Lukas 10 - Muna Southern Dialect

Yesus netudu anaguhuꞌino dofitu fulu damolele bhoasaono Ompu 10:1-12

¹ Palusi anaꞌa Ompu Yesus nepilimo anaguhuno sigaoꞌano dofitu fulu, maka notududa dahodua-hodua dakumala damaꞌindulu ne kota bhe liwu so kaangkaiꞌano.

² Nopugaumo ambano, “Pehapi so netobhe daanumo nobhahi, tamaka kumahadhaano dendai. Dadiꞌanomo mesaloomu ne kokaampono naꞌa, naetudu mie dakumala datumobhe.

³ Kalamoomu, atudukoomu ini tapedamo anano dhumba monaleno damesua ne wunta-wuntano daꞌu ngkahoku.

⁴ Koise mewowoꞌoomu kadu-kaduno dhoi, bhaku tawa kaampini we sembalino kapakemiu, koise pofendeꞌaoꞌomu bhe laꞌae maka dua ne laano sala.

⁵ Ane mesuaꞌomu ne lambudo mie, feabhaomu kadeki, ‘Kabarakatino Ompu so polambu aini.’

⁶ Ane ne itu bhe mie mantasino tumahimano kabarakatino kafeabhamiu, mie aitu tetewei natibarakati. Tamaka ane paise bhe mantasino, kabarakatino nasumuli ne wutomiu.

⁷ Meateomu ne lambu aitu, humaaꞌomu bhe fohoꞌuomu ampa kawaꞌaondo, kapaꞌamo mie kumahadhaano nopantasi naꞌumawa ponambono. Koise mebhali-bhaliiꞌomu lambu kabutuꞌa.

⁸ Ane mesuaꞌomu ne seꞌonu kota maka datumahima metaakoomu ne itu, humaaꞌomu ampa kawaꞌaondo ne hintimiu.

⁹ Fekaꞌosadaomu mie mosaki ne itu bhe fohatodaomu, ‘Kafopahintaꞌano Lahataꞌala nomaꞌomo bhe hintimiu.’

¹⁰ Tamaka ane mesuaꞌomu ne seꞌonu liwu maka pae datumahima metaakoomu ne itu, liligiomu kabhongka we liwu aitu bhe mekei-keiandaomu,

¹¹ ‘Mahingga bungahasino liwumiu mikaꞌano ne aꞌe mani, tatumantae ne wisemiu. ⸤ Aini somo kafodhagamiu, miinamo bhe taiꞌa mani bhe hintimiu⸥ . Ampamo kaowu pandeꞌaaneomu Kafopahintaꞌano Lahataꞌala nomaꞌomo.’

¹² Amohatokoomu, nahumato Oleono Kiama kahukumu so neꞌawa kotano Sodom nandoo naosape dapototoane bhe so neꞌawano liwu aitu.”

Yesus nefoꞌala liwu-liwu tapa marasaeano 10:13-16

¹³ “Balaamo hintu liwuno Korasim! Balaamo dua hintu liwuno Betsaida! Ane endefiꞌini we kotano Tirus bhe Sidon nakumadhadhia tanda-tanda tapa mentela newohamiu ini, tetewei nomponamo dadumoli ne Lahataꞌala, daepake bhida bhe daetei abu te fotundo ⸤ peda katandaino dososoꞌao dhosando⸥ .

¹⁴ Tamaka nahumato Oleono Kiama, naosape kahukumuno Tirus bhe Sidon bhe kahukumu so neꞌawamiu.

¹⁵ Hintu liwuno Kapernaum! Kunaꞌemu dasumangkeko te lani? Paise, tamaka daꞌumohoko we narakaa!”

¹⁶ ⸤ Pada aitu nopugaumo ne anaguhuꞌino, ambano,⸥ “Laꞌae metingkekoomu, nofetingkemo Idi. Laꞌae mongaheꞌikoomu, nongaheꞌimo Idi. Laꞌae mongaheꞌino Idi, nongaheꞌimo dua Tumudu kanau.”

Anaguhuꞌino fitu fuluno dosulimo 10:17-20

¹⁷ Palusi aitu anaguhuꞌino fitu fuluno dosulimo, doꞌia sepaliꞌa. Ambado, “Ompu, mahingga seetani doangkafi pahinta mani ane tapake neamu.”

¹⁸ Nopugaumo Yesus ambano, “Awoha Kafeompuꞌando seetani nondawu pasae bhibhito nomaiꞌao te lani.

¹⁹ Ingka padamo awaꞌangkoomu kuasa so mefindaꞌiꞌaoꞌomu ule bhe sabhaha kaꞌuhi kobisa. Awaꞌangkoomu dua kapooli so tumaloꞌaoꞌomu kuasano kaewamiu sampe paise bhe so kobalaaꞌano ne wutomiu.

²⁰ Ampamo kaowu koise moꞌiaꞌomu mbaꞌinomo seetani doangkafi pahintamiu, tamaka fowula lalomiu hampano neamiu notibuhimo te surugaa.”

