Ibrani 3 - Muna Southern Dialect

Nobhala Yesus bhe anabii Musa 3:1-6

¹ Dadiꞌanomo bhahitieꞌiku mongkilono toka nebhasino Lahataꞌala so menamisino surugaa! Fekihi kaitaomu nehabuno Yesus, Rasulu bhe Imamu Bhalano neparasaeantoomu.

² Anoa notuhu mpuu lalono ne Lahataꞌala toka sumangkee, pedamo dua endefiꞌini anabii Musa notuhu mpuu lalono nodhalangi takano weo polambuno Lahataꞌala.

³ Ampamo kaowu nopantasi mpuu Yesus neꞌawamo kafosibhala noliuꞌe kafosibhala ne anabii Musa, tapedamo seemie pandeno lambu noliuꞌe katifosibhalano bhe lambu nehabuno.

⁴ Daanumo seꞌo-seꞌonu lambu dofoehee pande, tamaka moeheno bhahi-bhahiꞌae ndumandoono ingka wutono Lahataꞌala.

⁵ Anabii Musa daanumo notuhu lalono peda seemie palima-lima weo polambuno Lahataꞌala, pugauno bhe kahadhaano nofosusuꞌao so nekobhoasaꞌaono Ompu mada kaowu.

⁶ Tamaka Kristus notuhu lalono peda Anano Lahataꞌala mandeꞌaono polambuno Amano. Polambuno Lahataꞌala ingka intaodiomu ini, sumanomo sadaa-daa pae dakamihi-mihia bhe damintahaki mpuu kaposahunaꞌao bhe so neꞌawantoomu, kaowoseꞌanomo bhakentoomu.

Kabinasa mbaꞌinomo dohunsa kaparasaea 3:7-19

⁷ Dadiꞌanomo ambano Rohino Lahataꞌala, “Ane oleo itu fetingkeomu suahano Lahataꞌala,

⁸ koise mekatuꞌa pongkeomu peda awuaꞌimiu, wakutuuno doewangi bhe dosolo-solo Lahataꞌala we pandaso bhalano.

⁹ ⸤ Ambano Lahataꞌala,⸥ ne naꞌa awuaꞌimiu dosolo-solo bhe doꞌudhi kanau, mahinggamo dowohae nehabuku kaomponano fato fulu taꞌu.

¹⁰ Ainimo kaꞌamahaꞌaku ne mie dhamani anaꞌa, ambaku, ‘Totono lalondo sadhia nokolilino, dongahe damangkafi pahintaku.

¹¹ Dadiꞌanomo atundada weo amahaku, Andoa paise sepaliꞌa damesua we liwu kafewuleꞌa nefontaa-ntaaku.’ ”

¹² Bhahitieꞌiku! Posiꞌondoomu, koise bhe kolalo modaino bhe tapa marasaeano ne olotamiu itu, sampe nokukundo Lahataꞌala dumadino.

¹³ Tamaka naetaa seꞌo-seꞌoleo pofeka-fekatangkaomu lalo tinangke dadiomu ne dhamani nekonando “Oleo Itu” weo Kitabi, keana bhe mekatuꞌa pongkeno ne olotamiu itu sampe nabhohe-bhoheꞌie dhosa.

¹⁴ Kapaꞌamo intaodiomu ini dembalimo posabhangkaꞌano Kristus, sumanomo ampa kapuliaono namatangka fintahantoomu ne kaparasaea mpini kabhao-bhaono.

¹⁵ Weo Kitabi notibuhi peda aini, “Ane oleo itu fetingkeomu suahano Lahataꞌala, koise mekatuꞌa pongkeomu peda awuaꞌimiu wakutuuno doewangi Lahataꞌala.”

¹⁶ Laꞌae bhahaa metingkeno suahano Lahataꞌala maka doewangie? Ingka andoa maitu saneamo mie neatono anabii Musa dolimba maiꞌao we witeno Mesir.

¹⁷ Kaowu ne laꞌae bhahaa Lahataꞌala noꞌamaha kaomponano fato fulu taꞌu? Ingka ne andoa mehabuno dhosa bhe mate kambaha-mbahano we pandaso bhalano.

¹⁸ Laꞌae bhahaa netundano Lahataꞌala putae paise sepaliꞌa damesua we liwu kafewuleꞌa nefontaa-ntaano? Ingka andoa pata meangkano.

¹⁹ Dadiꞌanomo dolosangiemoomu putae pata kapesuaꞌando hampano miina damarasaeaꞌa.