Ibrani 7 - Muna Southern Dialect

Pototoꞌano Kristus bhe Melkisedek 7:1-10

¹ Melkisedek ini omputo ne kotano Salem, nembali dua imamuno Lahataꞌala Foliuno kalangke. Wakutuuno Abraham nosuli maiꞌao ne popahisaꞌa bhe notalo omputo ⸤ lidimano maiꞌaono te mata oleo⸥ , nosumpuiꞌe Melkisedek. Pada anaꞌa Melkisedek nobarakatimo Abraham.

² Abraham nodawu kafotaloꞌano nofeompulu dawue maka sedawu nowaꞌane Melkisedek. Doangkafi neano, Melkisedek kabhao-bhaono nokomaꞌana “Omputono kabanara”, maka anoa dua omputo we Salem, maꞌanano “Omputono katohopo”.

³ Mulaoꞌano Melkisedek ini, miina bhe tibuhiꞌano laꞌae inano bhe amano tawa siwuluno, miina natipandeꞌao dua kalenteꞌano tawa kamateꞌano. Dadiꞌanomo tapedamo dua Anano Lahataꞌala, anoa nembalimo imamu ampa suhue dhamani.

⁴ Tandaiꞌeomu kabhalano mie aini, sampe amano bansano liwuntoomu Abraham nowaꞌane seompulu dawuꞌa maiꞌao ne bara karampasiꞌano ne popahisaꞌa.

⁵ Weo tubhono agama Yahudi, sampuꞌano Lewi membalino imamu tetewei detahima seompulu dawuꞌa maiꞌao ne sabhaha hasilindo umatino Israel, gahaꞌaitumo umatino Israel ingka sanea bhahitiendo, sampuꞌano dua Abraham.

⁶ Melkisedek suano sampuꞌano Lewi, gahaꞌa netahima dua seompulu dawuꞌa maiꞌao ne sabhaha nepoolino Abraham. Anoa nobarakati dua Abraham, gahaꞌaitumo Abraham maitu ingka tumahimanomo dhandino Lahataꞌala.

⁷ Daanumo pae bhe so tumaganoa putae mie nebarakati nofepanda bhe mie fobarakatino.

⁸ Imamu metahimano seompulu dawuꞌa maiꞌao ne umatino Israel maitu, ingka sanea manusia momateno, tamaka notibuhi ⸤ weo Kitabi⸥ putae Melkisedek, mie metahimano seompulu dawuꞌa maiꞌao ne Abraham maitu, sadaa-daaꞌe nodadi.

⁹ Dadiꞌanomo naembali dakumonae, Lewi bhe sampuꞌano metahimano seompulu dawuꞌa ne umatino Israel, ingka dotanduao dua seompulu dawuꞌa ⸤ ne Melkisedek⸥ noangka ne Abraham.

¹⁰ Daanumo wakutuu anaꞌa Lewi miinaꞌo nalumentea, tamaka wakutuuno Melkisedek nosumpui Abraham, Lewi neatemo weo mbadhano Abraham, awuano.

Nofewawo Kristus bhe Imamu Bhalano sigaoꞌano 7:11-28

¹¹ Tubhono agama Yahudi ingka dofosampee ne miendo Israel nengkoha ne kaꞌimamuꞌano Lewi. Ane ibahano takano imamu naꞌa neowamo dadi sumangka, noafa bhahaa nofaraluuꞌao desangke dua seemie imamu sigaoꞌano, imamu peda Melkisedek, suano maiꞌao ne sampuꞌano imamu Harun?

¹² Kapaꞌamo ane kaengkohaꞌando kaꞌimamuꞌa dobhaliiꞌe, tantumo dobhaliiꞌemo dua tubhono agama Yahudi.

¹³ Nepulaoꞌao ne ini ingka Ompuntoomu. Anoa nomaiꞌao ne sampuꞌa sigaoꞌano ⸤ suano sampuꞌano Lewi⸥ . Sampuꞌano naꞌa bhe naseemie miinaꞌo bhe membalino imamu mefoampeno kapopanga.

¹⁴ Kosasawindo mie dopandeꞌaane putae Ompuntoomu nomaiꞌao ne sampuꞌano Yehuda, maka anabii Musa miina sepaliꞌa nasumambili sampuꞌano Yehuda so membalino imamu.

¹⁵ Aini sedhuluꞌamo dua kantaleano bhe hatoꞌano seemie imamu peda Melkisedek.

¹⁶ Anoa dosangkee mbali imamu miina naengkoha ne atorano sampuꞌano manusia, tamaka katisangkeꞌano nengkoha ne kuasano dadi tapa kotompano.

¹⁷ Kapaꞌamo ⸤ weo Kitabi⸥ dokowambaane peda aini, “Hintumo imamu ampa suhue dhamani, peda imamu Melkisedek.”

¹⁸ Dadiꞌanomo atora ngkodau dofogampiemo, hampano miina naotangkaa bhe miina dua nakofahalaaꞌa.

¹⁹ Tubhono agama Yahudi naꞌa miina naeowa dadi sumangka ne laꞌae maka dua, kanandooꞌanomo dowaꞌa kaita posahunaꞌao sedhuluꞌano kataa. Hampano posahunaꞌao anaꞌa nembalimo domaꞌotiomu Lahataꞌala.

²⁰ Pakade bhahi-bhahiꞌae ini noangkafiane fematano Lahataꞌala, nopoꞌala bhe desangke imamu sigaoꞌano, ingka miina bhe fematanoa.

²¹ Tamaka Yesus dosangkee mbali imamu bhe fematano Lahataꞌala. Wakutuu aitu Lahataꞌala nokobhoasao ne Anoa, “Ompu nofemata maka pae natibhaliia patudhuno, Hintumo imamu ampa suhue dhamani.”

²² Hampano femata anaꞌa, Yesus nembalimo kafekamatangkano podhandiꞌano ⸤ Lahataꞌala bhe manusia⸥ sedhuluꞌano kataa ⸤ bhe tetewei nakoꞌula⸥ .

²³ Imamu sigaoꞌano naꞌa dobhahi sepaliꞌa hampano andoa noꞌontoda mate sampe miina daembali kansuhu imamu.

²⁴ Tamaka Yesus nodadi suhue dhamani sampe kaꞌimamuꞌano miina nasipulia ne mie sigaoꞌano.

²⁵ Dadiꞌanomo Yesus nopooli nofosangka mpuu kasalamatindo manusia maino ne Lahataꞌala doangka ne Anoa. Kapaꞌamo Anoa nodadi suhue dhamani mbalimo fosambaheaꞌaono ne Lahataꞌala.

²⁶ Imamu Bhalano pedandomo anaꞌa nefaraluuntoomu: Anoa mie mongkilo, miina nakodhosaa, miina nakodengo-dengoa, nopogaati bhe mie kodhosa, dosangkee te surugaa te wawono wawo.

²⁷ Anoa nopoꞌala bhe Imamu Bhalano sigaoꞌano, andoa defoampe kapopanga seꞌo-seꞌoleo, tabeano mbali dhosando wutondo kadeki maka mbali dhosando umati bhahino. Tamaka Yesus nefoampe kapopanga sepaku kaowu ampa suhue dhamani, wakutuuno nofoampe Wutono mbali kapopanga.

²⁸ Tubhono agama Yahudi nesangke mie monale dembali Imamu Bhalano. Tamaka nopalusi tubhono agama amaitu, Lahataꞌala nehabu dhandi bhe nofemata nosangke Anano mbali Imamu Bhalano, nefosangka ampa suhue dhamani.