Kolose 3 - Muna Southern Dialect

¹ Ingka dofowanukoomu maiꞌao ne mate poowa bhe Kristus. Dadiꞌanomo ondofiomu ndumandooꞌano te surugaa. Ne itumo Kristus nengkoha ne suanano Lahataꞌala.

² Sadhia fekihiomu sabhaha ndumandooꞌano te surugaa, koise sadhia fekihiomu ndumandooꞌano we dhunia ini.

³ Kapaꞌamo momatemoomu maka dadi buꞌoumiu notifebunimo poowa bhe Kristus weo kaseꞌiseno bhe Lahataꞌala.

⁴ Kristusmo ini kamaiꞌano dadintoomu; mada kaowu ane namotiwoha Wutono, hintimiu dua tetewei tiwohaomu bhe Anoa mesuaꞌomu weo kakalabhiano.

Dadi ngkodau bhe dadi buꞌou 3:5-17

⁵ Dadiꞌanomo fekamateeꞌomu weo totono lalomiu sabhaha fekihino dhunia: podiu tampahasa bhe pokahaku, o nafusuu bhe kapoindalo modai bhe kakadau-dau, kapaꞌamo o kakadau-dau ini ingka nopototo bhe desombai barahala.

⁶ Kosasawiꞌae itu saneamo meowano amahano Lahataꞌala ne mie tapa meangkano.

⁷ Ingka endefiꞌini hintimiu mehabuomu dua peda naꞌa, wakutuuno dadimiu nandoo nokuasaiꞌe kapoindalono dhunia.

⁸ Tamaka ampa aitu ohoeꞌomu amaha, pamuhu bhe pomodai. Koise foꞌumbu, koise dua pugau tampahasa ne mie bhaimu.

⁹ Koemo popaha-pahaiꞌomu, kapaꞌamo dadi ngkodau bhe sabhaha diuno padamo ohoeꞌomu.

¹⁰ Ampa aitu dowaꞌangkomoomu dadi buꞌou, hintimiu membalimoomu manusia buꞌou. Mokonandoono dadi buꞌou naꞌa nopahabuꞌounikoomu kansuhu ampa sifatimiu napototo bhe Wutono. Patudhuno neanomo mandeꞌaaneomu mpuu wutono Lahataꞌala maitu.

¹¹ Weo dadi buꞌou ini miinamo bhe poꞌalaꞌano miendo Yahudi bhe suano miendo Yahudi, mie nesuna tawa tapa nesuna, mie koliwuno tawa bansano liwu pata koꞌadhatino, o bhatua tawa mie bebasi. Tamaka nefosibhalando ampamo kaowu Kristus, hampano Kristus neate weo totono lalondo kosasawindo naꞌa.

¹² Hintimiu umatino Lahataꞌala timoasiꞌaono, padamo nopilikoomu mbali fehebuaꞌano mongkilono. Dadiꞌanomo fotiwohaeꞌomu kabhelano lalo bhe kataano lalomiu ne mie bhaimu, fekapandae diumu, fekamalu lalomu bhe kosabaha.

¹³ Posaba-sabahakiomu, ane pomoda-modaiꞌomu lalo pomaꞌa-maꞌafuꞌaoꞌomu. Ompu ingka padamo noꞌamponikoomu, dadi pedamo dua naꞌa hintimiu tabeano pomaꞌa-maꞌafuꞌaoꞌomu.

¹⁴ Te wawono bhahi-bhahiꞌae naꞌa pomoa-moasiꞌaoꞌomu, kapaꞌamo o kanini kaasi kanggetumo kawawe mosangkano kaseꞌisendo umati.

¹⁵ Naetaa katohopono dadi maiꞌao ne Kristus nakumuasai fekihimiu bhe totono lalomiu. Kapaꞌamo patudhuno katibhasiꞌamiu sembadha bhe Kristus ingka so menamisiꞌaoꞌomu katohopono dadi naꞌa. Koe molimpuomu mefoampeomu katumpuno lalo.

¹⁶ Naetaa bhoasaono Kristus bhe sabhaha kabarakatino nakumabhinti totono lalomiu, neanomo naembali pofoi-foinaꞌu bhe potanga-tangahiomu maiꞌao ne totono lalo kotimbangi. Pudhiomu Lahataꞌala, mepakeomu lagu mazmur ne Kitabino Daud, lagu-laguno kapudhi bhe lagu-lagu lumebeno. Melaguomu bhe mefoampeomu katumpuno lalo ne Lahataꞌala.

¹⁷ O ae maka dua nehabu bhe nepugauꞌaomiu, habueꞌomu tawa pugauaneomu peda mantasiꞌano so mie mangkafino Ompu Yesus. Habuomu bhahi-bhahiꞌae naꞌa poowa mefoampeomu katumpuno lalo ne Lahataꞌala Amantoomu hampano sabhaha nedhalangino Yesus so hintimiu.

Pokai-kaiꞌando mie weo dadi buꞌou 3:18—4:1

¹⁸ Hintimiu membalino hobhine, tuhuomu ne moꞌanemiu, kapaꞌamo pedamo naꞌa mantasiꞌano so mie marasaeano ne Ompu.

¹⁹ Hintimiu membalino moꞌane, moasianeomu hobhinemiu, koise noꞌosa lalomiu.

²⁰ Hintimiu membalino anaꞌi, sadhia meangkaomu ne kamungkulamiu, kapaꞌamo podiu medano aitu mekaꞌiano lalono Ompu.

²¹ Hintimiu membalino ama, koise fekalea lalondo anaꞌimu sampe nasikuhu lalondo.

²² Hintimiu membalino bhatua, sadhia meangkaomu ne kafeompuꞌamiu we dhunia ini. Koise meangkaomu ane doꞌondo-ondokoomu kaowu, so tipudhiꞌaoꞌomu, tamaka meangkaomu maiꞌao weo totono lalo mohelasi, hampano kafosibhalamiu ne Ompu.

²³ O ae maka nehabumiu, kahadhaaꞌeomu weo kakampuu-mpuuno lalo kao-kaomo neꞌondofaomiu Ompu, suano manusiaꞌa.

²⁴ Ingka pandeꞌaanemo mada kaowu metahimaomu ponambo maiꞌao ne Ompu. Ponambomiu naꞌa o kadawu toka nefontaa-ntaano Ompu so umatino. Kapaꞌamo kafeompuꞌa sakotuꞌuno neꞌondofaomiu ingka wutono Kristus, hintimiu o bhatuano.

²⁵ Laꞌae kokaꞌalano, natumongkuꞌao wutono kaꞌalano, kapaꞌamo Ompu miina naepoꞌala-alaꞌao manusia.