Kolose 2 - Muna Southern Dialect

¹ Gaoku mpuu mandeꞌaaneomu kabhieno apoewangi weo totono laloku so hintimiu bhe umati we Laodikia bhe kosasawindo mie tapaꞌo mohano ulaku.

² Bhahi-bhahiꞌae ini ahabue so naotangkaꞌao lalondo umati bhe daseꞌise weo kanini kaasi. Ane nada naꞌa andoa daeꞌawa kabarakati bhalano, maꞌanano kotu-kotuꞌu dalumosangie kabanara, paemo dapoibhahaanea. Damandeꞌaane dua rahasiano Lahataꞌala, ingka wutono Kristus.

³ Kapaꞌamo Kristusmo ini motiwohano kosasawiꞌae timbangi bhe kapandeno Lahataꞌala, tapedamo arataa tifebuniꞌano endefiꞌini, ampa aitu nentaleamo.

⁴ Kanandooꞌano afohatokoomu peda aini keana dobhohe-bhoheꞌikoomu mie mekameko-mekono wambano.

⁵ Kapaꞌamo mahingga mbadhaku nokodoꞌo bhe hintimiu, totono laloku nopobhaiangkoomu. Nowula sepaliꞌa laloku awoha kaꞌosano kaseꞌisemiu bhe kamatangkano kaparasaeamiu ne Kristus.

Dadi sumangkano weo Kristus 2:6-15

⁶ Ingka tahimaemoomu Kristus Yesus nembali Ompumiu. Dadiꞌanomo podiumiu tabeano napoangkafi bhe kapoindalono, kapaꞌamo seꞌisemoomu bhe Kristus.

⁷ Kaparasaeamiu ne Anoa tabeano nakopahaka, bhe wutono Kristus naembalimo kaengkohaꞌano dadimiu. Kaparasaeamiu tabeano dhulu kamatangka, noposahataa bhe kafoinaꞌu netahimamiu. Totono lalomiu nakaꞌende-ende mefoampeomu katumpuno lalo.

⁸ Posiꞌondoomu, koise dofetandoangkoomu fahamuno agama tapa kofahalaa, ingka nefekakolilino kaowu totono lalondo mie. Fahamu medando naꞌa miina namaiꞌao ne Kristus, tamaka nomaiꞌao ne fekihindo manusia nepomantulu-ntuluꞌao bhe nomaiꞌao dua ne rohi kumuasaino dhunia ini.

⁹ Kapaꞌamo bhahi-bhahiꞌae sifatino Lahataꞌala nosangkamo ne wutono Kristus, neate ne mbadha kamanusiano.

¹⁰ Weo kaseꞌisemiu bhe Anoa, dadimiu nosangkamo dua, kapaꞌamo Kristus mefotuꞌaonomo sabhaha rohi mahintano bhe kokuasano.

¹¹ Weo kaseꞌisemiu bhe Kristus, hintimiu padamo dosunakoomu. Ampamo kaowu suano kasuna nekahadhaando limando manusia, tamaka kasuna nekahadhaano Kristus weo totono lalomiu, maꞌanano noaliangkoomu kuasano dhosa we lalomiu.

¹² Kapaꞌamo wakutuuno dokadiu saranikoomu, ⸤ membaliomu peda mie mate maka⸥ dokobuhukoomu bhe Kristus. Weo kakadiu saranimo dua anaꞌa, hintimiu itu suli dofodadikoomu bhe Kristus, hampano parasaeaꞌomu ne kuasano Lahataꞌala toka mowanuno Kristus maiꞌao ne mate.

¹³ Hintimiu endefiꞌini momateomu hampano sabhaha kaꞌalamiu pakade mbadhamiu miina natisunaa. Tamaka ampa aitu Lahataꞌala nofodadikomoomu poowa-owaomu bhe Kristus. Lahataꞌala noꞌamponiemo sabhaha kaꞌalantoomu.

¹⁴ Hampano miina damangkafiomu pahintano Lahataꞌala, nandoo fomobhieꞌaono bhe fonantiꞌaono, tapedamo buhino dosa. Gahaꞌa bhahi-bhahiꞌae naꞌa nofosaliemo Lahataꞌala, kanggetumo o suha anaꞌa nokantaiꞌemo te sau salipu sampe sabhaha nemobhieꞌao nowolomo.

¹⁵ Maiꞌao te sau salipu Kristus notalodamo sabhaha rohi mahintano bhe kokuasano. Kafotalono Kristus dowohae sabhaha mie; rohi mahintano bhe kokuasano naꞌa kanggetumo katohongku dotapuda weo hame-hameno kafotalono Kristus.

Daeꞌondofi ndumandooꞌano te surugaa 2:16—3:4

¹⁶ Dadiꞌanomo koise undaomua mie bhaimiu damoꞌalakoomu hampano nehumaa bhe nefohoꞌumiu. Koemo dua damosuhukoomu meangkafiomu oleo hohaeaꞌano agama tawa hohaeaꞌano wula mohangku bhahaꞌi oleono Sabat.

¹⁷ Kosasawiꞌae naꞌa saneamo ondulano kumadhadhiaꞌano mada kaowu, gahaꞌa nokadhadhiamo nokoꞌulamo ne wutono Kristus.

¹⁸ Koe sampe damekahugikoomu mie wohaꞌano kaowu dofekapanda wutondo bhe desombai malaꞌekati. Mie andoa ini dofekalangke diundo, mahinggamo miina bhe tingkuno, dofekihi kanandoono dhunia bhe dosangke-sangke wutondo hampano dokopowoha.

¹⁹ Tamaka andoa miinamo damasande ne Kristus fofefotuꞌaono. Gahaꞌaitumo hampano nofefotuane Kristus, o mbadha ⸤ maꞌanano umati marasaeano⸥ nodadi metaa koseꞌulu-uluno, sabhaha katokano mbadha noseꞌise nopotudu-tudumiane noangkafi losuano. Pedamo anaꞌa o mbadha dhulu kabhala bhe kamatangka, noposahataa bhe patudhuno Lahataꞌala.

²⁰ Ingka momatemoomu poowa bhe Kristus maka mobebasimoomu maiꞌao ne rohi kumuasaino dhunia ini. Noafaꞌao dua gahaꞌa nandoo dadiꞌaoꞌomu peda mie nekuasaino dhunia ini? Noafa gahaꞌa taꞌotuhumoomu ne sabhaha atorano dhunia?

²¹ Sandahano atora naꞌa ibahano: “Koise dampasi aini”, “koise fenami aitu”, “koise dingku aini.”

²² Bhahi-bhahiꞌae atorano naꞌa nopulaoꞌao kaowu giu nepake so binasano, ingka miina nakofahalaa; saneamo atora bhe kafoinaꞌu nehabundo manusia.

²³ Andoa maitu dofofoinaꞌu dasumombai malaꞌekati, damekapanda wuto bhe dasumikisaa mbadha. Kafoinaꞌu maitu daanumo wohaꞌano nokesa, tamaka sakotuꞌuno miina nakofahalaa so damewanakiꞌao nafusuundo manusia.