Ibrani 5 - Muna Southern Dialect

¹ Seemie Imamu Bhalano sadhia dopilie maiꞌao ne manusia, maka dosangkee so meompuno ne Lahataꞌala nowakiliꞌao manusia bhaino. O takano nefoampe kawaꞌao bhe kapopanga nesumbele ne Lahataꞌala so katiꞌamponiꞌano dhosa.

² Seemie Imamu Bhalano nembali nomalu-malusi mie tapa konipandeꞌaono bhe kolilinono fekihi, kapaꞌamo wutono nonale dua peda mie bhaindo.

³ Kanandooꞌanomo tetewei naefoampe kapopanga ne Lahataꞌala so katiꞌamponiꞌano dhosa, suano kaowu dhosando umati bhahino tamaka dhosano wutono dua.

⁴ Miina bhe sumangkeno wutono so taka tifosibhalano ini ⸤ dembali Imamu Bhalano⸥ , tamaka kaembaliꞌando Imamu Bhalano ingka nobhasida Lahataꞌala, peda Harun endefiꞌini.

⁵ Pedamo dua Kristus miina namekakalabhia Wutono nembali Imamu Bhalano, tamaka Lahataꞌala kobhoasaono ne Anoa, “Hintumo itu Anaku, akoanaꞌangkomo oleo itu.”

⁶ Bhoasaono dua Lahataꞌala ne aeati sigaoꞌano peda aini, “Hintumo Imamu ampa suhue dhamani, peda Imamu Melkisedek.”

⁷ Weo dadino peda seemie manusia, Yesus padamo nefoampe sambahea bhe kamesalo ne Lahataꞌala poowa nokei nopontuhufi bhe luuno, ingka Lahataꞌala kokuasano mosalamatie maiꞌao ne mate. Hampano kalebeno dadino, Lahataꞌala nofetingkee.

⁸ Mahinggamo Anoa Anano Lahataꞌala, nopoguhu nembali mie meangka weo kakadee-dee nenamisino.

⁹ Nosangka kaowu dadino, Yesus nembalimo meowano kasalamati suhue dhamani so kosasawindo mie meangkano ne Anoa.

¹⁰ Anoa nosangkee Lahataꞌala nembali Imamu Bhalano, peda Imamu Melkisedek.

Kafodhaga keana dokukundo kaparasaea 5:11—6:8

¹¹ Sakotuꞌuno nandoo nobhahi so nepugauꞌao mani pokaiꞌano bhe nesambili mani saꞌituini, tamaka ingka nomahasai tatumalesaane, hampano kaluntuno melosangiomu.

¹² Sakotuꞌuno ingka temponomo membaliomu guru, tamaka koꞌulaꞌano ingka nandoo nofaraluu damoinaꞌuangkoomu kafetompunaꞌino dopoguhuꞌao bhoasaono Lahataꞌala. Hintimiu tabeano mohoꞌuomu kaowu oeno titi, paeꞌo mepooliomu oti motuꞌa.

¹³ Kapaꞌamo laꞌae mefaraluuno oeno titi miinaꞌo naelosangi kafoinaꞌuno habu metaa bhe habu modai, ingka nandoo noanaꞌi mohobu.

¹⁴ Tamaka oti motuꞌa so mie motangkano dadi, andoa dokaneamo wutondo dopake matando, tingalando bhe siitondo, sampe nembalimo dopofelesaane metaaꞌano bhe modaiꞌano.