Ibrani 13 - Muna Southern Dialect

Katangahi kapuliaono 13:1-19

¹ Naetaa sadhia pomoni-moniniꞌaoꞌomu peda mie pobhahi-bhahitieno!

² Sadhia mohelasi mefotiampeomu mie tapaꞌo nepandeꞌao weo lambumiu, hampano nandoomo mefotiampeno malaꞌekati, tamaka miina damandeꞌaanea.

³ Feꞌulaidaomu mie weo katohongku kao-kaomo hintimiu itu titohongkuomu dua bhe andoa. Feꞌulaidaomu mie nefompina-mpina kao-kaomo hintimiu dohabukoomu dua peda anaꞌa.

⁴ Kosasawiꞌamiu fosibhalaeꞌomu o kakawi, koise pokadengoꞌao kaodoꞌamiu, kapaꞌamo mie pokawite-witeno bhe monsuleno nabhitahakida Lahataꞌala.

⁵ Koise membaliomu bhatuano dhoi, netaamo notumpu lalomiu ne kanandoomiu. Kapaꞌamo Lahataꞌala padamo nokobhoasao, “Paise sepaliꞌa akumatahokoa, paise sepaliꞌa ahumunsakoa.”

⁶ Dadiꞌanomo dokado dopugauꞌomu, “Ompu tumulumi kanau, paise aoteꞌia. Damafaꞌi kanau gahaꞌa manusia?”

⁷ Feꞌulaidaomu neangkamiu toka mefosampeangkoomu bhoasaono Lahataꞌala. Ondoomu kodadindo bhe komatendo, maka mesandahaomu ne kaparasaeando.

⁸ Yesus Kristus sadaa-daaꞌe nopototo, endewi, oleo itu bhe ampa suhue dhamani.

⁹ Koise namekakolilinokoomu sabhaha kafoinaꞌu sumempa mengkahatono. Naetaa totono lalontoomu namekamatangkae rahamatino Lahataꞌala, koise namekamatangkae sabhaha atorano oti nehumaa. Mie meangkafino sabhaha atorano oti nehumaa naꞌa miina daeꞌawaa fahalaanoa.

¹⁰ Nandoo bhe medha kaefoampeꞌantoomu kapopanga, tamaka ⸤ imamundo Yahudi⸥ mepopangano weo tenda kaeateꞌano Lahataꞌala miina naembalia dohumaa oti ne medha anaꞌa.

¹¹ Heano kadadi nefoampe nowowoꞌoe Imamu Bhalano ne Boloku Foliuno Kangkilo mbali kapopanga so katolosino dhosa, tamaka uluno kadadi anaꞌa dohampue we sembalino kapoliwuꞌando.

¹² Kanandooꞌanomo dua, Yesus nomate we simbalino kagualino kota, mbali nofekangkiloꞌao umatino noangka ne tuhuno heano Wutono.

¹³ Dadiꞌanomo mai dokalaomu se Anoa we sembalino kapoliwuꞌa, daeala dawu weo kafekaꞌaebu nenamisino.

¹⁴ Kapaꞌamo we dhunia ini miina bhe liwu kaeateꞌantoomu suhue dhamani, neꞌondofintoomu o kota we oleo mbuhumai ⸤ so kapoliwuꞌantoomu suhue dhamani⸥ .

¹⁵ Dadiꞌanomo sadhia foampe kaitaomu kapudhi ne Lahataꞌala namangka ne Kristus, anaꞌaemo kapopanga nefoampentoomu, noangka ne wiwinto mekakalabhiano neano.

¹⁶ Koise molimpuomu habu metaaꞌomu bhe fotulumiomu, kapaꞌamo anaꞌaemo kapopanga mekaꞌiano lalono Lahataꞌala.

¹⁷ Meangkaomu ne meangkamiu bhe tuhuomu ne andoa, kapaꞌamo andoa dhumaganino alusumiu maka dapowiseꞌao takando naꞌa ne Lahataꞌala. Meangkaomu, neanomo dakumahadhaa weo kawulano lalo, keana bhe fedeea, hampano fedeendo pae nakofahalaa so hintimiu.

¹⁸ Sambahea kainsamiomu. Tapandeꞌaanemo mpuu totono lalo mani kumatanga-tangano nongkilo, hampano kapoindalo mani ne ae maka dua sadhia tadumadi metaa.

¹⁹ Puuno kamesaloku sambaheaꞌomu, neanomo naehimba damosuli kanau we hintimiu.

Kasongkono suha 13:20-25

²⁰ Ingka Lahataꞌala padamo nofowanu Ompu Yesus maiꞌao ne mate. Hampano tuhuno heano, Anoa nembalimo Dhagano Dhumba Kumalabhiano so intaodiomu, mekamatangkanomo dua podhandiꞌa suhue dhamani nehabuno Lahataꞌala bhe intaodiomu.

²¹ Sio-siomo Lahataꞌala kamaiꞌaoꞌano katohopono dadi, namosangkaangkoomu sabhaha metaaꞌano so dhumalangiꞌaoꞌomu kapoindalono. Sio-siomo dua weo dadintoomu Lahataꞌala naehabu podiu mekaꞌiano lalono, namangka ne Yesus Kristus. Notifekakalabhia Kristus ampa suhue dhamani. Amin.

²² Bhahitieꞌiku, aesalo mpuu sabahakieꞌomu sabhaha wambano katangahi ini, kapaꞌamo suha nebuhiku ini ingka miina naewantaa.

²³ Naetaa mandeꞌaaneomu bhahitientoomu Timotius dofolimbaemo maiꞌao we katohongku. Ane napikihato se ini, awowoꞌoe amai we hintimiu itu.

²⁴ Fosampe kanauꞌomu salam ne kosasawindo neangkamiu bhe kosasawindo umati marasaeano. Bhahitieꞌi maiꞌaono we Italia depakatuangkoomu dua salam.

²⁵ Sio-siomo kosasawimiu itu sadhia napobhaiangkoomu kabarakatino Lahataꞌala.