Ibrani 9 - Muna Southern Dialect

Boloku Mongkilo we dhunia bhe te surugaa 9:1-10

¹ Podhandiꞌa kabhao-bhaono nandoo bhe atorano dosambahea, nonandoo dua bhe lambu kasambaheaꞌano we dhunia ini.

² Nandoo seꞌonu tenda dofoehee, maka wetano te wise dokonae Boloku Mongkilo. Ne itu nandoo bhe kaengkohaꞌano kantalea, bhe nandoo dua medha kaeteiꞌa roti kapopanga so Lahataꞌala.

³ Nandoo dua seꞌonu boloku we sewetano anaꞌa, dohondomiane dua kai bhalano; boloku aini dokonae Boloku Foliuno Kangkilo.

⁴ Weo Boloku Foliuno Kangkilo ini nandoo medha kaetunuꞌa dupa dohabue maiꞌao ne bulawa. Pada aitu nandoo dua sohongano podhandiꞌa, dodapoane sabula-bulawa. Weo sohonga aitu nandoo o nuꞌua bulawa, iꞌino o manna, o katukono Harun kotunaꞌano bhe haa tibha kontu ⸤ kaebuhiꞌa koompulu pahintano⸥ podhandiꞌano Lahataꞌala.

⁵ Te wawono sohonga maitu nandoo kaꞌuhi kopani haa ulu, nekonando kerub, katandaino kakalabhiano Lahataꞌala. Panindo kaꞌuhi maitu nefewahai nodapohi kasongkono sohonga maitu, nekonando Kasongko Kapometaaꞌa. Ampamo kaowu aitu paise naembali datumula-tulae sehonda-sehonda.

⁶ Pedamo anaꞌa bhahi-bhahiꞌae doꞌatoroe, maka seꞌo-seꞌoleo imamu dopesua weo boloku te wise naꞌa dodhalangi taka kaꞌondofaondo.

⁷ Tamaka membalino mesuano weo boloku we sewetano naꞌa ⸤ Boloku Foliuno Kangkilo⸥ mpahinomo Imamu Bhalano, sepaku kaowu setaꞌu. Wakutuuno nopesua ne itu Imamu Bhalano tetewei newowoꞌo bhe heano mbali kapopanga so katiꞌamponiꞌano dhosano wutono bhe dhosando tapa nefepuundo nehabundo umati bhahino.

⁸ Noangka ne atora aini Rohino Lahataꞌala nofekantaleaꞌiemo putae ane Boloku Mongkilo sadaa-daaꞌe, ingka kaangkaꞌa damesua weo Boloku Foliuno Kangkilo miinaꞌo natilengkaa.

⁹ Aini o kaꞌibahatinomo dhamani ampa aitu, maꞌanano sabhaha kawaꞌao bhe kapopanga nesumbele nefoampendo manusia miina namooliea nofosangka totono lalondo manusia meowano kapopanga maitu.

¹⁰ Kapaꞌamo sabhaha kapopanga maitu nopokai kaowu bhe oti nehumaa bhe nefohoꞌu bhe sabhaha atorano kangkilono mbadha. Bhahi-bhahiꞌae maitu sanea kaowu atorano mbadha, nofaraluu kaowu ampa tempono Lahataꞌala namahabuꞌouni podhandiꞌa naꞌa.

Kristus poatoꞌaono podhandiꞌa buꞌou 9:11-28

¹¹ Tamaka Kristus padamo nomai peda seemie Imamu Bhalano meowano sabhaha metaaꞌano toka ndumandoono. Padamo nolempagie Tenda kaeateꞌano Lahataꞌala, noliuꞌe kasangkano bhe kakalabhiano ⸤ bhe tenda we dhunia ini⸥ . Tenda amaitu ingka suano kahabundo manusia, maꞌanano miina natilentu ne dhunia nefokonandoono ini.

¹² ⸤ Kristus nopesua weo Boloku Foliuno Kangkilo maitu⸥ sepaku kaowu ampa suhue dhamani. Wakutuu anaꞌa Anoa miina naewowoꞌo heano membe moꞌane tawa heano anano sapi mbali kapopanga, tamaka heano Wutono. Pedamo anaꞌa neꞌawamo kasalamatiꞌantoomu ampa suhue dhamani.

