Ibrani 2 - Muna Southern Dialect

Kasalamati bhalano 2:1-4

¹ Dadiꞌanomo intaodiomu tabeano sedhuluꞌa damintahakie kafoinaꞌu toka nefetingkentoomu, bhahasaa nowowoꞌo kaita solo.

² O bhoasao nefosampendo malaꞌekati ⸤ ne awuaꞌintoomu⸥ nandoo nokotuꞌu sampe mie kumangkalaꞌie bhe tapa meangkano deꞌawamo kahukumu mantasiꞌano.

³ ⸤ Ane pedamo anaꞌa endefiꞌini, bhemo toha haꞌoleo ini.⸥ Nada amai dalumapa ne kahukumu gahaꞌa ane pae dapokihaꞌiao kasalamati bhalano maitu? Kapaꞌamo kasalamati amaitu kabhao-bhaono nofolelee wutono Ompu, maka mie metingkee padamo dosakusiiane kakotuꞌuno ne intaodiomu.

⁴ We simbalino dua anaꞌa, Lahataꞌala nofekamatangka kasakusiindo nepake tanda tapa mentela, giu timenteꞌaono bhe sabhaha kuasa mangaliuno, bhe nofodawu-dawuꞌao dua kawaꞌaono Rohino Lahataꞌala nopoangkafi bhe kapoindalono Wutono.

Yesus nopobhahitie bhe manusia 2:5-18

⁵ Ingka suano malaꞌekati meꞌawano kuasa maiꞌao ne Lahataꞌala so mahintano dhunia buꞌou so humatono itu, nesambi-sambilintoomu ini.

⁶ Tamaka nandoo mie pugauno, notibuhi weo aeatino Kitabi peda aini, “O ae bhahaa manusia sampe feꞌu-feꞌulaiane? Laꞌae gahaꞌa anano manusia maitu sampe ondofaane?

⁷ Sekabantaha fosampue seendai we pandado malaꞌekati, padamo dua waꞌane kaengkohaꞌa kumalabhia bhe tifosibhala peda omputo.

⁸ Bhahi-bhahiꞌae ne alamu ini fokuasaane, padamo folongkoda ne wawono aꞌeno.” Ane peda anaꞌa, nokomaꞌana bhahi-bhahiꞌae nofokuasaandae Lahataꞌala ne manusia, miina bhe tapa nekuasaindo. Tamaka ampa aitu miinaꞌo daohaomu manusia kumuasaino bhahi-bhahiꞌae ini.

⁹ Ampamo kaowu dowohamoomu Yesus. Sekabantaha nofosampue Lahataꞌala seendai we pandado malaꞌekati, neanomo hampano rahamatino Lahataꞌala nenamisimo mate so kosasawindo manusia. Ampa itu dowaꞌane kaengkohaꞌa kumalabhiano bhe tifosibhala peda omputo, hampano padamo nokadee-dee sampe mate.

¹⁰ Ingka nopantasimo so Lahataꞌala, Anoamo mokonandoono bhahi-bhahiꞌae somo dua Wutono, nohabu Yesus mbali melengkano kaangkaꞌano kasalamatiꞌa, nofosangkaane kakadee-dee. Pedamo anaꞌa noangka ne Yesus dobhahi manusia nebhasino Lahataꞌala daeala dawu weo kakalabhiano.

¹¹ Anoa mefekangkilono manusia maiꞌao ne dhosa bhe manusia nefekangkilo, saneamo doseama. Kanandooꞌanomo Yesus miina naoambanoa nokonada bhahitieno.

¹² Ambano ⸤ Yesus ne Lahataꞌala⸥ , “Amolele bhihitano neamu ne bhahitieꞌiku, aelagu amudhiko weo hompuꞌando umati.”

¹³ Ambano dua, “Tetewei aposahunaꞌao mpuu ne Lahataꞌala.” Ambano dua, “Ainiꞌa kanaumo bhe kosasawindo anaꞌi kawaꞌaono Lahataꞌala ne Idi.”

¹⁴ Anaꞌi nepulaoꞌaono maitu saneamo manusia kombadha kasarano, maka Yesus nopototoꞌao wutono bhe andoa, nodadi peda seemie manusia. Kahabuꞌano peda anaꞌa, neanomo noangka ne mateno, Yesus nofobinasamo mintahano kuasano mate, o Kafeompuꞌano seetani.

¹⁵ Patudhunomo dua so namobebasiꞌao manusia dumadino peda bhatua sasukae umuhundo, nofobhatuada kateꞌi ne mate.

¹⁶ Ingka nentaleamo suano malaꞌekati netulumino tamaka manusia sampuꞌano Abraham.

¹⁷ Kanandooꞌanomo Yesus nofaraluu nopototoane ⸤ Lahataꞌala⸥ bhe bhahitieꞌino ne ae maka dua, kaembaliꞌanomo Imamu Bhalano tiposahunaꞌaono, mobhelano lalo ne mie bhaino bhe meompuno ne Lahataꞌala. Pedamo dua anaꞌa neowa kapometaaꞌando manusia bhe Lahataꞌala mosalinomo dhosando umatino manusia.

¹⁸ Hampano wutono Yesus padamo nokadee-dee weo sabhaha kasoba neꞌawano, maka Anoa nembali netulumi mie meꞌawano kasoba.