Ibrani 4 - Muna Southern Dialect

Kafewuleꞌa nefontaa-ntaano Lahataꞌala 4:1-13

¹ Dhandino Lahataꞌala damesuakiomu kafewuleꞌano ingka sadaa-daaꞌe. Dadiꞌanomo naetaa posiꞌondoomu mpuu, keana nonandoo ne olotamiu itu so tapa humatono.

² Kapaꞌamo Bhihita Metaa ingka padamo dofolelee ne intaodiomu pedamo dua ne andoa. Ampamo kaowu Bhihita Metaa miina nakofahalaaꞌa so andoa hampano dofetingkee tamaka miina dapoangkafiane bhe kaparasaea.

³ Mpahinomo intaodiomu marasaeano so mesuakino kafewuleꞌa nedhandiꞌaono naꞌa. Aini noposahataa bhe bhoasaono Lahataꞌala peda ini, “Atundada weo amahaku, Andoa paise sepaliꞌa damesua we liwu kafewuleꞌa nefontaa-ntaaku.” Lahataꞌala nokobhoasao peda maitu mahinggamo kahadhaano ingka notokamo mpini pakatifokonandoono dhunia.

⁴ Kapaꞌamo aeati weo Kitabi nopulaoꞌao oleo ne kafitu oleono peda aini, “Ne kafitu oleono Lahataꞌala nofewulemo ne sabhaha kahadhaano.”

⁵ Pokaiꞌano bhe anaꞌa nandoo dua tibuhino peda aini, “Andoa paise sepaliꞌa damesua we liwu kafewuleꞌaku.”

⁶ Aini nokomaꞌana, mie kabhao-bhaono metingkeno Bhihita Metaa miina damesua we liwu kafewuleꞌa naꞌa hampano miina daeangkaa. Ane peda anaꞌa ingka nentaleamo dua putae nandoo mie sigaoꞌano so mesuaꞌano we kafewuleꞌa naꞌa.

⁷ Kanandooꞌano Lahataꞌala padamo nefotantu toha seꞌoleo nokonae “Oleo itu”, peda nekobhoasaꞌaono palusi ntini taꞌu-taꞌu noangka ne Daud. Bhoasaono peda saꞌituini, “Ane oleo itu fetingkeomu suahano Lahataꞌala, koise mekatuꞌa pongkeomu.”

⁸ Ane ibahano Yosua kotu-kotuꞌu namaꞌanda kafewuleꞌa nedhandiꞌaono Lahataꞌala naꞌa, ingka tantumo mada anaꞌa Lahataꞌala paemo naesambi-sambilia oleo sigaoꞌano.

⁹ Dadiꞌanomo so umatino Lahataꞌala, sadaa-daaꞌe nokantaa-ntaa oleo kafewuleꞌa, peda kafewuleꞌano Lahataꞌala ne oleo kafitu oleono.

¹⁰ Kapaꞌamo mie mesuaꞌano we kafewuleꞌa naꞌa, namewule ne sabhaha kahadhaano, pedamo wutono Lahataꞌala nofewule ne kahadhaano.

¹¹ Dadiꞌanomo, ulei kaitaomu lalontoomu so damesuaꞌao we kafewuleꞌa nedhandiꞌaono Lahataꞌala naꞌa, keana bhe binasano hampano doangkafi sandahando mie pata meangkano endefiꞌini.

¹² Bhoasaono Lahataꞌala nodadi bhe nolaku, nohoko anoa bhe kampue komata haa wetaꞌano. Bhoasaono Lahataꞌala nofotobho ampa nopolekaꞌao alusu bhe rohi, nopogaatiꞌao losua bhe lolino buku, nopooli nopofelesaane sabhaha fekihi bhe dukuno lalondo manusia.

¹³ Miina bhe dumadino notifebuni ne matano Lahataꞌala, bhahi-bhahiꞌae kanggetu delembi bhe notiwolengkasi ne wiseno. Ne Anoamo dua dapowiseꞌao wutontoomu ne sabhaha nehabunto.

Yesus Imamu Bhalano 4:14—5:10

¹⁴ Kanandooꞌanomo tetewei damintahakieꞌomu mpuu kaparasaea neꞌakuintoomu, kapaꞌamo bhe imamuntoomu, Imamu Bhalano kumalabhiano toka mangkano surugaa ampa te wiseno Lahataꞌala. Anoamo itu ingka Yesus, Anano Lahataꞌala.

¹⁵ Imamuntoomu, o Imamu Bhalano numamisino dua sabhaha kanalentoomu. Anoa nopototo bhe intaodiomu ini, padamo nonamisie sabhaha kasoba, ampamo kaowu miina nakodhosaa.

¹⁶ Dadiꞌanomo ⸤ weo sambaheantoomu⸥ fekakado kaitaomu damaꞌotiomu kaengkohaꞌano Lahataꞌala kumalabhiano fowaꞌaono rahamati, neanomo daeꞌawa rahamati bhe daetahima kabarakati sampe natumulumi kaita ne wakutuuno dofaraluuꞌe.