Lukas 1 - Muna Southern Dialect

Patudhuno kitabi aini 1:1-4

¹ Teofilus nefosibhalaku! Dobhahimo mie mebuhino bhihitano sabhaha kadhadhia ne olotantoomu.

² Nebuhindo naꞌa nopokantibha bhe bhihita netahimantoomu ne mie mohaꞌaono wuntano matano kadhadhia anaꞌa mpini kabhao-bhaono bhe molelenomo dua bhihita anaꞌa.

³ Dadiꞌanomo pada afotinda-tindae sabhaha kadhadhia amaiane mpini pakatandano, saoku netaa dua abuhiangkoe weo kitabi amangkafi tulu-tulungano,

⁴ neanomo mandeꞌaane kantoono sabhaha kafoguhu netahimamu.

Bhihita so kalenteꞌano Yohanes Fokadiuno 1:5-25

⁵ Ne dhamanino Herodes nembali kolaki we kadieno Yudea, nandoo seemie imamu koneaꞌano Zakaria nomaiꞌao ne kaseꞌisendo imamu Abia. Neano hobhineno Elisabet, sampuꞌano dua imamu Harun.

⁶ Kohoduando sanea mie lumebe ne pomatano Lahataꞌala, dodadi doangkafi kosasawiꞌae pahinta bhe tubhono Ompu, miina dakonilempagia.

⁷ Ampamo kaowu miina dakoanaa mbaꞌinomo Elisabet noꞌafa, pakade kohoduando dokamungkulamo.

⁸ Sewakutuu nohatomo paliꞌano kaseꞌisendo, Zakaria nodhalangi takano nembali imamu ne wiseno Ompu ⸤ we Lambuno Lahataꞌala⸥ .

⁹ Kaneando imamu dopodaduane mbali dofotantuꞌao laꞌae so nekantibhano taka. Gahaꞌa Zakaria nekantibhano taka namesua weo Lambuno Lahataꞌala naetunu dupa weo boloku mongkilo.

¹⁰ Tangasano notunu dupa naꞌa kosasawindo umati dohompu we simbali dosambahea we kadete.

¹¹ Gahaꞌa seemie malaꞌekatino Ompu tanosifotiwohaꞌamo wutono ne Zakaria. Malaꞌekati anaꞌa neehe-ehe ne suanano medha kaetunuꞌa dupa.

¹² Nowoha peda maitu Zakaria nokohedu bhe noteꞌi.

¹³ Tamaka malaꞌekati anaꞌa nopugaumo ambano, “Koe moteꞌia Zakaria, kapaꞌamo sambaheamu notitahimamo. Hobhinemu Elisabet naefolenteangko seemie anaꞌi moꞌane maka tabeano kumonae Yohanes.

¹⁴ Hintu moꞌia bhe naowula lalomu, pakade daobhahi dua mie sigaoꞌano so moꞌiano mbaꞌinomo kalenteꞌano anaꞌi anaꞌa.

¹⁵ Anaꞌi anaꞌa naembali kabhala ne pomatano Ompu, paise naohoꞌu angguru tawa kafohoꞌu kaololanuꞌa sigaoꞌano. Rohino Lahataꞌala nakumabhintie mpini weo haebu.

¹⁶ Naobhahi miendo Israel namodolida dasumuli ne Ompu Lahataꞌalando.

¹⁷ Anoa namaꞌinduluki Ompu, rohino bhe kuasano napototo bhe anabii Elia. Namodoli lalondo kamungkula ne anaꞌindo bhe namodoli totono lalondo mie pata meangkano ne fekihindo mie banara. Nadamo naꞌa naefontaa-ntaa umati mantasiꞌano so tumahimano Ompu.”

¹⁸ Ambano Zakaria ne malaꞌekati anaꞌa, “Nada amai amandeꞌaane bhahaa putae tetewei nakumadhadhia? Kapaꞌamo idi ini akamungkulamo, hobhineku nokoꞌumuhumo dua.”

¹⁹ Notobhoosimo malaꞌekati anaꞌa ambano, “Idimo ini Gabriel, palima-limano Lahataꞌala, notudu kanau apotula-tulaangko, amohatoangko bhihita metaa ini.

²⁰ Pugauku ini nahumato tempono tetewei nakoꞌula. Tamaka hampano miina marasaea kanau, kotu-kotuꞌu mobhea, pae sepaliꞌa mooli pugaua ampa oleono bhahi-bhahiꞌae naꞌa nakumadhadhia.”

²¹ Gahaꞌa mie bhahi we kadete tadontaa-ntaamo Zakaria. Andoa domente, noafa nompona sepaliꞌa neate-ate weo Lambuno Lahataꞌala.

²² Hato nolimba gahaꞌa Zakaria miinamo namandea nopugaua, tanoale-aleandamo kaowu limano, mbaꞌinomo nobheamo. Dadiꞌanomo mie bhahi dopandeꞌaomo lalondo putae Zakaria nokopowoha weo Lambuno Lahataꞌala.

