoa, nada amai naentara dua kafopahintaꞌano seetani naꞌa? Kapugauꞌaku peda anaꞌa, kapaꞌamo ingka ambamiu aefolimba seetani apake kuasano Beelsebul.

¹⁹ Dadiꞌanomo ane aefolimba seetani apake kuasano Beelsebul, anaguhuꞌimiu depake kuasa laꞌae defolimba seetani? Dadiꞌanomo nehabundo maitu katandainomo kaꞌalano fekihimiu.

²⁰ Tamaka ane aefolimba seetani apake kuasano Lahataꞌala, sakotuꞌuno nohatokoomu Kafopahintaꞌano Lahataꞌala.

²¹ Ane mie moꞌosa nosangka bhe ewangano nodhagani lambuno wutono, teteweimo sabhaha fehebuaꞌano natohopo.

²² Ampamo kaowu nahumato seemie lumiuꞌe kaꞌosa maka napoewangiane bhe natumaloe, tetewei sabhaha katokano ewangano netangkaꞌaono narumampasie maka sabhaha fehebuaꞌano nerampasino nadumawu-dawue.

²³ Laꞌae tapa pobhaino bhe Idi noewangi kanau. Laꞌae tapa humamba kanau taefohompu mie, mie aitu mehabuno pogasa-gasaꞌando mie.”

Seetani nosuli kundo 11:24-26

²⁴ “Ane seetani nolimba nomaiꞌao ne manusia, tanolilimo ne wite mokekele neꞌondofi kabutuꞌano, tamaka miina naeꞌawaa. Dadiꞌanomo ambano, ‘Naetaa asumuli we lambuku kahunsaꞌaku.’

²⁵ Hato nosuli ne itu, gahaꞌa lambu anaꞌa nonggelamo bhe notifosintuwu.

²⁶ Pada anaꞌa nosulikimo sabhangkano dopipitu maka dopesua deate ne itu. Seetani bhaiꞌino maitu dofoliuꞌe dua kadaindo. Panda-pandano mie aitu sedhuluꞌa dua kadahano bhe pakatandano.”

Mie kodawuano mpuu 11:27-28

²⁷ Tangasano Yesus nopugau, nokeimo seemie hobhine ne olotando mie bhahi naꞌa, “Nokodawua mpuu hobhine mowoowako bhe motitiko.”

²⁸ Tamaka Yesus tanopugau ambano, “Uumbe, tamaka sedhuluꞌa kakodawuando metingkeno bhoasaono Lahataꞌala bhe doangkafie.”

Tandano kumadhadhiano ne anabii Yunus 11:29-32

²⁹ Tangasano dolibu-libue mie bhahi maitu Yesus nopugaumo ambano, “Mie dhamani aini nodai diundo. Andoa desalo seꞌise tanda tapa mentela tamaka paise damaꞌanda ampamo kaowu tandano kumadhadhiano ne anabii Yunus.

³⁰ Hampano pedamo anabii Yunus padamo nembali tanda so miendo kota Niniwe, nadamo dua aitu Anano Manusia naembali tanda so mie dhamani aini.

³¹ Nahumato Oleono Kiama, omputo hobhine maiꞌaono we Salata namai nasiwanuꞌa bhe mie dhamani aini maka namoꞌalada. Kapaꞌamo omputo hobhine aini nomaiꞌao we tompano dhunia nametingke kafoinaꞌu kotimbangino omputo Salomo. Sakotuꞌuno humatono ini noliuꞌe omputo Salomo.

³² Nahumato Oleono Kiama, miendo Niniwe dasiwanu-wanuꞌa bhe mie dhamani aini maka damoꞌalada. Kapaꞌamo miendo Niniwe dofetingke kaowu bhihita neowano anabii Yunus, dofetompaꞌaomo dhosando bhe dodoli ne Lahataꞌala. Sakotuꞌuno humatono ini noliuꞌe anabii Yunus.”

Kantaleano mbadha 11:33-36

³³ “Bhe naseemie miina bhe mesulano kantalea maka nahumunsae we wawa tawa nosongkowiane bhengki, tamaka tetewei dohunsae ne kangkailaoꞌano, neanomo sasuka mie mesuano weo lambu damoha tilangano.

³⁴ O mata kantaleanomo mbadhamu. Ane netaa matamu, nentaleamo dua mbadhamu; tamaka ane nodai matamu, nohohondomo dua mbadhamu.

³⁵ Dadiꞌanomo posiꞌondoomu, bhahasaa nahohondo tilanga ne wutomiu itu.

³⁶ Ane mbadhamu nentalea, miinamo bhe mohohondoꞌanoa, maka koseꞌulu-ulumiu nentalea sepaliꞌa, pasae notila-tilakoomu kantalea.”

