Ibrani 12 - Muna Southern Dialect

O kasabha mbali dhalano katangahi bhe kahukumuno Ompu 12:1-17

¹ Intaodiomu ini dofowaliligi sakusii bhahino naꞌa, tapedamo o olu dofokaputi. Dadiꞌanomo ⸤ kanggetu meangkafino pogolo-goloꞌa⸥ hunsa kaitaeꞌomu toha sabhaha fofekabhieno bhe foꞌonto-ontomino bhe dhosa mansopikano. Tende kaitaomu kansuhu, potaami kaitaomu weo pogolo-goloꞌa newisekintoomu ini.

² Poowa bhe tendentoomu, ondo kaitaomu kansuhu te wise, te Yesus. Anoamo melengka kaita kaangkaꞌano kaparasaea, Anoamo dua so mosangkano kaparasaeantoomu. Yesus netaami kakadee-dee te sau salipu bhe miina naoheruane putae domate te sau salipu maitu giu timoambanoꞌaono, hampano sehonda-honda nefeꞌulaino: te wiseno nandoo kawulano lalo bhalano so netahimano. Ampa aitu Anoa nengkohamo ne suanano kaengkohaꞌano kumalabhiano Lahataꞌala.

³ Sadhia feꞌulaiꞌomu Yesus potaamino kakadee-dee nopowise bhe mie kodhosa mewangie, keana nondidiki lalomiu maka nobhotu posahunaꞌaomiu.

⁴ Kapaꞌamo weo poewangiꞌamiu bhe dhosa, ingka miinaꞌo namotuhua heamiua.

⁵ Molimpuꞌaanemoomu gahaꞌa katangahino Lahataꞌala kumonakoomu anaꞌino? Ingka bhoasaono peda aini, “Anaku! Koe pisakiomu katangahi bhe kahukumuno Ompu, koise nobhotu kaposahunaꞌaomiu ane nofoꞌalakoomu.

⁶ Kapaꞌamo Ompu notangahi bhe nohukumu mie nemoasiꞌaono, kotika nekonano anaꞌino nopepekida.”

⁷ Potaamiomu weo kasabhamiu, tahimaeꞌomu peda katangahi bhe kahukumuno Amamiu, kapaꞌamo Lahataꞌala ingka nokonakoomu anaꞌino. Bhahaa nandoo seemie anaꞌi tapa sepaliꞌa netangahi bhe nehukumuno amanoa?

⁸ Ane hintimiu paise meꞌawaomu katangahi bhe kahukumu nada kosasawindo anaꞌino sigaoꞌano, nokomaꞌana hintimiu itu suano anaꞌi mpuu tamaka anaꞌi pata sumaha.

⁹ Kosasawintoomu bhe amantoomu we dhunia ini maka andoa dotangahi bhe dohukumu kaita, katifosibhalaꞌandomo. Sanginomo amantoomu we dhunia ini pedamo anaꞌa, bhemo toha Amantoomu te surugaa, ingka teteweimo nasedhuluꞌa dua damotuhu wutontoomu ne Anoa so dadumadiꞌao.

¹⁰ Kamungkulanto we dhunia ini dofotangahi bhe dofohukumu sebantaha kaowu, tadoangkafimo metaaꞌano weo fekihindo. Tamaka Lahataꞌala nofotangahi bhe nofohukumu so kaetaaꞌantoomu, neanomo daongkiloomu nada Anoa.

¹¹ Daanumo sabhaha katangahi bhe kahukumu, wakutuuno dofondawue miina naeowa kaꞌia tamaka neowa kaguguhu. Ampamo kaowu pada anaꞌa, so mie metandaino kafoinaꞌu, kahukumu amaitu nokohasiliꞌao kabanara bhe katohopono dadi.

¹² Dadiꞌanomo fekatangkae limamu monaleno, fekalaa tuumu mehengku-hengkuno itu.

¹³ Fekalaaꞌe kaangkaꞌano aꞌemu, neanomo aꞌemu mokempano itu paise natokulepea.

¹⁴ Uleiꞌe lalomiu dadi pometaa bhe kosasawindo mie bhaimiu, uleiꞌe dua lalomiu dumadi mongkilo so Ompu, kapaꞌamo miina bhe manusia so mohano Ompu ane pae nadumadi mongkilo.