²³ Nokapo kaowu tempono takano, Zakaria nosulimo se lambuno.

²⁴ Miina naomponaa Elisabet, hobhineno Zakaria nofowoowamo. Lima wula kaomponano miina namotiwoha wutono ne komieꞌano, maka nopugau ambano,

²⁵ “Pedamo aini habuno Ompu ne idi ini, aitu noniniꞌa kanaumo, nofosali kaambanoku ne pomatando mie.”

Kafohato so kalenteꞌano Yesus 1:26-38

²⁶ Nokapo nomo wula Elisabet nofowoowa, Lahataꞌala notudumo toha malaꞌekati Gabriel nakumala we Galilea ne seꞌonu kota koneaꞌano Nasaret.

²⁷ Ne itu nakumala ne seemie kalambe koneaꞌano Maria. Kalambe aini nopopohae bhe Yusuf sampuꞌano omputo Daud.

²⁸ Sapesuano weo lambuno Maria, malaꞌeakati nofeabhamo ambano, “Megau ae itua, hintu tibarakatino, Ompu nopobhaiangko.”

²⁹ Maria nokohedu nofetingke peda naꞌa, sampe nofeena totono lalono, bhahaa o ae maꞌanano kafeabha anaꞌa.

³⁰ Ambano dua malaꞌekati anaꞌa, “Koise moteꞌia Maria, kapaꞌamo hintu meꞌawamo rahamatino Lahataꞌala.

³¹ Hintu fowoowa maka koanaꞌao seemie moꞌane bhe tabeano kumonae Yesus.

³² Anaꞌi anaꞌa naembali kabhala bhe dakumonae Anano Lahataꞌala Foliuno Kuasa. Ompu Lahataꞌala nasumangkee so omputo nameda omputo Daud awuano.

³³ Anoa naembali omputo so mowano sampuꞌano Yakub ampa suhue dhamani, kafopahintaꞌano pae bhe kawoloa.”

³⁴ Ambano Maria ne malaꞌekati anaꞌa, “Nada amai nakumadhadhia bhahaa, ingka idi ini miinaꞌo akomoꞌanea?”

³⁵ Notobhoosimo malaꞌekati, “Rohino Lahataꞌala nasumampu ne hintu bhe kuasano Lahataꞌala foliuno kalangke nakumaputiko, dadiꞌanomo anaꞌi so lumenteꞌano naꞌa dakumonae Mie mongkilo, Anano Lahataꞌala.

³⁶ Amohatoko bhahitiemu Elisabet tangasano dua nofowoowa, mahinggamo nokamungkulamo, ampa aini nomo wulamo. Mie nekonando noꞌafa naꞌa nakoanaꞌao seemie moꞌane.

³⁷ Kapaꞌamo so Lahataꞌala miina bhe pata nepoolino.”

³⁸ Ambano Maria, “Ingka idi ini bhatuano Ompu, hunsaꞌanomo nakumadhadhia ne idi peda pugaumu naꞌa.” Pada aitu malaꞌekati naꞌa nohunsamo Maria.

Maria nokala nodongawi Elisabet 1:39-45

³⁹ Miina naompona palusi anaꞌa Maria nokalamo te tombuno kabhawo ne seꞌonu liwu we kadieno Yudea.

⁴⁰ Nohato ne itu nopesuamo ne lambuno Zakaria maka nofeabha ne Elisabet.

⁴¹ Nofetingke kafeabhano Maria, anaꞌi newoowano Elisabet nebhapunda weo haebu maka Elisabet nokabhintie Rohino Lahataꞌala.

⁴² Elisabet lasao nopugau nofekahaa-haaꞌi ambano, “Hintu tibarakatino foliuda sabhaha hobhine, notibarakati mpuu bhakeno wutomu so lumenteno itu.

⁴³ Laꞌae bhahaa idi ini sampe inano Ompuku nodongawi kanau?

⁴⁴ Kapaꞌamo saꞌafetingke kafeabhamu, anaꞌi newoowaku ini nebhapundaꞌao kaꞌia.

⁴⁵ Kodawua mpuu hintu, kapaꞌamo parasaea putae kafohato nefetingkemu ne Ompu tetewei nakumadhadhia.”

Lagu katumpuno lalono Maria 1:46-56

⁴⁶ Pada aitu nopugaumo Maria ambano, “Apudhi afekakalabhia Ompu,

⁴⁷ noꞌia totono laloku hampano Lahataꞌala Mosalamati kanau,

⁴⁸ kapaꞌamo noniniꞌa kanau, idi bhatuano mepandano kaengkohaꞌa ini. Sakotuꞌuno notandamo aini mieno sabhaha dhamani dakumona kanau akodawua,

⁴⁹ mbaꞌinomo Kokuasano nofokonandoo kanau habu kumalabhia. Nongkilo mpuu neano.

⁵⁰ Nopomantulu-ntulu nofotiwoha kabhelano lalono ne mie moteꞌino ne Anoa.

