Ibrani 11 - Muna Southern Dialect

Sandahano sabhaha mie motangkano kaparasaea 11:1-40

¹ Doparasaea maꞌanano nokampuu-mpuu totono lalo dofintahaki putae neposahunaꞌao tetewei nakoꞌula, maꞌanano dua dopandeꞌaane mpuu giu pata tiwohaꞌano kotu-kotuꞌu nonandoo.

² Hampano kaparasaeando, mie dhamani wawono nosambili metaada ⸤ Lahataꞌala⸥ .

³ Hampano kaparasaea dopandeꞌaaneomu putae alamu bhalano ini nofokonandooꞌe bhoasaono Lahataꞌala; dadiꞌanomo newohantoomu aitu nonandoo maiꞌao ne pata tiwohaꞌano.

⁴ Hampano kaparasaeano, Habel nefoampe kapopanga metaa, noliuꞌe kapopangano Kain. Hampano kaparasaeano maitu Habel nosambili metaaꞌe Lahataꞌala peda seemie banara, mbaꞌinomo kapopangano maitu noꞌiaꞌane Lahataꞌala. Habel nomatemo, tamaka hampano kaparasaeano maitu, ampa aitu kao-kaomo nandoo sadhia nopugau.

⁵ Hampano kaparasaeano, Henok notisangke sampe miina naenamisi mate. Bhe naseemie miina bhe poꞌawaane hampano padamo nosangkee Lahataꞌala. Notibuhi weo Kitabi, miinaꞌo natisangke, Henok seemie mekaꞌiano lalono Lahataꞌala.

⁶ Ane pae bhe kaparasaea, manusia pae bhe kapoolia namekaꞌia lalono Lahataꞌala. Kapaꞌamo laꞌae maꞌotino Lahataꞌala tabeano noparasaea mpuu nandoo bhe Lahataꞌala, bhe noparasaea dua Lahataꞌala nefontaa-ntaa ponambo so mie umondofie.

⁷ Hampano kaparasaeano, Nuh nofodhagae Lahataꞌala so kumadhadhiaꞌano te wise, tapaꞌo newohano. Nuh neangka ne Lahataꞌala sampe nefotoka bhangka bhalano, mbalimo mosalamatie bhe koseꞌonu polambuno. Noangka ne kaparasaeano naꞌa dhunia dohukumue, tamaka wutono Nuh notahimae Lahataꞌala peda seemie banara hampano kaparasaeano.

⁸ Hampano kaparasaeano, Abraham neangka ne pahintano Lahataꞌala wakutuuno nobhasie bhe notudue nakumala we wite nedhandiꞌaono Lahataꞌala somo kahunsaꞌao so siwuluno. Abraham tanokalamo mahingga miina namandeꞌaanea nahumope ne amai.

⁹ Hampano kaparasaeano, Abraham neate peda mie humato we koliwuno, ne wite nedhandiꞌaono Lahataꞌala naꞌa. Ne itu neate weo tenda. Pedamo dua aitu Ishak bhe Yakub, sanea metahimano dhandi sehondano naꞌa maiꞌao ne Lahataꞌala.

¹⁰ Kapaꞌamo Abraham neanta-antagi naeate ne seꞌonu kota kosandi motangkano, kota anaꞌa noꞌide-idee bhe nofoehee wutono Lahataꞌala.

¹¹ Hampano kaparasaeano, Abraham neꞌawa kaꞌosa nokosampuꞌa maiꞌao ne Sara, mahinggamo umuhuno nakoana noliumo. Abraham noparasaea mpuu Lahataꞌala tetewei namekakoꞌula dhandino.

¹² Mahinggamo wakutuu anaꞌa Abraham kanggetu nomatemo mbadhano, tamaka nomaiꞌao ne seemieno maitu nobhahimo sampuꞌano, miina natilentua, kabhahindo pedamo kulipopo te lani bhe bhone we wiwino teꞌi.

¹³ Kosasawindo mie saꞌituini sanea dokokaparasaea sampe mate. Andoa miina daetahima sabhaha nedhandiꞌaono Lahataꞌala, tamaka kao-kaomo tadowoha we kodoꞌoꞌano o ae so neꞌawando mada kaowu maka doꞌiaꞌane. Pedamo aitu domangaku dembali mie humato bhe humampe we dhunia ini.

¹⁴ Kapaꞌamo mie mangakuno peda naꞌa ingka nentaleamo notiwoha putae nandoo deꞌondofi wite buꞌou so kapoliwuꞌando sakotuꞌuno.

¹⁵ Tantumo suanomo liwu kahunsaꞌando maitu nefeki-fekihindo, kapaꞌamo ane nada naꞌa ingka nobhahimo kasalawando dasumuli we liwu anaꞌa.

¹⁶ Tamaka ingka nentalea andoa nokamba lalondo ne liwu sedhuluꞌano kataa, maꞌanano o liwu te surugaa. Kanandooꞌanomo Lahataꞌala miina naoambanoa dokonae Lahataꞌalando, kapaꞌamo padamo nefontaa-ntaaꞌanda seꞌonu kota.

¹⁷ Hampano kaparasaeano dua, Abraham nofoampe Ishak mbali kapopanga wakutuuno noꞌudhie Lahataꞌala. Abraham notahimaemo dhandino Lahataꞌala tamaka nohelasi dua nofoampe anano kaenseemie naꞌa mbali kapopanga nesumbele.