¹³ Heano membe bhe sapi moꞌane bhe walono anano sapi netunu dopakee mbali dokambesiꞌao mie kodengo-dengono weo atorano agama Yahudi, neanomo suli dongkilo. Sanginomo o hea bhe walo amaitu nembalimo nefekangkilo mbadhando manusia,

¹⁴ bhemo toha heano Kristus! Weo kuasano Rohino Lahataꞌala dumadino suhue dhamani, Kristus nofoampe Wutono mbali kapopanga pata kodengono ne Lahataꞌala. Dadiꞌanomo heano tetewei namekangkilo totono lalontoomu maiꞌao ne sabhaha podiu meowano mate, neanomo naembali dameompuomu ne Lahataꞌala dumadino.

¹⁵ Kanandooꞌanomo Kristus nembalimo Poatoꞌaono podhandiꞌa buꞌou, neanomo mie toka nebhasino Lahataꞌala daeꞌawa sabhaha kadawu suhue dhamani peda nedhandiꞌaono Lahataꞌala. Bhahi-bhahiꞌae maitu nokadhadhia hampano bhe mateno, ⸤ ingka wutono Kristus,⸥ maka o matemo amaitu mobebasino manusia maiꞌao ne sabhaha kaꞌala nehabundo wakutuuno podhandiꞌa kabhao-bhaono.

¹⁶ Kapaꞌamo ane nandoo suhano kahunsaꞌao, ingka tabeano bhe bukutiino mateno mie humabuno suha aitu.

¹⁷ O suha kahunsaꞌao kaneꞌomo notiangga ane mie mebuhino suha aitu nomatemo, ane nandoo nodadi ingka miinaꞌo natianggaa.

¹⁸ Dadiꞌanomo mahingga podhandiꞌa kabhao-bhaono, ⸤ pakatifokonandoono⸥ tetewei dua dofosahaane bhe heano.

¹⁹ Kabhao-bhaono anabii Musa nofosampemo sabhaha pahintano Lahataꞌala tibuhino weo Kitabi ne kosasawindo miendo Israel. Pada aitu nealamo heano anano sapi bhe heano membe moꞌane, noposaloane bhe oe maka nokambesie ne Kitabino Pahintano Lahataꞌala bhe ne kosasawindo miendo Israel. Kakambesino nepakeane hoono kahoku nekonando hisop bhe wuluno dhumba kadea lalo moꞌito.

²⁰ Poowa nokambesida anabii Musa nopugau ambano, “Ainimo hea mekatangkano podhandiꞌa nehabuno Lahataꞌala bhe hintimiu, tetewei dhalangieꞌomu.”

²¹ Pedamo dua aitu anabii Musa nokambesi hea anaꞌa ne tenda kaeateꞌano Lahataꞌala bhe sabhaha katokano sambahea.

²² Daanumo weo tubhono agama Yahudi naembali dakumonae bhahi-bhahiꞌae dofekangkiloane hea. O dhosa pae bhe kapooli natiꞌamponi ane pae bhe hea lumimbaꞌano.

²³ Bhahi-bhahiꞌae ndumandooꞌano ⸤ weo tenda naꞌa⸥ , kaꞌibahatino ndumandooꞌano te surugaa, tabeano dofekangkiloe peda anaꞌa. Tamaka bhahi-bhahiꞌae kanandoo sakotuꞌuno te surugaa nofaraluu damekangkiloane kapopanga sedhuluꞌano kataa.

²⁴ Kapaꞌamo Kristus miina namesua weo Boloku Foliuno Kangkilo nehabundo manusia, membalino kaowu sandahano Boloku Foliuno Kangkilo sakotuꞌuno ⸤ te surugaa⸥ , tamaka Kristus nopesuamo te puuno surugaa, ampa aitu nofewise ne Lahataꞌala so sabhaha kafaraluuntoomu.

²⁵ Kristus miina naefendu-fenduaꞌa noowa Wutono mbali kapopanga, nopoꞌala bhe Imamu Bhalano, ingka setaꞌu-setaꞌu nopesua weo Boloku Foliuno Kangkilo neowa hea, tamaka suano heano wutono.

²⁶ Kapaꞌamo ane ibahano namendua, nokomaꞌana tabeano namekantuhu-ntuhu nakadee-dee mpini pakatifokonandoono dhunia. Tamaka miina nada naꞌa: ne pandano dhamani ini Kristus nohato ne dhunia ini sepaku kaowu noowa Wutono mbali kapopanga nesumbele so katitolosiꞌano dhosa.

²⁷ Padamo dofotantue, manusia tetewei damate sepaku kaowu, pada aitu daewiseki kabhotusi.

²⁸ Pedamo dua anaꞌa Kristus sepaku kaowu noowa Wutono mbali kapopanga nesumbele so katitolosiꞌano dhosando manusia bhahino. Anoa namendua namai, paemo naehefu dhosaa tamaka naeowa kasalamati so mie mantagino kahatoꞌano.