⁵¹ Kaꞌosano kabhalano kuasano sampe limano negasa mie melangkeno diu, bhe nohungga patudhundo.

⁵² Kabhala kokuasano nofosampuda maiꞌao te kaengkohaꞌando, tamaka mie mepandano kaengkohaꞌa nofofonida.

⁵³ Mie moꞌaho nofekaweꞌianda sabhaha metaaꞌano, tamaka mie hangkaea notududa dakumala haa mbali limando.

⁵⁴ Anoa notulumi Israel bhatuano, noangkafi podhandino bhe awuaꞌintoomu.

⁵⁵ Ompu miina naolimpuꞌao podhandino; nofotiwoha kabhelano lalo ne Abraham bhe sampuꞌano ampa suhue dhamani.”

⁵⁶ Napetolu wula kaomponano Maria neate bhe Elisabet maka nosuli we lambuno.

Kalenteꞌano Yohanes Fokadiuno 1:57-66

⁵⁷ Nokapo kaowu wulano, Elisabet nokoanaꞌaomo seemie moꞌane.

⁵⁸ Santieneno bhe bhahitieꞌino dofetingke putae Ompu nofotiwohamo kabhelano lalono ne Elisabet, dadiꞌanomo andoa dosimoꞌi-moꞌiaꞌamo bhe anoa.

⁵⁹ Nokapo alu oleo andoa ini dosimai-maiꞌamo dasumuna anaꞌi anaꞌa, maka patudhundo dakumonae Zakaria dapototoane bhe neano amano.

⁶⁰ Tamaka ambano inano, “Koise, tabeano dakumonae Yohanes.”

⁶¹ Ambado dua, “Ingka miina bhe bhahitiemiua koneaꞌano peda naꞌa.”

⁶² Pada aitu dofetapamo ne amano depake tanda bhahaꞌi dakumonae laꞌae anaꞌi amaitu.

⁶³ Zakaria nesalomo kontu kaebuhiꞌa maka nobuhie peda ini, “Neano Yohanes.” Kosasawindo tadomente.

⁶⁴ Gahaꞌa Zakaria tambaꞌomo notobhoka nopugau, kapokaꞌuluno lelano notilensemo, lasao nopudhi Lahataꞌala.

⁶⁵ Mie poꞌowatiꞌando doteꞌi sepaliꞌa, sampe sabhaha kadhadhia anaꞌa nembalimo lansano wiwindo mie meateno te tombuno kabhawono Yudea.

⁶⁶ Kosasawindo mie metingkeno dokofekihi we lalondo, “Naembali ae bhahaa anaꞌi aini?” Kapaꞌamo nopobhaiane kuasano Ompu.

Lagu katumpuno lalono Zakaria 1:67-80

⁶⁷ Zakaria amano anaꞌi anaꞌa nokabhintie Rohino Lahataꞌala maka nokosuahamo peda seemie anabii ambano,

⁶⁸ “Fosibhala kaitaomu Ompu Lahataꞌalando miendo Israel, kapaꞌamo Anoa nodongawi umati natumulumida, nomai notolosida.

⁶⁹ Anoa nefoehe seemie fosalamatino kokuasano, nomaiꞌao ne sampuꞌano omputo Daud palima-limano.

⁷⁰ Aini nopobutu bhe bhoasaono endefiꞌini, nefosampendo ana-anabii mongkilono.

⁷¹ Ambado Lahataꞌala nafofosalamati maiꞌao ne kaewantoomu, nafofolapa ne kuasando kosasawindo mie fobansino.

⁷² Pedamo anaꞌa namotiwoha kabhelano lalono ne awuaꞌintoomu bhe namekakoꞌula podhandino mongkilono.

⁷³ Dhandino naꞌa nobhoasaꞌaane bhe notunda ne Abraham awuantoomu

⁷⁴ putae dalumapaomu maiꞌao ne kuasano kaewa bhe paemo dakateꞌi-teꞌia dasumombai Anoa,

⁷⁵ sadhia daongkilo bhe dadumadi metaa ne wiseno suhue dadinto.

⁷⁶ Hintu anaku dakumonako seemie anabiino Lahataꞌala Kokuasano, kapaꞌamo hintu maꞌinduluki Ompu mebhongkaane kaangkaꞌa,

⁷⁷ somo mohatono umatino putae Lahataꞌala namosalamatida, hampano dhosando naꞌumamponie.

⁷⁸ Kosasawiꞌae ini hampano kanini kaasi bhe kabhelano lalono Lahataꞌalantoomu, Anoa nofodongawi nafotulumi, tapedamo tilangano oleo bheteno te melangkeꞌano

⁷⁹ naꞌumulawi mie dumadino weo kahohondo bhe mewisekino mate. Anoamo so tumonda kaita ne kaangkaꞌa humopeꞌano ne katohopono dadi.”

⁸⁰ Anaꞌi anaꞌa dhulu kabhala dhulu kamatangka rohino. Anoa neate we pandaso bhalano ampa ne oleono namotiwoha wutono ne miendo Israel.