Yesus nefoꞌala miendo Farisi bhe pande-pande Kitabi 11:37-54

³⁷ Nopalusi nofofoinaꞌu, Yesus nosaliꞌiemo seemie Farisi daomaa se lambuno. Dadiꞌanomo Yesus nokala se lambuno maka nengkoha nohumaa.

³⁸ Gahaꞌa miendo Farisi naꞌa tanomente nowoha Yesus tanohumaamo miina naewanu deki ⸤ peda atorano agama⸥ .

³⁹ Tamaka Ompu nopugaumo ambano, “Hintimiu miendo Farisi fewaniuꞌomu kundono kampomaaꞌa bhe kampohoꞌuꞌa tamaka we totono lalomiu noponoꞌao kasaohi buku bhe podiu modai.

⁴⁰ Hintimiu bhohe, ingka Lahataꞌala mokonandoono tiwohaꞌano we simbali, Anoamo dua mokonandoono meateꞌano weo totono lalo.

⁴¹ Ampamo kaowu, iꞌino kampomaaꞌa bhe kampohoꞌuꞌa tabeano podawu-dawuomu dua bhe mie mokae. Ane nada anaꞌa naonggelamo kosasawiꞌae, naetaa mbadhamiu naetaa totono lalomiu.

⁴² Tamaka balaamoomu hintimiu miendo Farisi, kapaꞌamo taꞌolentu-lentuomu pehapimiu mohobuꞌino peda sabhaha kagule feompulu dawueꞌomu maka sedawu gaatiemoomu so kapopanga ne Lahataꞌala. Gahaꞌa o kaꞌadhili bhe kaasi ne Lahataꞌala miina konamianeomu. Haa hondano aini tetewei dhalangieꞌomu, tamaka atorano agama koise dua molimpuꞌaneomua.

⁴³ Balaamoomu hintimiu miendo Farisi kapaꞌamo weo lambu kasambaheaꞌa moasianeomu sepaliꞌa mengkohaomu ne kaengkohaꞌando kabhala, moasianeomu dua sepaliꞌa dofosibhalakoomu we wuntano daoa.

⁴⁴ Balaamoomu, kapaꞌamo hintimiu nopototo bhe kobuhu tapa kokatandai, mie mangkano te wawono tadofinda-findaꞌimo miina damandeꞌaanea.”

⁴⁵ Seemie pande Kitabi notobhoosimo ambano, “Guru, pugau peda naꞌa ingka fekaꞌaebumo dua bhe insaodi.”

⁴⁶ Tamaka ambano Yesus, “Balaamoomu hintimiu pande-pande Kitabi, kapaꞌamo sabhaha tubho nehabumiu tapeda wowoꞌo mobhie nefotongkumiu ne mie bhaimiu, gahaꞌa wutomiu mongaheomu bhe dumingkueꞌomu.

⁴⁷ Balaamoomu, kapaꞌamo mefekakesaomu kobuhundo ana-anabii, gahaꞌaitu awuaꞌimiu mongkoda.

⁴⁸ Habumiu naꞌa nokomaꞌanaꞌao akuiꞌomu dua podiundo awuaꞌimiu moasianeomu, kapaꞌamo awuaꞌimiu naꞌa mongkono ana-anabii andoa naꞌa maka hintimiu mekakesano kobuhundo.

⁴⁹ Dadiꞌanomo Lahataꞌala kotimbangino nokobhoasao ambano, ‘Aetudu ana-anabii bhe rasuluꞌi dakumala se andoa, sigaꞌa damongkoda bhe damodee-deeda.’

⁵⁰ Kanandooꞌano peda anaꞌa neanomo mie dhamani aini damotongkuanda kaꞌala defolimba heando kosasawindo anabii mpini pakatifokonandoono dhunia.

⁵¹ Maꞌanano notanda ne katipongkoꞌano Habel ampa ne katipongkoꞌano Zakaria, nepongkondo ne kadeteno Lambuno Lahataꞌala ne olotano medha kaefoampeꞌa bhe Boloku mongkilo. Amohatokoomu dua, kosasawiꞌae kaꞌala naꞌa damotongkuandae mie dhamani aini.

⁵² Balaamoomu hintimiu pande-pande Kitabi, kapaꞌamo hintimiu mintahano kunsino fointono kapande ⸤ maꞌanano kafoinaꞌu so dasumalamatiꞌao⸥ . Gahaꞌa wutomiu kiido mesuaꞌomu bhe mie moindalono mesuano onto-ontomidaomu.”

⁵³ Nokala kaowu nomaiꞌao ne itu pande-pande Kitabi bhe miendo Farisi dopoewangianemo sepaliꞌa bhe doangka-angkafiane kansuhu sabhaha kafeena.

⁵⁴ Patudhundo dakumabua alano wambano, somo tingkundo dahumakoe.