Ibrani 8 - Muna Southern Dialect

Yesus Imamu Bhalano Podhandiꞌa Buꞌou 8:1-13

¹ Puuno bhahi-bhahiꞌae nepuga-pugauꞌaontoomu ini: intaodiomu bhe Imamuntoomu Bhalano medano anaꞌa, mengkohano ne suanano kaengkohaꞌano Lahataꞌala fofoliuno kakalabhia te surugaa.

² Anoa nofodhala takano mbali Imamu Bhalano weo Boloku Mongkilo, weo tenda kaeateꞌano Lahataꞌala sakotuꞌuno, kafoeheno wutono Ompu, suano kafoehendo manusia.

³ Seemie-seemie Imamu Bhalano dosangkee so naefoampeꞌao kawaꞌao bhe kapopanga nesumbele ne Lahataꞌala. Pedamo dua aitu Imamuntoomu nofaraluu dua bhe nefoampeno.

⁴ Ane ibahano naeate we dhunia ini, ingka pae naembalia imamu hampano dobhahimo imamu mefoampeno kapopanga doangkafi tubhono agama Yahudi.

⁵ Kahadhaando dembali imamu maitu sakotuꞌuno mbali kaowu sandaha bhe kaꞌibahati ndumandooꞌano te surugaa. Aini noposahataa bhe bhoasaono Lahataꞌala ne anabii Musa endefiꞌini wakutuuno nefoehe tenda kaeateꞌano Lahataꞌala. Lahataꞌala nokobhoasao peda aini, “Tandaiꞌe! Bhahi-bhahiꞌae itu tetewei humabue angkafi sandaha nefotiwoha ne hintu te kabhawo.”

⁶ Tamaka ampa aitu Yesus neꞌawamo taka kaꞌondofaono imamu noliuꞌe kakalabhiano takando imamu sigaoꞌano, tapedamo podhandiꞌano Lahataꞌala bhe manusia nepoatoꞌaono Yesus noliuꞌe kataano podhandiꞌa endefiꞌini, hampano nengkoha ne dhandi sedhuluꞌano kataa.

⁷ Ane ibahano podhandiꞌa kabhao-bhaono pae nakonikaemi, tantumo pae namaraluua bhe podhandiꞌa buꞌou.

⁸ Tamaka Lahataꞌala padamo nofoꞌala umatino bhe nokobhoasao, “Kotu-kotuꞌu nahumato tempono, bhoasaono Ompu, aehabu podhandiꞌa buꞌou bhe miendo Israel bhe miendo Yehuda.

⁹ Suano peda podhandiꞌa nehabuku bhe awuaꞌindo, wakutuuno atondada dolimba maiꞌao we witeno Mesir. Andoa miina daeangka ne podhandiꞌaku naꞌa, kanandooꞌanomo miinamo dua aoheruandaa, bhoasaono Ompu.

¹⁰ Tamaka ainiꞌaemo podhandiꞌa so nehabuku bhe miendo Israel we oleo mbuhumai, bhoasaono Ompu: pahintaku atumeiꞌe weo fekihindo, tubhoku abuhie weo totono lalondo. Idi somo Lahataꞌalando, andoa somo umatiku.

¹¹ Paemo namaraluua seemie-seemie namoinaꞌu mie bhaino, paemo dua namaraluua seemie-semie namohato bhahitieno putae, ‘Tabeano mandeꞌaane Ompu!’ Kapaꞌamo kosasawindo, naobhala naohobu sanea damandeꞌa kanau.

¹² Sabhaha podiu modaindo aꞌumamponie, sabhaha dhosando paemo ameꞌu-meꞌulaiꞌea.”

¹³ Hampano Lahataꞌala nosambili podhandiꞌa buꞌou, nokomaꞌana nofekangkodaumo podhandiꞌa kabhao-bhaono. Maka mongkodauꞌano bhe molusaꞌano ingka nomaꞌomo naosali.