Ibrani 6 - Muna Southern Dialect

¹ Dadiꞌanomo dohunsaeꞌanaomu kadeki kafoinaꞌu kabhao-bhaono pokaiꞌano bhe Kristus, maka damopansuhueꞌomu dapoguhuꞌao so dadi motangka peda mie marasaeano. Koemo tadofendu-fenduaꞌomu kafoinaꞌu kabhao-bhaono, putae manusia tetewei nametompaꞌao podiu meowano mate, maka damarasaea ne Lahataꞌala.

² Pedamo dua itu kafoinaꞌuno kakadiu sarani, kafoinaꞌu detei limando te wawondo mie bhaindo ⸤ desaloanda kabarakati⸥ , kawanuꞌando mie mate bhe kahukumu suhue dhamani.

³ Dadiꞌanomo ane Lahataꞌala namolalesa kaita, ingka anaꞌaemo so nehabuntoomu, ⸤ damopansuhuomu kapoguhuntoomu⸥ .

⁴ Kapaꞌamo ane bhe mie kumukundono Lahataꞌala, miinamo bhe dhalano dasumuli dametompaꞌao dhosando. Endefiꞌini padamo notilada tilangano Lahataꞌala, denamisimo kadawuno surugaa bhe padamo dua dotahima Rohino Lahataꞌala peda bhaindo.

⁵ Padamo dua dofenami kataano bhoasaono Lahataꞌala, bhe denamisimo kuasa maiꞌao ne dhunia mbuhumai.

⁶ Tamaka gahaꞌa pada anaꞌa andoa dokukundoemo Lahataꞌala. Ane peda anaꞌa ingka pae bhe kapooli sumuli damowada dametompaꞌao dhosando. Kapaꞌamo andoa kao-kaomo suli dokantai Anano Lahataꞌala te sau salipu bhe dofekaꞌaebue ne wisendo mie bhahi.

⁷ Kapaꞌamo ane o wite nentuhu nesoso use maka nokohasiliꞌao sabhaha kantisa kofahalaano mbali manusia kumahadhaaꞌe, ingka wite anaꞌa neꞌawamo kabarakatino Lahataꞌala.

⁸ Tamaka ane o wite notumbuiꞌe kahoku kokihi bhe laiwongka maka wite aitu miina nakofahalaaꞌa, mada kaowu nabhatataꞌianemo Lahataꞌala maka panda-pandano dakumonsulapaiꞌe.

Damekatangka fintaha ne kaposahunaꞌaonto 6:9-20

⁹ Bhahitieꞌiku timoasiꞌaono! Mahinggamo tapugau peda naꞌa, insaodi taparasaea mpuu padamo metahimaomu sabhaha metaaꞌano noliuꞌe ⸤ wite saꞌituini⸥ . Nepulaoꞌaoku kabarakati pokaiꞌano bhe kasalamatiꞌamiu.

¹⁰ Lahataꞌala suano Lahataꞌala tapa umadhilinoa. Ingka pae naolimpuꞌaanea sabhaha kahadhaa bhe kanini kaasimiu ne Anoa nefotiwohamiu wakutuuno ondofaoꞌomu umati marasaeano endefiꞌini taꞌampamo aitu.

¹¹ Gao mani mpuu hintimiu seemie-seemie motiwohaomu kansuhu kakampuu-mpuuno lalomiu ampa we kapuliaono, sampe neanta-antagimiu kotu-kotuꞌu nakoꞌulamo.

¹² Takiido membaliomu mie mantawa, tamaka gao mani mangkafiomu sandahano mie tumahimano nedhandiꞌaono Lahataꞌala hampano kaparasaea bhe kakosabahando.

¹³ Kapaꞌamo wakutuuno Lahataꞌala nopodhandi bhe Abraham, nofemata tetewei nadhumalangie. Nofemata nosambili Wutono, hampano ingka miina bhe lumiuno Lahataꞌala.

¹⁴ Ambano, “Kotu-kotuꞌu abarakatiko, bhe amaꞌangko sampuꞌa bhahi.”

¹⁵ Abraham nokosabaha neanta-antagi ampa noꞌawamo nedhandiꞌaono Lahataꞌala naꞌa.

¹⁶ Ane manusia dofemata ingka dosambili moliuno kuasa bhe wutondo, maka femata maitu mbalimo kafekamatangkano pugau, kasongkonomo potaga-tagaliꞌa.

¹⁷ Lahataꞌala nopoindalo nofotiwoha kakampuu-mpuuno lalono ne manusia tumahimano dhandino, putae patudhuno maitu paise nabhaliiꞌea, dadiꞌanomo dhandino naꞌa nofekamatangkaane femata.

¹⁸ Haa hondano ini paise natibhaliia, kapaꞌamo Lahataꞌala pae bhe kapoolia nagumau-gau podhandino bhe fematano naꞌa. Kanandooꞌanomo intaodiomu meoluno ne Lahataꞌala daeꞌawa katangkano lalo so damintahakiꞌao kaposahunaꞌao kumantaa-ntaano te wisentoomu.

¹⁹ Kaposahunaꞌaontoomu maitu tapedamo matano kai ⸤ labuno kapala⸥ , nembali kafintahaꞌa motangka bhe tumohopono so alusuntoomu. Kaposahunaꞌao maitu nohato ampa we sembalino kai bhalano kahondomino Boloku Foliuno Kangkilo ⸤ we Lambuno Lahataꞌala te surugaa⸥ .

²⁰ Yesus nopaꞌindulumo nopesua te naꞌa nofomelengkaꞌao kaangkaꞌa, nembalimo Imamu Bhalano ampa suhue dhamani peda imamu Melkisedek.