Kolose 1 - Muna Southern Dialect

Kalengkano suha 1:1-2

¹ Suha aini nomaiꞌao ne idi, Paulus, rasuluno Kristus Yesus hampano kapoindalono Lahataꞌala, bhe Timotius bhahitientoomu.

² Apakatue so hintimiu bhahitieꞌiku, umati mongkilono Lahataꞌala we Kolose, motangkano kaparasaea ne Kristus. Sio-siomo kabarakati bhe katohopono dadi maiꞌao ne Lahataꞌala Amantoomu sadhia napobhaiangkoomu.

Sambahea bhe katumpuno lalo 1:3-14

^3-4 Tafetingkeemo kaparasaeamiu ne Kristus Yesus bhe kanini kaasimiu ne kosasawindo umatino Lahataꞌala. Dadiꞌanomo taenomo tasambaheaꞌangkoomu, sadhia taefoampe katumpuno lalo ne Lahataꞌala, Amano Ompuntoomu Yesus Kristus.

⁵ Katangkaꞌanomo kaparasaeamiu naꞌa bhe kanini kaasimiu ne mie bhaimiu, hampano kaposahunaꞌao umawaomu nefontaa-ntaano Lahataꞌala te surugaa. Kaposahunaꞌao ini ingka tokamo fetingkeeꞌomu wakutuuno dofohatoangkoomu bhoasao banarano, maꞌanano o Bhihita Metaa.

⁶ Bhihita Metaa ini ingka nohatokomoomu dua. Ne kosekaꞌewaꞌae dhunia sadhulu kaꞌewa nolele bhe sadhulu kabhahi hasilino ⸤ maꞌanano sadhulu kabhahi mie marasaeano ne Kristus bhe notibhalii podiundo⸥ . Pedamo dua anaꞌa ne hintimiu, notanda oleo kabhao-bhaono fetingkeomu bhe kotu-kotuꞌu pandeꞌaoꞌomu kanini kaasino Lahataꞌala.

⁷ Bhahi-bhahiꞌae naꞌa ingka pandeꞌaanemoomu maiꞌao ne Epafras, bhahitie mani timoasiꞌaono, sabhangka mani weo kahadhaano Ompu. Anoa ini nokampuu-mpuu weo kaꞌondofao ne Kristus so hintimiu.

⁸ Anoamo dua mohato kainsami, ingka pomoa-moasiꞌaoꞌomu weo kuasano Rohino Lahataꞌala.

⁹ Dadiꞌanomo notanda tafetingke peda naꞌa, miina bhe fengaasia tasambaheaꞌangkoomu. Taesalo sio-siomo Rohino Lahataꞌala namaꞌangkoomu timbangi bhe pomaꞌana metaa, neanomo lumosangieꞌomu mpuu kapoindalono Lahataꞌala.

¹⁰ Ane nada naꞌa, dadimiu namantasimo peda mie mangkafino Ompu bhe mekaꞌiano lalono Lahataꞌala. Kobhakeomu weo habu metaamiu, sampe sedhuluꞌa dua mandeꞌaoꞌomu Lahataꞌala.

¹¹ Sio-siomo kuasano kumalabhiano Lahataꞌala namekamatangkakoomu, so kosabahaꞌaoꞌomu bhe natumuhu lalomiu potaamiꞌaoꞌomu sabhaha netompaloimiu.

¹² Sadhia dua naowula lalomiu mefoampeomu katumpuno lalo ne Amantoomu. Anoamo mekapantasikoomu umawaomu dawu nefontaa-ntaa so umatino mongkilono weo kafopahintaꞌano mentaleaꞌano.

¹³ Lahataꞌala nofosalamati kaita maiꞌao weo kuasano kahohondo maka nofogampi kaita weo kafopahintaꞌano Anano kamoasiꞌaono.

¹⁴ Noangka ne Anano, nofobebasi kaitaomu, maꞌanano dhosantoomu notiꞌamponimo.

Sifati bhe kahadhaano Kristus 1:15-23

¹⁵ Lahataꞌala miina natiwohaa, tamaka Kristus ulanomo Lahataꞌala tiwohaꞌano. Anoamo kabhao-bhaono, koeateno nofoliuda bhahi-bhahiꞌae nefokonandoono Lahataꞌala.