¹⁵ Dhaganieꞌomu koise bhe mekapingkano maiꞌao ne rahamatino Lahataꞌala, koise dua bhe so membalino peda kantisa mopaꞌi kohasu ne olotamiu itu, kapaꞌamo hasuno naeowa kasabha bhe naedai-dai mie bhahi.

¹⁶ Dhaganieꞌomu koe sampe bhe dumadi pokawite-witeno tawa tapa mefadhulino dadi lumebe peda Esau. Ingka anoa noaso hakuno titiisa so kaowu neꞌawaꞌao oti sepihi.

¹⁷ Ingka pandeꞌaaneomu, pada anaꞌa Esau gaono sumuli natumahima kabarakatino tamaka ⸤ amano⸥ miina naꞌumundaa. Kapaꞌamo mahingga nopotuhu bhe luuno neꞌondofi kasalawa namekataaꞌi kaꞌalano maitu, miinamo bhe dhalanoa.

Poꞌalano podhandiꞌa buꞌou bhe podhandiꞌa ngkodau 12:18-29

¹⁸ Hintimiu miina ⸤ peda miendo Israel endefiꞌini. Andoa⸥ domaꞌoti tikadampaꞌano, ⸤ o kabhawono Sinai⸥ bhe efino ngkalai-laino, dewiseki kahohondo bhe doloma mposo bhe kawea mongkolo.

¹⁹ Andoa dofetingke peda ndiino duhulele bhalano bhe suaha mobhibhiisano. Wakutuuno dofetingke suaha aitu miendo Israel lasao desalo paemo namendua namugau ne andoa.

²⁰ Kapaꞌamo miina damondoiꞌe dofetingke pahinta nefosampeno suaha anaꞌa. Ambano, “Kotika dumingkuno kabhawo aini, mahingga o kadadi, tetewei dabhatumbuliane kontu ampa namate.”

²¹ Newohando miendo Israel maitu nobhibhiisa bhe notimoteꞌi sepaliꞌa sampe anabii Musa nopugau ambano, “Nogugu kanau kaꞌosano kateꞌiku!”

²² Tamaka nopoꞌala bhe hintimiu. Hintimiu hatoomu ne kabhawono Sion, ne kotano Lahataꞌala dumadino, kotano Yerusalem te surugaa, ne kantawundo malaꞌekati ntini hewu-hewuno.

²³ Hintimiu mai meangkafiomu hompuꞌa mohame, hompuꞌando umati sanea anaꞌi titiisano Lahataꞌala, toka tibuhino nea te surugaa. Hintimiu mai fewiseomu ne Lahataꞌala, bhitahakino kosasawindo manusia. Hintimiu powiseomu bhe rohindo mie banara toka mosangkano dadi.

²⁴ Hintimiu mai fewiseomu ne Yesus, Poatoꞌaono podhandiꞌa buꞌou; heano podhandiꞌa buꞌou ini ⸤ neowa katiꞌamponiꞌano dhosa⸥ , noliuꞌe fahalaano bhe tuhuno heano Habel ⸤ mesonsono kabhoosi⸥ .

²⁵ Dadiꞌanomo posiꞌondoomu, koe sampe mokiido metingkeomu kobhoasaono itu. Ane mie tapa metingkeno meowano bhihitano Lahataꞌala ne dhunia, miina damooli dalumapaa ne kahukumu, bhemo toha intaodiomu metingkeno kobhoasaono maiꞌaono te surugaa. Ane dokiido dametingkeeꞌomu, ingka tetewei paise dalumapaomu ne kahukumu.

²⁶ Endefiꞌini suahano nofogugu dhunia, tamaka ampa aitu nopodhandi, “Tana sepaku amogugue, suano kaowu taꞌo dhunia tamaka bhe lani dua.”

²⁷ Wamba “tana sepaku” maitu ingka nokomaꞌana putae sabhaha nefokonandoo tifoguguno damosalie, neanomo tapa tifoguguno somo meateꞌano.

²⁸ Kanandooꞌanomo naetaa daefoampe katumpuno lalo ne Lahataꞌala, hampano detahimaomu kafopahintaꞌa tapa tifoguguno. Naetaa natumumpu lalontoomu bhe dasumombaomu weo kamihi bhe kafosibhala ne Lahataꞌala, naposahataa bhe kapoindalono Wutono.

²⁹ Kapaꞌamo Lahataꞌalantoomu tapedamo hendeno efi fohampunino.