¹⁸ Lahataꞌala padamo nokobhoasao ne Abraham, “Sampuꞌanomo Ishak ini so nekonando sampuꞌamu.”

¹⁹ Abraham nofekihi lalono putae Lahataꞌala nokokuasa naefodadi mie mate, maka daanumo Ishak suli notahimae, kao-kaomo nomaiꞌao ne mate.

²⁰ Hampano kaparasaeano, Ishak nobarakatimo Yakub bhe Esau bhe nosambilianda kabarakati so neꞌawando te oleo mbuhumai.

²¹ Hampano kaparasaeano, wakutuuno nomaꞌomo namate, Yakub nobarakati anaꞌino Yusuf hoduano, poowa nosambahea nofintaha ne katukono.

²² Hampano kaparasaeano, nomaꞌo nahumunsa dhunia ini, Yusuf nopugauꞌaomo so kalimbaꞌando miendo Israel ⸤ maiꞌao we witeno Mesir⸥ bhe noowilianda so nehabundo ne bukuꞌino.

²³ Hampano kaparasaeando, pakalenteno Musa dofebunie kamungkulano tolu wula kaomponano, hampano dowoha anando nokesa sepaliꞌa maka miina daoteꞌia doewangi pahintano omputo.

²⁴ Hampano kaparasaeano, Musa hato nobhala nokiido dakumonae awuano omputo Firaun.

²⁵ Anoa nopoindalo nokadee-dee poowa bhe umatino Lahataꞌala, bhe nasekabantaha naetaa namisino nadumadi weo dhosa.

²⁶ Weo fekihino Musa, kafekaꞌaebu neꞌawano hampano kaparasaeano ne Mesias Omputo Fosalamatino, noliuꞌe kakoharagaano bhe kosasawiꞌae arataano witeno Mesir, hampano nofeki-fekihi ponambo te oleo mbuhumai.

²⁷ Hampano kaparasaeano, Musa nohunsa witeno Mesir, miina naoteꞌia ne amahano omputo. Musa notangka mpuu nofintahaki patudhuno, kao-kaomo nowoha Lahataꞌala tapa tiwohaꞌano.

²⁸ Hampano kaparasaeano, Musa nofotudu dahumohaeaꞌao Paska maka nopahintangi miendo Israel daekambesi hea ⸤ ne tuuhano fointondo⸥ , neanomo Malaꞌekati Fobinasano paise namongko anando titiisa.

²⁹ Hampano kaparasaeando, miendo Israel dopolimba ne Teꞌi Modea tapedamo dekala-kala te kakeleꞌa, tamaka miendo Mesir domate notoloda oeno teꞌi wakutuu dofesoba doangkafida.

³⁰ Hampano kaparasaeando miendo Israel, pada dokalibue fitu oleo kaomponano, bente bhalano kotano Yeriko nowolo nosansa.

³¹ Hampano kaparasaeano, Rahab, seemie karambole, miina nabinasa napoowa-owa bhe mie pata meangkano ne Lahataꞌala, mbaꞌinomo notahima metaada mata-mata miendo Israel.

³² O ae toha bhahaa so nesambiliku? Kapaꞌamo pae bhe wakutuua ane atumula-tulaanda ndo Gideon, Barak, Simson, Yefta, Daud, Samuel, bhe ana-anabii.

³³ Hampano kaparasaeando andoa detalo liwu neowando omputo, dedhalangi kaꞌadhili, dotahima nedhandiꞌaono Lahataꞌala, deꞌopi wobhano singa,

³⁴ depeoni hendeno efi mobhibhiisa. Andoa dolapa ne matano kampue, kanalendo nembali kaꞌosando, andoa doꞌosa weo popahisaꞌa sampe dotalo tagu-taguando tantarando koliwuno.

³⁵ O hobhineꞌi suli doꞌawa mie nemoasiꞌaondo toka mateno, hampano suli dodadi. Nandoo dua nesikisaa ampa domate, dokiido damobebasida hampano gaondo suli dadumadi ne dadi sedhuluꞌano kataa.

³⁶ Nandoo dua doele-eleda, dohambisianda habuta, dokatapuanda hante maka dofopesuada weo katohongku.

³⁷ Andoa dobhatumbulianda kontu ampa domate, sigaꞌa dopokebhaanda kahakadhi bhe dopongkoanda kampue. Andoa dolili tadepakemo kulino dhumba tawa kulino membe mbali pakeando, dokae, dofodee-deeda bhe dosikisaada.

³⁸ Dhunia ini miinamo namantasia so kaeateꞌando. Andoa tadolilimo we pandaso bhalano bhe te tombuno kabhawo, tadeatemo weo lia bhe ne losono kontu.

³⁹ Kosasawindo ini nosambili metaada Lahataꞌala hampano kaparasaeando, gahaꞌaitumo miinaꞌo datumahima nedhandiꞌaono Lahataꞌala.

⁴⁰ Kapaꞌamo Lahataꞌala nandoo bhe patudhuno sedhuluꞌano dua kataa so intaodiomu. Patudhuno Lahataꞌala andoa maitu kaneꞌo daeꞌawa kasangkano dadi dapoowa-owa bhe intaodiomu.