Wambano katumpuno lalono Yesus 10:21-24

²¹ Wakutuumo dua aitu Yesus nowula lalono hampano nokabhintie Rohino Lahataꞌala, maka ambano, “Notumpu laloku ne Hintu, Ama, Ompuno lani bhe dhunia, kapaꞌamo kosasawiꞌae ini febunie ne mie kotimbangi bhe mie mande, tamaka fotiwohae ne mie ndidiki tapa kokasikolano. Daanumo Ama, pedamo aitu kaposahasiꞌanomo lalomu.

²² Kosasawiꞌae padamo nowaꞌa kanaꞌe Amaku. Miina bhe mandeꞌaono Anano Lahataꞌala mpahinomo Amano. Miina dua bhe mandeꞌaono Amano mpahinomo Anano, bhe kosasawindo mie neꞌundaꞌaono Anano Lahataꞌala damandeꞌao Amano.”

²³ Pada aitu nodolikimo anaguhuꞌino bhe nopugau, “Kakodawuamiu hampano wohaomu newohamiu ampa aitu.

²⁴ Kapaꞌamo amohatokoomu, dobhahi anabii bhe kafeompuꞌa endefiꞌini gaondo damoha newohamiu ampa aitu, tamaka miina damohaea. Gaondo dametingke nefetingkemiu aitu, tamaka miina dametingkeea.”

Mieno Samaria metaano lalo 10:25-37

²⁵ Sewakutuu noehemo seemie pande Kitabi nomansoꞌalai Yesus. Ambano, “Guru, aeafa so aeꞌawaꞌao dadi suhue dhamani?”

²⁶ Yesus notobhoosimo ambano, “O ae tibuhiꞌano weo Kitabino Musa? O ae nebasamu weo Kitabi naꞌa?”

²⁷ Ambano mie anaꞌa, “Moasiane Ompu Lahataꞌalamu sampuu-mpuuno lalomu, sampuu-mpuuno alusumu, sampuu-mpuuno kaꞌosamu, sampuu-mpuuno fekihimu, bhe moasianda mie bhaimu peda kaasimu ne wutomu.”

²⁸ Ambano Yesus, “Ingka anoamo katobhoosimu itu, angkafimo aitu maka tetewei dumadi.”

²⁹ Tamaka mie aitu noꞌondofi kakantibhano wutono, ambano, “Laꞌae bhahaa mie bhaiku?”

³⁰ Yesus notobhoosiane kapalenda ambano, “Nandoo seemie nosampu nomaiꞌao we Yerusalem nohope we Yeriko, gahaꞌa noꞌawae karampasi we sala. Barano dopadae doalaꞌie, mieno dolandakie maka dofilei tadohunsamo olotano dadi bhe mate.

³¹ Miina naomponaa tanosiangkaꞌamo seemie imamu. Gahaꞌa sanowoha mie aitu tanolalo noangka se wiwino sala sewetano.

³² Pedamo dua naꞌa noangkamo seemie sampuꞌano Lewi ⸤ o palima-limano imamu⸥ . Gahaꞌa sanowoha mie aitu tanolalo dua noangka se wiwino sala sewetano.

³³ Kaowu noangkamo seemie Samaria nakokakalaꞌa, sanowoha mie aitu nobhelaane lalono.

³⁴ Nokalaꞌiemo maka nokakompo kakobhela-bhelano, nobubusiane mina bhe angguruno. Pada anaꞌa nofosawie ne keledai kasawiꞌano wutono maka noowae ne seꞌonu lambu kabutuꞌa bhe nokomadiaꞌane.

³⁵ Nopooli nomentae nealamo haa woka dhoi pera maka nowaꞌane kolambuno kabutuꞌa naꞌa bhe nopugau ambano, ‘Komadiaꞌane, ane bhe nebhalandaꞌaomu sigaoꞌano, madaꞌo amosuliangkoe humato asumuli.’ ”

³⁶ ⸤ Pada aitu Yesus nofeenamo ne pande Kitabi maitu ambano,⸥ “Weo fekihimu, laꞌae bhahaa ne olotando mie totoluno naꞌa membalino mie bhaino so mie neꞌawando karampasi saꞌituinia?”

³⁷ Ambano pande Kitabi naꞌa, “Mie motiwohaane kabhelano lalo.” Ambano toha Yesus, “Kalamo, habumo dua nada naꞌa!”

Yesus we lambuno Maria bhe Marta 10:38-42

³⁸ Weo kala-kalano bhe anaguhuꞌino, Yesus nohatomo ne seꞌonu liwu. Ne itu seemie hobhine notahimada weo lambuno, neano Marta.

³⁹ Marta bhe hobhine kakutaꞌano, neano Maria. Maria nengkoha-ngkoha ne owano aꞌeno Ompu, nofetingke kansuhu pugauno,

⁴⁰ tamaka Marta nosabha noehe mengkoha noꞌondofaanda. Dadiꞌanomo nomaꞌotimo Yesus bhe nopugau ambano, “Ompu, miina moheruanea gahaꞌa Maria nohunsa kanau aehe mengkohaa amoisa? Fohatoe natumulumi kanau.”

⁴¹ Tamaka Ompu tanotobhoosimo ambano, “Marta, Marta, hintu ini nomihi lalomu bhe fekasabha wutomu ne sabhaha giu.

⁴² Ingka ampamo sehonda maraluuꞌano. Maria nopilimo metaaꞌano, maka paise damalae mie bhaindo.”