Kolose 4 - Muna Southern Dialect

¹ Hintimiu membalino kafeompuꞌa, fekaꞌadhili bhe fekalaa lalomu ne bhatuamiu, ingka pandeꞌaaneomu bhe kafeompuꞌamiu dua te surugaa.

Katangahi sigaoꞌano 4:2-6

² Mpuu-mpuunieꞌomu sambaheamiu, kodhagaomu weo sambaheamiu poowa mefoampeomu katumpuno lalo.

³ Sambahea kainsamiomu dua, sio-siomo Lahataꞌala naelengka kainsami fointo tamolele bhihitano Kristus tifebuniꞌano endefiꞌini. Kapaꞌamo katitohongkuꞌaku mbaꞌinomo aefolele bhihitano Kristus ini.

⁴ Sambaheaꞌomu so naembaliꞌao atumalesao bhihita aini mentalea-mentalea, peda mantasiꞌano so nehabuku.

⁵ Pedamo pokaiꞌamiu bhe mie tapa marasaeano, dadi kotimbangiomu. Kotika bhe kasalawa, pake metaaꞌeomu.

⁶ Sabhaha nekowambaꞌaomiu tabeano naombaka dametingkee bhe natimohelaꞌao lalo. Ane dameenakoomu, tabeano mandeomu tumobhoosidaomu seemie-seemie.

Kasongkono suha 4:7-18

⁷ Tikikus namai namohatoangkoomu bhahi-bhahiꞌae netompaloiku we ini. Tikikus ini bhahitientoomu timoasiꞌaono bhe kumampuu-mpuuno lalo, sabhangka mani weo kaꞌondofao ne Ompu.

⁸ Atudue we hintimiu, so mandeꞌaoꞌomu ngkoha-ngkoha mani we ini bhahi kaowu natilawesi dua lalomiu.

⁹ Anoa napobhaiane Onesimus saliwumiu. Anoa ini bhahitientoomu dua timoasiꞌaono bhe kumampuu-mpuuno lalo. Kohoduando damohatoangkoomu sabhaha kumadhadhiaꞌano we ini.

¹⁰ Aristarkus titohongkuno bhe idi nopakatuangkoomu dua salam. Pedamo dua aitu Markus pisano Barnabas. (Ingka padamo defebhitaiangkoomu, ane nahumato we itu tahima metaaꞌeomu.)

¹¹ Kapakatuno dua salam maiꞌao ne Yesus nekonando dua Yustus. Kabhahindo miendo Yahudi marasaeano ne Ompu Yesus, ampamo andoa totoluno pobhai kanau takahadhaa so Kafopahintaꞌano Lahataꞌala. Andoa ini dolawesi mpuu laloku.

¹² Saliwumiu Epafras nepakatuangkoomu dua salam. Anoa ini palima-limano Kristus Yesus, sadhia dua nosambaheaꞌangkoomu sampuu-mpuuno lalono. Nesalo ne Lahataꞌala so naotangkaꞌao kofindamiu weo kaparasaeamiu, membaliomu miendo sarani motangkano dadi tapa poibhahano, mie mangkafino kapoindalono Lahataꞌala.

¹³ Awohaꞌao wuntano mataku, anoa ini noꞌuleiꞌe lalono nokahadhaa so hintimiu bhe so miendo Laodikia bhe miendo Hierapolis.

¹⁴ Lukas o doktere timoasiꞌaono bhe Demas dopakatuangkoomu dua salam.

¹⁵ Fosampeomu dua salam mani ini ne bhahitie marasaeano we Laodikia; ne bhahitie mani Nimfa bhe umati marasaeano sumambaheano we lambuno.

¹⁶ Mada dabasaangkoomu suha aini, aesalo pakatueꞌomu ne umati we Laodikia dobasaeꞌao dua. Pedamo dua suha ⸤ nebuhiku⸥ so umati we Laodikia, basaeꞌomu dua bhe hintimiu.

¹⁷ Fohatoomu dua Arkipus, “Fotokaemo kahadhaa netahimamu weo kaꞌondofaomu ne Ompu.”

¹⁸ Idi, Paulus apakatuangkoomu dua salam, abuhiane limaku wutoku. Koe molimpuꞌa kanauꞌomu ingka nandoo atitohongku. Sio-siomo napobhaiangkoomu kabarakatino Ompu.