¹⁶ Kapaꞌamo bhahi-bhahiꞌae nefokonandoono Lahataꞌala noangka ne Kristus. Sabhaha ndumandoono te surugaa bhe we dhunia, tiwohaꞌano bhe pata tiwohaꞌano, sabhaha rohi mintahano kuasa, sabhaha neangkando rohi, saneamo nofokonandooda Lahataꞌala noangka ne Kristus bhe nofokonandooda somo dua wutono Kristus.

¹⁷ Anoa nonandoomo wawo bhe sabhaha ndumandooꞌano; hampano kuasano Anoa bhahi-bhahiꞌae ndumandooꞌano pae naohungga, sadaa-daa kaeateꞌando.

¹⁸ Anoamo mefotuꞌaono mbadha, maꞌanano umati marasaeano. Anoamo kabhao-bhaono manuno maiꞌao ne mate, neanomo nofewawomo ne bhahi-bhahiꞌae ndumandoono.

¹⁹ Kapaꞌamo noposahataa bhe kapoindalono Lahataꞌala, bhahi-bhahiꞌae sifatino Lahataꞌala nosangka dua ne Kristus Anano.

²⁰ Patudhuno Lahataꞌala, noangka ne Anano ini, sabhaha ndumandoono te surugaa bhe we dhunia napometaaꞌanda bhe Wutono. Tuhuno heano Kristus te sau salipu meowanomo pometaaꞌa naꞌa.

²¹ Hintimiu dua endefiꞌini nokodoꞌo bhe Lahataꞌala bhe poewangianeomu hampano fekihi bhe habu modaimiu.

²² Tamaka ampa aitu hampano mateno Anano peda seemie manusia, Lahataꞌala nopometaaꞌangkomoomu. Nadamo anaꞌa Kristus namowakoomu ne wiseno Lahataꞌala, naongkilo bhe namoinda totono lalomiu, paemo kodengo-dengoomua.

²³ Tamaka tabeano mpuu-mpuunieꞌomu kaparasaeamiu, fekamatangkae kofindamiu. Koise nomagoeaꞌa, koise dua nogampi posahunaꞌao neꞌawamiu wakutuuno fetingkeomu Bhihita Metaa. Bhihita Metaa ainimo nefolele ne sabhaha manusia we towawano lani ini. Idimo dua ini, Paulus, katudu mefoleleno Bhihita Metaa naꞌa.

Kaꞌondofao bhe kakadee-deeno Paulus 1:24—2:5

²⁴ Aitu nowula laloku akadee-dee so hintimiu. Kapaꞌamo weo kakadee-deeno mbadhaku ini, ingka afopansuhu kakadee-dee nenamisino Kristus mbali mbadhano, maꞌanano umati marasaeano.

²⁵ Lahataꞌala nowaꞌa kanau taka aembali umondofaono umatino, amebhihitaiangkoomu bhoasaono Lahataꞌala amopada-padae.

²⁶ Bhihita aini ntini moꞌo-moꞌono taꞌumo nofebunie Lahataꞌala ne sabhaha sampuꞌa pomantulu-ntuluno, tamaka ampa aitu rahasia maitu nofohatoandaemo umatino.

²⁷ Ne umatinomo ini, gaono Lahataꞌala namotiwohae kabhalano kabarakatino bhe kakalabhiano rahasia aitu so sabhaha bansano liwu te dhunia ini. Rahasia anaꞌa peda aini: Kristus neate weo totono lalondo umatino, Anoamo puuno kaposahunaꞌaomiu so menamisiꞌaoꞌomu dua kakalabhiano Lahataꞌala.

²⁸ Kristusmo ini nefebhihitaiꞌao mani ne sabhaha mie. Kosasawindo taefeꞌulaianda bhe tafoinaꞌuanda maiꞌao we totono lalo kotimbangino. Patudhu mani neanomo kosasawindo tamowada ne wiseno Lahataꞌala peda mie motangkano dadi weo totono lalondo, hampano doseꞌise bhe Kristus.

²⁹ Somo amooliꞌao anaꞌa, aꞌuleiꞌe laloku akahadhaa bhe apoewangi ampa kaꞌosano bukuku, hampano kuasano Kristus kumahadhaano weo totono laloku.